បទ​វិភាគ៖ មូលហេតុ​នៃ​ការ​ចាប់​ខ្លួន​សកម្មជន​បក្ស​ប្រឆាំង​សកម្មជន​ដីធ្លី​និង​ព្រះសង្ឃ

ដោយ ទីន ហ្សាការីយ៉ា
2014-11-20
អ៊ីម៉ែល
មតិ
Share
បោះពុម្ព
អនុ​ប្រធាន​គណបក្ស​សង្គ្រោះ​ជាតិ លោក កឹម សុខា (ឆ្វេង) ចាប់​ដៃ​ជាមួយ​លោក​នាយករដ្ឋមន្ត្រី ហ៊ុន សែន នា​វិមាន​ព្រឹទ្ធ​សភា ក្រោយ​ជំនួប​ចរចា​កំពូល​នៅ​ថ្ងៃ​ទី​២២ កក្កដា ២០១៤។
អនុ​ប្រធាន​គណបក្ស​សង្គ្រោះ​ជាតិ លោក កឹម សុខា (ឆ្វេង) ចាប់​ដៃ​ជាមួយ​លោក​នាយករដ្ឋមន្ត្រី ហ៊ុន សែន នា​វិមាន​ព្រឹទ្ធ​សភា ក្រោយ​ជំនួប​ចរចា​កំពូល​នៅ​ថ្ងៃ​ទី​២២ កក្កដា ២០១៤។
RFA/Tin Zakariya

ការ​ចាប់​ខ្លួន​សកម្មជន​គណបក្ស​នយោបាយ ព្រះសង្ឃ និង​សកម្មជន​ដីធ្លី គណបក្ស​ជាប់​ឆ្នោត​ទាំង​ពីរ​បាន​ច្រាន​ចោល​មិន​ទទួល​ខុស​ត្រូវ​ទៅ​វិញ​ទៅ​មក។

គណបក្ស​សង្គ្រោះ​ជាតិ ចាត់​ទុក​ការ​ចាប់​ខ្លួន​សកម្មជន​ដីធ្លី ព្រះសង្ឃ និង​សកម្មជន​របស់​ខ្លួន​នោះ ថា​ជា​សកម្មភាព​ដែល​រំលោភ​ទៅ​លើ​កិច្ច​ព្រមព្រៀង​បញ្ចប់​វិបត្តិ​នយោបាយ​កាល​ពី​ថ្ងៃ​ទី​២២ កក្កដា។ តែ​គណបក្ស​ប្រជាជន​កម្ពុជា បាន​ច្រាន​ចោល​ការ​ចោទ​ប្រកាន់​នេះ។

តើ​រូបភាព​ចាប់​ខ្លួន​ដែល​កក្រើក​ឡើង​វិញ​នៅ​ពេល​នេះ គឺ​ជា​យុទ្ធសាស្ត្រ​វាយ​ផង ចរចា​ផង ឬ​យ៉ាង​ណា?

ល្បែង​វាយ​ផង ចរចា​ផង​នេះ ត្រូវ​អ្នក​នយោបាយ​ខ្មែរ​ទាំង​ពីរ​ក្រុម យក​មក​ប្រើប្រាស់​ជា​ញឹកញយ។ ក្រុម​ខ្លះ​ដែល​មាន​ចិត្ត​ស្ទាក់ស្ទើរ ដូច​ដែល​ពាក្យ​ខ្មែរ​និយាយ​ថា មិន​ចិត្ត​ដាច់ ធ្វើ​ស្ដេច​មិន​បាន លេង​ល្បែង​នេះ​ចាញ់​រហូត។ ឯ​ក្រុម​ដែល​មាន​ចិត្ត​ដាច់​វិញ តែង​លេង​ល្បែង​នេះ​ឈ្នះ​ជានិច្ច។

ក្រោយ​ការ​បោះ​ឆ្នោត​កាល​ពី​ថ្ងៃ​ទី​២៨ ខែ​កក្កដា ឆ្នាំ​២០១៣ គណបក្ស​សង្គ្រោះ​ជាតិ ដែល​ទទួល​បាន​សំឡេង​ជា​ផ្លូវ​ការ​តិច​ជាង​អ្វី​ដែល​ខ្លួន​គិត​ថា​គួរ​ទទួល​បាន បាន​កេណ្ឌ​អ្នក​ស្រុក​អោយ​ធ្វើ​បាតុកម្ម​ទាមទារ​យុត្តិធម៌។ ទន្ទឹម​គ្នា​នឹង​ធ្វើ​បាតុកម្ម ពួក​គេ​ក៏​ចរចា​គ្នា​ជាមួយ​គណបក្ស​ម្ខាង​ទៀត​ដែរ គឺ​គណបក្ស​ប្រជាជន​កម្ពុជា។ យុទ្ធសាស្ត្រ​វាយ​ផង ចរចា​ផង​របស់​គណបក្ស​សង្គ្រោះ​ជាតិ ត្រូវ​បញ្ឈប់​ពាក់​កណ្ដាល​ទី ដោយ​មិន​ទាន់​បាន​សម្រេច​គោលដៅ​ដែល​ខ្លួន​គ្រោង​ទុក​ទេ។

គណបក្ស​កាន់​អំណាច ដែល​មិន​សូវ​ជា​មាន​ប្រវត្តិ​ល្អ​ក្នុង​ការ​អត់ធ្មត់​ជាមួយ​នឹង​អ្នក​ហ៊ាន​ងើប​តតាំង​ប្រឆាំង​នឹង​ខ្លួន បាន​ប្រើប្រាស់​គ្រប់​មធ្យោបាយ ដើម្បី​បង្ក្រាប​បាតុកម្ម​នេះ។ គេ​បាញ់​សម្លាប់​ក្រុម​បាតុករ​ផង គេ​ចាប់​ដាក់​គុក​ខ្លះ​ផង និង​បិទ​ទីតាំង​សម្រាប់​ប្រជាពលរដ្ឋ​ចេញ​មុខ​តវ៉ា​ផង។ ជា​លទ្ធផល គណបក្ស​សង្គ្រោះ​ជាតិ ដែល​ចិត្ត​មិន​ដាច់ ក៏​សុខ​ចិត្ត​ទទួល​យក​ការ​សម្រប​សម្រួល​នយោបាយ​មួយ​ជាមួយ​គណបក្ស​ប្រជាជន​កម្ពុជា។

ឥឡូវ​នេះ គណបក្ស​ប្រជាជន​កម្ពុជា ជា​អ្នក​លេង​ល្បែង​ចរចា​ផង វាយ​ផង​នេះ​វិញ​ម្តង។ គណបក្ស​ប្រជាជន​កម្ពុជា ដែល​ចិត្ត​ដាច់​ជាង​នេះ លេង​ល្បែង​នេះ​ឈ្នះ​ជា​បណ្ដើរៗ​ហើយ។ គ្រាន់​តែ​គណបក្ស​ប្រឆាំង​នៅ​រ៉ែរ៉​រង់ចាំ​ត​ថ្លៃ​មុន​ចូល​សភា តំណាង​រាស្ត្រ​ជាប់​ឆ្នោត​នៃ​គណបក្ស​នេះ រួម​ទាំង​សកម្មជន​ផង ត្រូវ​គេ​ចាប់​វាយ​ខ្មោះ​បញ្ចូល​គុក​ព្រៃ​ស។ ដើម្បី​ជា​ថ្នូរ​នៃ​ការ​ដោះ​លែង​វិញ គណបក្ស​សង្គ្រោះ​ជាតិ ត្រូវ​រត់​ជាន់​ជើង​គ្នា​រក​អាវ​ក​កុត និង​សំពត់​ចង​ក្បិន​សឹង​មិន​ទាន់ ដើម្បី​ទៅ​ផឹក​ទឹក​សម្បថ​មុខ​ព្រះករុណា ដើម្បី​ចូល​សភា នៅ​ពេល​ដែល​គណបក្ស​ទាំង​ពីរ កំពុង​មាន​ភាព​ចម្រូងចម្រាស​ក្នុង​ការ​ចរចា។

ការ​ចាប់​ខ្លួន​លើក​នេះ តាម​មើល​ទៅ​ប្រហែល​ជា​មិន​ខុស​លើក​មុន​នោះ​ឡើយ គណបក្ស​ប្រជាជន​កម្ពុជា បាន​ប្រើ​ផែនការ​ចាស់​សកម្មភាព​ថ្មី គឺ​តុលាការ​បាន​សើរើ​ករណី លោក មាជ សុវណ្ណារ៉ា និង​យុវជន ទេព ណារិន យក​មក​ចោទ​ប្រកាន់​ឡើង​វិញ និង​ផ្ដន្ទាទោស​ទាក់ទង​នឹង​ការ​ចូលរួម​ធ្វើ​បាតុកម្ម​នៅ​ស្ពាន​នាគ​ក្បែរ​ទីលាន​ប្រជាធិបតេយ្យ ដែល​ដឹក​នាំ​ដោយ អ្នកស្រី មូរ សុខហួរ នោះ។ បើ​សិន​ជា​សកម្មជន​គណបក្ស​សង្គ្រោះ​ជាតិ ទាំង​ពីរ​នេះ ជា​អ្នក​ញុះញង់​ឲ្យ​ប្រព្រឹត្ត​បទឧក្រិដ្ឋ កាល​ពី​ថ្ងៃ​ទី​១៥ កក្កដា មែន​នោះ ហេតុ​អ្វី​បាន​ជា​តុលាការ​ដោះ​លែង អ្នកស្រី មូរ សុខហួរ ដែល​ជា​អ្នក​ដឹក​នាំ​ធ្វើ​បាតុកម្ម និង​តំណាង​រាស្ត្រ​មួយ​ចំនួន​ទៀត ក្រោយ​ពេល​មាន​កិច្ច​ព្រមព្រៀង​នយោបាយ?

សាលា​ដំបូង​រាជធានី​ភ្នំពេញ កាល​ពី​ថ្ងៃ​ទី​១១ វិច្ឆិកា បាន​ចាប់​ឃុំ​ខ្លួន លោក មាជ សុវណ្ណារ៉ា ជា​ខ្មែរ-អាមេរិកាំង និង​ជា​ប្រធាន​នាយកដ្ឋាន​ព័ត៌មាន និង​ប្រព័ន្ធ​ផ្សព្វផ្សាយ​របស់​គណបក្ស​សង្គ្រោះ​ជាតិ ក្រោម​បទ​ចោទ​ប្រកាន់​ផ្ដើម​គំនិត​ហិង្សា​ដោយ​ចេតនា​មាន​ស្ថាន​ទម្ងន់​ទោស បទ​ញុះញង់​ឲ្យ​ប្រព្រឹត្ត​បទឧក្រិដ្ឋ និង​ដឹក​នាំ​ចលនា​កុបកម្ម។ បើ​សិន​ជា​តុលាការ​រក​ឃើញ​ថា លោក​ពិត​ជា​មាន​ទោស​មែន លោក មាជ សុវណ្ណារ៉ា នឹង​អាច​ជាប់​ពន្ធនាគារ​រហូត​ដល់ ៣០​ឆ្នាំ។

ការ​ចាប់​ខ្លួន លោក មាជ សុវណ្ណារ៉ា នេះ ធ្វើ​ឡើង​ក្រោយ​ពេល​តុលាការ​បាន​ចាប់​ខ្លួន​អ្នក​ភូមិ​បឹងកក់ ចំនួន ៧​នាក់ និង​បាន​បើក​សវនាការ​បិទ​ទ្វារ។ តុលាការ​បាន​សម្រេច​កាត់​ទោស​ស្ត្រី​សកម្មជន​ដីធ្លី​ទាំង ៧​នាក់​នេះ រួម​មាន អ្នកស្រី ទេព វន្នី ផង ឲ្យ​ជាប់​ពន្ធនាគារ​រយៈពេល​មួយ​ឆ្នាំ ហើយ​ម្នាក់ៗ​ត្រូវ​ពិន័យ​ទឹក​ប្រាក់​ពីរ​លាន​រៀល។

តុលាការ​ចោទ​ប្រកាន់​អ្នក​ទាំង​នោះ​ពី​បទ​បង្ក​ឧបសគ្គ​ដល់​ចរាចរណ៍ នៅ​ពេល​ពលរដ្ឋ​ប្រមាណ ៦០​នាក់ តវ៉ា​នៅ​មុខ​សាលា​រាជធានី​ភ្នំពេញ កាល​ពី​ថ្ងៃ​ទី​១០ វិច្ឆិកា សុំ​ឲ្យ​អាជ្ញាធរ​ដោះស្រាយ​បញ្ហា​ផ្ទះ​របស់​ពួក​គេ​លិច​ទឹក ដោយសារ​ការ​អភិវឌ្ឍ​នៅ​តំបន់​បឹងកក់។ នៅ​ថ្ងៃ​បន្តបន្ទាប់​ទៀត តុលាការ​ក៏​ចាប់​សកម្មជន​គណបក្ស​សង្គ្រោះ​ជាតិ លោក ទេព ណារិន និង​ព្រះសង្ឃ​ចំនួន បី​អង្គ​ទៀត។ សកម្មភាព​ចាប់​ខ្លួន​លើក​នេះ តាម​មើល​ទៅ​ក៏​មិន​ចាញ់​លើក​មុនៗ​ដែរ។ សកម្មភាព​ទាំង​នេះ អាច​ថា​បង្ខំ​ឲ្យ​គណបក្ស​សង្គ្រោះ​ជាតិ ទាល់ច្រក ហើយ​ចេញ​មក​ដឹក​នាំ​ធ្វើ​បាតុកម្ម​ទៀត ដើម្បី​ជា​លេស​មួយ​ដែល​គណបក្ស​ប្រជាជន​កម្ពុជា ចោទ​ថា គណបក្ស​សង្គ្រោះ​ជាតិ មិន​គោរព​កិច្ច​ព្រមព្រៀង​នៅ​ពេល​ដែល​គណបក្ស​សង្គ្រោះ​ជាតិ បាន​ចោទ​ប្រកាន់​រួច​ទៅ​ហើយ​ថា គណបក្ស​ប្រជាជន​កម្ពុជា មិន​គោរព​កិច្ច​ព្រមព្រៀង​បញ្ចប់​ជម្លោះ​នយោបាយ​កាល​ពី​ថ្ងៃ​ទី​២២ ខែ​កក្កដា នោះ។

តែ​បញ្ហា​នេះ គណបក្ស​សង្គ្រោះ​ជាតិ នឹង​មិន​អាច​បញ្ចេញ​កម្ដៅ​នយោបាយ​ដើរ​បាតុកម្ម​ដូច​មុន​ទេ ព្រោះ​ថា រចនាសម្ព័ន្ធ​នៅ​ក្នុង​រដ្ឋសភា ឬ​ការ​បែង​ចែង​តួនាទី​គ្នា ដែល​គណបក្ស​សង្គ្រោះ​ជាតិ ទាមទារ​ឲ្យ​មាន​តុល្យភាព​អំណាច​ក្នុង​សភា​នោះ គឺ​ខ្លួន​ទាមទារ​បាន​ហើយ។ ម្យ៉ាង គណបក្ស​សង្គ្រោះ​ជាតិ ក៏​អាច​ធ្វើ​សកម្មភាព​បាន​មួយ​ចំនួន​ដែរ​នៅ​ក្នុង​សភា ដូចជា ការ​កោះ​ហៅ​រដ្ឋមន្ត្រី​មួយ​ចំនួន​មក​សាកសួរ ហើយ​តំណាង​រាស្ត្រ​ទាំងអស់​ទទួល​បាន​ប្រាក់​បៀវត្ស ជាដើម។

ដូច្នេះ ចង់​មិន​ចង់ បញ្ហា​ចំពោះ​មុខ​របស់​គណបក្ស​សង្គ្រោះ​ជាតិ នៅ​ពេល​នេះ ហាក់​កំពុង​សម្ដែង​ពី​ការ​អត់ធ្មត់​របស់​ខ្លួន និង​ប្រើ​វិធីសាស្ត្រ​សម្រប​សម្រួល​ជាមួយ​គណបក្ស​ប្រជាជន​កម្ពុជា ដើម្បី​រក​ដំណោះស្រាយ​ដោះ​លែង​សកម្មជន​របស់​ខ្លួន ដូច​ដែល លោក សម រង្ស៊ី បាន​ដាក់​លិខិត​ទៅ​លោក​ឧបនាយក​រដ្ឋមន្ត្រី ស ខេង ជា​ឧទាហរណ៍​ស្រាប់។

ក្រៅ​ពី​នេះ​ទៀត គោល​បំណង​ធំ​នៃ​ការ​ចាប់​ខ្លួន​ពេល​នេះ អាច​ថា​ជា​ការ​ដាក់​សម្ពាធ​កុំ​ឲ្យ​គណបក្ស​សង្គ្រោះ​ជាតិ តឹងរ៉ឹង​លើ​ការ​ធ្វើ​សេចក្ដី​ព្រាង​ច្បាប់​ស្ដីពី​ការ​រៀបចំ និង​ការ​ប្រព្រឹត្ត​ទៅ​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត ដែល​គណបក្ស​ទាំង​ពីរ​កំពុង​តែ​ដំណើរ​ការ​ធ្វើ​នោះ។

ទី​បញ្ចប់​ទៅ ការ​កែ​ទម្រង់​ស្ថាប័ន គ.ជ.ប.ថ្មី ល្មមៗ​ក៏​ឯកភាព​ទៅ ដើម្បី​បញ្ចប់​នូវ​ការ​ចាប់​ចង និង​រួច​ផុត​ពី​សម្ពាធ​នេះ។ និយាយ​ឲ្យ​ងាយ​ស្រួល​ស្ដាប់ ប្រហែល​ជា​គណបក្ស​ប្រជាជន​កម្ពុជា ប្រើ​យុទ្ធសាស្ត្រ​ដើម្បី​ឲ្យ​គណបក្ស​សង្គ្រោះ​ជាតិ ក្ដៅ​ក្រហាយ ហើយ​ចេញ​ដឹក​នាំ​ធ្វើ​បាតុកម្ម នៅ​ពេល​នោះ អាជ្ញាធរ​មាន​ឱកាស​ចាប់​ខ្លួន​សកម្មជន​គណបក្ស​ប្រឆាំង​កាន់​តែ​ច្រើន​ថែម​ទៀត។ នៅ​ពេល​នោះ គណបក្ស​ទាំង​ពីរ​រវល់​នឹង​ការ​ចរចា ឬ​ធ្វើ​ការ​សម្រប​សម្រួល​ផ្នែក​នយោបាយ សុំ​ឲ្យ​ដោះ​លែង​សកម្មជន​របស់​ខ្លួន​វិញ រីឯ​ការ​ជជែក​អំពី​ការ​បង្កើត គ.ជ.ប.ថ្មី ទុក​មួយ​ឡែក​សិន។ ការ​ធ្វើ​ដូច្នេះ នៅ​ទី​បំផុត ការ​បោះ​ឆ្នោត​នៅ​ឆ្នាំ​២០១៨ គណបក្ស​ទាំង​ពីរ​នឹង​ប្រើ គ.ជ.ប.ចាស់ ដែល​មាន​ស្រាប់​ដដែល។ ក៏ប៉ុន្តែ វិធី​ពន្យារ​ពេល​នេះ គណបក្ស​សង្គ្រោះ​ជាតិ ហាក់​បី​ដូចជា​ដឹង​ល្បិចកល​មួយ​នេះ​របស់​គណបក្ស​ប្រជាជន​កម្ពុជា។ ដូច្នេះ​ហើយ បាន​ជា​មេ​ដឹក​នាំ​គណបក្ស​សង្គ្រោះ​ជាតិ នៅ​តែ​ប្រកាស​ថា ខ្លួន​នឹង​យក​វប្បធម៌​សន្ទនា​ក្នុង​ការ​ដោះស្រាយ​បញ្ហា។

លើស​ពី​នេះ​ទៀត ស្ថាប័ន​រៀបចំ​ការ​បោះ​ឆ្នោត​ថ្មី​នេះ គឺ​ជា​ស្ថាប័ន​សំខាន់​សម្រាប់​កំណត់​ជោគ​វាសនា​គណបក្ស​នយោបាយ ឬ​ប្រទេស​ជាតិ ទោះ​បី​ជា​សំឡេង​ឆ្នោត​ប្រជាពលរដ្ឋ​ជា​អ្នក​ផ្ដល់​ជូន​គណបក្ស​នយោបាយ​តាម​រយៈ​ការ​បោះ​ឆ្នោត​តាម​បែប​ប្រជាធិបតេយ្យ​ក៏ដោយ​ចុះ តែ​ប្រជាធិបតេយ្យ​នៅ​កម្ពុជា មាន​រូបភាព​ផ្សេង​ពី​ប្រទេស​ជឿនលឿន​មួយ​ចំនួន ដូចជា​នៅ​ប្រទេស​ជប៉ុន ជាដើម។

ម្យ៉ាង​ទៀត បើ​សិន​ជា គ.ជ.ប ដែល​មាន​ស្រាប់​ជា​ស្ថាប័ន​ឯករាជ្យ​មែន​នោះ មិន​មែន​គណបក្ស​ប្រឆាំង​មិន​ទទួល​ស្គាល់​លទ្ធផល​បោះ​ឆ្នោត​នោះ​ឡើយ ហើយ​ក៏​មិន​មាន​ការ​រិះគន់​ពី​សហគមន៍​ជាតិ និង​អន្តរជាតិ​ដែរ។

ផ្ទុយ​ទៅ​វិញ បញ្ហា​ចម្បង​ដែល​គេ​ឯង​ដឹង​ថា រដ្ឋាភិបាល​បាន​ប្រើ​ដៃ​តុលាការ​ចាត់​ការ​ទៅ​លើ​សកម្មជន​ដីធ្លី សកម្មជន​នយោបាយ និង​ព្រះសង្ឃ​នោះ ដោយសារ​តែ​ភាព​ខ្វះ​ចន្លោះ​របស់​គណបក្ស​សង្គ្រោះ​ជាតិ កាល​ពី​ពេល​ចរចា​ជាមួយ​គណបក្ស​ប្រជាជន​កម្ពុជា កាល​ពី​ថ្ងៃ​ទី​២២ កក្កដា នោះ ដូចជា​គណបក្ស​សង្គ្រោះ​ជាតិ ទទួល​យក​លទ្ធផល​ចរចា​យ៉ាង​ទាន់​ហន់ គឺ​ការ​ចរចា​ធ្វើ​ឡើង​តែ​រយៈពេល​មួយ​ថ្ងៃ ដែល​ធ្វើ​ឡើង​ផ្ទុយ​ពី​អ្វី​ដែល​ខ្លួន​បាន​សន្យា​ជាមួយ​អ្នក​គាំទ្រ​ខ្លួន​ថា ត្រូវ​តែ​សួរ​ម្ចាស់​ឆ្នោត​ជា​មុន​សិន មុន​នឹង​សម្រេច​លើ​រឿង​ចរចា។ ម្យ៉ាង​ទៀត គណបក្ស​ប្រជាជន​កម្ពុជា បាន​រៀប​ជើង​ព្រួល​ជា​ស្រេច ដោយ​ចង​រក្សា​ទុក គ.ជ.ប.ចាស់ អាច​ដំណើរ​ការ​ស្រប​តាម​ច្បាប់​ដដែល បើ​សិន​ជា គ.ជ.ប.ថ្មី​បង្កើត​មិន​បាន​នោះ។ តែ​លោក​នាយក​រដ្ឋមន្ត្រី ហ៊ុន សែន វិញ​ក៏​ត្រេកអរ​ដែរ​ដែល​គណបក្ស​សង្គ្រោះ​ជាតិ យល់​ព្រម​ចូល​សភា ដើម្បី​ឲ្យ​សភា​ស្រប​ច្បាប់ ដែល​អ្នក​ច្បាប់​ថា សភា​មិន​គ្រប់​ទឹក និង​ជា​ការ​ទាញ​ការ​ចាប់​អារម្មណ៍​ពី​ប្រទេស​ម្ចាស់​ជំនួយ​ឡើង​វិញ។ ដូច​នេះ លោក ហ៊ុន សែន ក៏​សម្រេច​ចិត្ត​លឿន​ក្នុង​ការ​យល់​ព្រម​បង្កើត គ.ជ.ប.ថ្មី​ដែរ។ តែ​ពេល​នេះ លោក ហ៊ុន សែន ហាក់​បី​ដូច​ជា​ស្ទាក់ស្ទើរ​ក្នុង​ការ​បង្កើត គ.ជ.ប.ថ្មី​នេះ​ទៅ​វិញ ដោយ​សើរើ​សំណុំ​រឿង​ចាស់​ក្នុង​ការ​ចោទ​ចាប់​ចង ដែល​ក្រុម​មន្ត្រី​សិទ្ធិ​មនុស្ស​អះអាង​ថា គណបក្ស​កាន់​អំណាច​កំពុង​រំលោភ​ទៅ​លើ​កិច្ច​ព្រមព្រៀង​បញ្ចប់​វិបត្តិ​នយោបាយ​នោះ។

បញ្ហា​ទាំង​នេះ បើ​សិន​ជា​គណបក្ស​សង្គ្រោះ​ជាតិ នៅ​តែ​ទាមទារ​ដាច់​ខាត​តាម​អ្វី​ដែល​ខ្លួន​ចង់​បាន និង​សង្គម​ស៊ីវិល​ចង់​បាន ទាក់ទង​នឹង​ការ​បង្កើត គ.ជ.ប.ថ្មី​នោះ សកម្មជន​របស់​ខ្លួន​ក៏​អាច​បន្ត​នៅ​ក្នុង​ពន្ធនាគារ ដែល​មិន​អាច​សម្រប​សម្រួល​ផ្នែក​នយោបាយ​បាន ហើយ​សកម្មជន​មួយ​ចំនួន​ទៀត​នៅ​ជាប់​បណ្ដឹង​នៅ​តុលាការ​នោះ ក៏​អាច​នឹង​តុលាការ​បន្ត​ចាប់​ខ្លួន​ទៀត​ដែរ ព្រោះ​ការ​បដិសេធ​របស់​ក្រសួង​យុត្តិធម៌ មិន​ដោះ​លែង លោក មាជ សុវណ្ណារ៉ា តាម​ការ​ស្នើសុំ​របស់ លោក សម រង្ស៊ី នោះ​ជា​ឧទាហរណ៍​ស្រាប់។

ម្យ៉ាង​វិញ​ទៀត បើ​យើង​មើល​ពី​ពាក្យ​ផ្សះផ្សា​ជាតិ​វិញ គ្រាន់​តែ​ជា​ពាក្យ​ចេញ​ពី​មាត់​អ្នក​នយោបាយ​តែ​ប៉ុណ្ណោះ។ ផ្សះផ្សា​ជាតិ នឹង​មិន​មាន​ទេ​នៅ​ក្នុង​សង្គម​កម្ពុជា ដែល​ប្រកាន់​របប​ប្រជាធិបតេយ្យ​នៅ​ក្មេង​ខ្ចី​នៅ​ឡើយ​នេះ។ កម្ពុជា អាច​ពន្លត់​ភ្លើង​នយោបាយ​រវាង​គូបដិបក្ខ​នេះ មាន​តែ​ការ​សម្រប​សម្រួល​នយោបាយ​ទេ។ បញ្ហា​នេះ​ក៏​បាន​ឆ្លុះ​បញ្ចាំង​ពី​ប្រវត្តិសាស្ត្រ​របស់​កម្ពុជា ជា​ហូរហែ​មក​ដែរ។

ទោះ​ជា​យ៉ាង​ណា​ក៏ដោយ មេ​ដឹក​នាំ​គណបក្ស​សង្គ្រោះ​ជាតិ ក្រោយ​ពី​បាន​ទៅ​ជួប​មន្ត្រី​ជាន់​ខ្ពស់​របស់​ខ្លួន​នៅ​គុក​ព្រៃ​ស កាល​ពី​ថ្ងៃ​ច័ន្ទ កន្លង​ទៅ បាន​ប្រកាស​ជំហរ​របស់​ខ្លួន​ពី​កៀន​របង​គុក​ថា នឹង​មិន​អនុញ្ញាត​អោយ​យក​ការ​ចាប់​ខ្លួន​សកម្មជន​បក្ស​ធ្វើ​ជា​ថ្នូរ​ក្នុង​ការ​បង្កើត គ.ជ.ប.ថ្មី​ទេ។ ប្រសិន​បើ​ការ​ប្ដេជ្ញា​របស់ លោក កឹម សុខា ពេល​នេះ ជា​ការ​ប្ដេជ្ញា​ពិត​មែន​នោះ គណបក្ស​ប្រជាជន​កម្ពុជា អាច​នឹង​បរាជ័យ​ក្នុង​ល្បែង​ដែល​ខ្លួន​ធ្លាប់​លេង​ឈ្នះ​រហូត​នោះ​ជា​លើក​ទី​មួយ​ក្នុង​ប្រវត្តិសាស្ត្រ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (10)
Share

អ្នក​អាន​អនាមិក

ក្នុងនាមខ្ញុំជាកូនខ្មែរមួយរូប និងជាអ្នកស្រលាញ់ គាំទ្របក្សសង្គ្រោះជាតិ និងស្រលាញ់ប្រជាធិបតេយ្យ សេរីភាព យុត្តិធម៍ ខ្ញុំសូមឲ្យថ្នាក់ដឹកនាំគណបក្សសង្គ្រោះជាតិ មានជំហរឲ្យរឹងមាំ មិនត្រូវចុះញ៉ម មិនត្រូវចាញ់បោកជាដាច់ខាត បក្សប្រជាជន ពីព្រោះមានតែបក្សសង្គ្រោះជាតិទេ ដែលអាចជួយស្រោចស្រង់ប្រទេសជាតិបាន មិនត្រូវចាញ់យុទ្ឋសាស្រ្ត ត្របកស្អំ របស់បក្សប្រជាជនឡើយ។ សូមឥ្យថ្នាក់ដឹកនាំបក្សសង្គ្រោះជាតិទាំងអស់ឆាប់ទទួលបានជោគជ័យ និងបានដឹកនាំប្រទេសនាពេលខាងមុខនេះ។ សូមអរគុណ

Nov 30, 2014 08:59 PM

អ្នក​អាន​អនាមិក

ប្រដាល់មានស្នៀតមួយវាយឱយគេដួលKOបើដៃគូរមិនដួល
គឺគេវាយខ្លួនឯងវិញឱយដួលមានន័យថាឱយគេដួលគេមិនដួល
ដួលខ្លួនឯងឱយគេដូរគេមិនដូរដូរតែខ្លួនឯងស្រែកឱយគេចេញ
គេមិនចេញចេញតែខ្លួនឯងឱខ្មែរអើយតោងកិច្ចព្រមព្រៀងប៉ារីស
២៣តុលាឆ្នាំ១៩៩១មកវិញឱយទាល់តែបានទើបខ្មែររស់នោះហើយ
ជាដួងកែវកំណើតកើតជារបស់ខ្មែរប្រលឹងខ្មែរនៅលើថ្ងៃ២៣តុលា
ហ្នឹងឯងអ្នកប្រាជ្ញខ្មែរទាមទារអន្តរជាតិជួយយកមកវិញឱយទាល់តែ
បានទោះចំណាយប៉ុន្មានក៏ដោយកូនខ្មែរជាអ្នកចេញសងឯករាជសេរី
ភាពរបស់ខ្មែរកូនខ្មែរដឹងគុណថ្ងៃ២៣តុលាធ្វើបុណ្យរំលឹកគុណជានិច្ច
បើអន្តរជាតិអនុវត្តយួននឹងចេញពីដីខ្មែរអាចសងទឹកដីខ្មែរមកវិញ

Nov 21, 2014 12:11 AM

អ្នក​អាន​អនាមិក

ហើយធើល្មេចវាចេញអ្នកដែលធើឱយយួនចេញបាន
ទាល់តែtomahawk missileអាមេរិកាំងរួមទាំង
សម្ព័នមិត្តដូចអ៊ីរ៉ាក់ទើបវាចាញ់​ហើយសម្លឹងមើល
អាមេរិកវាមិនចំណាយមកវាយស្រុកយួនត្រួតខ្មែរទេ
វាតុកបណ្ដោយឱយចិនយួនស៊ីខ្មែរអាចក្លាយជាខេត្ត
មួយរបស់ចិនយួនទៅថ្ងៃមុខក៏មិនដឹងព្រោះសត្វនាគពស់ចិន
ក្រពើយួនលេបរិតរួតខ្មែររមួលសួតទៅហើយក៏គ្មានព្រះ
ឥន្ទនៅឯណាជួយ

Nov 20, 2014 11:19 PM

អ្នក​អាន​អនាមិក

ខ្មែរទាំងអស់ត្រូវទទួលស្គាល់រឿងពិតថាខ្មែរចាញ់បោកយួនហើយ
ធើល្មេចវាចេញអ្នកដែលធើឱយយួនចេញបានទាល់តែtomahawk missileអាមេរិកាំងរួមទាំងសម្ព័នមិត្តដូចអ៊ីរ៉ាក់ទើបវាចាញ់​ហើយសម្លឹងមើលអាមេរិកវាមិនចំណាយមកវាយស្រុកយួនត្រួតខ្មែរទេ
វាទុកបណ្ដោយឱយចិនយួនស៊ីខ្មែរអាចក្លាយជាខេត្តមួយរបស់ចិនយួនទៅថ្ងៃមុខក៏មិនដឹងព្រោះសត្វនាគពស់ចិនក្រពើយួនលេបរិតរួតខ្មែររមួលសួតទៅហើយក៏គ្មានព្រះឥន្ទនៅឯណាជួយមហាអំណាចចែកដីគ្នាកាន់កាប់!

Nov 20, 2014 11:16 PM

អ្នក​អាន​អនាមិក

hostage move!

Nov 20, 2014 11:16 PM

មើល​មតិ​ទាំង​អស់.

គេហទំព័រ​ទាំងមូល