រុស្ស៊ី​ព្រម​លុប​ចោល​បំណុល​៧០%​ដែល​កម្ពុជា​ជំពាក់​ពី​អតីតកាល

ប្រទេស​រុស្ស៊ី​បាន​យល់ព្រម​លុប​ចោល​៧០%​នៃ​បំណុល​ដែល​កម្ពុជា​ជំពាក់​ពី​អតីតកាល។

លោក ជាម យៀប ប្រធាន​គណៈកម្មការ​ហិរញ្ញវត្ថុ​សភា​នៅ​ថ្ងៃ​អង្គារ​នេះ​ត្រូវ​ទីភ្នាក់ងារ​ព័ត៌មាន​ចិន​ស៊ីនហួ ដក​ស្រង់​ប្រសាសន៍​ដែល​ថ្លែង​ថា រដ្ឋាភិបាល​កម្ពុជា​ជា​បន្ត​បន្ទាប់​មក​បាន​ខ្ចី​ប្រាក់​ពី​ប្រទេស​រុស្ស៊ី​អស់​ប្រមាណ​ជា​១​៥០០​លាន​ដុល្លារ​អាមេរិក។

ក្នុង​ពេល​ជាមួយ​គ្នា​នេះ​មូលនិធិ​ហិរញ្ញវត្ថុ​អន្តរជាតិ (IMF) ក៏​បាន​សម្រេច​លុប​ចោល​បំណុល​៨២​លាន​ដុល្លារ​ដែល​កម្ពុជា​ជំពាក់​ខ្លួន​ផងដែរ។ ក៏​ប៉ុន្តែ លោក ជាម យៀប បាន​ឲ្យ​ដឹង​ថា ចំពោះ​ស.រ.អា.​វិញ​ដែល​កម្ពុជា​ជំពាក់​ប្រាក់​៣៣៩​លាន​ដុល្លារ​នោះ​គេ​បាន​បដិសេធ​មិន​លុប​ចោល​បំណុល​កម្ពុជា​ផង​នោះ​ទេ៕