ធនាគារពិភពលោក World Bank ព្យាករណ៍ថា កំណើនសេដ្ឋកិច្ចកម្ពុជា ក្នុងឆ្នាំ២០២០នេះ នឹងធ្លាក់ចុះយ៉ាងគំហុក មកនៅត្រឹមតែ ២,៥%។ ការព្យាករណ៍នេះ ធ្វើឡើងនៅក្នុងរបាយការណ៍បច្ចុប្បន្នភាពប្រចាំឆ្នាំ ផ្សាយកាលពីថ្ងៃទី៣០ ខែមីនា ស្ដីពីសេដ្ឋកិច្ចក្នុងតំបន់អាស៊ីបូព៌ា និងប៉ាស៊ីហ្វិក ក្នុងអំឡុងពេលវិបត្តិ ជំងឺរាតត្បាត កូវីដ-១៩។
ធនាគារពិភពលោកពន្យល់ថា សេដ្ឋកិច្ចកម្ពុជា បានរងការប៉ះទង្គិចខ្លាំង ដោយសារតែការរីករាលដាលនៃជំងឺកូវីដ-១៩។ បញ្ហានេះបណ្ដាលឱ្យមានការថមថយចុះខ្លាំង ក្នុងវិស័យចម្បងៗជួយជំរុញឱ្យមានកំណើនសេដ្ឋកិច្ច ក្នុងត្រីមាសទីមួយ ឆ្នាំ២០២០នេះ។ ធនាគារពិភពលោក វាយតម្លៃថា ហានិភ័យបណ្ដាលឱ្យធ្លាក់ចុះកំណើនសេដ្ឋកិច្ចកម្ពុជាក្នុងឆ្នាំ២០២០នេះ រួមមាន ការរីករាលដាលនៃជំងឺកូវីដ១៩ នៅក្នុងស្រុក ការអូសបន្លាយការធ្លាក់ចុះនៃ ចំនួនភ្ញៀវទេសចរ និងការកែសម្រួលទីផ្សារអចលនទ្រព្យជាដើម។
យ៉ាងណាក៏ដោយ ធនាគារពិភពលោក ព្យាករណ៍ថា កំណើនសេដ្ឋកិច្ចកម្ពុជា អាចនឹងងើបមកវិញ ក្នុងឆ្នាំ២០២១ មកនៅ ៥,៩% ក្រោមសេណារីយ៉ូជាក់លាក់។ ធនាគារពិភពលោក ផ្ដល់អំណះអំណាងថា វិស័យទេសចរណ៍ រងការប៉ះទង្គិចខ្លាំង ជាងគេបំផុត ក្នុងចំណោមវិស័យដទៃទៀត ដែលទ្រទ្រង់សេដ្ឋកិច្ចកម្ពុជា គឺដោយសារតែការរីករាលនៃជំងឺកូវីដ-១៩។ ដូចគ្នានេះដែរ ធនាគារថា វិស័យឧស្សាហកម្មកាត់ដេរ ក៏រងការរង្គោះរង្គើខ្លាំង ដោយសារតែគ្មានតម្រូវការជាសាកល ព្រមទាំងការដកហូតដោយផ្នែក នៃប្រព័ន្ធអនុគ្រោះពន្ធ «គ្រប់មុខទំនិញទាំងអស់លើកលែងតែអាវុធ» ហៅកាត់ថា EBA របស់សហភាពអឺរ៉ុប។ ផលប៉ះពាល់នេះ ក៏បន្តរាលដាល ដល់វិស័យសំណង់ និងអចលនទ្រព្យ ខណៈភាពចលាចលក្នុងទីផ្សារហិរញ្ញវត្ថុ ក៏អាចធ្វើឱ្យប៉ះពាល់ខ្លាំងដល់កំណើនសេដ្ឋកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។