នៅពេលដែលព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក កាន់តែខិតជិតចូលមកដល់ កីឡាករ និងអ្នកនិយមចូលចិត្តគាំទ្រទូកប្រណាំង ឬចំណុះទូក បាននាំគ្នារៀបចំត្រៀមជាស្រេចក្នុងការចូលរួមប្រកួតប្រជែងនាឆ្នាំនេះ។
តើកីឡាករទូកកំពុងត្រៀមអ្វីខ្លះនៅមុនពេលប្រកួតនេះ?
អ្នកស្រី ខែ សុណង មានសេចក្ដីរាយការណ៍អំពីការត្រៀមខ្លួនរបស់កីឡាករទូកប្រណាំងដូចតទៅ៖
កីឡាករទូកប្រណាំងវត្តច័ន្ទបុរីវង្ស ដែលនឹងចូលរួមប្រកួតនាឱកាសព្រះរាជពិធីបុណ្យអុំទូក បាននាំគ្នាចុះទូកអុំសាកល្បង និងសាកកម្លាំងគ្នានៅលើដងទន្លេសាប។
«សំឡេងអុំទូកសាក»
អ្នកឈរនៅលើច្រាំងទន្លេ បានផ្ដល់យោបល់កែតម្រូវកីឡាករនៅលើទូក។
«សំឡេងអុំទូកសាក»
កីឡាករអុំទូក បានចាប់ផ្ដើមអុំសាកល្បងជារៀងរាល់ថ្ងៃ ឬហៅថាសមពីរទៅបីសប្ដាហ៍មុនថ្ងៃប្រកួតមកដល់ គឺថ្ងៃប្រារព្ធព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ថ្ងៃទី៥ ដល់ថ្ងៃទី៧ វិច្ឆិកា។
កីឡាករមួយរូប គឺលោក អឿន វាសនា ជាចំណុះទូករស់នៅស្រុកស្អាង ខេត្តកណ្ដាល ដែលនឹងចូលរួមប្រកួតឲ្យទូកវត្តព្រែកសំរោង បានថ្លែងថា នៅអំឡុងពេលមួយ ឬពីរសប្ដាហ៍មុនប្រកួត ពួកគាត់បានហាត់សមគ្នាអុំនៅដងទន្លេ។ លោកថា សាមគ្គីភាព គឺជាកត្តាសំខាន់បំផុតក្នុងការផ្ដួលដៃគូប្រកួត។ ក្រៅពីនេះ កីឡាករត្រូវមានកម្លាំងពលំមាំមួន។ លោកថា ការចូលរួមប្រកួតឆ្នាំនេះ មិនមែនជាលើកទី១ទេ ពីព្រោះវាជាចំណង់ចំណូលចិត្តរបស់គាត់៖ «ចិត្តចេះតែចង់អុំតែម្ដង យើងដូចថាស្រឡាញ់ទូក ព្រោះអីធ្លាប់អុំទូកតាំងពីតូចមកដល់ពេលនេះ ចេះតែចង់អុំ។ ទី១ យើងទប់កម្លាំង យើងកុំដើរលេងច្រើន យើងអុំយើងចេះសាមគ្គីគ្នាផង ទី១ យើងទប់ជើងច្រវា នរណាខុសចឹងប្រាប់ទៅណា កុំឲ្យច្រឡោត តែច្រឡោតទូកក្រញែងអុំអត់ទៅមុខទេ។ គេងឲ្យគ្រប់គ្រាន់ កុំឲ្យដើរលេងណា ព្រោះកាលណាអត់បានគ្រប់គ្រាន់ យើងចាញ់កម្លាំងគេ ទូកលឿនម៉េចក៏អត់ទៅរួចនឹងគេដែរ ព្រោះយើងចាញ់កម្លាំងគេបាត់ហើយហ្នឹង យើងធ្វើម៉េចកុំហូបចុកស្រា កាលណាហូបចុកស្រា យើងខ្សោយ ហើយទៅអត់រួចទេ យើងសមរាល់ថ្ងៃ»។
មិនខុសគ្នានោះទេ យុវជន រិន ភារម្យ ដែលមានបទពិសោធន៍ប្រកួត ៥លើករួចមកហើយ និងធ្លាប់បានជ័យលាភីលេខ១ផងនោះ ថ្លែងថា គាត់ធ្លាប់បានអុំទូកឈ្មោះព្រះទីនាំងឫទ្ធីក្លាហាន ដែលជាទូកតែងបានឆ្លងកាត់វគ្គកាត់ព្រាត់ គឺជាវគ្គចុងក្រោយ។ យុវជនរូបនេះ បានផ្ដល់បទពិសោធន៍ថា កីឡាករត្រូវតែមានទាំងកម្លាំងកាយ និងកម្លាំងចិត្តល្អព្រមគ្នា ទើបទទួលបានជ័យជម្នះ៖ «ចុះអុំទូក យើងត្រូវតែត្រៀមកម្លាំងកាយកម្លាំងចិត្តទាំងអស់គ្នា ហើយយើងត្រូវបំប៉នកម្លាំង ហើយត្រូវដេកឲ្យគ្រប់គ្រាន់ បើយើងដេកអត់គ្រប់គ្រាន់ ចេះតែទៅណេះទៅណោះ យើងវាមិនកើត។ ដូច្នេះ យើងត្រូវតែខិតខំហ្វឹកហាត់ ហើយខំហាត់កម្លាំងកាយកម្លាំងចិត្តទាំងអស់គ្នា។ បើយើងមិនខំទេ យើងមិនអាចឈ្នះគូប្រកួតបានទេ»។
ប៉ុន្តែ មុនពេលបានឈានទៅដល់ការហាត់សមកម្លាំងនេះ គេបានរៀបចំពិធីបែបសាសនាមួយចំនួនជាស្រេចសិន។
នៅឯវត្តព្រែកសំរោង ស្ថិតនៅក្រុងតាខ្មៅ ខេត្តកណ្ដាល ចៅអធិការវត្តនេះបានរៀបចំពិធីសែនក្រុងពាលីសម្រាប់ទូក ដោយមានការតុបតែងនៅលើទូកចំនួន៣ ហើយដាក់គ្រឿងសំណែន និងរៀបចំគ្រឿងរណ្ដាប់បាយសី៧ថ្នាក់ ដោយមានធូបទៀនផ្កាភ្ញី ម្ហូបអាហារ បាយសម្ល ផ្លែឈើ និងមានក្រុមភ្លេងប្រពៃណីផង។ នៅក្នុងនោះ លោកអាចារ្យក៏ចាប់ផ្ដើមពិធី ដោយការសំបូងសង្រូងដល់បារមីសក្ដិសិទ្ធិ ដើម្បីសុំសិរីសួស្ដី ថែរក្សាដល់ចំណុះជើងទូក ឬកីឡាករទូក។
«សំឡេងលោកតាអាចារ្យ»
ក្រុមចំណុះទូកបានអង្គុយលើកដៃប្រណមបិទភ្នែកសុំសេចក្ដីសុខសប្បាយ កុំឲ្យមានភ័យអាសន្ន និងគ្រោះថ្នាក់នានា។
«សំឡេងលោកតាអាចារ្យ»
ក្រុមភ្លេងប្រពៃណី ក៏បានលេងភ្លេងអន្ទងព្រលឹងម្ចាស់បារមីឲ្យមកកាន់ទូក។ នៅក្នុងពិធីអន្ទងព្រលឹងនោះ គឺមានការលេងភ្លេងអារក្ស៖ «សំឡេង»។
បន្ទាប់ពីពិធីសែនព្រេននេះរួច ក្រុមកីឡាករ និងអ្នកគាំទ្រទូក បាននាំគ្នាបញ្ចុះទូកទៅក្នុងទឹកទន្លេ ដោយស្រែកជយឃោសយកជ័យជម្នះ៖ «សំឡេង»។
កីឡាករមួយរូប ដែលនិយាយបណ្ដើរហើយដៃអង្អែលទូកបណ្ដើរ លោក រិន ភារម្យ និយាយដោយទឹកមុខសើចញឹមៗថា ទូករបស់លោកនឹងទទួលបានជោគជ័យនាឆ្នាំនេះ៖ «បានឈ្នះចិត្តសប្បាយរីករាយចង់ឈ្នះយកកិត្តិយសឲ្យវត្ត»។
នៅក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០១៤ មានទូកង និងទូកមួងជាង ២០០ទូក ចូលរួមប្រកួត។ ទន្ទឹមនឹងនេះ សម្រាប់កីឡាករ និងកីឡាការិនីជាចំណុះទូកវិញជាង ១ម៉ឺន ៧ពាន់នាក់ (១៧.០៦២នាក់) និងកីឡាករបម្រុងជាង ២ពាន់នាក់ (២.០១៥នាក់) ប៉ុន្តែមានការថយចុះជាងឆ្នាំកន្លងទៅ ដែលទូកប្រកួតមានដល់ជាង ៤០០ទូក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។