កម្មករ​ កាស៊ីណូ ​​នៅ​ខេត្ត​ព្រះសីហនុ ជិត ៨ពាន់​នាក់ បាត់​បង់​ការងារ​ធ្វើ​ ក្រោយ​ការ​​បិទ​​​​ល្បែង​អនឡាញ ភ្នាល់​តាម​ប្រព័ន្ធ​អ៊ីនធឹណិត

ដោយ សុជីវី
2019-12-27
អ៊ីម៉ែល
មតិ
Share
បោះពុម្ព
ជនជាតិ​ចិន​ជញ្ជូន​ឥវ៉ាន់​ដាក់​ឡាន ចាក​ចេញ​ពី​ខេត្ត​ព្រះសីហនុ នៅ​ថ្ងៃ​ទី២៧ ខែ​ធ្នូ ឆ្នាំ២០១៩។
ជនជាតិ​ចិន​ជញ្ជូន​ឥវ៉ាន់​ដាក់​ឡាន ចាក​ចេញ​ពី​ខេត្ត​ព្រះសីហនុ នៅ​ថ្ងៃ​ទី២៧ ខែ​ធ្នូ ឆ្នាំ២០១៩។
រូបថត៖ លោក ស៊ាង វីន អតីត​បុគ្គលិក​កាស៊ីណូ ខេត្ត​ព្រះសីហនុ

កម្មករ​​ធ្វើការ​នៅ​តាម​កាស៊ីណូ​ នៅ​ខេត្ត​ព្រះសីហនុ ជិត ៨ពាន់ (.៧០០) នាក់ បាន​បាត់​បង់​ការងារ​ធ្វើ​ ក្រោយ​ពេល​ជនជាតិ​ចិន បិទ​ការ​ភ្នាល់​ល្បែង​តាម​អ៊ីនធឹណិត (Online Game) ហើយ​ចាក​ចេញ​ត្រលប់​ ទៅ​ប្រទេស​ចិន​វិញ ខណៈ​អាជ្ញាធរ​ខេត្ត​ព្រះសីហនុ ក៏​កំពុង​ចុះ​ត្រួត​ពិនិត្យ​មើល​ការ​បិទ​ល្បែង​អនឡាញ នៅ​គ្រប់​កាស៊ីណូ​ទាំង​អស់។

ប្រធាន​មន្ទីរ​ការងារ និង​បណ្ដុះ​បណ្ដាល​វិជ្ជាជីវៈ ខេត្ត​ព្រះសីហនុ លោក យ៉ូវ ខេមរា ប្រាប់​អាស៊ី​សេរី​ថា កម្មករ​ធ្វើការ​នៅ​កាស៊ីណូ ផ្នែក​អនឡាញ ជាង​ប្រាំពីរ​ពាន់ ប្រាំពីរ​រយ (.៧០០) នាក់ បាន​បាត់​បង់​ការងារ​ធ្វើ​ ក្នុង​រយៈ​ពេល ៣ខែ​មក​នេះ។ ប៉ុន្តែ​កម្មករ​ទាំង​នោះ ភាគ​ច្រើន​ធ្លាប់​ជា​កម្មការិនី​រោង​ចក្រ​កាត់​ដេរ ហើយ​មក​ធ្វើ​ការ​ផ្នែក​ហ្គេម​អនឡាញ ដោយសារ​ទទួល​បាន​ប្រាក់​ឈ្នួល​ខ្ពស់​ជាង​នៅ​រោងចក្រ។ លោក​ថ្លែង​បន្ត​ថា ពួក​គេ​ខ្លះ​បាន​ត្រឡប់​ទៅ​ធ្វើ​ជា​កម្មការិនី​រោងចក្រ​វិញ​ហើយ ខណៈ​អ្នក​ខ្លះ​ត្រឡប់​ទៅ​ស្រុក​កំណើត​វិញ៖ «មាន​កាស៊ីណូ ពិសេស​អនឡាញ​ ​ហ្នឹង បិទ​ មាន​កម្មករ​ខ្មែរ​ហ្នឹង ៧​ពាន់ ៧​រយ​នាក់​ជាង បាត់​បង់​ការងារ»

រដ្ឋាភិបាល​បាន​ចេញ​សារាចរ កាល​ពី​ខែ​សីហា​ឲ្យ​បិទ​អាជីវកម្ម​ល្បែង​ភ្នាល់​តាម​ម៉ាស៊ីន​អេឡិច​ត្រូនិច​ ​ប្រព័ន្ធ​អ៊ិនធឺណិត អនឡាញ គ្រប់​រូបភាព​ទាំង​អស់ នៅ​ប្រទេស​កម្ពុជា។ រដ្ឋាភិបាល​អះអាង​ថា មាន​ឧក្រិដ្ឋជន​បរទេស​មួយ​ចំនួន បាន​ជ្រក​ក្រោម​រូបភាព ល្បែង​ភ្នាល់​អ៊ីនធឹណិត​ប្រភេទ​នេះ​ ធ្វើ​សកម្មភាព​បោកប្រាស់​ ចាប់​ជំរិត​ទារ​ប្រាក់​ ពី​ជន​រង​គ្រោះ​ ទាំង​នៅ​ក្នុង និង​ក្រៅ​ប្រទេស ដែល​ធ្វើ​ឱ្យ​ប៉ះពាល់​ដល់​សន្តិសុខ​ សណ្ដាប់​ធ្នាប់​សាធារណៈ​ និង​របៀប​រៀបរយ​ក្នុង​សង្គម។

បន្ថែម​​ពី​លើ​សារាចរ​នោះ កាល​ពី​ថ្ងៃ​ទី២១ ធ្នូ ក្នុង​ពេល​ចូលរួម​ពិធី​បុណ្យ​សមុទ្រ​នៅ​ខេត្ត​កំពត លោក ហ៊ុន សែន បាន​បញ្ជា​ផ្ទាល់​មាត់​ថែម​ទៀត​ឲ្យ​បិទ​ល្បែង​ភ្នាល់​តាម​អ៊ីនធឹណិត​នេះ ឲ្យ​អស់​ត្រឹម​ចុង​ឆ្នាំ២០១៩ ដើម្បី​ស្រវា​ចាប់​យក​អ្នក​វិនិយោគ​ទុន​ល្អៗ ជាង​អ្នក​វិនិយោគ​ទុន​ផ្នែក​ល្បែង៖ «អ្នក​ជំនួញ​ធំៗ អ្នក​រកស៊ី​ធំៗ ដែល​ជា​អ្នក​មាន​ប្រាក់​កាក់ មិន​ហ៊ាន​ចូល​មក​កម្ពុជា ដោយសារ​ខ្លាច​ក្រុម ម៉ាហ៊្វីយ៉ា (Mafia)។ ដូច្នេះ​អ្វី​ក៏​ដោយ ត្រូវ​តែ​មាន​ការ​បង់​ថ្លៃ ត្រូវ​តែ​មាន​ការ​បង់​ថ្លៃ។ យើង​សុខ​ចិត្ត​មិន​មាន​អនឡាញ ក៏​ប៉ុន្តែ​យើង​ច្បាស់​ជា​នាំ​មក នូវ​​ប្រទេស​របស់​យើង ប្រកប​ដោយ​សុវត្ថិភាព​ និង​សន្តិសុខ ហើយ​យើង​នាំ​មក​នូវ​អ្នក​វិនិយោគ​ ដែល​សុចរិត និង​អ្នក​វិនិយោគ​ដែល​មាន​ប្រាក់​កាក់​មក រស់​នៅ​កម្ពុជា»

ចាប់​តាំង​ពី​​​រដ្ឋាភិបាល​បញ្ជា​ឲ្យ​បិទ​ល្បែង​ភ្នាល់​តាម​​ប្រព័ន្ធ​អ៊ីនធឹណិត​ជាង ៣ខែ​មក​នេះ អ្នក​ខេត្ត​ព្រះសីហនុ ឲ្យ​ដឹង​ថា ជនជាតិ​ចិន បាន​សម្រុក​ចាកចេញ​​ទាំង​ក្រុមៗ ជា​បន្ត​បន្ទាប់។ ប៉ុន្តែ​អាជ្ញាធរ​ខេត្ត​ព្រះសីហនុ​វិញ​អះអាង​ថា ជន​ជាតិ​ចិន បាន​ត្រឡប់​ចូល​មក​កម្ពុជា​វិញ មាន​ចំនួន​ច្រើន​ដូច​គ្នា។

បច្ចុប្បន្ន អាជ្ញាធរ​ខេត្ត​ព្រះសីហនុ កំពុង​ចុះ​ពិនិត្យ​មើល​កាស៊ីណូ​ទូទាំង​ខេត្ត ដើម្បី​បញ្ឈប់​ការ​ភ្នាល់​ល្បែង​អនឡាញ។ អ្នក​នាំ​ពាក្យ​រដ្ឋបាល​ខេត្ត​ព្រះសីហនុ លោក ឃាង ភារម្យ ប្រាប់​សារ​ព័ត៌មាន​ក្នុង​ស្រុក (VOD) ថា ថ្នាក់​ដឹក​នាំ​ខេត្ត​បាន​ចុះ​ត្រួត​ពិនិត្យ​តាម​ទីតាំង​នានា ដើម្បី​បិទ​អាជីវកម្ម​ល្បែង​អនឡាញ​ទាំង​អស់​ត្រឹម​ម៉ោង​សូន្យ នៅ​ចុង​ឆ្នាំ​នេះ។

យ៉ាង​ណា​ក៏​ដោយ​ចុះ ពលរដ្ឋ​ខេត្ត​ព្រះសីហនុ​ប្រាប់​ថា ប៉ុន្មាន​ថ្ងៃ​នេះ ជន​ជាតិ​ចិន​បាន​សម្រុក​ចេញ​កាន់​តែ​ច្រើន ពេល​កាស៊ីណូ​បិទ​ផ្នែក​ហ្គេម​អនឡាញ ជា​បន្ត​បន្ទាប់ ហើយ​កាស៊ីណូ​ខ្លះ បាន​បិទ​ទ្វារ​ទាំង​ស្រុង។

បុគ្គលិក​កាស៊ីណូ​មួយ​កន្លែង ក្នុង​ក្រុង​ព្រះសីហនុ យុវជន ស៊ាង វីន ប្រាប់​ថា កាស៊ីណូ ដែល​លោក​ធ្លាប់​ធ្វើ​ការ​បាន​បិទ​ទ្វារ​ហើយ។ យុវជន​រូប​នេះ​កំពុង​ដើរ​រក​ការងារ​ថ្មី​ ហើយ​ថា ប្រហែល​ជា​មិន​អាច​រក​ការងារ​ថ្មី​ធ្វើ​បាន​ទេ នៅ​ខេត្ត​ព្រះសីហនុ ដោយសារ​កាស៊ីណូ​បិទ​ទ្វារ​ជា​បន្ត​បន្ទាប់ និង​មិន​រើស​បុគ្គលិក​ថ្មី។

លោក ស៊ាង វីន ប្រាប់​ថា លោក​ចង់​ចេញ​ពី​ខេត្ត​ព្រះសីហនុ ទៅ​ដើរ​រក​ការងារ​ធ្វើ​នៅ​រាជ​ធានី​ភ្នំពេញ​វិញ។ លោក​បញ្ជាក់​ថា កាស៊ីណូ​ ដែល​លោក​ធ្លាប់​ធ្វើ​ការ​កន្លង​មក មិន​សូវ​សំបូរ​បុគ្គលិក​ខ្មែរ​ទេ គឺ​មាន​តែ​ប៉ុន្មាន​នាក់​ទេ​ជា​ខ្មែរ កាន់​ផ្នែក​ទទួល​ភ្ញៀវ និង​បក​ប្រែ​ភាសា។ ចំណែក​អ្នក​ចែក​បៀ អ្នក​កាន់​ម៉ាស៊ីន ឬ​ផ្នែក​ហ្គេម​អនឡាញ គឺ​ជា​ជនជាតិ​ចិន​ទាំង​អស់ ហើយ​ភ្ញៀវ​ក៏​សុទ្ធ​តែ​ជា​ជនជាតិ​ចិន​ដែរ គ្មាន​ខ្មែរ​ទេ។ លោក​ថា ថៅកែ​កាស៊ីណូ​ជនជាតិ​ចិន​ខ្លះ បិទ​កាស៊ីណូ ឬ​បិទ​ល្បែង​ភ្នាល់​អនឡាញ​ស្ងាត់ៗ ហើយ​រត់​ចោល​កម្មករ មិន​ទាន់​បើក​ប្រាក់​ឈ្នួល​ឲ្យ​ ក៏​មាន​ដែរ៖ «ពឹង​ផ្អែក​លើ​ភ្ញៀវ​ចិន អនឡាញ​ហ្នឹង​ណា ហើយ​ពេល​ពួក​គាត់​បន្ត​ចាកចេញ​រាប់​ម៉ឺន​នាក់ ​អ៊ីចឹង​ទៅ គ្រប់​បណ្ដា​កាស៊ីណូ ដែល​ថា បើក​​ល្បែង​ផ្ទាល់​ណា ល្បែង​ចាក់​ផ្ទាល់​ហ្នឹង ក៏​អត់​មាន​ភ្ញៀវ​ទៅ​លេង​ដែរ វា​ស្បើយ​ ធ្លាក់​ចុះ​ជា​គំហុក​ហ្មង ច្រើន​មែន​ទែន។ អ៊ីចឹង​ធ្វើ​ឲ្យ​បណ្ដា​កាស៊ីណូ ដែល​គាត់​បើក​ជា​លក្ខណៈ​លេង​ល្បែង​​ អត់​មាន​ភ្ញៀវ​ចូល​លេង​ ហើយ​កម្មករ​​ បុគ្គលិក​ខ្មែរ​ហ្នឹង ​គេ​ចាប់​ផ្ដើម​ជម្រុះ ​ឬ​ក៏​ថៅកែ​រត់​ខាត​អ៊ីចឹង​ទៅ គឺ​រត់​ចោល​តែ​ម្ដង គឺ​អត់​បាន​បើក​លុយ​ បើក​អ្វី​ឲ្យ​បុគ្គលិក​ទេ។ ខ្លះ​បាតុកម្ម បាតុ​អ្វី​អ៊ីចឹង​ទៅ។ ថៅកែ​ខ្លះ​ណា​ទៅ​ដល់​ប្រទេស​ដទៃ​ទៀត ឬ​ក៏​ទៅ​ស្រុក​គាត់​វិញ អ៊ីចឹង​ទៅ។ វា​បញ្ហា​ប្រឈម​ច្រើន»

លោក​ប៉ាន់ស្មាន​ថា ជនជាតិ​ចិន​ទាំង​នោះ ទំនង​បាន​ចាក​ចេញ​ពី​ខេត្ត​ព្រះសីហនុ​អស់​ហើយ។ លោក ​ថា ការ​បិទ​ល្បែង​ភ្នាល់​តាម​អនឡាញ​នេះ ក៏​មាន​ឥទ្ធិពល​ធ្វើ​ឲ្យ​ធ្លាក់​ចុះ​ភ្ញៀវ​ចិន នៅ​តាម​កាស៊ីណូ លេង​ល្បែង​ភ្នាល់​នៅ​លើ​តុ​ដែរ គឺ​ដោយសារ​ជន​ជាតិ​ចិន បាន​ចាក​ចេញ​ពី​ខេត្ត​ព្រះសីហនុ​ច្រើន ធ្វើ​ឲ្យ​កាស៊ីណូ​ខ្លះ ខ្សត់​ភ្ញៀវ​ចូល​លេង។

ចំណែក​បុគ្គលិក​កាស៊ីណូ​ម្នាក់​ទៀត​ ជា​អ្នក​បក​ប្រែ​ភាសា​ចិន សុំ​មិន​ប្រាប់​ឈ្មោះ ​ឲ្យ​ដឹង​ថា លោក​ អត់​ការ​ងារ​ធ្វើ​ច្រើន​ខែ​ហើយ ដោយសារ​ជន​ជាតិ​ចិន​បិទ​កាស៊ីណូ ហើយ​ត្រឡប់​ទៅ​វិញ។ លោក​ថា បច្ចុប្បន្ន​ លោក​ឡើង​មក​​ស្រុក​កំណើត​វិញ ដើម្បី​ទៅ​រក​ការងារ​ធ្វើ​នៅ​ភ្នំពេញ​ម្ដង​ ព្រោះ​ការងារ​នៅ​ខេត្ត​ព្រះសីហនុ​ ចាប់​ផ្ដើម​ខ្សត់​​ខ្លាំង៖ «ខ្ញុំ​ធ្វើការ​ងារ​ឲ្យ​ជនជាតិ​ចិន ខាង​បក​ប្រែ​។ តែ​ឥឡូវ​ពួកគាត់​ទៅ​ប្រទេស​គាត់​វិញ​ទៅ ខ្ញុំ​អត់​មាន​ការ​ងារ​ធ្វើ​ ខ្ញុំ​មក​នៅ​ស្រុក​វិញ។ បាទ! ធ្វើការ​ងារ​ខាង (បកប្រែ) អនឡាញ​បង។ ខ្ញុំ​អត់​ដឹង​ដែរ អត់​ថា ហេតុអ្វី​ពួកគាត់​ទៅ​វិញ​ទៅ ខ្ញុំ​ធ្វើការ​ងារ​ជាមួយ​គាត់​រយៈ​ពេល​ខ្លី គាត់​បិទ​ក្រុមហ៊ុន​ទៅ​ ខ្ញុំ​មក​ផ្ទះ​វិញ​ទៅ ព្រោះ​កំពង់​សោម​ ឥឡូវ វា​ក្រ​កន្លែង​​ការងារ​ធ្វើ​អ៊ីចឹង​ណា​បង»

តួលេខ​របស់​អគ្គ​ស្នងការ​នគរបាល​ជាតិ ធ្លាប់​ចេញ​ផ្សាយ​ថា ជនជាតិ​ចិន​នៅ​ក្រុង​ព្រះសីហនុ មាន​ចំនួន​ជាង ២២ម៉ឺន​នាក់ គឺ​ច្រើន​ជាង​នៅ​តាម​បណ្ដា​ខេត្ត​ផ្សេងៗ ទាំង​អស់ ហើយ​ពួក​គេ​ គឺ​ជា​អ្នក​ជំនួញ និង​អ្នក​ទេសចរណ៍។ ចំណែក​កាស៊ីណូ​វិញ មាន​ចំនួន ៧៣ទីតាំង កំពុង​ធ្វើ​ប្រតិបត្តិការ​អាជីវកម្ម​ល្បែង​ស៊ីសង​រាល់​ថ្ងៃ។

ប្រធាន​មន្ទីរ​ការងារ​ និង​បណ្ដុះ​បណ្ដាល​វិជ្ជា​ជីវៈ​ខេត្ត​ព្រះសីហនុ ឱ្យ​ដឹង​ថា មក​ដល់​ចុង​ខែ​ធ្នូ​នេះ កាស៊ីណូ​ចំនួន ៤កន្លែង​ បាន​​បិទ​ប្រតិបត្តិការ​អាជីវកម្ម​​ទាំង​ស្រុង ២៣កន្លែង បាន​បញ្ឈប់​បុគ្គលិក​ទាំង​អស់ នៅ​សល់​តែ​អ្នកយាម ហើយ​កាស៊ីណូ ចំនួន ៣៣កន្លែង​ទៀត បាន​ព្យួរ​ការងារ​បុគ្គលិក​បណ្ដោះអាសន្ន។

អ្នក​សម្រប​សម្រួល​សមាគម​សិទ្ធិមនុស្ស អាដហុក ខេត្ត​ព្រះសីហនុ អ្នកស្រី ជាប សុធារី សង្កេត​ឃើញ​ថា កម្មករ​ធ្វើការ​នៅ​កាស៊ីណូ​ជា​ច្រើន ពិត​ជា​បាត់​បង់​ការងារ​ធ្វើ​មែន ហើយ​យុវជន​ជា​ច្រើន​ នៅ​មិន​ទាន់​បាន​ការងារ​ថ្មី​ធ្វើ​ទេ។ ចំណែក​ជន​ជាតិ​ចិន​វិញ ក៏​រាង​ស្បើយ​ខ្លះ​ដែរ តែ​នៅ​មាន​ចំនួន​ច្រើន​ បើ​ធៀប​នឹង កាល​ពី​ជំនាន់​ចិន មិន​ទាន់​សម្រុក​ចូល​ខ្លាំង៖ «ដោយសារ​តែ ​វា​មាន​ការ​បិទ​ល្បែង​ហ្នឹង​ទៅ​ណា ហ្នឹង​ហើយ ហើយ​កាស៊ីណូ​ធំៗ​ផ្សេង​ទៀត​ហ្នឹង​ វា​មាន​ដែរ វា​មាន​ខ្មែរ​យើង​ខ្លះ​នៅ​ធ្វើ​ទី​ហ្នឹង។ ប៉ុន្តែ​វា​មិន​មែន​ត្រូវ​ការ​ធនធាន​មនុស្ស​ច្រើន​ ដូច​ល្បែង​​ហ្គេម​អនឡាញ​ទេ។ ចង់​និយាយ​ថា អា​ហ្គេម​អនឡាញ​ហ្នឹង មួយ​អគារ​ហ្នឹង គេ​មាន​បុគ្គលិក​​កាន់​​កុំព្យូទ័រ​មួយៗ តែ​ម្ដង។ ខ្ញុំ​សួរ​គាត់​(បុគ្គលិក)​ហើយ ថា វា​ក៏​អត់​ដឹង​ដែរ​ តែ​ភាគច្រើន​អ្នក​លេង​នៅ​ក្រៅ​ប្រទេស​ទេ ចង់​និយាយ​អ៊ីចឹង​ណា អា​ហ្គេម​អនឡាញ​ហ្នឹង អត់​មាន​អ្នក​មក​លេង​ផ្ទាល់​ទេ»

អ្នក​គ្រប់​គ្រង​កម្មវិធី​ការងារ នៃ​មជ្ឈមណ្ឌល​សម្ព័ន្ធ​ភាព​​សិទ្ធិ​មនុស្ស និង​ការងារ (Central) លោក ឃុន ថារ៉ូ គាំទ្រ​ការ​បិទ​ល្បែង​ភ្នាល់​​តាម​អ៊ីនធឹណិត​នៅ​កម្ពុជា។ ប៉ុន្តែ​លោក​យល់​ថា រដ្ឋាភិបាល​ត្រូវ​បន្ត​ទទួល​ខុស​ត្រូវ រក​ការងារ​ស្រប​ច្បាប់ ក្នុង​​វិស័យ​ស្រដៀង​គ្នា​ឲ្យ​កម្មករ​កាស៊ីណូ​ទាំង​នោះ បាន​ធ្វើ​ការ​វិញ និង​ឲ្យ​ពួក​គេ​ទទួល​បាន​ប្រាក់​ឈ្នួល​សម​រម្យ៖ «ខេត្ត​ព្រះសីហនុ​ហ្នឹង តម្រូវ​ការ​កម្លាំង​ពលកម្ម​ហ្នឹង ត្រូវ​​គឹ​ត្រូវ​តែ​​មាន​ការ​ធានា​ ថា កម្មករ​ហ្នឹង​គាត់​អាច​មាន​ឱកាស​ក្នុង​ការ​ចាប់​យក​នូវ​​មុខរបរ ឬ​ការងារ​ណា ដែល​ក្រៅ​ពី​សេវាកម្ម​ផ្នែក​កាស៊ីណូ​ហ្នឹង ដូចជា​ សណ្ឋាគារ​ ដូចជា​សេវា​​ផ្សេងៗ​ទៀត​ហ្នឹង ដើម្បី​​ឲ្យ​ធានា​នូវ​អតិប្រមាណ នូវ​កម្លាំង​ពលកម្ម ការ​ស្រូប​យក​កម្លាំង​ពលកម្ម​ហ្នឹង ហើយ​យើង​អាចReplace (ជំនួស)។ យើង​អាច​កម្មករ​ទាំង​អស់​ គាត់​​​បាត់​បង់​ការងារ​ហ្នឹង គាត់​អាច​ព្យាយាម​នៅ​ក្នុង​ការ​សម្រប​សម្រួល​ណា ដែល​សណ្ឋាគារ ឬ​ក៏​សេវា​កម្ម​ផ្សេង​ទៀត ​​ដែល​មាន​លក្ខខណ្ឌ​ប្រហាក់​ប្រហែល​ ប៉ុន្តែ​មាន​ការ​ចុះ​បញ្ជី​ការ​ត្រឹមត្រូវ អា​ហ្នឹង វា​អាច​ជួយ​សម្រួល​លក្ខខណ្ឌ​កម្មករ ដែល​គាត់​បាត់​បង់​ការងារ»

ឆ្លើយ​តប​ការ​លើក​ឡើង​​នេះ ប្រធាន​មន្ទីរ​ការងារ​ និង​បណ្ដុះ​បណ្ដាល​វិជ្ជា​ជីវៈ​ខេត្ត​ព្រះសីហនុ​ លោក យ៉ូវ ខេមរា អះអាង​ថា ក្រៅ​ពី​កម្មករ​កាស៊ីណូ​ភាគ​ច្រើន បាន​ត្រឡប់​ទៅ​ធ្វើការ​រោងចក្រ​វិញ មន្ទីរ​ការងារ​ខេត្ត បាន​អំពាវនាវ​ដល់​កម្មករ ដែល​មិន​ទាន់​រក​បាន​ការងារ​ថ្មី​ធ្វើ ឬ​កម្មករ​មិន​មាន​ជំនាញ ឱ្យ​ទៅ​រៀន​ជំនាញ​ដោយ​ឥត​គិត​ថ្លៃ នៅ​វិទ្យាស្ថាន​បច្ចេកទេស​​របស់​រដ្ឋ​ ចំនួន ២ នៅ​ខេត្ត​ព្រះសីហនុ ដែល​ចំណុះ​ឲ្យ​ក្រសួង​ការងារ។ លោក​ថា មន្ទីរ​ការងារ​ខេត្ត ក៏​បាន​ព្យាយាម​រក​ទីផ្សារ​ការងារ​សម្រាប់​កម្មករ​​​ដែរ។

ខេត្ត​​​ព្រះសីហនុ​ មាន​តំបន់​សេដ្ឋកិច្ច​​ពិសេស​ ចំនួន ៥កន្លែង មាន​រោងចក្រ​ធំ​តូច ជាង ២០០​​រោងចក្រ​ និង​មាន​រោង​សិប្បកម្ម​ ជាង ១ពាន់​កន្លែង ដែល​អាជ្ញាធរ​អះអាង​ថា អាច​ស្រូប​ទាញ​កម្លាំង​ពលរដ្ឋ​ ​បាន​ជាង ៨ម៉ឺន​នាក់៕

(ជនជាតិ​ចិន​រៀបចំ​ចាក​ចេញ​ពី​ខេត្ត​ព្រះសីហនុ នៅ​ថ្ងៃ​ទី២៧ ខែ​ធ្នូ ឆ្នាំ២០១៩។ រូបថត៖ លោក ស៊ាង វីន អតីត​បុគ្គលិក​កាស៊ីណូ ខេត្ត​ព្រះសីហនុ)


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល