កសិករ​អំពាវនាវ​សុំ​ទុន និង​បច្ចេកទេស​ពី​រដ្ឋាភិបាល​សម្រាប់​ដាំ​បន្លែ

ដោយ វ៉ែន សុមេធ
2020-07-30
អ៊ីម៉ែល
មតិ
Share
បោះពុម្ព
ដំណាំ​ស្ពៃ​ក្ដោប​របស់​កសិករ​នៅ​ភូមិ​ជ្រាំងបាក់ ឃុំ​ឃ្លាំងមាស ស្រុក​បវេល ខេត្ត​បាត់ដំបង រូប​ថត​ពលរដ្ឋ កាល​ពី​ថ្ងៃ​ទី១២ ខែ​មីនា ឆ្នាំ​២០១៩។
ដំណាំ​ស្ពៃ​ក្ដោប​របស់​កសិករ​នៅ​ភូមិ​ជ្រាំងបាក់ ឃុំ​ឃ្លាំងមាស ស្រុក​បវេល ខេត្ត​បាត់ដំបង រូប​ថត​ពលរដ្ឋ កាល​ពី​ថ្ងៃ​ទី១២ ខែ​មីនា ឆ្នាំ​២០១៩។
Photo Provided

កសិករ​អំពាវនាវ​សុំ​ទុន និង​បច្ចេកទេស​ដាំ​ដំណាំ​ពី​រដ្ឋាភិបាល ដើម្បី​ពួកគាត់​មានលទ្ធភាព​ដាំ​បន្លែ​ឱ្យ​មាន​គុណ​ភាពល្អ ដើម្បី​បង្កើន​ជីវភាព​គ្រួសារ និង​រួមចំណែក​កាត់បន្ថយ​ការនាំ​បន្លែ​ពី​ក្រៅ​ចូល​ពី​ផ្សារ​ក្នុង​ស្រុក​។ ការ​អំពាវនាវ​របស់​កសិករ​បែបនេះ ស្រប​ពេល​ដែល​ស្ថានភាព​គ្រួសារ​ពួកគាត់​កំពុង​ជួប​ទុក្ខលំបាក ក្នុង​ដំណាក់កាល​រង​វិបត្តិ​កូវីដ ១៩ និង​ក្នុង​ពេល​ដែល​កម្ពុជា​ត្រូវ​ចំណាយ​ប្រាក់​រាប់​រយ​លាន​ដុល្លារ​ក្នុង​១​ឆ្នាំៗ សម្រាប់​ការ​នាំ​ចូល​បន្លែ​ពី​ក្រៅប្រទេស។

តំណាង​សហគមន៍​សាមគ្គី ស្រុក​រមាសហែក ខេត្ត​ស្វាយរៀង លោកស្រី ខៀវ សារុន ថ្លែង​ថា កសិករ​ភាគច្រើន​នៅ​ក្នុង​ភូមិ​លោកស្រី​ធ្វើ​តែ​ស្រែ​ទេ ចំណែក​ការដាំ​ដំណាំ​មាន​តិចតួច​ប៉ុណ្ណោះ ហើយ​ការ​ដាំដុះ​នោះ​ទៀត​សោត គឺ​ពួកគាត់​ដាំ តាម​ទម្លាប់ និង​តាម​បែប​ធម្មជាតិ។

លោកស្រី​ស្នើឱ្យ​មន្ត្រី​ជំនាញ​កសិកម្ម​ចុះ​ណែនាំ អំពី​របៀប​ដាំ​ដំណាំ និង​ផ្ដល់ទុន​ជួយ​ដល់​កសិករ​ក្នុងការ​បង្កបង្កើនផល ឱ្យ​បាន​ល្អ​ជាង​មុន«ពួក​ខ្ញុំ​ដាំ​បន្លែ​រហូត ទាំង​ប្រាំង​ទាំង​វស្សា​ហ្នឹង លក់បាន​ដែរ គ្រាន់​តែ​ថា លក់​វា​មិន​បាន​ច្រើន ដោយ​ផ្សារ​តម្លៃ​ទីផ្សារ​ហ្នឹង​យើង​អត់​អាច​កំណត់​តម្លៃ​បាន​ទេ។ហើយ​ម្យ៉ាងវិញទៀត ដោយសារ​វា​មាន​បន្លែ​នាំចូល​មក​ពី​ក្រៅ គេ​លក់​តម្លៃថោក ហើយ​បើ​ប្រសិនជា​ប្រជា​ពលរដ្ឋ ដាំ​បាន​ច្រើន​ដូចគ្នា ហើយ​លក់​ក្នុង​តម្លៃថោក គឺ​វា​អត់​ចំណេញ​ទេ ដល់​អីចឹង​ទៅ គាត់​ធ្វើ​ត្រឹម​ល្មម​ហូប​ក្នុង​គ្រួសារ និង​លក់​ឱ្យ​អ្នកភូមិ​តិចតួច​ទេ»

ស្រដៀង​គ្នា​នេះដែរ តំណាង​សហគមន៍ ស្រុក​កណ្ដាលស្ទឹង ខេត្ត​កណ្ដាល លោកស្រី អឿង សារី ឱ្យ​ដឹង​ថា មន្ត្រី​ជំនាញ​មិន​ដែល​ចុះទៅ ណែនាំ​បច្ចេកទេស​ថ្មីៗ​ដល់​ប្រជាពលរដ្ឋ​ក្នុង​សហគមន៍​របស់​លោក​ស្រី​នោះ​ទេ​។ លោកស្រី​ថា បើ​រដ្ឋាភិបាល អាច​ផ្ដល់ទុន និង​ផ្ដល់​បច្ចេកទេស​ដាំ​ដុះ​បន្ថែមទៀត នោះ សហគមន៍​លោកស្រី​នឹង​មាន​លទ្ធភាព​ដាំ​ដំណាំ ឱ្យ​កាន់​តែ​មានគុណ​ភាពល្អ តាម​តម្រូវការ​ទីផ្សារ​ក្នុងស្រុក៖ «សម្រាប់​ខ្ញុំ​មើលឃើញ ឃើញតែ​ស្រែក​មក​ពី​លើ ប៉ុន្តែ​ជាក់ស្ដែង​មក​ដល់​ពេល​នេះ គឺ​ខ្ញុំ​អត់​ទាន់​ឃើញ មាន​គម្រោង​ណា​ដាក់​ឱ្យ​លុយ ហើយ​បង្រៀន អី អត់​មាន​ចំណាត់ការ​ហ្នឹង​មក​ដល់​ថ្នាក់មូលដ្ឋាន​ទេ ។ តែ​នេះ​សម្រាប់​សហគមន៍​ខ្ញុំ​ទេ ក្រែងលោ​កន្លែង​ផ្សេង​គេ​ដាក់​ឱ្យ​អី ខ្ញុំ​ក៏​អត់​ដឹង​គ្រប់​ជ្រុងជ្រោយ​ដែរ ខ្ញុំ​ក៏​មិន​ហ៊ាន​ថាមេច​ដែរ ប៉ុន្តែ​មក​ខាង​ខ្ញុំ គឺ​អត់​ឃើញ​មានអី​ទេ បើ​ប្រជា​ពលរដ្ឋមិន​មាន​គំនិត​ដាំ ឬ​ធ្វើខ្លួន​ឯង​គឺ​អត់​ទេ ដូចជា​ខ្ញុំ​អីចឹង»។

ការ​ត្អូញត្អែ​របស់​កសិករ​នេះ គឺ​ដោយសារ​បច្ចុប្បន្ន កម្ពុជា​នាំចូល​បន្លែ​ជាច្រើន​មុខ​ពី​ប្រទេស​វៀតណាម ដូចជា ពោត​បារាំង ក្រូចឆ្មារ ប៉េងប៉ោះ ស្ពែ​បូកគោ ត្រប់វែង ល្ពៅ និង​ផ្កា​ខាត់ណា ជាដើម​។ បន្លែ​ទាំងនេះ សុទ្ធសឹងតែ​អាច​ដាំ​ដុះ​បាន​នៅក្នុង​ស្រុក ហើយ​ពីមុន​មក កសិករ​ខ្មែរ​ជាច្រើន​គ្រួសារ​ធ្លាប់​ដាំ​ដុះ​ជាទូទៅ។

អាស៊ីសេរី​នៅ​មិនអាច​ទាក់ទង​អ្នកនាំពាក្យ​ក្រសួងកសិកម្ម លោក ស្រី វុឌ្ឍី ដើម្បី​សុំ​ការបកស្រាយ​រឿងនេះ​បាន​នៅឡើយ នៅ​ថ្ងៃទី​៣០ កក្កដា ដោយ​លោក​មិន​លើក​ទូរស័ព្ទ។

ទោះជា​យ៉ាងណា រដ្ឋមន្ត្រី​ក្រសួង​កសិកម្ម រុក្ខា ប្រមាញ់ និង​នេសាទ លោក វេង សាខុន បាន​ប្រាប់​សារព័ត៌មាន​ក្នុងស្រុក​នៅ​ពេល​ថ្មីៗ​នេះ ថា ក្រសួង​កំពុង​ពង្រឹង​និង​ជំរុញ​ឱ្យ​ប្រជាពលរដ្ឋ​ដាំ​ដុះ និង​ចិញ្ចឹម​សត្វ​ដើម្បី​កាត់បន្ថយ​ការ​នាំចូល​បន្លែ និង​សាច់​ពី​ក្រៅប្រទេស។

ប្រធាន​សមាគម​សម្ពន្ធ​សហគមន៍​កសិករ​កម្ពុជា​លោក ថេង សាវឿន លើកឡើង​ថា ការ​អនុវត្តរបស់​រដ្ឋាភិបាល ក្នុង​ការ​ពង្រីក​វិស័យ​កសិកម្ម​នេះ មិនសូវ​មាន​ប្រសិទ្ធភាព​នៅ​ឡើយ​ទេ​។ លោក​ថា ដើម្បី អនុវត្ត​ការងារ​នេះ​ឱ្យ​មាន​ប្រសិទ្ធិភាព រដ្ឋាភិបាល​ត្រូវតែ​ផ្ដល់ ជំនួយ​បច្ចេកទេស ដើម​ទុន និង​ការ​ចុះ​ណែនាំ​ផ្ទាល់​ដល់​កសិករ​ទន្ទឹម​នឹង​នេះ លោក​ថា រដ្ឋាភិបាល​ត្រូវ​ពង្រីក​ប្រព័ន្ធ​ទឹក​ស្រោចស្រព​ឱ្យ​បាន​ទូលំទូលាយ​នៅ​ទូទាំង​ប្រទេស៖ «រដ្ឋាភិបាល​ត្រូវតែ​ស្នើ​ថវិកា ដាក់​បញ្ចូល​ទៅលើ​គម្រោង​វិស័យ​កសិកម្ម​ជា​អាទិភាព​ហ្នឹង ក្នុង​ខ្ទង់​ចំណាយថវិកា​ជាតិ ហើយ​យក​ថវិកា​ហ្នឹង​ផ្ដល់​ជា​ទុន​កម្ចី​ដល់​ប្រជា​ពលរដ្ឋ ដោយ​មាន​អត្រា​ការប្រាក់​ទាប​សមរម្យ ហើយ​មាន​លក្ខខណ្ឌ​ងាយស្រួល​ដែល​អាច​ខ្ចី​បាន​។ ទី​២​ឱ្យ​មន្ត្រី កំរិត ភូមិ ឃុំ ស្រុក មន្ទីរ​ផ្សេងៗ មិនមែន​តែ​មន្ទីរ​កសិកម្ម​ទេ មន្ទីរ​ផ្សេងៗ​ហ្នឹង​ដែលជា​មន្ត្រី​សាធារណៈ​របស់​រដ្ឋ​ហ្នឹង ដឹកនាំ​ប្រជាពលរដ្ឋ​ធ្វើ​ការ​ដាំដុះ​ហ្នឹង»។

របាយការណ៍​ក្រសួងកសិកម្ម បង្ហាញ​ថា ក្នុង​ឆ្នាំ​២០១៩ កន្លង​ទៅ កម្ពុជា​ដាំ​បន្លែ​បាន​ជាង ១​លាន​តោន​សម្រាប់​ផ្គត់ផ្គង់​ទីផ្សារ​ក្នុងស្រុក និង​នាំ​បន្លែ​ចូល​ពី​ក្រៅប្រទេស​ចន្លោះ​ពី​២០០(​ពីរ​រយ​) តោន​ទៅ​៤០០(​បួន​រយ) តោន​ក្នុង​មួយថ្ងៃ។ តាមរយៈ​ការ​នាំចូល​បន្លែ​ពី​ក្រៅប្រទេស​មក​ផ្គត់ផ្គង់​ទីផ្សារ​ក្នុងស្រុក​នេះ កម្ពុជា​ត្រូវ​ចំណាយ​ថវិកា​ប្រមាណ​២០០ (​ពីរ​រយ​) លាន​ដុល្លារ​អាមេរិក​ក្នុង​១​ឆ្នាំៗ ដែល​បន្លែ​ទាំងនោះ ភាគច្រើន​នាំចូល​ពី​ប្រទេស​វៀតណាម និង​ប្រទេស​ចិន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល