បទវិភាគ៖ តើបក្សប្រឆាំងអាចនឹងដាក់បេក្ខភាពថ្មីសម្រាប់អនុប្រធានទី១រដ្ឋសភាដែរឬទេ?
2015.11.05
ពលរដ្ឋតវ៉ាលើកបដាទាមទារឲ្យលោក កឹម សុខា ចុះចេញពីតំណែងអនុប្រធានទី១ រដ្ឋសភា នាមុខរដ្ឋសភា នៅថ្ងៃទី២៦ ខែតុលា ឆ្នាំ២០១៥។
RFA/Rann Samnang
សភាឯកបក្ស បានអនុម័តដកតួនាទី លោក កឹម សុខា ពីអនុប្រធានទី១ រដ្ឋសភា កាលពីថ្ងៃទី៣០ តុលា គឺជាបរិបទនយោបាយថ្មីមួយទៀត បន្ទាប់ពីមានព្រឹត្តិការណ៍ថ្ងៃទី២៦ តុលា គឺការប្រើអំពើហិង្សាលើតំណាងរាស្ត្របក្សប្រឆាំងពីររូប ដែលធ្វើឲ្យសាធារណជននៅទូទាំងពិភពលោកចាប់អារម្មណ៍កាន់តែខ្លាំងថែមទៀតអំពីនយោបាយនៅកម្ពុជា។
ការបោះឆ្នោតដកតួនាទី លោក កឹម សុខា ចេញពីសភានេះ គឺធ្វើឡើងដោយតំណាងរាស្ត្រគណបក្សប្រជាជនកម្ពុជា ទាំង ៦៨រូប ដោយមិនបាត់សំឡេងតំណាងរាស្ត្រណាមួយនោះទេ។ ក៏ប៉ុន្តែ ក្រោយពីការដកតួនាទី លោក កឹម សុខា នេះ ប្រធានរដ្ឋសភា បានផ្ញើលិខិតជូនគណបក្សសង្គ្រោះជាតិ ភ្លាមៗ ដើម្បីស្នើបេក្ខភាពថ្មីជំនួស លោក កឹម សុខា វិញ។ តែសំណើនេះ ត្រូវបានគណបក្សសង្គ្រោះជាតិ បដិសេធ។ គណបក្សសង្គ្រោះជាតិ ក៏បដិសេធភ្លាមដែរថានឹងមិនបញ្ជូនមនុស្សថ្មី ដើម្បីទទួលយកតំណែងអនុប្រធានទី១ រដ្ឋសភាជំនួស លោក កឹម សុខា ទេ។
តើគណបក្សសង្គ្រោះជាតិ អាចនឹងដូរចិត្ត រួចបញ្ជូនបេក្ខភាពទៅទទួលយកតំណែងអនុប្រធានទី១ រដ្ឋសភានេះឬទេ?
ជារឿយៗ ការខ្វែងគំនិតគ្នារវាងគណបក្សសង្គ្រោះជាតិ និងគណបក្សប្រជាជនកម្ពុជា ហាក់មានភាពតានតឹងណាស់ពីដំបូង តែនៅទីបំផុត គណបក្សសង្គ្រោះជាតិ តែងតែសម្របសម្រួល ហើយយល់ព្រមតាមការទាមទារ ឬការគំរាមកំហែងរបស់គណបក្សប្រជាជនកម្ពុជា។
នៅថ្ងៃព្រហស្បតិ៍ ទី៥ ខែវិច្ឆិកា នេះ លោកនាយករដ្ឋមន្ត្រី ហ៊ុន សែន ទើបតែទម្លាយអោយដឹងថា លោក សម រង្ស៊ី បានផ្ញើសារសូមទោសលោក។ នេះជាអ្វីដែលលោក សម រង្ស៊ី ធ្លាប់ប្រកែក ហើយអាចជាសញ្ញាវិជ្ជមានមួយឈានទៅរកការសម្របសម្រួលជាថ្មីម្ដងទៀត។
លោក សម រង្ស៊ី ក៏ធ្លាប់ប្រកែកយ៉ាងដាច់អហង្ការថា នឹងមិនចូលសភាទេ។ តែអ្វីដែលកើតឡើងបន្ទាប់មកទៀត យើងទាំងអស់គ្នាបានដឹងច្បាស់ហើយ។ នេះវាមិនខុសអីពីរឿងល្ខោនដែលឈុតខ្លះតួឯកតួអង្គឈ្លោះកាប់ចាក់គ្នា ឈុតខ្លះក៏ត្រូវរ៉ូវគ្នាវិញ ដើម្បីអូសបន្លាយសាច់រឿងអោយរំកិលទៅមុខ។ ល្ខោនលេងកាន់តែយូរ អ្នកមើលកាន់តែដឹងតួណាចិត្តល្អ តួណាចិត្តអាក្រក់កាន់តែច្បាស់។
កៅអីអនុប្រធានសភាទី១ នៅចន្លោះចោល បន្ទាប់ពីលោក កឹម សុខា អង្គុយនៅលើកៅអីនេះបានជាងមួយឆ្នាំ ក្រោយពីមានកិច្ចព្រមព្រៀងបញ្ចប់ជម្លោះនយោបាយកាលពីថ្ងៃទី២២ ខែកក្កដា ឆ្នាំ២០១៤។ ក៏ប៉ុន្តែវាសនាលោក កឹម សុខា មិនអាចរក្សាកៅអីនេះបានចប់អាណត្តិនោះទេ ដោយសារតែស្ថានភាពនយោបាយប្រែប្រួល។
សង្គ្រាមពាក្យសំដីគឺជាដើមចមមួយដ៏សំខាន់ ដែលរុញច្រានឲ្យគណបក្សប្រជាជនកម្ពុជាពិសេសលោកនាយករដ្ឋមន្ត្រី ហ៊ុន សែន ប្រើយុទ្ធសាស្ត្រឈ្នះឈ្នះ របស់ខ្លួន ដើម្បីផ្ដួលគូបដិបក្ខនៅមុនការប្រកួតប្រជែងនៅពេលខាងមុខបានមកដល់ ដែលនយោបាយបែបនេះផ្ទុយពីប្រទេសប្រកាន់របបប្រជាធិបតេយ្យកំពុងតែអនុវត្ត។
ថ្វីត្បិតស្ថាប័ននីតិប្បញ្ញត្តិជាស្ថាប័នកំពូលរបស់ជាតិ និងជាស្ថាប័នតាក់តែងច្បាប់ដើម្បីឲ្យស្ថាប័ននីតិប្រតិបត្តិអនុវត្ត ក៏ប៉ុន្តែសម្រាប់ប្រទេសកម្ពុជា ស្ថាប័នប្រតិបត្តិមានឥទ្ធិពលលើស្ថាប័ននីតិប្បញ្ញត្តិ និងស្ថាប័នតុលាការទៅវិញ។
ជាកាពិតណាស់ នៅមុនពេលសភាប្រជុំយ៉ាងប្រញាល់ដកតួនាទីលោក កឹម សុខា ចេញពីអនុប្រធានទី១រដ្ឋសភានោះ លោក ហ៊ុន សែន ថ្លែងនៅក្នុងពិធីជួបជុំអ្នកគាំទ្រនៅប្រទេសបារាំង ឆ្លើយតបទៅគណបក្សប្រឆាំងថា បើសិនជាមានការធ្វើបាតុកម្មនៅប្រទេសបារាំង លោកក៏មានបាតុកម្មនៅស្រុកខ្មែរប្រឆាំងវិញដែរ ហើយការធ្វើបាតុកម្មនេះ អាចរបូតតួនាទីលោក កឹម សុខា ពីអនុប្រធានទី១រដ្ឋសភាទៀតក៏ថាបាន។ លោក ហ៊ុន សែន សង្កត់ធ្ងន់ថា "បើលេងកុំខឹង បើខឹងកុំលេង"។
ការប្រកាសរបស់លោកនាយករដ្ឋមន្ត្រី ហ៊ុន សែន នេះ មានប្រសិទ្ធភាពភ្លាមៗ គឺនៅថ្ងៃទី២៦ ខែតុលា ក៏មានក្រុមបាតុករធ្វើបាតុកម្មនៅមុខរដ្ឋសភាជាង ២ពាន់នាក់ បាតុកម្មទាមទារទម្លាក់លោក កឹម សុខា ហើយចោទប្រកាន់ថា លោក កឹម សុខា មិនបានធ្វើដូចការសន្យានៅមុនពេលបោះឆ្នោត និងជាអ្នកញុះញង់បង្កឲ្យមានភាពវឹកវរសង្គមជាដើម។
មិនយូរប៉ុន្មានដោយសភាសំអាងលើហេតុផលនេះ តំណាងរាស្ត្រគណបក្សប្រជាជនកម្ពុជា ដែលធ្លាប់រងការចោទប្រកាន់ថា ជាក្រុមតំណាងរាស្ត្រ ឬសភាឯកបក្សនៅពេលជាប់គាំងនយោបាយ និងបានអនុម័តច្បាប់មួយចំនួននោះ។ ឥឡូវនេះ មិនខុសពីមុនទៀតឡើយ ក្រុមតំណាងរាស្ត្រគណបក្សប្រជាជនកម្ពុជា នៅថ្ងៃសុក្រ ទី៣០ ខែតុលា បានអនុម័តទម្លាក់លោក កឹម សុខា ចេញពីតួនាទីភ្លាមៗ ដែលការដកតួនាទីហាក់ដូចជាការធ្វើឡើង ដើម្បីបំពេញចិត្តលោក ហ៊ុន សែន ព្រោះថា ការប្រកាសរបស់លោក ហ៊ុន សែន ពីការធ្វើបាតុកម្មក៏មានបាតុកម្មកើតឡើងមែន ហើយការប្រកាសពីការរបូតតួនាទីលោក កឹម សុខា ទីបំផុតកៅអីអនុប្រធានសភាទី១ ក៏បានរបូតដូចលោក ហ៊ុន សែន អះអាងមែន គឺសមាជិកសភាមកពីគណបក្សប្រជាជនកម្ពុជា ទាំង ៦៨រូប ចូលប្រជុំនិងអនុម័តដោយគ្មានបាត់ ១សំឡេងឡើយ។
ជាការប្រតិកម្មនៃការដកតំណែងនេះ គណបក្សសង្គ្រោះជាតិ បានចេញសេចក្ដីថ្លែងការណ៍ជំទាស់ភ្លាមៗ នៅថ្ងៃទី៣០ ខែតុលា ដោយលើកពីភាពមិនប្រក្រតីយ៉ាងធ្ងន់ធ្ងរពីរករណីធំៗគឺ ទី១ ជាការរំលោភលើរដ្ឋធម្មនុញ្ញនៃព្រះរាជាណាចក្រកម្ពុជា ព្រោះរដ្ឋធម្មនុញ្ញមិនមានចែងអំពីការអនុម័តញត្តិបន្ទោស ឬដកតួនាទី ឬតំណែងរបស់ប្រធាន ឬអនុប្រធានសភាទេ។ ការបោះឆ្នោតជ្រើសតាំងប្រធាន ឬអនុប្រធានសភាថ្មីមកជំនួសបាន លុះត្រាតែក្នុងករណីដែលប្រធាន អនុប្រធាននោះ សុំលាលែងពីមុខតំណែង ឬទទួលអនិច្ចកម្មយោងលើមាត្រា៨៧ នៃរដ្ឋធម្មនុញ្ញ។ ទី២ ជាការរំលោភលើកិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ដែលជាគណបក្សមានអាសនៈក្នុងរដ្ឋសភាកាលពីថ្ងៃទី២២ កក្កដា ឆ្នាំ២០១៤។
ទោះបីជាសមាជិកសភាមកពីគណបក្សប្រជាជនកម្ពុជា បានបោះឆ្នោតអនុម័តដកលោក កឹម សុខា ចេញពីតួនាទីបែបនេះក្ដី ក៏ប៉ុន្តែកៅអីអនុប្រធានទី១រដ្ឋសភានេះ នៅតែជាកូតាគណបក្សសង្គ្រោះជាតិ ដដែល។ ក្រោយពីការដកលោក កឹម សុខា បានប៉ុន្មានម៉ោងនៅថ្ងៃទី៣០ ខែតុលា ដដែល លោក ហេង សំរិន អនុប្រធានរដ្ឋសភា បានផ្ញើលិខិតទៅលោក សម រង្ស៊ី ប្រធានគណបក្សសង្គ្រោះជាតិ ស្នើបេក្ខជនថ្មីជំនួសលោក កឹម សុខា ក្នុងតំណែងអនុប្រធានទី១រដ្ឋសភា និងដាក់ឲ្យសភាបោះឆ្នោតអនុម័តសម្រាប់នីតិកាលទី៥នេះ។ សំណើនេះ គណបក្សសង្គ្រោះជាតិ មិនបង្អង់ឡើយគឺបានឆ្លើយតបភ្លាមៗថា គណបក្សនេះនឹងមិនបញ្ជូនសមាជិកសភាដើម្បីទទួលយកកៅអីអនុប្រធានសភាទី១ជំនួសលោក កឹម សុខា នោះឡើយ។
ក្រៅពីលោក សម រង្ស៊ី ថ្លែងបដិសេធមិនបញ្ជូនមនុស្សទៅទទួលយកកៅអីលោក កឹម សុខា ធ្លាប់អង្គុយនេះ លោក សម រង្ស៊ី ក៏អះអាងបញ្ជាក់ក្នុងឱកាសលោកវិលត្រឡប់ពីបរទេសកាលពីយប់ថ្ងៃទី៣ ខែតុលា ថា គណបក្សសង្គ្រោះជាតិ នៅតែមិនបញ្ជូនមនុស្សទៅទទួលយកតួនាទីអនុប្រធានទី១រដ្ឋសភានេះដែរ។
ទោះបីជានៅក្នុងកាលៈទេសៈនេះ គណបក្សប្រឆាំងនៅតែប្រកាន់ជំហរបដិសេធដាច់អហង្ការបែបនេះក្ដី ក៏ប៉ុន្តែស្ថានការណ៍នយោបាយអាចប្រែប្រួលមួយរំពេច។ នរណាក៏ដឹងដែរថា គណបក្សសង្គ្រោះជាតិ ធ្លាប់បានប្រកាសមិនទទួលស្គាល់លទ្ធផលបោះឆ្នោត និងមិនចូលសភាទេ ក៏ប៉ុន្តែនៅថ្ងៃចរចាថ្ងៃទី២២ ខែកក្កដា ឆ្នាំ២០១៤ គណបក្សនេះសម្រេចដើរចូលសភា គឺបន្ទាប់ពីមានព្រមព្រៀងនយោបាយបញ្ចប់ជម្លោះ ក៏នាំគ្នាដើរចូលសភាយ៉ាងទាន់ហន់ក្នុងហេតុផលថា ដើម្បីប្រយោជន៍ជាតិ និងប្រើប្រាស់វប្បធម៌សន្ទនាជាធំ។
ក្រៅពីនេះទៀត គណបក្សសង្គ្រោះជាតិ នៅតែមិនអាចបដិសេធមិនបញ្ជូនមនុស្សជំនួសលោក កឹម សុខា រហូតនោះទេ បើសិនជាគណបក្សនេះនៅតែចង់រក្សាជំហរវប្បធម៌សន្ទនានោះ ព្រោះថា លោក សម រង្ស៊ី នៅតែប្រកាសថា នឹងយកវប្បធម៌សន្ទនាក្នុងការដោះស្រាយបញ្ហានយោបាយដ៏ចម្រូងចម្រាសនៅពេលបច្ចុប្បន្ននេះដែរ។ ឧទាហរណ៍ការជួបគ្នាដោយសម្ងាត់រវាងលោក សម រង្ស៊ី និងលោក ស ខេង អនុប្រធានគណបក្សប្រជាជនកម្ពុជា កាលពីថ្ងៃទី៤ ខែវិច្ឆិកា ជាឧទាហរណ៍ស្រាប់ ដោយគណបក្សទាំងពីរឯកភាពបន្តយកវប្បធម៌សន្ទនាជាគោលសំខាន់ក្នុងការដោះស្រាយបញ្ហា។
លើសពីនេះទៀត ល្បែងនយោបាយរបស់គណបក្សទាំងពីរកំពុងតែលេងគ្នាម្នាក់ម្ដង។ គណបក្សប្រជាជនកម្ពុជា នៅក្នុងបរិបទនេះ គឺត្រូវការមនុស្សមកជំនួសកៅអីលោក កឹម សុខា វិញ ដើម្បីបញ្ចប់ការរិះគន់ពីសហគមន៍ជាតិ និងអន្តរជាតិ ពិសេសគឺរិះគន់ពីសភាឯកបក្សមិនឆ្លុះបញ្ចាំងពីសង្គមប្រជាធិបតេយ្យជាដើម។
ម្យ៉ាងទៀតនៅស្របពេលគណបក្សប្រជាជនកម្ពុជា កំពុងមានប្រៀបជាងគណបក្សប្រឆាំងក្នុងយុទ្ធសាស្ត្រនយោបាយយកឈ្នះចាញ់គ្នា។ ប្រៀបនយោបាយនោះគឺតុលាការស្ថិតនៅក្រោមឥទ្ធិពលគណបក្សកាន់អំណាច បានចាប់ខ្លួនសកម្មជន និងសមាជិកព្រឹទ្ធសភាគណបក្សប្រឆាំងចំនួន ១៥នាក់ ហើយមកទល់ពេលនេះ។ បើសិនជាគណបក្សសង្គ្រោះជាតិ នៅតែរឹងទទឹងនោះ វាសនារបស់សកម្មជនគណបក្សរបស់ខ្លួនគ្មានថ្ងៃដោះលែងនោះទេ។ ម្យ៉ាងទៀត តួនាទីប្រធានគណៈកម្មការជំនាញនៅក្នុងរដ្ឋសភាដែលជាកូតារបស់គណបក្សសង្គ្រោះជាតិនោះ អាចនឹងរង្គោះរង្គើទៀតក៏ថាបាន។
ក្រៅពីនេះទៀត ស្ថានការណ៍នយោបាយនៅពេលនេះអាចធូរស្បើយបន្តិចវិញ ព្រោះថា លោក សម រង្ស៊ី បានផ្ញើសារសុំទោសលោក ហុន សែន បន្ទាប់ពីលោក សម រង្ស៊ី រិះគន់លោក ហ៊ុន សែន ដឹកនាំប្រទេសបែបហ្វាស៊ីស ធ្វើឲ្យលោក ហ៊ុន សែន ខ្ញាល់ហើយព្រមានឲ្យសុំទោសនោះ។
ការសុំទោសរបស់លោក សម រង្ស៊ី នៅពេលនេះ តាមមើលទៅលោក សម រង្ស៊ី ចង់វិលមករកតុចរចាដើម្បីដោះស្រាយបញ្ហាផ្សេងៗទៀតកំពុងកើតមាន ពិសេសរឿងដោះលែងសកម្មជនរបស់ខ្លួន។ បើសិនជាគណបក្សសង្គ្រោះជាតិ យល់ព្រមបញ្ជូនមនុស្សជំនួសលោក កឹម សុខា នោះ ការដោះលែងសកម្មជនរបស់ខ្លួននឹងអាចកើតមានក៏ថាបាន។ បញ្ហានេះ លោក សម រង្ស៊ី ក៏ព្រលយឲ្យដឹងដែរថា លោកសង្ឃឹមថា ការប្រើប្រាស់វប្បធម៌សន្ទនា គឺដើម្បីសុំឲ្យមានការដោះលែងសកម្មជនរបស់ខ្លួនវិញ។
នៅក្នុងដំណាក់កាលនេះ គណបក្សសង្គ្រោះជាតិ អាចគ្មានជម្រើសអ្វីក្រៅពីបន្តចូលសភាធ្វើការជាមួយគណបក្សប្រជាជនកម្ពុជា របស់លោក ហ៊ុន សែន នោះទេ បើមិនអ៊ីចឹងទេ ស្ថានការណ៍នយោបាយនៅកម្ពុជា នឹងកាន់តែអាក្រក់ទៅៗ។
សរុបសេចក្ដីទៅ ការប្រើប្រាស់នយោបាយឈ្នះ ឈ្នះរបស់លោក ហ៊ុន សែន នៅតែមានប្រសិទ្ធភាពសម្រាប់សង្គមកម្ពុជា។ បើងាកទៅមើលប្រវត្តិសាស្ត្រថយក្រោយជាងពីរទសវត្សរ៍មុនវិញ លោក ហ៊ុន សែន ក៏ធ្លាប់លេងល្បែងបែបនេះជាមួយសម្ដេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច ជាច្រើនលើកច្រើនសាដែរ។ នៅក្រោយការបោះឆ្នោតឆ្នាំ១៩៩៣ ដែលកាលណោះ គណបក្សប្រជាជនកម្ពុជា ចាញ់ឆ្នោតនោះ លោក ហ៊ុន សែន មិនព្រមចុះចាញ់នោះឡើយ។
នៅទីបំផុត អតីតព្រះមហាវីរក្សត្រ ធ្វើការសម្របសម្រួល និងបង្ខំឲ្យសម្ដេចក្រុមព្រះ នរោត្តម រណឫទ្ធិ ចូលបង្កើតរដ្ឋាភិបាលចម្រុះជាមួយលោកនាយករដ្ឋមន្ត្រី ហ៊ុន សែន។ នៅពេលនោះ សម្ដេចក្រុមព្រះ នរោត្តម រណឫទ្ធិ ទូលថ្វាយព្រះបិតារបស់ព្រះអង្គវិញថា ព្រះអង្គមានការលំបាកណាស់ក្នុងការធ្វើការជាមួយលោក ហ៊ុន សែន និងគណបក្សប្រជាជនកម្ពុជា ដែលបានវាយប្រហារ និងសម្លាប់មន្ត្រីហ្វ៊ុនស៊ិនប៉ិច របស់ព្រះអង្គក្នុងយុទ្ធនាការបោះឆ្នោតអាណត្តិទី១នោះ។ ក៏ប៉ុន្តែនៅទីបំផុត គណបក្សហ្វ៊ុនស៊ិនប៉ិច មិនអាចដឹកនាំរដ្ឋាភិបាលតែឯងបានទេ ទោះបីជាឈ្នះឆ្នោតក្ដី ក្នុងហេតុផលដើម្បីបង្រួបបង្រួមជាតិ និងជៀសពីការប្រឈមកងកម្លាំងដាក់គ្នា សម្ដេចក្រុមព្រះក៏សុខចិត្តបង្កើតរដ្ឋាភិបាលចម្រុះជាមួយគ្នា ដោយព្រះអង្គជានាយករដ្ឋមន្ត្រីទី១ និងលោក ហ៊ុន សែន ជានាយករដ្ឋមន្ត្រី២។
អ្នកនយោបាយកម្ពុជា បានដើរជាន់ដានប្រវត្តិសាស្ត្រដដែលៗ ហើយលោក ហ៊ុន សែន នៅតែជោគជ័យលើកគូបដិបក្ខ ទោះបីក្នុងរូបភាពអ្វីក៏ដោយ។ នៅក្នុងបរិបទនយោបាយបច្ចុប្បន្ននេះវិញ គណបក្សទាំងពីរមិនអាចគេចវេះពីវប្បធម៌សន្ទនានោះទេ ពោលគឺគណបក្សសង្គ្រោះជាតិ នឹងមិនអាចមិនបញ្ជូនមនុស្សទៅជំនួសលោក កឹម សុខា នោះឡើយ។
បើតាមគន្លងដែលអ្នកនយោបាយទាំងពីរក្រុមធ្លាប់ដើរកន្លងមក គណបក្សសង្គ្រោះជាតិ អាចនឹងបញ្ជូនមនុស្សសម្រាប់ស្នងតំណែងអនុប្រធានទី១រដ្ឋសភា ដើម្បីជំនួសលោក កឹម សុខា ក្នុងពេលឆាប់ៗនេះមិនខាន នៅខណៈដែលកូនចៅរបស់ខ្លួនកំពុងស្ថិតនៅក្នុងកណ្ដាប់ដៃគណបក្សប្រជាជនកម្ពុជា ផងនោះ ហើយពេលនោះ វាំងនននៃរឿងល្ខោនដែលគេរូតបិទមួយភ្លែត ក៏ត្រូវគេរូតបើកឡើងវិញ។ ចំណែកឯតួឯកតួអង្គ ទាំងតួចិត្តល្អ និងតួចិត្តអាក្រក់ ក៏ចេញមកសំដែងរឿងល្ខោនដែលលាយឡំទៅដោយភាពទន់ភ្លន់ ផ្អែមល្ហែមដាក់គ្នាផង ផិតក្បត់គ្នា ញុះញង់ វាយប្រហារឈ្នានីសគ្នាផងនោះជាថ្មីម្ដងទៀត។ អ្វីដែលប្លែកនោះ នៅត្រង់ថា នៅក្នុងរឿងល្ខោនពិតនៃនយោបាយកម្ពុជា តួចិត្តអាក្រក់ហាក់មិនងាយបរាជ័យដូចរឿងល្ខោនសម្ដែងលើឆាកនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ