គណៈកម្មាធិការជាតិរៀបចំបុណ្យជាតិ និងអន្តរជាតិ ចុះហត្ថលេខាកាលពីថ្ងៃទី១៨ ខែមេសា ឆ្នាំ២០១៣ បញ្ជាក់ថា បណ្ដាជនកម្ពុជា ប្រារព្ធព្រះរាជពិធីបុណ្យចម្រើនព្រះជន្មថ្វាយព្រះមហាក្សត្រ ដើម្បីសម្ដែងកតញ្ញូតាធម៌ចំពោះព្រះអង្គ ដែលខិតខំបម្រើការងារជាច្រើនសម្រាប់ប្រយោជន៍ដល់ប្រជាជាតិកម្ពុជា។
ទាក់ទងនឹងបញ្ហានេះ សម្ដេចព្រះសុគន្ធាធិបតី មហាសង្ឃរាជនៃគណៈធម្មយុត្តិកនិកាយ ព្រះអង្គ បួរ គ្រី មានព្រះរាជបន្ទូលថា ព្រះរាជពិធីបុណ្យចម្រើនព្រះជន្មថ្វាយព្រះមហាក្សត្រ ពលរដ្ឋខ្មែរប្រារព្ធព្រះរាជពិធីនេះតាំងពីបុរាណមក ដើម្បីជាការតបគុណចំពោះក្សត្រគ្រងរាជ្យ។ ព្រះអង្គមានព្រះរាជបន្ទូលបន្តថា ព្រះរាជពិធីចម្រើនព្រះជន្មនេះ ប្រារព្ធនៅព្រះបរមរាជវាំង ដោយមានពិធីបែបសាសនាមួយចំនួន ដូចជាពិធីចម្រើនព្រះបរិត្ត និងថ្វាយព្រះសុគន្ធវារី ឬស្រោចទឹកថ្វាយព្រះមហាក្សត្រ។ ក្រៅពីនោះ ព្រះមហាក្សត្រក៏នឹងយាងទៅតាមទីជនបទផ្សេងៗ ដើម្បីបំពេញបុណ្យកុសល។
សៀវភៅ បុញ្ញប្រវត្តិ ដែលចងក្រងឡើងដោយ លោក យិន វន់ សរសេរថា ការធ្វើបុណ្យចម្រើនព្រះជន្មនេះទាក់ទងអត្ថន័យបីយ៉ាង។ ទី១ ជីវិតមហគ្គកម្ម ប្រារព្ធពិធីនេះដើម្បីអបស្ទប ឬជប់លៀងជីវិតដោយធ្វើអំពើល្អផ្សេងៗ។ ទី២ អាយុវឌ្ឍនកម្ម មានន័យថា ប្រារព្ធពិធីនេះដើម្បីចម្រើនព្រះជន្ម ឬអាយុ។ ទីបី អនុបទានកម្ម ប្រារព្ធពិធីនេះឡើងដើម្បីអនុគ្រោះ ឬសន្តោសដោយឲ្យចែកទ្រព្យសម្បត្តិដែលខ្លួនមានជូនដល់អ្នកដែលអត់។
ចំណែកឯផ្នែកអាណាចក្រវិញ នៅក្នុងថ្ងៃប្រារព្ធព្រះរាជពិធីបុណ្យចម្រើនព្រះជន្មថ្វាយព្រះមហាក្សត្រនេះជារៀងរាល់ឆ្នាំ មន្ត្រីធំៗរបស់រាជរដ្ឋាភិបាល នឹងចូលគាល់ព្រះមហាក្សត្រ ដើម្បីថ្វាយព្រះពរ និងថ្វាយរបាយការណ៍ពីការអនុវត្តការងារ ថ្វាយព្រះមហាក្សត្រទៀតផង។ នៅតាមកញ្ចក់ទូរទស្សន៍ក្នុងស្រុក ក៏ចាក់ផ្សាយពីព្រះរាជសកម្មភាពព្រះអង្គចំពោះជាតិមាតុភូមិដែរ ក្នុងនោះមានការយាងទៅកាន់ទីជនបទ ការបំពេញព្រះរាជបូជនីយកិច្ចការងារសង្គមផ្សេងៗ។
សាលារាជធានីភ្នំពេញ ក៏បានប្រកាសថានឹងមានរៀបចំពិធីបាញ់កាំជ្រួចរយៈពេល ៣ថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែឧសភា ពីម៉ោង ១៩យប់តទៅ។ ក្រៅពីនេះ គ្រប់ក្រសួង មន្ទីរ ទីសាធារណៈនានា ក៏មានរៀបចំពាក្យស្លោក និងសារថ្វាយព្រះពរថ្វាយព្រះមហាក្សត្រដែរ។
គណៈកម្មការរៀបចំបុណ្យជាតិ និងអន្តរជាតិ ក៏បានបញ្ជាឲ្យគ្រប់ស្ថាប័នពាក់ព័ន្ធ ឲ្យរៀបចំថែរក្សាសណ្ដាប់ធ្នាប់ ជាពិសេស ជូនពលរដ្ឋ និងរៀបចំសិល្បៈសម័យបុរាណជូនពលរដ្ឋទស្សនាកម្សាន្ត។ នៅក្នុងឱកាសនេះ ព្រះមហាក្សត្រក៏បានសព្វព្រះរាជហរទ័យប្រោសព្រះរាជទានការលើកលែង និងបន្ធូរបន្ថយទោសដល់ទណ្ឌិតជាង ១០០នាក់ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។