មន្ត្រីប៉ូលិសនៃស្នងការនគរបាលខេត្តសៀមរាប បានឲ្យដឹងថា ស្រ្តី ៣នាក់ដែលជាមេគ្រួសារ និងសមាជិកគ្រួសារមួយរស់នៅភូមិវត្តស្វាយ ក្នុងទីរួមខេត្តសៀមរាប ត្រូវជនមិនស្គាល់មុខចូលសម្លាប់ទាំងអស់នៅក្នុងផ្ទះកាលពីរំលងអធ្រាត្រថ្ងៃទី១០ ខែមករា ឆ្នាំ២០១១។
ស្ត្រីរងគ្រោះទាំង ៣នាក់នោះត្រូវបានគេស្គាល់ថា ទី១ ឈ្មោះ អេង លី អាយុ ៨០ឆ្នាំ ឈ្មោះ អេង មួយហ្គិច អាយុ ៥៨ឆ្នាំ និងម្នាក់ទៀតឈ្មោះ អោក ស្រីនាង អាយុ ២០ឆ្នាំ ដែលជាប្រជាពលរដ្ឋមានមុខរបរលក់អីវ៉ាន់ចាប់ហួយកំប៉ិកកំប៉ុកនៅផ្ទះជាប្រចាំថ្ងៃ។
លោកវរសេនីយ៍ត្រី ប៉ាត់ ចាន់សុខ អនុប្រធានការិយាល័យនគរបាលបច្ចេកទេស និងវិទ្យាសាស្រ្ត របស់ស្នងការនគរបាលខេត្តសៀមរាប ដែលបានធ្វើកោសល្យវិច័យលើសាកសពបានមានប្រសាសន៍កាលពីព្រឹកថ្ងៃច័ន្ទ ទី១០ ខែមករាថា សាកសពស្ត្រីរងគ្រោះទាំង៣ ត្រូវឃាតកអារកសម្លាប់ ដែលស្ត្រីក្មេងម្នាក់ក្នុងចំណោមនោះត្រូវគេរំលោភផ្លូវភេទផងដែរ។
មន្ត្រីប៉ូលិសដដែលបានមានប្រសាសន៍ថា តាមការពិនិត្យសាកសពឲ្យដឹងថា ជនរងគ្រោះអាចត្រូវក្រុមឃាតកចូលសម្លាប់នៅក្នុងផ្ទះ ប្រហែលជាអំឡុងម៉ោង៣ រំលងអធ្រាត្រ ៖ «កាំបិតហាន់បន្លែយើងហ្នឹង អាកាំបិតស វាអារកទាំងបី ហើយនារីរំលោភហ្នុង គឺអារកជិតដាច់ជាមួយនឹងយាយមួយ ហើយម្នាក់ទៀតស្រីនោះ គឺអារកចំហៀងខាងឆ្វេង តិចជាងគេ។ សម្ភារៈយើងអត់ទាន់ដឹងថា បាត់ស្អីទេ ប៉ុន្តែវារើទូររើអីរាយប៉ាយពេញហ្នឹង ប៉ុន្តែសម្ភារៈវាអត់ឃើញស្អីដែលនៅសល់សំខាន់។ យើងកំពុងតែស្រាវជ្រាវ»។
សាច់ញាតិរបស់ជនរងគ្រោះបានអះអាងថា អ្នកដែលស្លាប់ទាំងនោះពុំធ្លាប់មានទំនាស់ជាមួយអ្នកជិតខាងណាម្នាក់ទេ។
លោក ផេង ទូច ត្រូវជាកូនរបស់ស្ត្រីអាយុ ៨០ឆ្នាំ ដែលត្រូវគេសម្លាប់នោះបានមានប្រសាសន៍ថា គាត់បានរៀបការហើយបែកផ្ទះទៅនៅឆ្ងាយពីម្ដាយ ប៉ុន្តែគាត់តែងតែទៅលេងផ្ទះម្តាយជារៀងរាល់ថ្ងៃ ហើយគ្រួសាររបស់ម្ដាយគាត់ពុំដែលមានទំនាស់ជាមួយអ្នកជិតខាងណាមួយឡើយ។ ប៉ុន្តែចំពោះក្មួយស្រីអាយុ ២០ឆ្នាំដែលស្លាប់ដែរនោះ មានប្រុសៗចោមរោមលែបខាយពាក្យសម្ដីក្នុងផ្លូវស្នេហាជាច្រើន ហើយលោកក៏បានដឹងថា ក្មួយស្រីនោះឧស្សាហ៍និយាយទូរស័ព្ទឆ្លើយឆ្លងគ្នាជាមួយប្រុសម្នាក់ជាញយៗ តែក្រុមគ្រួសារមិនធ្លាប់ស្គាល់មុខប្រុសម្នាក់នោះទេ។
លោក ផេង ទូច បន្ថែមថា ៖ «ខ្ញុំចេញចូលរាល់ថ្ងៃ គាត់អត់ដែលមានទំនាស់មានអ្វីជាមួយនរណាទេ។ ក្មេងស្រីនោះវាមានតែតាមទូរស័ព្ទនោះ ខ្ញុំមិនដែលឃើញមុខឃើញមាត់មនុស្សប្រុសនោះផង។និយាយទូរស័ព្ទយប់ៗម៉ោង១២ ខ្លះណាម៉ោង ១ ទាក់ទងរឿងស្អីៗវានិយាយឡើង ២-៣ម៉ោង ៤-៥ម៉ោងនោះណា»។
លោក ពេជ្រ សាម៉ោល ប្រធានប៉ុស្តិ៍នគរបាលសង្កាត់សាលាកំរើក បានមានប្រសាសន៍ថា គ្រួសារជនរងគ្រោះនោះមានទីកំណើតឯខេត្តកំពង់ចាម ហើយបានមករស់នៅខេត្តសៀមរាប ចំនួន ១៥ឆ្នាំហើយ មិនដែលមានទំនាស់ជាមួយអ្នកភូមិណាម្នាក់ទេ។ ប៉ុន្តែគេដឹងថា ដោយសារគ្រួសារនោះមានរបរលក់ចាប់ហួយ បារី និងស្រា ព្រមទាំងមានចៅស្រីម្នាក់ គឺឧស្សាហ៍មានកំលោះៗទៅចោមរោមប្រើពាក្យលែបខាយស្នេហា ហើយកំលោះៗទាំងនោះតែងទទួលបានការស្ដីបន្ទោសពីសមាជិកក្រុមគ្រួសារនោះ។
ប៉ូលិសផ្នែកព្រហ្មទណ្ឌបានធ្វើការសន្និដ្ឋានជាជំហានដំបូងថា ក្រុមឃាតកដែលចូលសម្លាប់សមាជិកគ្រួសារនោះ អាចមានគ្នាយ៉ាងហោចណាស់ក៏ ៣នាក់ឡើងទៅ។ ចំណែកមូលហេតុនៃការសម្លាប់ត្រូវបានសន្និដ្ឋានជាជំហានដំបូងថា អាចជាអំពើប្លន់ ពីព្រោះមុនពេលចាកចេញ ក្រុមឃាតកបានរុះរើសម្ភារៈមួយចំនួនរបស់ជនរងគ្រោះ។ ប៉ុន្តែទោះយ៉ាងណា មន្ត្រីប៉ូលិសបានឲ្យដឹងថា គេកំពុងស្រាវជ្រាវ និងតាមរកពន្លឺអំពើឃាតកម្មនោះ ដើម្បីចាប់ខ្លួនជនដៃដល់ក្នុងការសម្លាប់មកផ្ដន្ទាទោសតាមច្បាប់៕