លោក ហ៊ុន សែន រក្សា​ជំហរ​មិន​ខ្វល់​អំពី​រឿង​បាត់បង់ EBA

ដោយ ខែ សុណង
2019-12-11
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន
លោក​នាយករដ្ឋមន្ត្រី ហ៊ុន សែន
រូប៖ ហ្វេសប៊ុក​លោក ហ៊ុន សែន

មេ​ដឹក​នាំ​របប​ក្រុង​ភ្នំពេញ លោក ហ៊ុន សែន ប្រកាស​ជា​ថ្មី​ទៀត​ថា លោក​មិន​ខ្វាយខ្វល់​រឿង​បាត់បង់​ប្រព័ន្ធ​អនុគ្រោះ​ពន្ធEBA នោះ​ទេ ខណៈ​របប​លោក​សល់​ពេល​​មួយ​ថ្ងៃ​ទៀត ដើម្បី​ឆ្លើយ​តប​នឹង​របាយ​ការណ៍​របស់​សហភាព​អឺរ៉ុប។ អ្នកឃ្លាំមើល សង្គម យល់ថា ប្រសិន​បើ​ប្រមុខ​របប​ក្រុង​ភ្នំពេញ នៅ​តែ​លើក​ឡើង​បែប​នេះ​ទៀត កម្ពុជា​មិន​ត្រឹម​តែ​បាត់បង់ EBA នោះ​ទេ ប៉ុន្តែ​ថែម​ទាំង​អាច​ទទួល​រង​ទណ្ឌកម្ម​ផ្សេងៗ ទៀត ដែល​ធ្វើ​ឲ្យ​កម្ពុជា រង​គ្រោះ​ធ្ងន់ធ្ងរ​ផង​ដែរ។

លោកនាយក​រដ្ឋមន្ត្រី ហ៊ុន សែន ប្រកាស​ជា​ថ្មី​ថា កម្ពុជា​មិន​យក​អធិបតេយ្យ​របស់​ជាតិ ទៅ​ដោះ​ដូរ​ជា​មួយ​ជំនួយ ឬ​ការ​អនុគ្រោះ​ណា​មួយ​នោះ​ឡើយ។

ក្នុង​ពិធី​ចែក​សញ្ញាប័ត្រ​ដល់​និស្សិត​ក្នុង​ក្រុង​ភ្នំពេញ នៅ​ថ្ងៃ​ទី១១ ខែ​ធ្នូ លោក ហ៊ុន សែន ថ្លែង​ថា ទោះ​បី​ជា​ថ្ងៃ​ទី១២ ខែ​ធ្នូ ជា​ថ្ងៃ​ត្រូវ​ឆ្លើយ​តប​របាយការណ៍​របស់​សហភាព​អឺរ៉ុប​ក្តី ក៏​លោក​មិន​បាន​ចាប់​អារម្មណ៍​ថ្ងៃ​នោះ​ដែរ។ លោក​បញ្ជាក់​ថា របប​លោក​ធ្វើ​បាន​តែ​ចំណុច​ដែល​ធ្វើ​បាន​ប៉ុណ្ណោះ ហើយ​លោក​ថែម​ទាំង​ព្រមាន​ទៅ​សហភាព​អឺរ៉ុប​វិញ​ថា ប្រសិន​បើ​ហ៊ាន​ដក​ប្រព័ន្ធ​អនុគ្រោះ​ពន្ធ ពី​កម្ពុជា​មែន​នោះ គឺ​មិន​មែន​ប៉ះពាល់​តែ​កម្ពុជា​ទេ សហភាព​អឺរ៉ុប ក៏​មាន​ផល​ប៉ះ​ពាល់​ដែរ៖ «ផល​ប៉ះពាល់​ វា​មិន​មែន​គ្រាន់​តែ​កម្ពុជា​ទេ អ្នកឯង​ក៏​មានផល​ប៉ះពាល់​ដែរ​ ប្រជាជន​នៅ​អឺរ៉ុប ត្រូវ​បងថ្លៃ​ច្រើន​ជាង​នៅ​ពេល​ដែល​មាន​ការ​បង់ពន្ធ​ដូចជា​អង្ករ​អ៊ីចឹង គឺ​ប្រជាជន​អឺរ៉ុប​ដែល​ស៊ី​អង្ករ ក៏​ត្រូវ​ស៊ី​អង្ករ​ថ្លៃ​ជាង​ដែរ។ សមិទ្ធផល​ដែល​អ្នកតែង​ជួយ​ខ្ញុំ​ ក៏​ត្រូវ​និរាករណ៍​ចោល​ដែរ ទឹកមាត់​អ្នក​ឯង​ជាមួយ​ខ្ញុំ​ ក៏​នឹង​កាត់​បន្ថយ​ដែរ​ មាន​ន័យ​ថា បាន​រួម​ចំណែក​សម្លាប់​អា​ពួក​ប្រឆាំង​ផ្កាប់មុខ​ហ្មង»

ការ​លើក​ឡើង​របស់​លោក ហ៊ុន សែន នេះ គឺ​ស្រប​ពេល​ដែល​របប​របស់​លោក មាន​ពេល​ត្រឹម​តែ មួយ​ថ្ងៃ​ទៀត ពោល​គឺ​នៅ​ថ្ងៃ ទី១២ ខែ​ធ្នូ​ ស្អែកនេះ​ដើម្បី​ឆ្លើយតបទៅនឹង​​របាយការណ៍​កម្រាស់ ៧០ទំព័រ​របស់​សហភាព​អឺរ៉ុប​ ពាក់ព័ន្ធ​នឹង​លក្ខខណ្ឌ​ទាមទារ​ឱ្យ​​ស្ដារ​ប្រជាធិបតេយ្យ និង​ការ​គោរព​សិទ្ធិ មនុស្ស ​ឡើងវិញ​ ជា​ថ្នូរ​នឹង​ការ​រក្សា​ប្រព័ន្ធ​អនុគ្រោះ​ពន្ធ EBA

តំណាង​ក្រុម​ប្រឹក្សា​ឃ្លាំមើល​កម្ពុជា និង​ជា​ប្រធាន​សហភាព​សហជីព​កម្ពុជា លោក រ៉ុង ឈុន ជឿ​ថា ទោះ​ជា​មាន​សារ​នយោបាយ​ខ្លាំង​បែប​នេះ​ក្តី​ ក៏​លោក ហ៊ុន សែន ច្បាស់ជា កំពុង​ព្រួយ​បារម្ភ​ខ្លាំង​ពី​រឿង​បាត់​បង់ EBA ដែរ។ លោក បន្ត​ថា លោក ហ៊ុន សែន គួរ​តែ​សម្រប​សម្រួល​ទៅ​តាម​លក្ខខណ្ឌ​របស់​សហភាព​អឺរ៉ុប ដើម្បី​ផល​ប្រយោជន៍​ជាតិ និង​ប្រជាពលរដ្ឋ។ លោក​យល់ថា ប្រសិន​បើ​រដ្ឋាភិបាល​កម្ពុជា មិន​ដោះ​ស្រាយ​តាម លក្ខខណ្ឌ​របស់​សហភាព​អឺរ៉ុប ហើយ​បណ្ដោយ​ឲ្យ​បាត់បង់ EBA នោះ គឺ​កម្ពុជា នឹង​ទទួល​រង​ទណ្ឌកម្ម ផ្សេងៗ ពី​សហគមន៍​អន្តរជាតិ​ជា​បន្ត​បន្ទាប់​ទៀត ដែល​នឹង​បណ្ដាល​ឲ្យ​កើត​មាន​វិបត្តិ​សង្គម និង​វិបត្តិ​សេដ្ឋកិច្ច​ធ្ងន់ធ្ងរ៖ «បើ​បាត់បង់​EBA​ មែន​ វា​មិន​មែន​គ្រោះ​ដល់​សហភាព​អឺរ៉ុប​នោះ​ទេ គឺ​អ្នក​ដែល​គ្រោះថ្នាក់​ជា​ប្រជាពលរដ្ឋ​កម្ពុជា​ហើយ​វា​នឹង​បាត់បង់​កិត្តិយស​ជាតិ។ វា​មិនមែន​បាត់បង់​ តែ​ EBA​ទេ​ វា​នឹង​អាច​ឈាន​ទៅ​ដាក់ទណ្ឌកម្ម​អី​ផ្សេងៗ បន្ត​ទៀត​ ហើយ​ថ្មីៗ នេះ​ម្សិល​ម្ង៉ៃ​យើង​ឃើញ​ ហើយ​ថា​ ក្រសួង​រតនាគារ​អាមេរិក បាន​ដាក់ទណ្ឌកម្ម​លើ​មន្ត្រី​រដ្ឋាភិបាល និង​ឧកញ៉ា​ពី​រូប​ទៀត​ហើយ។ នេះ​ជា​សញ្ញា​មិនល្អ​សម្រាប់​កម្ពុជា​យើង»

លោក រ៉ុង ឈ៉ុន ថ្លែង​ទៀត​ថា ការ​ធ្វើ​តាម​លក្ខខណ្ឌ​របស់​សហភាព​អឺរ៉ុប ដែល​ទាមទារ​ឱ្យ​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ​នេះ មិន​ធ្វើ​ឱ្យ​កម្ពុជា​បាត់បង់​ឯករាជ្យ ឬ​អធិបតេយ្យ​ជាតិ​ ដូច​ការ​លើកឡើង​របស់​លោក ហ៊ុន សែន ​នោះ​ទេ។ ផ្ទុយទៅវិញ លោក​​ថា ការ​ធ្វើតាម​លក្ខខណ្ឌ​របស់​សហភាព​អឺរ៉ុប នឹង​ជួយ​ពង្រឹង​ការអនុវត្ត​ច្បាប់​ឲ្យ​បាន​ត្រឹម​ត្រូវ និង​ពង្រឹង​អធិបតេយ្យ​កម្ពុជា ព្រមទាំង ជួយ​ដល់​ការ​រីក​លូតលាស់​សេដ្ឋកិច្ច​ជាតិ​ទាំងមូល៖ «តាម​ពិត​ទៅ ប្រព័ន្ធ​អនុគ្រោះ​ពន្ធ​ វា​មិន​ពាក់ព័ន្ធ​នឹង​អធិបតេយ្យ​ទេ។ ការ​និយាយ​នោះ គ្រាន់តែ​បំភ័ន្ត​ផ្នែក​ជាតិ និង​អន្តរជាតិ។ យើង​ដឹង​ហើយ​ថា សហភាព​អឺរ៉ុប​ និង​សហរដ្ឋអាមេរិក គេ​មិន​ដែល​លូកលាន់​អធិបតេយ្យ​កម្ពុជា​យើង​ទេ ប៉ុន្តែ​គ្រាន់​តែ​គេ​ចង់​ឲ្យ​កម្ពុជា មាន​ការ​គោរព​សិទ្ធិមនុស្ស និង​លទ្ធិ​ប្រជាធិបតេយ្យ​ឲ្យ​ស្រប​ទៅ​នឹង​រដ្ឋធម្មនុញ្ញ និង​ស្មារតី​កិច្ច​ព្រមព្រៀង​សន្តិភាព​ទីក្រុង​ប៉ារីស»

EBA គឺ​ជា​កិច្ច​ព្រមព្រៀង​ពាណិជ្ជកម្ម​មួយ​ដែល​បាន​អនុញ្ញាត​ឲ្យ​កម្ពុជា និង​​ប្រទេស កំពុង​អភិវឌ្ឍ​ផ្សេង​ទៀត បាន​នាំ​ទំនិញ​ចូល​ទៅ​កាន់​ទីផ្សារ​សហភាព​អឺរ៉ុប ដោយ​រួច​កាតព្វកិច្ច​ពន្ធ ។

សមាគម​រោងចក្រ​កាត់ដេរ​នៅ​កម្ពុជា (GMAC) ធ្លាប់​អះអាង​ថា ការ​ដក​​ហូត​ប្រព័ន្ធ​អនុគ្រោះ​ពន្ធ EBA នឹង​ប៉ះពាល់​ដល់​កម្មករ​ប្រមាណ ៧៥ម៉ឺន​នាក់ រួម​នឹង​គ្រួសារ​របស់​ពួក​គេ​ប្រមាណ ៣លាន​នាក់​ទៀត ដែល​កំពុង​រស់​នៅ​ពឹង​ផ្អែក​លើ​ឧស្សាហកម្ម​កាត់​ដេរ។ ចំណែក​សហព័ន្ធ​ស្រូវ អង្ករ​កម្ពុជា ក៏​ព្រមាន​ដែរ​ថា បើ​សហភាព​អឺរ៉ុប​ដក​ប្រព័ន្ធ​អនុគ្រោះ​ពន្ធ​EBA នឹង​ធ្វើ​ឲ្យ​ប៉ះ​ពាល់​ដល់​ធ្ងន់ធ្ងរ​ដល់​ប្រជាកសិករ​ខ្មែរ​ជាង​កន្លះ​លាន​គ្រួសារ ព្រម​ទាំង​ធ្វើ​ឲ្យ​ឧស្សាហកម្ម​ស្រូវ​អង្ករ​នឹង​ត្រូវ​បំផ្លាញ​ខ្ទេចខ្ទី។

ជាមួយ​គ្នា​នេះ ស្ថាប័ន​ហិរញ្ញវត្ថុ​ធំៗ របស់​ពិភពលោក​ បាន​ព្រមាន​ថា កំណើន​សេដ្ឋកិច្ច​កម្ពុជា នឹង​ត្រូវ​ធ្លាក់​ចុះ​ពី ៧ភាគ​រយ ក្នុង​ឆ្នាំ២០១៩ មក​នៅ​ត្រឹម ៦,% ក្នុង​ឆ្នាំ២០២០ ដោយសារ​ភាព​មិន​ប្រាកដ​ប្រជា​នៃ​បញ្ហា​ព្យួរ​ប្រព័ន្ធ​អនុគ្រោះ​ពន្ធ។ ក្នុង​ន័យ​នេះ កម្ពុជា​នឹង​ត្រូវ​ខាតបង់​យ៉ាង​ហោច​ណាស់​ជិត ៧០០​លាន​ដុល្លារ​អាមេរិក​ក្នុង​មួយ​ឆ្នាំ ឬ​ស្នើ​ជិត ២លាន​ដុល្លារ​អាមេរិក​ក្នុង​មួយ​ថ្ងៃ ប្រសិន​បើ​សហភាព​អឺរ៉ុប​សម្រេច​ព្យួរ​ប្រព័ន្ធ​អនុគ្រោះ​​ពន្ធ​នេះ​មែន។ នេះ​មិន​ទាន់​រាប់​បញ្ចូល​ ដល់​ប្រព័ន្ធ​អនុគ្រោះ​ពន្ធ GSP របស់​សហរដ្ឋ​អាមេរិក​ នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល