ពលរដ្ឋ​​ក្រីក្រ​មួយ​ចំនួន​​​នៅ​តែ​ត្អូញត្អែរ​ថា​ពួកគេ​​​មិន​បាន​ប្រាក់​​ឧបត្ថម្ភ​ពី​រដ្ឋាភិបាល​អំឡុង​វិបត្តិ​ជំងឺ​កូវីដ១៩

ដោយ សុជីវី
2020-08-28
អ៊ីម៉ែល
មតិ
Share
បោះពុម្ព
អ្នក​រើស​សំរាម​កំពុង​រុក​រក​វត្ថុ​មាន​តម្លៃ​នៅ​ក្នុង​គំនរ​សំរាម​ជើងឯក ក្នុង​ខណ្ឌ​ដង្កោ រាជធានី​ភ្នំពេញ ដើម្បី​លក់​យក​ប្រាក់​ចិញ្ចឹម​ជីវិត។ រូបថត​ថ្ងៃ​ទី​២ ខែ​ឧសភា ឆ្នាំ​២០១៥
អ្នក​រើស​សំរាម​កំពុង​រុក​រក​វត្ថុ​មាន​តម្លៃ​នៅ​ក្នុង​គំនរ​សំរាម​ជើងឯក ក្នុង​ខណ្ឌ​ដង្កោ រាជធានី​ភ្នំពេញ ដើម្បី​លក់​យក​ប្រាក់​ចិញ្ចឹម​ជីវិត។ រូបថត​ថ្ងៃ​ទី​២ ខែ​ឧសភា ឆ្នាំ​២០១៥
RFA/Sireymuny

ប្រជាពលរដ្ឋ​មួយ​ចំនួន​​ត្អូញត្អែរ​ថា​ពួកគាត់​មាន​ជីវភាព​​ក្រីក្រ​​លំបាក​ខ្លាំង​ ក៏​ប៉ុន្តែ​​​អាជ្ញាធរ​មិន​បាន​​​ដាក់​ឈ្មោះ​ពួកគាត់​ក្នុង​បញ្ជី​ជន​ក្រីក្រ​ ដើម្បី​ទទួល​ប្រាក់​ឧបត្ថម្ភ​​ពី​រដ្ឋាភិបាល​ឡើយ។ ពលរដ្ឋ​​ទាំង​នោះ ខ្លះ​នាំ​គ្នា​ដើរ​រើស​អេតចាយ​លក់​ និង​ខ្លះ​ទៀត​ដើរ​រក​ខ្យង​ចំណិត​ធ្វើ​​ម្ហូប​​ប្រចាំ​ថ្ងៃ ស្រប​ពេល​ដែល​​រដ្ឋាភិបាល​បាន​បន្ថែម​​ថវិកា​ចំនួន ៣០​លាន​ដុល្លារ​ ដើម្បី​​ឧបត្ថម្ភ​ដល់​ជន​ក្រី​ក្រ​ អំឡុង​ពេល​​​មាន​វិបត្តិ​ជំងឺ​កូវីដ១៩។

ប្រជាពលរដ្ឋ​ម្នាក់​រស់​នៅ​ក្រុង​ប៉ោយប៉ែត ខេត្ត​បន្ទាយមានជ័យ​ លោក ទុំ រ៉េន ថ្លែង​ថា គ្រួសារ​របស់​លោក​មាន​សមាជិក​៩​នាក់​ អត់​ការងារ​ជាង ៤ខែ​ហើយ​ ដោយសារ​ការ​រាតត្បាត​ជំងឺ​កូវីដ១៩។ បច្ចុប្បន្ន​​លោក​បាន​នាំ​ប្រពន្ធ​និង​កូន​ដើរ​រើស​អេតចាយ​លក់​យក​ប្រាក់​ទិញ​ស្បៀង​អាហារ​ហូប​ចុក​ ក៏ប៉ុន្តែ​រក​ប្រាក់​ចំណូល​​មិន​គ្រប់​សម្រាប់​ដោះស្រាយ​ជីវភាព​គ្រួសារ​នោះ​ទេ។​លោក​បញ្ជាក់​ថា ​ថ្វីត្បិត​តែ​ជីវភាព​គ្រួសារ​លោក​រក​ព្រឹក​ខ្វះ​ល្ងាច​យ៉ាង​នេះ​ក្ដី​ ក៏​អាជ្ញាធរ​មិន​បាន​​បញ្ចូល​ឈ្មោះ​​លោក​ក្នុង​បញ្ជី​ជន​ក្រីក្រ​ ដើម្បី​បើក​ប្រាក់​ឧបត្ថម្ភ​ពី​រដ្ឋាភិបាល​ឡើយ៖ «ដាច់​ហ្នឹង​ហើយ​អត់​មាន​អី​ធ្វើ​សោះ​បណ្ដោយ​ បើ​អត់​មាន​អេតចាយ​ទៀត​ ចប់​​តែ​ម្ដង។បើ​អត់​មាន​រក​ការងារ​អី​បាន​ធ្វើ​សោះ​ បើ​សំណង់​ក៏​អត់​មាន​​អី​ក៏​អត់​បាន​ធ្វើ​ រាល់​ថ្ងៃ​នេះ​កុំ​តែ​បាន​សាសនា​យេស៊ូគ្រិស្ត​ គេ​ឱ្យ​អង្ករ​មួយ​ខែ ២៥គីឡូ​ក្រាម។ អាជ្ញាធរ​អត់​ដែល​ឃើញ​ឱ្យ​អី​ផង​ តាំង​ពី​​បិទ​ច្រក​ព្រំដែន​មក​កុំ​តែ​បាន​យេស៊ូ​ហ្នឹង​ កុំ​អី​ងាប់​ហើយ។ ខ្ញុំ​អត់​មាន​កុហក​អី​ផង​ ក្រុម​គ្រួសារ​បងប្អូន​ខ្ញុំ​អត់​ដែល​បាន​អី​ផង​។​ខ្ញុំ​ក្រី​រក​តែ​ម៉ូតូ​មួយ​មិន​មាន​ជិះ​ផង​ មាន​តែ​ម៉ូតូ​សណ្ដោង​អេតចាយ​មួយ​កញ្ចាស់»

លោក​បន្ថែម​ថា ​មាន​ប្រជាពលរដ្ឋ​ជា​ច្រើន​គ្រួសារ​ទៀត​ដែល​ប្រកប​របរ​លីសែង​និង​ កម្មករ​អូស​រទេះ​នៅ​តំបន់​ច្រក​ទ្វារ​ព្រំដែន​​អន្តរជាតិ​ប៉ោយប៉ែត ​មិន​បាន​ទទួល​ប្រាក់​ឧបត្ថម្ភ​ពី​រដ្ឋាភិបាល​ដូច​គ្នា ដោយសារ​ពួក​គាត់​តែង​តែ​ចូល​រួម​តវ៉ា​​ទាមទារ​ឱ្យ​អាជ្ញាធរ​បើក​ច្រក​ទ្វារ​ព្រំដែន​កម្ពុជា​និង​ថៃ។

ចំណែក​​​ប្រជាពលរដ្ឋ​នៅ​ភូមិ​ព្រែក​តាវេន​ ឃុំ​ព្រែក​ជីក​ ស្រុក​រុក្ខគិរី ខេត្ត​បាត់ដំបង​ លោក​ស្រី​ឆាត ឈឿន វិញ​ ប្រាប់​ថា ​​គ្រួសារ​របស់​លោក​ស្រី​មាន​សមាជិក​៨​នាក់​​អត់​ការងារ​ធ្វើ​​ប្រមាណ​៥​ខែ​មក​ហើយ​ ។​លោក​ស្រី​បន្ត​ថា​ សព្វ​ថ្ងៃ​កូន​របស់​លោក​ស្រី​​នាំ​គ្នា​ដើរ​​រាវ​ខ្យង និង​ខ្ចៅ ​តាម​​ប្រឡាយ​ទឹក​យក​មក​​ចំអិន​ធ្វើ​អាហារ​​ហូប​ចុក​ប្រចាំថ្ងៃ​ ព្រោះ​គ្មាន​ប្រាក់​​ទិញ​ស្បៀង​​ជា​ច្រើន​ថ្ងៃ​មក​ហើយ​​​ ។លោក​បញ្ជាក់​ថា ​​​​​ អាជ្ញាធរ​មិន​បាន​​ដាក់​ឈ្មោះ​​លោក​ស្រី​ក្នុង​បញ្ជី​ជន​ក្រីក្រ​ ដើម្បី​ទទួល​ប្រាក់​ឧបត្ថម្ភ​ពី​រដ្ឋាភិបាល​ឡើយ​ ហើយ​លោក​ស្រី​ក៏​មិន​ដែល​បាន​ទទួល​អំណោយ​ពី​អាជ្ញាធរ​ផង​ដែរ៖ «វា​ពិបាក​ណាស់​ កូន​មក​ពី​ប្រឡាយ​រាវ​បាន​ខ្ចៅ​ខ្យង​មិញ​នៅ​ត្រាំ​ក្នុង​ឡាំង​ល្ងាច​ឡើង​មិន​ដឹង​ធ្វើ​អី​ហូប​ទេ​ ចេះ​ដើរ​រាវ​ខ្យង​​រាវ​ខ្ចៅ​អីចឹង​ទៅ​បើ​ថា​មាន​កូន​មាន់​​ទ្រើសៗ ធ្វើ​ហូប​អីចឹង​ទៅ​ បើ​អត់​មាន​អត់​ទៅ​។​ខ្ញុំ​អាណិត​តែ​យាយ​និង​តា​​ចេះ​តែ​ហូប​ទៅ​បើ​អត់​មាន​អី​ហូប​ផង​។ខ្ញុំ​មាន​អារម្មណ៍​ចេះ​តែ​ពិបាក​ចិត្ត​គ្មាន​អី​ហូប​អីចឹង​ហើយ​កូន​ចៅ​អី​នៅ​ជុំ​គ្នា​ ដេក​យប់​ឡើង​ខ្ញុំ​ចេះ​តែ​គិត​មិន​ដឹង​ទៅ​រក​អី​ទេ ។​អ្នក​នៅ​ម្ដុំ​ខ្ញុំ​អត់​បាន​ប្រាក់​ឧបត្ថម្ភ​ច្រើន​ដែរ​ ដូច​ថា​វា​ប្រកាន់​បក្ស​ពួក​យ៉ាប់​ណាស់»

ស្រប​ពេល​ដែល​ពលរដ្ឋ​មួយ​ចំនួន​មិន​ទាន់​ទទួល​បាន​ប្រាក់​ជំនួយ​នេះ រដ្ឋាភិបាល​បាន​ទម្លាក់​ថវិកា​ជុំ​ទី២ ចំនួន ៣០លាន​ដុល្លារ​អាមេរិក​បន្ថែម​ទៀត ដើម្បី​​ឧបត្ថម្ភ​ដល់​ប្រជាពលរដ្ឋ​ក្រីក្រ ដែល​រង​ផល​ប៉ះពាល់​ពី​វិបត្តិ​ជំងឺ​កូវីដ១៩។ សេចក្ដី​ប្រកាស​របស់​ក្រសួង​សេដ្ឋកិច្ច​និង​ហិរញ្ញវត្ថុ​ចុះ​ថ្ងៃ​ទី២៥ សីហា​ថា ថវិកា​ទាំង​នេះ​​ឧបត្ថម្ភ​​ដល់​ប្រជាពលរដ្ឋ​ក្រីក្រ​​​​ចំនួន ២លាន ៦សែន​នាក់​​​នៅ​ក្នុង​​​ខែ​សីហា​ និង​ចាប់​ផ្ដើម​អនុវត្ត​ពី​ថ្ងៃ​ទី២៥ សីហា​រហូត​មក។

ក្រុម​ប្រជាពលរដ្ឋ​ទាំង​នេះ​​អំពាវនាវ​ សុំ​ឱ្យ​អាជ្ញាធរ​បញ្ចូល​ឈ្មោះ​ពួក​គេ​ក្នុង​បញ្ជី​ជន​ក្រីក្រ ទទួល​ប្រាក់​ឧបត្ថម្ភ​ពី​រដ្ឋាភិបាល​នៅ​ជុំ​ទី២ នេះ ដើម្បី​បាន​ប្រាក់​មក​ដោះស្រាយ​ជីវភាព​គ្រួសារ​ដែល​កំពុង​ខ្វះខាត។

អាស៊ី​សេរី​មិន​អាច​ទាក់​ទង​អភិបាល​ខេត្ត​បាត់ដំបង​ ងួន រតនៈ​ និង​អភិបាល​ខេត្ត​បន្ទាយមានជ័យ​ លោក អ៊ុំ រាត្រី ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បាន​ទេ​នៅ​ថ្ងៃ​ទី២៧ សីហា​ ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

ប៉ុន្តែ​រដ្ឋមន្ត្រី​ក្រសួង​ផែនការណ៍ លោក ឆាយ ថន មាន​ប្រសាសន៍​នៅ​ក្នុង​សន្និសីទកាសែត​កាល​ពី​ថ្ងៃ​ទី៦ កក្កដា​ថា មាន​ខេត្ត​ចំនួន១៣ ដែល​មាន​បញ្ហា​ខ្លាំង​ជាង​គេ​រឿង​​​​ការ​ដាក់បញ្ចូល​ឈ្មោះ​ពលរដ្ឋ​​ក្រីក្រ​ ក្នុង​នោះ​​ពលរដ្ឋ​ពុំ​​មាន​ប័ណ្ណ​ក្រីក្រ​​ មាន​ជិត ៦០០​ករណី​ និង​ប័ណ្ណ​រហែក ឬ​បាត់ មាន​ជិត ៣ពាន់​ករណី។ លោក​ឱ្យ​ដឹង​ថា អំឡុង​​ការ​រាតត្បាត​ជំងឺ​កូវីដ១៩ នេះ មាន​ប្រជា​ពលរដ្ឋ ប្រមាណ​៥៦ម៉ឺន​គ្រួសារ ស្មើ​នឹង​ជាង ២លាន ៣សែន​នាក់​ក្រីក្រ គឺ​កើន​ឡើង ២ម៉ឺន ៤ពាន់​គ្រួសារ។ លោក​បញ្ជាក់​ថា ការ​កំណើត​អត្តសញ្ញាណ​ជន​ក្រី​ធ្វើ​ឡើង​​ដោយ​ល្អិតល្អន់ ដើម្បី​ជ្រើស​យក​អ្នក​ក្រ​ពិត​ប្រាកដ៖ «អីចឹង​ទេ​ការ​ដែល​ឧបត្ថម្ភ​ប្រាក់​បាន​ឬ​មិន​បាន ​គឺ​អាស្រ័យ​ការ​កំណត់​ពិតប្រាកដ ណែ​គ្រួសារ​ហ្នឹង​ក្រីក្រ​ពិតប្រាកដ​។អ្វី​ដែល​ជា​ប្រមុខ​រដ្ឋាភិបាល​លោក​ចង់​បាន​គឺ​ថា ធ្វើ​យ៉ាង​ការ​ឧបត្ថម្ភ​សាច់​នេះ​ឱ្យ​ចំ​​ទិស​ដៅ​ឱ្យ​ដល់​គោល​ដៅ​​អ្នក​ក្រីក្រ​ពិតប្រាកដ​ មិន​មាន​ការ​ស៊ុមគ្រលុំ​គ្នា​ដើម្បី​បង្កើត ទៅ​ជា​រឿង​មួយ​បាន​ប័ណ្ណ​ក្រី​ក្រ​ហ្នឹង​រួច​ហើយ ទៅ​បើក​លុយ​ពី​រដ្ឋាភិបាល​នោះ​ទេ»

ទោះ​ជា​យ៉ាង​ណា​ប្រធាន​អង្គការ​តម្លាភាព​កម្ពុជា (TIC) លោក​ ប៉ិច ពិសី កត់​សំគាល់​ថា ការ​ផ្ដល់​ប្រាក់​ឧបត្ថម្ភ​ដល់​ពលរដ្ឋ​ក្រីក្រ​នៅ​ជុំ​ទី១ រង​ការ​រិះគន់​ពី​ប្រជា​ពលរដ្ឋ​ជា​ច្រើន​កន្លែង​ ដោយ​ពលរដ្ឋ​ក្រីក្រ​ពិត​ប្រាកដ​មិន​បាន​ទទួល​ប្រាក់​ឧបត្ថម្ភ​នេះ​ឡើយ។​លោក​បញ្ជាក់​ថា ​រដ្ឋាភិបាល​គួរ​តែ​ផ្ដល់​ប្រាក់​ឧបត្ថម្ភ​ឱ្យ​បាន​ស្មើភាព​គ្នា ពីព្រោះ​ជា​ថវិកា​រដ្ឋ ដែល​បាន​មក​ពី​ការ​បង់ពន្ធ​របស់​ប្រជាពលរដ្ឋ៖ «ខ្ញុំ​គិត​ថា​ ដំបូង​គឺ​ការ​កំណត់​អត្តសញ្ញាណ​ នៃ​គ្រួសារ​ដែល​គាត់​ត្រូវ​ទទួល​ថវិកា​ហ្នឹង​ ហើយ​ធ្វើ​យ៉ាង​ដូចម្ដេច​ យើង​ត្រូវ​តែ​មាន​ការ​ចូល​រួម​ជា​មួយ​ភាគី​ពាក់ព័ន្ធ តាំង​អាជ្ញាធរ​មូលដ្ឋាន​​ ហើយ​មាន​អង្គការ​សង្គម​ស៊ីវិល​ថ្នាក់​មូលដ្ឋាន គឺ​ជា​ប្រសើរ​។ កាល​ណា​យើង​កំណត់​​អ្នក​ដែល​ត្រូវ​ទទួល​បាន​ថវិកា​ហ្នឹង​ឱ្យ​ច្បាស់​​ដោយ​មិន​មាន​ការ​រើសអើង គឺ​យើង​ប្រើប្រាស់​លុយ​ហ្នឹង​បាន​ហើយ​ បាន​ន័យ​ថា​លុយ​ហ្នឹង​ត្រូវ​ចំ​គោល​ដៅ​ហើយ​មាន​ប្រសិទ្ធភាព​ខ្ពស់»

កន្លងមក នៅ​ជុំ​ទី​១​រដ្ឋាភិបាល​បាន​​ទម្លាក់​ថវិកា​​​​ប្រមាណ ៥០លាន​ដុល្លារ ឧបត្ថម្ភ​ដល់​ប្រជាពលរដ្ឋ​នៅ​ខែ​មិថុនា និង​ខែ​កក្កដា។

ថវិកា​​ទាំង​នេះ គឺ​ពលរដ្ឋ​ទទួល​បាន​ប្រាក់​ខុសៗ គ្នា​ទៅតាម​កម្រិត​នៃ​ភាព​ក្រីក្រ និង​ទីតាំង​ដែល​ពួក​គាត់​រស់​នៅ។ ជា​ឧទាហរណ៍ បើ​រស់នៅ​ជនបទ​ ពួក​គាត់​អាច​ទទួល​​បាន​យ៉ាង​តិច​បំផុត ២០ដុល្លារ​អាមេរិក ហើយ​បើ​នៅ​ទីប្រជុំ​ជន និង​រាជធានី​ភ្នំពេញ ពួក​គាត់​អាច​បាន​ទាប​បំផុត ៣០ដុល្លារ​អាមេរិក។ ពលរដ្ឋ​ក្រីក្រ​នឹង​ទទួល​បាន​ប្រាក់​ឧបត្ថម្ភ​ជាក់​ស្ដែង​ច្រើន​ជាង​នេះ ដោយសារ​ការ​​បូក​ថែម​សមាជិក​គ្រួសារ​ម្នាក់ៗ និង​លក្ខខណ្ឌ​មួយ​ចំនួន​ទៀត។

ធនាគារ​ពិភពលោក​ព្យាករណ៍​កាល​ពី​ពេល​ថ្មីៗ​នេះ​ថា ពលរដ្ឋ​ខ្មែរ​ជិត​២ លាន​នាក់ នឹង​ធ្លាក់​ខ្លួន​ក្រីក្រ​ដោយ​សារ​វិបត្តិ​ជំងឺ​កូវីដ-១៩ ក្នុង​ឆ្នាំ២០២០ នេះ ធ្វើ​ឱ្យ​ចំនួន​អ្នក​ក្រ​នៅ​កម្ពុជា​នឹង​កើន​ឡើង​ដល់៤ លាន​នាក់ ក្នុង​ចំណោម​ពលរដ្ឋ​សរុបជាង១៥ លាន​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល