បុរសពីរនាក់ត្រូវចាប់ខ្លួនពីបទរំលោភក្មេងស្រីមិនទាន់គ្រប់អាយុនៅមណ្ឌលគិរី
2009.12.20
អនុប្រធានប៉ូលិសការិយាល័យប្រឆាំងការជួញដូរនិងការពារអនីតិជននៃស្នងការដ្ឋានប៉ូលិសខេត្ត លោក សុវណ្ណា រ៉ា មានប្រសាសន៍ថា នេះគឺជាលើកទីមួយហើយក្នុងឆ្នាំ២០០៩ ដែលសមត្ថកិច្ចប៉ូលិសរកឃើញករណីរំលោភក្មេងស្រីក្រោមអាយុ១៨ឆ្នាំ រហូតពីរករណីក្នុងរយៈពេលតែមួយសប្តាហ៍ប៉ុណ្ណោះ។
លោក សុវណ្ណា រ៉ា ឲ្យដឹងដូច្នេះ ៖ «អត់ដែលមានទេ ទើបចុងខែដាច់ឆ្នាំមានតែម្ដង។ អាហ្នឹងទាក់ទងនឹងភាពក្រីក្រ...»។
ជនជាប់ចោទទាំងពីរមានឈ្មោះ គង់ យ៉ុង អាយុ២៦ឆ្នាំ រស់នៅភូមិពូតាង សង្កាត់រមនា ក្រុងសែនមនោរម្យ ចាប់ខ្លួនពីថ្ងៃទី១៦ ខែធ្នូ ឆ្នាំ២០០៩ ក្នុងបទចោទប្រកាន់រំលោភក្មេងអាយុ១៥ឆ្នាំ កំណើតជនជាតិដើមព្នង និងឈ្មោះ ហ៊ឹម ស្លែស អាយុ៤៤ឆ្នាំ ជាប់ចោទរំលោភក្មួយស្រីអាយុ៩ឆ្នាំ ជនជាតិចាម នៅភូមិមេប៉ៃ ឃុំពូជ្រី ស្រុកកែវសីមា ចាប់ខ្លួននៅថ្ងៃទី១៨ ខែធ្នូ ឆ្នាំ២០០៩។
មន្ត្រីផ្នែកអង្កេតសមាគមអាដហុក ប្រចាំខេត្តមណ្ឌលគិរី លោក ឆាយ ធី មានប្រសាសន៍ថា នេះជាករណីទាក់ទិនក្នុងបទឧក្រិដ្ឋ ហើយតាមការអង្កេតរបស់លោករកឃើញថា ករណីចោទប្រកាន់ចាប់រំលោភទាក់ទិនក្មេងស្រីអាយុ១៥ឆ្នាំ ជនជាតិភាគតិចព្នងនោះ ក្រុមសហគមន៍ជនជាតិដើមចាត់ទុកករណីនេះថា ជាការបំពានទៅលើប្រពៃណី ហើយក្រុមចាស់ទុំ ឬមេកន្ទ្រាញ បានកាត់ក្តីតាមរយៈអាជ្ញាធរប្រពៃណីឲ្យធ្វើការផាកពិន័យ ឬសែនព្រេនដើម្បីបញ្ចប់បញ្ហាទៅវិញ។ លោកថា ដោយសារសង្គមស៊ីវិលផ្តល់របាយការណ៍មកប៉ូលិសជំនាញពីករណីនេះទើបនាំឲ្យមានការចាប់ឃាត់ខ្លួនជនជាប់ចោទនោះ។
លោក ឆាយ ធី មានប្រសាសន៍ដូច្នេះ ៖ «ធ្វើការដោះស្រាយសម្របសម្រួលរបៀបនេះផ្ទុយនឹងច្បាប់រដ្ឋ។ យើងឃើញថា បទល្មើសនេះធ្ងន់ធ្ងរណាស់»។
មេឃុំសែនមនោរម្យ លោក ភី ងូក មានប្រសាសន៍ទទួលស្គាល់ថា អ្នកភូមិភាគច្រើនមិនបានរាយការណ៍ពីហេតុការណ៍ដែលកើតមានក្នុងសហគមន៍ពួកគេមកអាជ្ញាធរមូលដ្ឋានដើម្បីចាត់វិធានការតាមផ្ឡូវច្បាប់នោះទេ ដោយសារតែពួកគាត់មិនបានយល់ដឹងពីច្បាប់ ហើយនិយមធ្វើការដោះស្រាយបញ្ហាតាមទម្លាប់និងប្រពៃណីរបស់ពួកគេតែប៉ុណ្ណោះ។ លោកថា ទាំងអស់នោះគឺជាប្រការខុសច្បាប់។
លោក ភី ងូក មានប្រសាសន៍ថា ៖ «ជាលក្ខណៈមួយតាមភូមិហ្នឹង ចាស់ៗគាត់សម្របសម្រួលទៅ ដល់អ៊ីចឹងគេមិនអាចប្ដឹងផ្ដល់មកដល់យើង អ៊ីចឹងយើងក៏ពិបាកបង្ខំឲ្យគេមកធ្វើការជាមួយយើងដែរ»។
មន្ត្រីប៉ូលិសខាងលើឲ្យដឹងដែរថា ជនជាប់ចោទឈ្មោះ គង់ យ៉ុង ត្រូវបានតុលាការចេញដីកាឃុំខ្លួននៅពន្ធនាគារខេត្ត ហើយចំណែកជនជាប់ចោទឈ្មោះ ហ៊ឹម ស្លែស កំពុងឃុំខ្លួននៅស្នងការដ្ឋានប៉ូលិសខេត្តដើម្បីកសាងសំណុំរឿងទៅតុលាការ។
របាយការណ៍របស់ប៉ូលិសការិយាល័យប្រឆាំងការជួញដូរនិងការពារអនីតិជនឲ្យដឹងថា ច្រើនឆ្នាំកន្លងទៅនេះ អំពើឧក្រិដ្ឋចាប់រំលោភសេពសន្ថវៈទៅលើនារីនិងកុមារមិនធ្លាប់កើតមាននៅក្នុងខេត្តដាច់ស្រយាលមួយនេះទេ ហើយការរកឃើញករណីរំលោភថ្មីនេះ គឺជាសញ្ញាបង្ហាញឲ្យឃើញនូវការកើតមានបទឧក្រិដ្ឋរំលោភសិទ្ធិកុមារគួរឲ្យព្រួយបារម្ភ៕
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
ព័ត៌មានថ្មីៗ
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា