ប្រជា​នេសាទ​មួយ​ចំនួន​នៅ​ខេត្តសៀមរាប​ត្អូញត្អែរ​ពី​តម្លៃ​ត្រី​ចុះ​ថ្លៃ​ធ្វើ​ឱ្យ​ពួក​គាត់​កាន់តែ​ក្រីក្រ

ដោយ ឡេង ម៉ាលី
2022.12.10
ប្រជា​នេសាទ​មួយ​ចំនួន​នៅ​ខេត្តសៀមរាប​ត្អូញត្អែរ​ពី​តម្លៃ​ត្រី​ចុះ​ថ្លៃ​ធ្វើ​ឱ្យ​ពួក​គាត់​កាន់តែ​ក្រីក្រ ត្រីរ៉ស់ ដែល​អ្នក​​រក​ត្រី​ក្នុង​តំបន់​ទន្លេសាបលើក​យក​មក​លក់ ​នៅ​ភូមិ​ភ្នំ​ក្រោម សង្កាត់​ចុង​ឃ្នៀស ក្រុង​សៀមរាប កាល​ពី​ថ្ងៃ​ទី៨ ខែធ្នូ ឆ្នាំ២០២២។
រូបពីពលរដ្ឋ

ប្រជា​នេសាទ​មួយ​ចំនួន ដែល​រស់នៅ​ដោយ​ពឹង​លើ​ការ​រក​ត្រី​ក្នុង​តំបន់​ទន្លេសាប​អស់​រយៈ​ពេល​ជា​ច្រើន​ទសវត្សរ៍ ស្ថិត​នៅ​ភូមិ​ភ្នំ​ក្រោម សង្កាត់​ចុង​ឃ្នៀស ក្រុង​សៀមរាប ត្អូញ​អំពី​តម្លៃ​ត្រី​ចុះ​ថ្លៃ ដែល​ធ្វើ​ឱ្យ​ពួក​គាត់​ជួប​ការ​លំបាក​ផ្នែក​ជីវភាព ដោយសារ​ការ​ចំណាយ​ច្រើន​ជាង​ចំណូល។

ក្រោយ​ពី​មាន​វិធានការ​បង្ក្រាប​បទ​ល្មើស​នេសាទ​ខុស​ច្បាប់​រួច​មក ឆ្នាំ​នេះ​គឺ​ខុស​ពី​ឆ្នាំ​មុនៗ ដែល​ធ្វើ​ឱ្យ​ប្រជា​នេសាទ​អាច​រក​ត្រី​បាន​ច្រើន​សម្រាប់​ទុក​បរិភោគ និង​យក​ទៅ​លក់​ឱ្យ​ឈ្មួញ គ្រាន់​បាន​ថវិកា​ខ្លះ​យក​មក​ទិញ​អង្ករ និង​សម្ភារៈ​ផ្សេងៗ។ ប៉ុន្តែ​ពលរដ្ឋ​បារម្ភ​ថា ចំណូល ដែល​រក​បាន​សឹងតែ​មិន​គ្រប់​លើ​ការ​ចំណាយ ដោយសារ​តែ​ទីផ្សារ​ត្រី​ចុះ​ថ្លៃ ដូច្នេះ​ពួក​គាត់ ស្នើ​ដល់​អាជ្ញាធរ​ពាក់ព័ន្ធ ឱ្យ​ជួយ​រក​ទីផ្សារ​ត្រី​ឱ្យ​បាន​ថ្លៃ​ជាង​នេះ។

ប្រជា​នេសាទ​ម្នាក់ ដែល​យក​ត្រី​មក​លក់​នៅ​ផ្សារ​ភ្នំ​ក្រោម សង្កាត់​ចុងឃ្នៀស លោកស្រី ប៉ា ធឿន ប្រាប់​វិទ្យុ​អាស៊ី​សេរី​ថា ការ​នេសាទ​ត្រី​បច្ចុប្បន្ន​នេះ មិន​សូវ​បាន​ទៀង​ទាត់​នោះ​ទេ ពេល​ខ្លះ​អាច​រក​បាន ៣០គីឡូ ទៅ ៤០គីឡូ និង​ពេល​ខ្លះ​ទៀត បាន​ត្រឹម ១០គីឡូក៏មាន។ តែ​យ៉ាង​ណា រយៈពេល ២ខែ​នេះ​លោកស្រី​សង្កេត​ឃើញ​ថា ត្រី​សម្បូរ​ជាង ២ឆ្នាំមុន ក្រោយ​ពី​បិទ​ការ​នេសាទ​ខុស​ច្បាប់ ខណៈ​ដែល​កន្លង​ទៅ រក​តែ​ត្រី​សម្រាប់​បរិភោគ​សឹង​មិន​បាន។

លោកស្រី​អះអាង​ថា រាល់​ថ្ងៃ​ការ​នេសាទ​របស់​ប្រជាពលរដ្ឋ​បាន​ត្រី​ច្រើន​ជាង​មុន​ក៏​ពិត ប៉ុន្តែ​បើ​គិត​លើ​ការ​ចំណាយ​វិញ​សឹងតែ​លើស​ចំណូល ព្រោះ​ទិញ​ផ្សេងៗ ឡើង​ថ្លៃ ហើយ​ប្រជា​នេសាទ ត្រូវ​ជិះ​ទូក​ស្មាច់ ដើម្បី​ទៅ​នេសាទ រយៈ​ពេល ២យប់​ទៅ ៣យប់ ទើប​មក​គោក ដើម្បី​លក់​ម្ដង ដូច្នេះ​ការ​ប្រើ​សាំង ម៉ាសូត ក៏​កើន​ឡើង។ លោកស្រី​បន្ត​ថា សព្វថ្ងៃ​ត្រី​លក់​បាន​ត្រឹម ១គីឡូ ១ម៉ឺន​រៀល​សម្រាប់​ត្រីរ៉ស់ និង ១ពាន់រៀល​សម្រាប់​ប្រភេទ​ត្រី​តូចៗ។

«រក​បាន ឥឡូវ​រក​បាន ប៉ុន្តែ​ពិបាក​លក់ ត្រី​វា​ថោក ឈ្មួញ​ទិញ​ឯ​ណោះ ត្រី​ក្រាញ់ ត្រី​អី​ថោក​ណាស់។ ១គីឡូ ១ពាន់ (រៀល) ២ពាន់ គឺ​ថា រើស​ណាស់ យ៉ាប់​លក់។ រក​ត្រី​បាន ពិបាក​លក់​ត្រី អ្នក​ទិញ​ហ្នឹង វា​ថោក​និយម​ទៅ វា​ទិញ​បង្អាប់។ បើ​ទិញ​ឱ្យ​គូរ​សម ដែល​គ្នា​អាច​រក​បាន​អត់។ ត្រី​ស្លាត​ត្រី​អ៊ីចឹង កាល​ពី​មុន ១គីឡូ ៨ពាន់ ៩ពាន់ (រៀល) ព្រឹក​មិញ​នៅ ១គីឡូ ៤ពាន់ (រៀល

ស្រដៀង​គ្នា​នេះ ពលរដ្ឋ​ម្នាក់​ទៀត ដែល​ទើប​មក​ពី​នេសាទ​នៅ​ក្នុង​ទន្លេ លោក ឈឿន សារី ឱ្យ​ដឹង​ថា ថ្ងៃ​នេះ​លោក​រក​ត្រី​បាន​តែ ៥គីឡូប៉ុណ្ណោះ ជា​ប្រភេទ​ត្រី​រ៉ស់ ហើយ​លក់​បាន​ថវិកា ៥ម៉ឺន​រៀល ដោយ​សារ​តែ​រក​ត្រី​មិន​សូវ​បាន។ លោក​បន្ត​ថា បើ​កុំ​មាន​ខ្យល់ ជា​ធម្មតា​លោក​អាច​រក ច្រើន​ជាង​នេះ។ តែ​យ៉ាងណា លោក​ស្នើ​ឱ្យ​អាជ្ញាធរ​ពាក់ព័ន្ធ​បន្ត​បង្ក្រាប​បទ​ល្មើស​នេសាទ​ខុស​ច្បាប់​ឱ្យ​បាន​តឹងរ៉ឹង​បន្ត​ទៀត ខណៈ​ដែល​បច្ចុប្បន្ន​នៅ​តែ​ឃើញ​បទ​ល្មើស​កើត​មាន​បែប​លួចលាក់។

លោក ឈឿន សារី៖ «ពេល​ណា​ទៅ បាន ១៤ម៉ឺន (រៀល) ទៅ ២០ម៉ឺន (រៀល) តែ​ថ្ងៃ​នេះ​វា​ខ្យល់ យប់​មិញ​វា​ខ្យល់​ពេក​ត្រី​វា​អត់​ត្រូវ។ ខ្យល់​ទៅ​វា​បាត់​ត្រូវ​ទៅ​ណា​បាត់ កាល​មុន​ចេះ​តែ​សន្សំ​បាន ២០ម៉ឺនឋ​(រៀល) ៣០ម៉ឺន (រៀល)។ វា​រឿង​កើន​ឡើង ២ឆ្នាំ​នេះ វា​កើត​ឡើង ឆ្នាំ​មុន និង​ឆ្នាំ​នេះ​រាង​គ្រាន់ បើ​ប៉ុន្មាន​ឆ្នាំ​មុន​អត់ ហើយ​បាន​ត្រី​តិចតួច​លក់​ឱ្យ​ថោក​ទៀត»

ជុំវិញ​រឿង​នេះ ចៅ​សង្កាត់​ចុង ឃ្នៀស ក្រុង​សៀមរាប លោក អ៊ុំ ណារី ប្រាប់​វិទ្យុ​អាស៊ី​សេរី​ថា ប្រជាពលរដ្ឋ ដែល​រស់នៅ​ក្នុង​សង្កាត់​ចុង​ឃ្នៀស​មាន​ជាង ២ពាន់​គ្រួសារ (.០៥៦គ្រួសារ) ហើយ ពលរដ្ឋ​ប្រកប​របរ​នេសាទ​មាន​ជាង ៦០ភាគ​រយ។ តែ​យ៉ាង​ណា លោក​អះអាង​ថា នៅ​តំបន់​ទន្លេសាប​បច្ចប្បន្ន​មិន​មាន​បទ​ល្មើស​ខុស​ច្បាប់​នោះ​ឡើយ តាំង​ពី​មាន​វិធានការ​តឹងរ៉ឹង​ពី​សំណាក់​រដ្ឋាភិបាល។ ចំណែក​ការ​ត្អូញត្អែរ​របស់​ពលរដ្ឋ​ជុំវិញ​តម្លៃ​ត្រី​ចុះ​ថ្លៃ​លោក​ថា ជា​រឿង​ធម្មតា ព្រោះ​កាល​ណា​ពលរដ្ឋ​រក​ត្រី​បាន​ច្រើន គឺ​វា​ចុះ​ថ្លៃ​ទៅ​តាម​ឈ្មួញ​អ្នក​ទិញ ដូច្នេះ​លោក​មិន​ដឹង​ថា ជួយ​រក​ទីផ្សារ​បែប​ណា​នោះ​ទេ។

លោក អ៊ុំ ណារី៖ «ភក់​ផល​ដែល​បាន​ច្រើន គឺ​វា​ពិបាក​ណាស់ គឺ​ថា [ឈ្មួញ] ទម្លាក់​ថ្លៃ​ហ្នឹង អ៊ីចឹង​វា​ពិបាក​ក្នុង​ការ​រក​ដំណោះស្រាយ។ ឥឡូវ​នេះ​គឺ ត្រី​របស់​យើង​នៅ​ក្នុង​សង្កាត់​ហូរ​ចេញ​ទៅ ប៉ោយប៉ែត ចេញ​ទៅ​គ្រប់​ទីកន្លែង តែ​យប់​ឡើង​មាន​ស្ទង់​ត្រី​គេ​ទិញ​យក​មក​ស្តុក​នៅ​ឯ​ណោះ​ឯង។ អា​នេះ​ជា​រឿង​មួយ ដែល​កន្លង​មក​តែងតែ​មាន​បញ្ហា​អ៊ីចឹង។ វា​មិន​ទៀងទាត់​តម្លៃ​ទីផ្សារ ត្រី​តែ​ពេល​ច្រើន​គឺ​ថោក។ ព្រោះ​គេ​ខាង​ណោះ​ក៏​រក​បាន​ច្រើន ខាង​ណេះ​ក៏​រក​បាន​ច្រើន​ដែរ»

ទោះ​យ៉ាង​នេះ​ក្ដី ប្រធាន​មជ្ឈមណ្ឌល​ប្រជា​ពលរដ្ឋ​ដើម្បី​អភិវឌ្ឍន៍​ និង​សន្តិភាព លោក យង់ គិមអេង មើល​ឃើញ​ថា កន្លង​ទៅ​ប្រជាពលរដ្ឋ​សាទរ ចំពោះ​យុទ្ធនាការ​បង្ក្រាប​បទ​ល្មើស​នេសាទ​ទ្រង់ទ្រាយ​ធំ នៅ​តំបន់​បឹង​ទន្លេសាប ដោយ​សង្ឃឹម​ថា ត្រី​នឹង​សំបូរ​ឡើង​វិញ ប៉ុន្តែ​ពួក​គាត់​បែរ​ជា​អស់​សង្ឃឹម​ក្រោយ​ពី​តម្លៃ​ទីផ្សារ​ត្រី​ចុះ​តម្លៃ តាម​តែ​មាត់​ឈ្មួញ ខណៈ​ដែល​អាជ្ញាធរ​ពាក់ព័ន្ធ​ហាក់​មិន យក​ចិត្ត​ទុក​ដាក់ ដោះ​ស្រាយ​ជូន​ពួក​គាត់​ឱ្យ​បាន​ត្រឹមត្រូវ។

លោក យង់ គិមអេង៖ «ព្រោះ​យើង​ដឹង​ហើយ​ថា ទន្លេសាប​បាន​ផ្ដល់​នូវ ភក់​ផល​ត្រី​យ៉ាង​ច្រើន​សន្ធឹកសន្ធាប់​សម្រាប់​ប្រទេស​កម្ពុជា ហើយ អាច​នឹង​យក​ទៅ​លក់​នៅ​ខាង​ក្រៅ​ទៀត ហើយ​អាច​បង្កើន​នូវ​ចំណូល សម្រាប់​ជាតិ​ផល សម្រាប់​សេដ្ឋកិច្ច​គ្រួសារ​ប្រជាពលរដ្ឋ​ផង បើសិនជា​យើង​គ្រប់គ្រង ហើយ​នឹង​រក្សា​នូវ​ការ​នាំ​ចេញ​ទៅ​បាន​ទូលំទូលាយ គឺ​ជា​ការ​ប្រសើរ»

កាលពីថ្ងៃទី២៣ ខែមីនា លោក ហ៊ុន សែន បាន បទ​បញ្ជា​ផ្ទាល់​មាត់ ឱ្យ​កងទ័ព និង​កង​កម្លាំង​នគរបាល​សហការ​ជាមួយ​ក្រសួង​ស្ថាប័ន​ពាក់ព័ន្ធ រួម​ទាំង​អភិបាល​ខេត្ត​នៅ​ជុំវិញ​បឹង​ទន្លេសាប ឱ្យ​ចុះ​បង្ក្រាប​បទ​ល្មើស​នេសាទ​ខុស​ច្បាប់​ឱ្យ​មាន​ប្រសិទ្ធភាព ក្រោយ​ការ​ស្រាវជ្រាវ​រក​ឃើញ​បទ​ល្មើស​នេសាទ​ជា​ទ្រង់ទ្រាយ​ធំ នៅ​តំបន់​បឹង​ទន្លេសាប​ពី​សំណាក់ លោក សុខ ទូច។ ប៉ុន្តែ​ការ​ចុះ​ទប់ស្កាត់​បទ​ល្មើស​នេសាទ​នេះ គេ​សង្កេត​ឃើញ​ថា កើត​ឡើង​តែ​មួយប៉្រាវ ក្រោយ​មាន​បទ​បញ្ជា​ប៉ុណ្ណោះ។សង្គម​ស្នើ​ឱ្យ​អាជ្ញាធរ​ពាក់ព័ន្ធ​គួរ​តែ​បង្ក្រាប​បទ​ល្មើស​នេសាទ​ជា​ប្រចាំ និង​ជួយ​រក​ទីផ្សារ​លក់​ត្រី​ឱ្យ​បាន​តម្លៃ​ជាង​នេះ ដើម្បី​លើក​ស្ទួយ​ជីវភាព​ពលរដ្ឋ​កាន់​តែ​ល្អ​ប្រសើរ៕

Phnom_Krom_Siem_Reap_120822_1.JPG
ទិដ្ឋភាព​ទូកអ្នក​នេសាទនៅ​ភូមិ​ភ្នំ​ក្រោម សង្កាត់​ចុង​ឃ្នៀស ក្រុង​សៀមរាប កាល​ពី​ថ្ងៃ​ទី៨ ខែធ្នូ ឆ្នាំ២០២២។

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
លោក ហ៊ុន សែន និង​លោក សេង សារី បន្ត​ឆ្លើយឆ្លង​គ្នា​លើ​បណ្ដាញ​សង្គម​ពាក់ព័ន្ធ​សារ​បែក​ធ្លាយ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។