មជ្ឈមណ្ឌលសិទ្ធមនុស្សកម្ពុជាស្នើឲ្យអាមេរិកបង្រៀនពីរបៀបកែទម្រង់សន្តិសុខ
2012.11.16
របាយការណ៍ដដែលក៏បានអំពាវនាវឲ្យមានកិច្ចពិភាក្សាថ្នាក់ជាតិស្ដីពីកំណែទម្រង់លើបញ្ហាសន្តិសុខ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ថ្លែងនៅថ្ងៃទី១៦ ខែវិច្ឆិកា ថា ឆ្លៀតឱកាសរដ្ឋមន្ត្រីការពារជាតិសហរដ្ឋអាមេរិក លោក ឡេអ៊ន ប៉ាណេតា នឹងមកប្រជុំកំពូលអាស៊ាន និងអាស៊ីបូព៌ា រដ្ឋាភិបាលកម្ពុជា គួរតែលើកមកពិភាក្សាជាមួយមន្ត្រីការពារជាតិអាមេរិក នោះ ដើម្បីឲ្យគេជួយកំណែទម្រង់សមាសភាពអ្នកការពារជាតិ គឺសុំឲ្យជួយបង្រៀនពីរបៀបកែទម្រង់សន្តិសុខនៅកម្ពុជា។
លោកអះអាងថា បច្ចុប្បន្ននៅក្នុងប្រទេសកម្ពុជា មានការប្រើកម្លាំងការពារជាតិនោះ ជាន់លើគ្នា ក្នុងនោះមានប៉ូលិសផង អាវុធហត្ថផង និងយោធាផង។ ដូចជានៅក្នុងទីក្រុង គួរប្រើស្ថាប័នណា ហើយនៅព្រំដែន គួរប្រើស្ថាប័នណា។ ព្រោះបច្ចុប្បន្ន អ្នកកាន់អាវុធមានទាំងយោធា នគរបាល អាវុធហត្ថ និងកម្លាំងសន្តិសុខតាមក្រុមហ៊ុនឯកជន ក៏អាចប្រើអាវុធការពារដី ឬការពារក្រុមហ៊ុនដែរ។
លោក អ៊ូ វីរៈ ថ្លែងបន្តថា សហរដ្ឋអាមេរិក មានឥទ្ធិពលខ្លាំងនៅពេលដែលនិយាយអំពីដំណើរការការពារសន្តិសុខ ហើយអាចនឹងផ្តល់អត្ថប្រយោជន៍ដល់ប្រទេសកម្ពុជា ប្រសិនបើសហរដ្ឋអាមេរិក អាចប្រើប្រាស់ឥទ្ធិពលរបស់ខ្លួនដើម្បីជំរុញឲ្យរដ្ឋាភិបាលកម្ពុជា ផ្ដួចផ្ដើមកំណែទម្រង់លើវិស័យការពារជាតិ និងសន្តិសុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។