ក្រសួង​សេដ្ឋកិច្ច​ធ្វើ​សេចក្ដី​ព្រាង​យុទ្ធសាស្ត្រ​គ្រប់គ្រង​បំណុល ខណៈ​រង​អន្ទាក់​បំណុល​ចិន​វ័ណ្ឌក

ដោយ មាន ឫទ្ធិ
2019-10-10
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន ផ្តល់​បទសម្ភាសន៍​ដល់​អ្នក​សារព័ត៌មាន​ក្រោយ​ជំនួប​រវាង​ក្រុម​មន្រ្តី​ក្រសួង​សេដ្ឋកិច្ច និង​អន្តរ​គណៈកម្មការ​របស់​សភា កាល​ពី​ថ្ងៃ​ទី​១១ ខែ​វិច្ឆិកា ឆ្នាំ​២១០៥។
រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន ផ្តល់​បទសម្ភាសន៍​ដល់​អ្នក​សារព័ត៌មាន​ក្រោយ​ជំនួប​រវាង​ក្រុម​មន្រ្តី​ក្រសួង​សេដ្ឋកិច្ច និង​អន្តរ​គណៈកម្មការ​របស់​សភា កាល​ពី​ថ្ងៃ​ទី​១១ ខែ​វិច្ឆិកា ឆ្នាំ​២១០៥។
Photo: RFA

ក្រសួង​សេដ្ឋកិច្ច និង​ហិរញ្ញវត្ថុ​កំពុង​ធ្វើ​សេចក្ដីព្រាង​យុទ្ធសាស្ត្រ គ្រប់គ្រង​បំណុល​រដ្ឋ​ជំពាក់​បរទេស សម្រាប់​ឆ្នាំ​២០១៩ ដល់​ឆ្នាំ​២០២៣។ ការ​កំណត់​យុទ្ធសាស្ត្រ​នេះ ធ្វើឡើង​ខណៈ​មាន​ការ​ព្រមាន​ជារឿយៗ ពី​ក្រុម​អ្នក​ជំនាញ​រឿង​ជាប់​ផុង​ក្នុង​អន្ទាក់​បំណុល​ចិន ហើយ​តួលេខ​ដែល​កម្ពុជា​ខ្ចីបុល​បរទេស ក៏​ចេះតែ​បន្ត​កើន​ឡើង​ខ្ពស់​គួរ​ឱ្យ​កត់សម្គាល់។

នេះ​មិនមែន​ជា​លើកដំបូង​ទេ ដែល​របប​ក្រុងភ្នំពេញ ដាក់​ចេញ​នូវ​យុទ្ធសាស្ត្រ​គ្រប់គ្រង​បំណុល ដែល​ខ្លួន​ជំពាក់​បរទេស​នោះ​។ សេចក្តី​ព្រាង «​យុទ្ធសាស្ត្រ​ស្ដីពី​ការគ្រប់គ្រង​បំណុល​សាធារណៈ ២០១៩-២០២៣» ធ្វើឡើង បន្ទាប់ពី​ឯកសារ​យុទ្ធសាស្ត្រ​ស្ដីពី​ការគ្រប់គ្រង​បំណុល​សាធារណៈ​សម្រាប់​ឆ្នាំ​២០១៥-២០១៨ បាន​ផុត​សុពលភាព។

ក្រសួង​សេដ្ឋកិច្ច និង​ហិរញ្ញវត្ថុ ឱ្យ​ដឹង​ថា សេចក្តី​ព្រាង «​យុទ្ធសាស្ត្រ​ស្ដីពី​ការគ្រប់គ្រង​បំណុល​សាធារណៈ ២០១៩-២០២៣» នេះ ធ្វើឡើង​ដោយ​ពិនិត្យ​លើ​វឌ្ឍនភាព​នៃ​ការអនុវត្ត​យុទ្ធសាស្ត្រ​គ្រប់គ្រង​បំណុល​ឆ្នាំ​ចាស់ ២០១៥-២០១៨ ការវិភាគ​លើ​ហានិភ័យ បញ្ហា​ប្រឈម និង​ឱកាស​នៃ​ការគ្រប់គ្រង​បំណុល​កម្ពុជា​។ ក្រសួង​សេដ្ឋកិច្ច​បញ្ជាក់​ថា ការ​ដាក់​ចេញ​យុទ្ធសាស្ត្រ​គ្រប់គ្រង​បំណុល​រហូតដល់​ឆ្នាំ​២០២៣​ខាងមុខនេះ គឺ​ដើម្បី​បន្ត​ធានា​ប្រសិទ្ធភាព តម្លាភាព គណនេយ្យភាព និង​ចិរភាព​នៃ​ការគ្រប់គ្រង​បំណុល​សាធារណៈ​ក្នុង​រយៈពេល​កំណត់​នេះ​។ ក្រសួង​គូស​បញ្ជាក់​ថា រដ្ឋាភិបាល​នៅតែ​ប្រកាន់ខ្ជាប់​នូវ​គោលការណ៍​គន្លឹះ​៥ ដើម្បី​ធានា​ចិរភាព​បំណុល​សាធារណៈ​របស់​រដ្ឋ​។ គោលការណ៍​គន្លឹះ​ទាំង​៥​នេះ រួមមាន​ដូចជា​៖ ការ​តម្រូវ​ឱ្យ​ខ្ចី​ឥណទាន​ក្នុង​ទំហំ​សមស្រប​ដែល​ស្ថានភាព​ថវិកា និង​សេដ្ឋកិច្ច​កម្ពុជា​អាច​ទ្រាំទ្រ​បាន ការខ្ចី​បុល​តែ​ឥណទាន​ដែល​មាន​កម្រិត​សម្បទាន ឬ​លក្ខខណ្ឌ​អនុគ្រោះ​ខ្ពស់ ការខ្ចី​សម្រាប់​តែ​វិស័យ​អាទិភាព​ដើម្បី​យក​ទៅ​ទ្រទ្រង់​ចិរភាព​កំណើន និង​ផលិតភាព​សេដ្ឋកិច្ច និង​ប្រើប្រាស់​សម្រាប់​វិនិយោគ​លើ​ហេដ្ឋារចនាសម្ព័ន្ធ​សាធារណៈ ជាដើម។

យ៉ាងណាក៏ដោយ ក្រសួង​សេដ្ឋកិច្ច នៅ​មិនទាន់​ចែកចាយ​សេចក្តី​ព្រាង​យុទ្ធសាស្ត្រ​ថ្មី​នេះ ជា​សាធារណៈ​នៅឡើយ​ទេ ក៏ប៉ុន្តែ បច្ចុប្បន្ន គណៈកម្មាធិការ​គ្រប់គ្រង​បំណុល​សាធារណៈ របស់​ក្រសួង​សេដ្ឋកិច្ច កំពុង​ប្រជុំពិភាក្សា​លើ​សេចក្ដី​ព្រាង​​យុទ្ធសាស្ត្រ​គ្រប់​បំណុល​សម្រាប់​រយៈពេល​កំណត់​ថ្មី​នេះ ជាមួយ​នឹង​មន្ត្រី​ជំនាញ​ពាក់ព័ន្ធ។

របាយការណ៍​ចុងក្រោយ​ចេញផ្សាយ​ក្នុង​ព្រឹត្តិបត្រ​ស្ថិតិ​បំណុល​សាធារណៈ​កម្ពុជា របស់​ក្រសួង​សេដ្ឋកិច្ច គិត​ត្រឹម​ពាក់​កណ្តាល​ឆ្នាំ​២០១៩​នេះ កម្ពុជា​ចុះ​កិច្ចព្រមព្រៀង​ខ្ចីបុល​ពី​ម្ចាស់​ឥណទាន​បរទេស​សរុប​មានតម្លៃ​ដល់​ទៅ​ជិត ១​ម៉ឺន ២​ពាន់​លាន​ដុល្លារ​អាមេរិក ឬ​ប្រមាណ​ជិត ១២​ប៊ី​លាន​ដុល្លារ​អាមេរិក​។ ក្នុងចំណោម​បំណុល​ដែល​រដ្ឋ​ខ្ចីបុល​បរទេស​នេះ មហាមិត្ត​ចិន​នៅតែ​ជា​ម្ចាស់​បំណុល​ខ្ពស់​ជាងគេ​របស់​កម្ពុជា គឺ​ស្មើនឹង​ជាង ៤​ពាន់​៧​រយ លាន​ដុល្លារ​អាមេរិក ឬ​ស្មើនឹង​ប្រមាណ​ជិត ៤០​ភាគរយ នៃ​បំណុល​ដែល​កម្ពុជា​ជំពាក់​បរទេស​សរុប។

នេះ​មានន័យថា ពលរដ្ឋ​ខ្មែរ​ម្នាក់ៗ ដែល​សូម្បីតែ​ទារក​ទើប​កើត​មក​ភ្លាម កំពុង​ជាប់ជំពាក់​បំណុល​បរទេស​ជាង ៧០០​ដុល្លារ​អាមេរិក ឬ​ជំពាក់​ចិន​ក្នុង​ម្នាក់ៗ ជិត ៣០០​ដុល្លារ​អាមេរិក។ បំណុល​នេះ នៅ​មិនទាន់​រាប់បញ្ចូល​ការ​ប្រមើល​ទុក​នៅ​ពេល​ដែល​កម្ពុជា​បាត់បង់​ប្រព័ន្ធ​អនុគ្រោះ​ពន្ធ​របស់​អឺរ៉ុប និង​អាមេរិក​នៅឡើយ​នោះ​ទេ ជា​ការ​ឆ្លើយតប​នឹង​ការណ៍​ដែល​របប​ក្រុងភ្នំពេញ បាន​រម្លាយ​ប្រជាធិបតេយ្យ និង​បង្កើត​រដ្ឋាភិបាល​ខ្វះ​ភាព​ស្របច្បាប់​។ ទន្ទឹម​នឹង​ការ​ជាប់​ជំពាក់​បំណុល​របស់​ពលរដ្ឋ​ខ្មែរ​ម្នាក់ៗ និង​កម្ពុជា​ជា​រួម ដែល​ចេះតែ​កើន​នោះ​ត្រកូល «​ហ៊ុន​» របស់​លោក​នាយករដ្ឋមន្ត្រី ហ៊ុន សែន ផ្អែក​តាម​ការ​ប៉ាន់ស្មាន​របស់​អង្គការ​ឃ្លាំមើល​ពិភពលោក ឬ Global Witness កាលពី​ឆ្នាំ​២០១៦ ឯណោះ អាច​មាន​ទ្រព្យសម្បត្តិ​រួមគ្នា​សរុប​ប្រមាណ​ពី ៥០០​លាន ទៅដល់ ១​ពាន់​លាន​ដុល្លារ​អាមេរិក។

ក្រៅ​ពី​នេះ កម្ពុជា​ជំពាក់​ដៃគូ​អន្តរជាតិ​ដទៃ​ទៀត ដូចជា​ធនាគារ​អភិវឌ្ឍន៍​អាស៊ី ជាង​២​ពាន់ ៦​រយ​លាន​ដុល្លារ​អាមេរិក ស្មើនឹង​ជាង ២២​ភាគរយ បន្ត​ដោយ​ជំពាក់​ប្រទេស​ជប៉ុន ជិត ១​ពាន់ ៥​រយ​លាន​ដុល្លារ​អាមេរិក ឬ​ស្មើនឹង​ជាង ១១​ភាគរយ។

ការសិក្សា​ស្រាវជ្រាវ​បែប​វិភាគ​គោលនយោបាយ​មួយ​ចេញផ្សាយ​ដោយសាកល​វិទ្យាល័យ Harvard University របស់​សហរដ្ឋអាមេរិក កាលពី​ខែ​ឧសភា ឆ្នាំ​២០១៨ កន្លងទៅ​ស្ដីពី​នយោបាយ​ការទូត​អន្ទាក់​បំណុល​៖ យុទ្ធសាស្ត្រ​ពង្រីក​ឥទ្ធិពល​សេដ្ឋកិច្ច​ថ្មី​របស់​ចិន និង​ផលវិបាក​ចំពោះ​គោល​នយោបាយ​ការបរទេស​អាមេរិក​លើក​ឡើង​ថា ក្នុង​រយៈពេល​មួយ​ទសវត្សរ៍​ចុងក្រោយ​នេះ ចិន​បាន​ពង្រីក​ការ​ផ្ដល់​ប្រាក់​កម្ចី​របស់​ខ្លួន​ទៅ​ឱ្យ​ប្រទេស​ដទៃ​ទៀត ដែល​ប្រទេស​ទាំងនោះ​គ្មាន​លទ្ធភាព​សងបំណុល​វិញ​បាន​។ ការសិក្សា​នេះ​ថា ចិន​បាន​ចាប់ផ្ដើម​អនុវត្ត​យុទ្ធសាស្ត្រ​បង្កើន​ទឹកប្រាក់​ឱ្យ​បរទេស​ខ្ចីបុល​នេះ គឺ​ដើម្បី​សម្រេច​បាន​មហិច្ឆតា​យុទ្ធសាស្ត្រ​របស់​ខ្លួន​នៅ​តាម​ទីតាំង​ភូមិសាស្ត្រ​ជំនួញ​ពាណិជ្ជកម្ម​សំខាន់ៗ នៅ​លើ​ពិភពលោក។

បន្ថែម​លើ​ការស្រាវជ្រាវ​នេះ​មជ្ឈមណ្ឌល ដើម្បី​ការ​អភិវឌ្ឍ​សាកល (Center for Global Development - CGD) ដែល​មាន​មូលដ្ឋាន​នៅ​សហរដ្ឋអាមេរិក កាលពី​ឆ្នាំ​២០១៨ បាន​ដាក់​បញ្ចូល​ប្រទេស​កម្ពុជា​ទៅ​ក្នុង​ចំណោម​ក្រុម​ប្រទេស​គោលដៅ​ចំនួន​២៣ ដែល​កំពុង​ប្រឈម​នឹង «​ហានិភ័យ​បំណុល​គួរ​ឱ្យ​កត់​សម្គាល់​» នា​ពេល​បច្ចុប្បន្ន​នេះ។

ឆ្លើយតប​ទៅ​នឹង​ការ​កើន​ឡើង​នៃ​បំណុល​ដែល​កម្ពុជា​ចេះតែ​ជំពាក់​បរទេស ជាពិសេស​មហាអំណាច​ចិន​ឥត​ឈប់ឈរ​ពី​មួយ​ឆ្នាំ​ទៅ​មួយ​ឆ្នាំនេះ អ្នក​ជំនាញ​កិច្ចការ​អន្តរជាតិ និង​ជា​សាស្ត្រាចារ្យ​ផ្នែក​ការទូត និង​កិច្ចការ​ពិភពលោក​នៅ​មហាវិទ្យាល័យ Occidental College នៃ​រដ្ឋ​កាលីហ្វ័រញ៉ា (California) សហរដ្ឋអាមេរិក បណ្ឌិត អៀ សុផល ធ្លាប់​ព្រមាន​ថា កម្ពុជា​បច្ចុប្បន្ន កំពុង​ក្លាយ​ខ្លួន​ជា​ជនរងគ្រោះ​នៃ​នយោបាយ​ការទូត​បែប​អន្ទាក់​បំណុល​របស់​ចិន ក្រោម​រូបភាព​នៃ​គម្រោង​គំនិត​ផ្ដួចផ្ដើម «​ខ្សែក្រវាត់ និង​ផ្លូវ​» របស់​ប្រទេស​នេះ​។ លោក​ធ្លាប់​ផ្ដល់​អនុសាសន៍​ថា ដើម្បី​ឱ្យ​កម្ពុជា​គេច​ផុត​ពី​អន្ទាក់​បំណុល​របស់​ចិន​នេះ​របប​លោក ហ៊ុន សែន ត្រូវ​បញ្ឈប់​ខ្ចីបុល​ពី​ចិន​ក្នុង​ចំនួន​ដ៏​ច្រើន​លើស​លុប​បែបនេះ​តទៅទៀត ហើយ​កម្ពុជា​ត្រូវ​ពង្រីក​ភាព​ចម្រុះ​នៃ​ប្រភព​ម្ចាស់បំណុល​របស់​ខ្លួន ចៀស​ជាង​ពឹងផ្អែក​តែ​ទៅលើ​មហាអំណាច​ចិន​តែ​ឯកឯង​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល