សមាគម​ទេសចរ​ណ៍ត្អូញត្អែរ​ថា​ ភ្ញៀវ​​ទេសចរ​ចិន​​មិន​បាន​​ផ្ដល់​​ប្រយោជន៍​​ធំ​​ដល់​​កម្ពុជា​​ទេ

ដោយ វ៉ែន សុមេធ
2019-09-12
អ៊ីម៉ែល
មតិ
Share
បោះពុម្ព
ទេសចរ​ដើរ​កម្សាន្ត​នៅ​ប្រាសាទ​អង្គរវត្ត ខេត្ត​សៀមរាប ​ក្នុង​ពិធី​បុណ្យ​ចូល​ឆ្នាំ​ចិន-វៀតណាម ឆ្នាំ​២០១៨។
ទេសចរ​ដើរ​កម្សាន្ត​នៅ​ប្រាសាទ​អង្គរវត្ត ខេត្ត​សៀមរាប ​ក្នុង​ពិធី​បុណ្យ​ចូល​ឆ្នាំ​ចិន-វៀតណាម ឆ្នាំ​២០១៨។
រូបថត​ក្រសួង​ទេសចរណ៍

សមាគម​មគ្គទេសក៍​អង្គរ​អះអាង​ថា ទោះបី​ក្រសួង​ទេសចរណ៍​អះអាង​ថា ភ្ញៀវ​ទេសចរ​មក​កម្ពុជា​មាន​ចំនួន​កើន​ឡើង​ក៏ដោយ ក៏​ពួកគេ​មិនសូវ​ទទួល​បាន​ផល​ប្រយោជន៍​ដែរ ជាពិសេស​ភ្ញៀវ​ទេសចរ​ចិន។ ប្រធាន​សមាគម​មគ្គទេសក៍​អង្គរ ខេត្ត​សៀមរាប លោក ខៀវ ធី និយាយ​ថា ភ្ញៀវ​ទេសចរ​ចិន ដែល​មកលេង​ស្រុក​ខ្មែរ មិនបាន​ផ្តល់​ប្រាក់​ដល់​ប្រជាពលរដ្ឋ​ខ្មែរ​ទេ ព្រោះ​ពួកគេ​មិនសូវ​ត្រូវការ​អ្នក​​មគ្គទេសក៍ និង​​អ្នក​បើកបរ។

លោក ខៀវ ធី បន្ត​ថា ភ្ញៀវ​ទេសចរ​ជនជាតិ​ផ្សេង​វិញ តែងតែ​ផ្ដល់​ប្រយោជន៍ ដល់​ប្រជាពលរដ្ឋ​កម្ពុជា ប៉ុន្តែ អ្នក​ទេសចរ​ចិន​ខុសគ្នា​ស្រឡះ។ លោក​ថា អ្នក​ទេសចរ​​មក​ពី​​បស្ចិម​ប្រទេស ច្រើនតែ​មក​ជា​គ្រួសារ ជា​មិត្តភ័ក្ដិ​ពីរ​បី​នាក់ ពួកគាត់​ត្រូវការ​មគ្គុទ្ទេសក៍​និង​អ្នកបើកបរ​រថយន្ត​ច្រើន៖ «ជនជាតិ​ចិន គាត់​មក​ទៅ គាត់​ត្រូវការ Guide ១ និង​តៃកុង​ឡាន ១​នាក់ ហើយ​ដើរ​ចូល​ទៅ​ញុំា​អាហារ​ជន​ជាតិ​ចិន​របស់​គាត់ ហើយ​ចូល​ទៅ Shopping នៅ​ហាង​ជនជាតិ​ចិន របស់​គាត់ ហើយ​បើ​ជនជាតិ​មកពី​បស្ចិម​ប្រទេស និង​ជនជាតិ​មកពី​ប្រទេស​ដទៃ​ទៀត តែងតែ​​ដើរ​​មើល​​ផ្សារ ដើរ​​ទិញ​​តាម​​តូប​​មួយៗ ​ទៅ។ គាត់​​ជិះ​​តាក់ស៊ី​​ទៅ គឺ​​វា​មាន​ការ​​ខុស​គ្នា​​អ៊ីចឹង»

របាយការណ៍​របស់​ក្រសួងទេសចរណ៍ ផ្សាយ​នៅ​ថ្ងៃ​ពុធ ទី​១១ ខែ​កញ្ញា​នេះ​ថា ប្រទេស​កម្ពុជា​បាន​ទទួល​ភ្ញៀវ​ទេសចរ​ចិន​ចំនួន ១,៥ លាន​នាក់​ក្នុង​រយៈពេល ៧ខែ​​ដំបូង​នៃ​ឆ្នាំ ២០១៩ កើន​ឡើង ៣៧ភាគ​រយ បើ​ប្រៀបធៀប​នឹង​រយៈពេល​ដូចគ្នា​កាលពី​ឆ្នាំមុន។ របាយការណ៍​នេះ​អះអាង​ថា ប្រទេស​ចិន​នៅតែ​ជា​ប្រភព​ធំ​បំផុត​នៃ​ភ្ញៀវ​ទេសចរ​បរទេស ទៅកាន់​ប្រទេស​ក្នុង​តំបន់​អាស៊ីអាគ្នេយ៍​មួយ​នេះ​ ដែល​មាន​ចំនួន ៣៩ភាគ​រយ​នៃ​ចំនួន​ភ្ញៀវ​ទេសចរ​បរទេស​សរុប​មកកាន់​ប្រទេស​នេះ ក្នុង​អំឡុង​ពេល​ពី​ខែ​មករា​ដល់​ខែ​កក្កដា។ របាយការណ៍​បញ្ជាក់​ថា ភ្ញៀវ​ទេសចរ​អន្តរជាតិ​សរុប​ចំនួន ៣,៨៤ លាន​នាក់​បាន​ធ្វើ​ដំណើរ​មក​ប្រទេស​កម្ពុជា​ក្នុងអំឡុងពេល ៧ខែ​ដំបូង​នៃ​ឆ្នាំនេះ គឺ​កើន​ឡើង ១១,១០ភាគ​រយ​ធៀប​នឹង​រយៈពេល​ដូចគ្នា​កាលពី​ឆ្នាំមុន​។ កាលពី​ឆ្នាំមុន​ប្រទេស​កម្ពុជា​បាន​ទទួល​ភ្ញៀវ​ទេសចរ​បរទេស​ចំនួន ៦,២ លាន​នាក់ ក្នុង​នោះ​មាន​ជនជាតិ​ចិន ២លាន​​នាក់​ ដែល​​មាន​​ប្រាក់​​ចំណូល​​សរុប ៤,៣៥ពាន់​​លាន​​ដុល្លារ​សហរដ្ឋអាមេរិក។

ទោះ​បី​យ៉ាងណា លោក ខៀវ ធី កត់សម្គាល់​ថា ភ្ញៀវ​ទេសចរ​នៅ​ខេត្ត​សៀមរាប ​ធ្លាក់​ចុះ​ប្រមាណ​ ១០​ភាគរយ​ចាប់​តាំង​ពី​ខែ​ឧសភា មក​ដល់​ខែ​កញ្ញា​ឆ្នាំនេះ ហើយ​ទេសចរណ៍ ជនជាតិ​ចិន​ក៏​មាន​ការ​ធ្លាក់​ចុះ​ច្រើន​ដែរ​ក្នុង​រយ​:​ពេល​ដូចគ្នា​នេះ​។ លោក​ថា មិន​ចំពោះតែ​ស្រុក​ខ្មែរ​ទេ សូម្បីតែ​ប្រទេស​ថៃ ប្រទេស​វៀតណាម ទូទាំង​ពិភពលោក ជនជាតិ​ចិន​មិនសូវ​ធ្វើដំណើរ ដើរ​កម្សាន្ត​ដូច​កាលពី​ឆ្នាំមុន​ទេ៖ «បើ​យើង​និយាយ​អំពី​ទេសចរ​ចិន ចាត់ទុកថា​សេដ្ឋកិច្ច​របស់​គាត់​ហាក់​ដូច​ជា​ មានការ​ធ្លាក់​ចុះ​នៅ​ឆ្នាំ២០១៩ នេះ ប៉ុន្តែ​លោក​រដ្ឋមន្ត្រី ក្រសួង​ទេសចរ កម្ពុជា លោក​បាន​ស្តី​បន្ទោស​ទៅលើ​ការ​លក់​កញ្ចប់​ទេសចរណ៍ ហើយ​តម្កើង​ឲ្យ​ភ្ញៀវ​មក​ទិញ​ទំនិញ​នៅ​ស្រុក​ខ្មែរ​ឡើងថ្លៃ ហើយ​នេះ​ជា​កត្តា ឲ្យ​ជនជាតិ​ចិន​ធ្លាក់​ចុះ នៅ​ក្នុង​ខេត្ត​សៀមរាប​យើង»

លោក ខៀវ ធី និយាយ​ថា មគ្គទេសក៍​របស់​គាត់​ធ្លាប់​ដើរ​បម្រើ​ភ្ញៀវ ជាទូទៅ​ពី ១៥ ទៅ ១៨ថ្ងៃ ក្នុង ១ខែ កាលពី​ឆ្នាំមុន។ ប៉ុន្តែ​ឆ្នាំនេះ ដើរ​បានតែ​ពី ៥ ទៅ ៧ថ្ងៃ យ៉ាង​​ច្រើន ក្នុង ​១​ខែ។

លោក​សង្កេត​ឃើញ​ថា មូលហេតុ នៃ​ការ​ធ្លាក់​ចុះ​ភ្ញៀវ​ទេសចរ​នេះ គឺ​ដោយសារ​សភាពការណ៍​នយោបាយ​នៅ​ស្រុក​ខ្មែរ​មិន​សូវ​​ល្អ ហើយ​ភ្ញៀវ​ទេសចរណ៍​មកពី​បស្ចិម​ប្រទេស មានការ​ច្រណែន ដោយសារ​កម្ពុជា​បើក​ចំហ​ឲ្យ​មានការ​លំហូរ​ចូល​ជន​ជាតិ​ចិន​ច្រើនពេក។

លោក ខៀវ ធី បន្ត​ថា​រដ្ឋាភិបាល​កម្ពុ​ជា គួរតែ​រៀបចំ​ឲ្យ​បាន​ល្អ​នៅ​ច្រក​ព្រំដែន​ជាមួយ​ប៉ូលិស​​អន្តោប្រវេសន៍ សូម​មេត្តា​ជួយ​ផ្ដល់​ការងារ​ងាយស្រួល​ដល់​​ភ្ញៀវ​ទេសចរណ៍ ព្រោះ​ភ្ញៀវ​ភាគច្រើន​បាន​រអ៊ូរទាំ​ថា ​ប៉ូលិស​អន្តោប្រវេសន៍​តាម​ច្រក​ព្រំដែន មិនសូវ​សហការ​ជាមួយ​ពួកគាត់ មិនសូវ​សប្បាយចិត្ត​ចំពោះ​ពួក​គាត់។

លោក​ថា ប្រធាន​មន្ទីរ​ទេសចរ​ខេត្ត​សៀមរាប បាន​និយាយ​ក្នុង​អង្គប្រជុំ ជាមួយ​សមាគម​មគ្គទេសក៍​ទេសចរ​កាលពី​ថ្ងៃទី១០ កញ្ញា​ថា ភ្ញៀវ​ទេសចរ​នៅ​ខេត្ត​សៀមរាប មានការ​ធ្លាក់​ចុះ​រង្វង់ ១០ភាគ​រយ នេះ​បើ​តាម​របាយការណ៍​របស់​មន្ទីរ​ទេសចរ​ខេត្ត​សៀមរាប។

អាស៊ីសេរី​បាន​ទាក់ទង លោក ង៉ូវ សេងកាក់ ប្រធាន​មន្ទីរ​ទេសចរ​ខេត្ត​សៀមរាប កាល​ពី​ថ្ងៃ​ពុធ ទី១១ ខែ​កញ្ញា នេះ ប៉ុន្តែ​លោក​ថា ជាប់រវល់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល