អង្គភាពប្រឆាំងអំពើពុករលួយជំរុញឲ្យមន្ត្រីប្រកាសទ្រព្យសម្បត្តិ
2011.03.02
មន្ត្រីនាំពាក្យនៃក្រុមប្រឹក្សាជាតិប្រយុទ្ធប្រឆាំងអំពើពុករលួយបានអះអាងថា អង្គភាពប្រឆាំងអំពើពុករលួយកំពុងតែជំរុញឲ្យមន្ត្រីនៅក្នុងរដ្ឋាភិបាលប្រកាសទ្រព្យសម្បត្តិឲ្យបានមុនកាលបរិច្ឆេទកំណត់ នៅថ្ងៃទី៧ ខែមេសា ឆ្នាំ២០១១ ខាងមុខ។
លោក កែវ រេមី មន្ត្រីនាំពាក្យនៃក្រុមប្រឹក្សាជាតិប្រឆាំងអំពើពុករលួយ បានមានប្រតិកម្មថា អង្គភាពប្រឆាំងអំពើពុករលួយមិនបានពន្យារពេលតម្រូវឲ្យមន្ត្រីរដ្ឋាភិបាលធ្វើការប្រកាសទ្រព្យសម្បត្តិដូចដែលកាសែតបរទេស ឈ្មោះ កាសែត The Cambodia daily ចុះផ្សាយនៅថ្ងៃទី២ មិនា ឆ្នាំ២០១១ នេះទេ ៖ "អ៊ីចឹងគឺឋិតនៅក្នុងកាលវិភាគរបស់យើងដដែល ដូចដែលយើងបានធ្វើវេទិកាអ្នកស្ដាប់វិទ្យុអាស៊ីសេរីកន្លងមកហើយ គឺយើងបានដំណើរការនៃការប្រកាសទ្រព្យសម្បត្តិនៃដំណាក់កាលៗ របស់ក្រសួងនីមួយៗ ទៅតាមសេចក្ដីសម្រេចរបស់អង្គភាពប្រឆាំងអំពើពុករលួយ"។
លោក កែវ រេមី បានលើកឡើងទៀតថា នៅក្នុងដំណើរការប្រកាសទ្រព្យសម្បត្តិរបស់មន្ត្រីបម្រើការងារនៅក្នុងជួររដ្ឋាភិបាលនេះ ក៏មានមន្ត្រីមួយចំនួនដែលមានងារជាឧកញ៉ា បានសុំលាលែងពីតួនាទីនៅក្នុងរដ្ឋាភិបាលផងដែរ។
មន្ត្រីជាន់ខ្ពស់គណបក្សប្រឆាំង និងជាអ្នកតំណាងរាស្ត្រ លោក សុន ឆ័យ បានពន្យល់ថា ការដកខ្លួនចេញពីតួនាទីនៅក្នុងរដ្ឋាភិបាលរបស់ឧកញ៉ាទាំងនោះ ដោយសារតែពួកគេមានការភ័យខ្លាច និងដើម្បីជៀសផុតអំពីការប្រកាសទ្រព្យសម្បត្តិជាដើម ៖ "ទ្រព្យគេមានច្រើនណាស់ចំពោះពួកឧកញ៉ាទាំងនោះ ព្រោះគេមានឥទ្ធិពលទៅលើគណបក្សកាន់អំណាច គេឲ្យសាលាមួយពីរទៅ គេជួយបក្សតិចតួចទៅ គេអត់ត្រូវការបង់ពន្ធ ហើយគេលាក់ទ្រព្យគេ ព្រោះកាលណាថា គណបក្សកាន់អំណាចដឹងថា គេមានទ្រព្យគេហ្នឹង បំណងកេះកៀវយកទ្រព្យគេ ឬក៏ទារគេជួយនេះ ជួយនោះថែម ម៉្លោះហើយគេបារម្ភកាលណាគេប្រកាសទៅ គេដឹងថាគាត់មានប្រាក់ប៉ុន្មាន"។
ការតម្រូវឲ្យប្រកាសទ្រព្យសម្បត្តិនេះ គេបានអនុវត្តតាំងពីដើមខែមករា ឆ្នាំ២០១១ មក ដែលមុខសញ្ញាត្រូវប្រកាសនោះមានចំនួនជាង ១០ម៉ឺននាក់ ដែលត្រូវធ្វើការប្រកាសជាសម្ងាត់បំផុត ផ្ញើមកអង្គភាពប្រឆាំងអំពើពុករលួយ រាប់ទាំងរបាយការណ៍ផ្ទះសម្បែង រថយន្ត និងប្រាក់ចំណូលជាដើម។
ចំពោះអ្នកដែលជាប់កាតព្វកិច្ចប្រកាសទ្រព្យសម្បត្តិនោះ គឺផ្ដោតលើនាយករដ្ឋមន្ត្រី ប្រធានសភាជាតិ ប្រធានព្រឹទ្ធសភា មន្ត្រីរាជការស៊ីវិល នគរបាល យោធា មន្ត្រីតុលាការ តំណាងរាស្ត្រ សមាជិកព្រឹទ្ធសភា រដ្ឋសភា មេដឹកនាំអង្គការសង្គមស៊ីវិល និងទីប្រឹក្សារបស់រដ្ឋាភិបាលជាដើម ដែលបានតែងតាំងដោយព្រះរាជក្រឹត្យ និងអនុក្រឹត្យ ហើយមន្ត្រី និងបុគ្គលិកនៃស្ថាប័នប្រឆាំងអំពើពុករលួយទាំងអស់ ក៏ត្រូវប្រកាសទ្រព្យសម្បត្តិផងដែរ។
លោក កែវ រេមី បានបញ្ជាក់ថា ចំពោះមន្ត្រីណាដែលមិនធ្វើការប្រកាសទ្រព្យសម្បត្តិរបស់ខ្លួនឲ្យបានមុនថ្ងៃទី៧ ខែមេសា ឆ្នាំ២០១១ ខាងមុខនេះទេ អ្នកនោះនឹងត្រូវទទួលការពិន័យទៅតាមច្បាប់ប្រឆាំងអំពើពុករលួយ៕
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
អត្ថបទពេញនិយម
ព័ត៌មានថ្មីៗ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត
- សហមេធាវីប្រតិកម្មរឿងសមត្ថកិច្ចយាមផ្ទះ មិនឲ្យជួបលោក កឹម សុខា គឺជារឿងផ្ទុយពីច្បាប់
- ពិធីមង្គលការរបស់ពលករខ្មែរនៅប្រទេសថៃ
- មេសហជីពកញ្ញា ឈឹម ស៊ីថរ ត្រូវបានជ្រើសរើសឲ្យទទួលពានរង្វាន់របស់រដ្ឋាភិបាលស៊ុយអែត
- តុលាការឧក្រិដ្ឋកម្មអន្តរជាតិចេញដីកាចាប់ខ្លួនប្រធានាធិបតីរុស្ស៊ីពីបទឧក្រិដ្ឋកម្មសង្គ្រាម