របបភ្នំពេញអនុញ្ញាតឱ្យក្រុមហ៊ុនចិនមួយសង់​បរិវេណ​ហោះហើរ​​វាល​យន្តហោះ​សៀមរាប

ដោយ មាន ឫទ្ធិ
2019-07-12
អ៊ីម៉ែល
មតិ
Share
បោះពុម្ព
គំនូរ​ប្លង់​ប្រលានយន្តហោះ​អន្តរជាតិ​ខេត្ត​សៀមរាប​ថ្មី។
គំនូរ​ប្លង់​ប្រលានយន្តហោះ​អន្តរជាតិ​ខេត្ត​សៀមរាប​ថ្មី។
រូបភាពពី sasac.gov.cn​|China Daily

របប​ក្រុង​ភ្នំពេញ​បាន​អនុញ្ញាតឲ្យ​ក្រុមហ៊ុន​ចិន​ឈ្មោះ​ Shanxi Mechanization Construction Groupសង់​​បរិវេណ​​ហោះហើរ​​នៅ​វាល​យន្តហោះ​អន្តរជាតិ​​ថ្មី​​នៅ​​ខេត្ត​​សៀមរាប​។ ​ការ​អនុញ្ញាត​នេះ​ ​គឺ​បន្ទាប់ពី​ក្រុមហ៊ុន​ចិន​មួយ​នេះ​ ​ទើប​តែ​បាន​ឈ្នះ​ការដេញថ្លៃ​ដើម្បី​ទទួល​​សង់​បរិវេណ​ហោះហើរ​នៃ​ព្រលានយន្តហោះ​ថ្មី​នេះ​ ​ក្នុង​ទឹកប្រាក់​ ២៩០លាន​យ័ន​ ស្មើនឹង​ជាង​ ៤២លាន​ដុល្លារ​អាមេរិក​។ ​

នេះ​បើ​យោង​តាម​ការផ្សាយ​របស់​សារព័ត៌មាន​ចិន​ China Dailyកាលពី​ថ្ងៃ​ទី៨ ​កក្កដា​។ ​សារព័ត៌មាន​​នេះ​​​ឲ្យ​ដឹង​​ថា​ ​វាល​យន្តហោះ​​ថ្មី​​នេះ​ ​មាន​​ចម្ងាយ​ ៥១គីឡូ​ម៉ែត្រ​ពី​ទីប្រជុំជន​ខេត្ត​សៀមរាប​ និង ៤០គីឡូម៉ែត្រ​​ពី​តំបន់​រមណីយដ្ឋាន​អង្គរ​។ ​វាល​យន្តហោះ​នេះ​ ​នឹង​ត្រូវ​សាងសង់​លើ​ផ្ទៃដី​សរុប ៧០០ហិកតារ​ ​ក្រោម​ទឹក​ប្រាក់​សរុប​ជិត​ ១ពាន់​​លាន​​ដុល្លារ​។​

​អាស៊ី​សេរី​នៅ​មិន​ទាន់​អាច​សុំ​ការបញ្ជាក់​ពី​មន្ត្រី​របប​ក្រុង​ភ្នំពេញ​ ​និង​មន្ត្រី​អាកាសចរណ៍​ស៊ីវិល ​អំពី​​តម្លាភាព​​នៃ​​ការ​ដេញ​ថ្លៃ​​ការ​សាងសង់​​បរិវេណ​​​វាល​យន្តហោះ​ថ្មី​នេះ​បាន​នៅឡើយ​ទេ​។ ​ក៏ប៉ុន្តែ​ ​កន្លង​មក​ របប​នេះ​តែង​រក្សា​ការសម្ងាត់​ និង​កម្រ​បង្ហាញ​តម្លាភាព​ជុំវិញ​ការដេញថ្លៃ​លើ​គម្រោង​សាងសង់​ហេដ្ឋារចនាសម្ព័ន្ធ​ធំ​ៗ​ នោះ​ទេ​។​

ក្រុមហ៊ុន​ចិន​ ​តែង​ឈ្នះ​ការដេញថ្លៃ​រាល់​គម្រោង​សំខាន់​ៗ​ ទាំងនោះ​ ​ដែល​ជា​ផ្នែក​មួយ​នៃ​គម្រោង​ការប្រចាំ​សតវត្ស «​គំនិត​ផ្តួចផ្តើម​ ​ខ្សែក្រវ៉ាត់​ និង​ផ្លូវ​»របស់​មហា​យក្ស​ចិន​។ ​ក្នុង​នោះ​ ​រួម​មាន​គម្រោង​សាងសង់​វាល​យន្ត​ហោះ​ភ្នំពេញ​ថ្មី​នៅ​ខេត្ត​កណ្តាល​ក្នុង​ទឹកប្រាក់​ជាង​ ១ពាន់ ៥រយ​​លាន​​ដុល្លារ​​អាមេរិក​ វាល​យន្តហោះ​កោះ​កុង ​ក្នុង​តម្លៃ​ជាង​ ៣៥០លាន​​ដុល្លារ​​អាមេរិក​​ជាដើម​។

​ក្រុម​អ្នកជំនាញ​កិច្ចការ​បរទេស​ធ្លាប់​ព្រមាន​​ថា​ ​ចិន​អាច​បម្លែង​វាលយន្ត​ខេត្ត​កោះកុង ​ឲ្យ​បម្រើ​វិស័យ​យោធា​របស់​ខ្លួន​នា​ពេល​អនាគត​។ ​ក៏ប៉ុន្តែ​ ​ក្រុង​ភ្នំពេញ​តែង​បដិសេធ​ព័ត៌មាន​ទាំងនេះ​ ​និង​ថា​ ​ផ្អែក​តាម​រដ្ឋធម្មនុញ្ញ​ ​កម្ពុជា​ ​មិន​អនុញ្ញាតឲ្យ​មាន​មូលដ្ឋាន​យោធា​បរទេស​នោះឡើយ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល