កូដករណាហ្គាវើលដ៍បន្តធ្វើម្ហូបនិងបោះតង់នៅខាងមុខក្រុមហ៊ុន ដើម្បីរង់ចាំថៅកែចេញមុខដោះស្រាយវិវាទការងារ

ដោយ ជី វិតា
2022.10.16

កូដករណាហ្គាវើលដ៍បន្តធ្វើម្ហូបនិងបោះតង់នៅខាងមុខក្រុមហ៊ុន ដើម្បីរង់ចាំថៅកែចេញមុខដោះស្រាយវិវាទការងារ

ក្រុមកូដករណាហ្គាវើលដ៍ (Nagaworld) បន្តតវ៉ានៅមុខក្រុមហ៊ុននៅថ្ងៃអាទិត្យ ទី១៦ ខែតុលានេះ ដោយបង្ហោះប៉េងប៉ោងពណ៌សនិងពណ៌ខ្មៅតំណាងឱ្យការកាន់មរណទុក្ខក្រសួងស្ថាប័នរដ្ឋនានាដើម្បីដោះស្រាយបញ្ហាវិវាទការងារ។

រូប៖ ពលរដ្ឋផ្ដល់ឲ្យ

ក្រុមកូដករក្រុមហ៊ុនបនល្បែងកាស៊ីណូណាហ្គាវើលដ៍ (Naga World) បន្តនាំគ្នាធ្វើម្ហូប និងបោះតង់នៅខាងមុខក្រុមហ៊ុន ដើម្បីរង់ចាំថៅកែចេញមុខដោះស្រាយវិវាទការងារឱ្យបានត្រឹមត្រូវតាមច្បាប់ស្ដីពីការងារ។ មន្រ្តីសហជីពយល់ថា រដ្ឋាភិបាល និងក្រសួងស្ថាប័នពាក់ព័ន្ធល្មមដល់ពេលគិតគូរជំរុញឱ្យថៅកែក្រុមហ៊ុនបរទេសគោរពច្បាប់កម្ពុជា និងសិទ្ធិសេរីភាពសហជីពនៅកន្លែងការងារ។

ក្រុមកូដករក្រុមហ៊ុនបនល្បែងកាស៊ីណូណាហ្គាវើលដ៍ (Naga World) ប្រមាណ១០០នាក់នៅថ្ងៃទី១៦ ខែតុលា នៅតែបន្តធ្វើកូដកម្មទាមទារសិទ្ធិសេរីភាពនៅកន្លែងការងារ។ ក្រុមកូដករបានបង្ហោះប៉េងប៉ោងពណ៌សលាយខ្មៅ អមដោយមានបដាសរសេរថា សូមចូលរួមការពារយុត្តិធម៌សង្គម និងប្រាប់ទៅថៅកែណាហ្គាវើលដ៍ថា ក្រុមកម្មករនៅតែចង់ចូលធ្វើការងារវិញ ព្រោះពួកគាត់គឺជាអ្នករងគ្រោះដែលត្រូវថៅកែបញ្ឈប់ពីការងារទាំងខុសច្បាប់។ ចំណែកសារលើប៉េងប៉ោងនីមួយៗ ក៏មានខ្លឹមសារថា ណាហ្គាវើលដ៍កុំយកកម្ទេចលុយមកទិញសិទ្ធិកម្មករ។

កូដករម្នាក់ គឺកញ្ញា ផុន ករុណា ប្រាប់វិទ្យុអាស៊ីសេរីថា កញ្ញានិងក្រុមកូដករដទៃទៀតជឿជាក់ថា ការណ៍ដែលកូដករសម្ដែងមតិ ផ្លុំកញ្ចែ និងវាយស្គរនៅក្បែរអគារក្រុមហ៊ុនបែបនេះវានឹងអាចជះឥទ្ធិពលដល់ថៅកែ ដើម្បីចេញមុខដោះស្រាយបញ្ចប់វិវាទការងារដ៏រ៉ាំរ៉ៃមួយនេះ។ កញ្ញាបញ្ជាក់ថា មកដល់ពេលនេះ ក្រសួងការងារនៅតែលម្អៀងទៅខាងក្រុមហ៊ុន និងគ្មានឆន្ទៈដាក់សម្ពាធឱ្យក្រុមហ៊ុន គោរពច្បាប់កម្ពុជា និងសិទ្ធិសេរីភាពរបស់សហជីពឡើយ។

កញ្ញា ផុន ករុណា ឱ្យដឹងទៀតថា ការណ៍ដែលកូដករបង្ហោះប៉េងប៉ោងពណ៌ខ្មៅលាយស គឺបង្ហាញអំពីការកាន់ទុក្ខលើក្រសួងការងារ និងស្ថាប័នថ្នាក់កំពូលៗដែលពាក់ព័ន្ធថា ពួកគេអសមត្ថភាពក្នុងការជួយរកដំណោះស្រាយការងារជូនពលរដ្ឋដែលកំពុងត្រូវបានថៅកែរំលោភបំពានលើសិទ្ធិសេរីភាព៖

«យើងមើលឃើញថា ក្រសួងការងារគាត់អត់ដែលជំរុញឱ្យក្រុមហ៊ុនគោរពច្បាប់សហជីពទេ យើងមើលឃើញថា ក្រសួងការងារអត់ជំរុញទេ។ អ៊ីចឹងក្រុមហ៊ុនគាត់ដូចជាអាងវិញ។ ឆន្ទៈរបស់យើងនៅតែបន្តព្រោះថាយើងធ្វើតាមច្បាប់គោរពតាមនីតិវិធីច្បាប់»។

វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារលោក ហេង សួរ ដើម្បីសុំអត្ថាធិប្បាយជុំវិញរឿងនេះបានទេនៅថ្ងៃទី១៦ ខែតុលា។

ការចរចារវាងកម្មករ និងតំណាងក្រុមហ៊ុនណាហ្គាវើលដ៍ក្នុងការស្វែងរកដំណោះស្រាយកន្លងមកនៅតែគ្មានលទ្ធផលនៅឡើយទេ ក្រៅតែពីក្រសួងការងារដាក់សម្ពាធឱ្យក្រុមកូដករទទួលយកសំណងពីក្រុមហ៊ុន ដើម្បីបញ្ឈប់កូដកម្មតវ៉ាតទៅទៀត។ ជាងនេះទៅទៀត ក្រុមកូដករអះអាងថា ក្រសួងការងារក៏មិនបានប្រើអំណាចក្នុងនាមជាសេនាធិការនៃនាយករដ្ឋមន្ត្រី ក្នុងការស៊ើបអង្កេតចំពោះក្រុមហ៊ុនបនល្បែងកាស៊ីណូណាហ្គាវើលដ៍ ដែលបានបញ្ឈប់បុគ្គលិកទាំងខុសច្បាប់នេះទេ។

ជុំវិញរឿងនេះ ប្រធានសម្ព័ន្ធសហជីពកម្ពុជាអ្នកស្រី យ៉ាង សោភ័ណ្ឌ មានប្រសាសន៍ថា អ្នកស្រីសោកស្ដាយដែលវិវាទការងារនេះបន្តអូសបន្លាយដោយសារតែក្រុមកម្មករមិនទាន់ទទួលបានយុត្តិធម៌ និងដំណោះស្រាយសមរម្យណាមួយនៅឡើយ។ អ្នកស្រី មើលឃើញថា ដើម្បីបញ្ចប់វិវាទដ៏រ៉ាំរ៉ៃនេះប្រកបដោយតម្លាភាព ក្រសួងការងារដែលជាភាគីសម្របសម្រួលត្រូវតែមានភាពអព្យាក្រឹត្យឥតលម្អៀង និងកោះហៅភាគីពាក់ព័ន្ធចរចារកដំណោះស្រាយដោយផ្អែកតាមច្បាប់ជាតិ និងអន្តរជាតិ៖

«យើងក្រឡេកទៅមើលកូដកម្មរបស់កូដករ គាត់ធ្វើកូដកម្មនេះ ដើម្បីស្វែងរកដំណោះស្រាយ។ ក្នុងករណីថៅកែក្រុមហ៊ុនណាហ្គាវើលដ៍ហ្នឹងមិនគោរពច្បាប់ ហើយបើគាត់ធ្វើកូដកម្មទៀតសោត ក្រុមហ៊ុនបែរជាព្យាយាមប្ដឹងផ្ដល់គាត់ វាមិនកើតឡើងជាវិវាទមួយទៀត។ អ៊ីចឹងចង់មិនចង់ សួរថាអ្នកសម្របសម្រួល ឬក្រសួងការងារហ្នឹង បានមើលឃើញចំណុចទាំងអស់ហ្នឹងឬអត់? យកចិត្តទុកដាក់ក្នុងការដោះស្រាយវិវាទហ្នឹង ឬក៏យកចិត្តទុកដាក់ ក្នុងការព្យាយាមធ្វើម៉េចឱ្យវិវាទនេះចោទក្រុមកូដករកាន់តែខុសទៅៗ?»។

រហូតមកដល់ពេលនេះ ក្រុមកូដករក្រុមហ៊ុនណាហ្គាវើលដ៍បានធ្វើកូដកម្ម ទាមទារសិទ្ធិសេរីភាពការងារជិត១ឆ្នាំមកហើយ បន្ទាប់ពីថៅកែក្រុមហ៊ុនបនល្បែងនេះ មានចេតនាលុបបំបាត់សំឡេងសហជីពឯករាជ្យក្នុងកន្លែងការងារ និងបានបញ្ឈប់បុគ្គលិកជាង៣រយនាក់។ ជាងនេះទៀត ការចេញតវ៉ារបស់ក្រុមកូដករកន្លងមកនេះ តែងតែត្រូវកម្លាំងអាជ្ញាធរប្រើបង្ក្រាបជាបន្តបន្ទាប់រហូតដល់ បណ្ដាលឱ្យកូដករម្នាក់រលូតកូនទៀតផង។ ក្រៅពីគ្មានដំណោះស្រាយដែលក្រុមកូដករអាចទទួលយកបានហើយនោះ ថ្មីៗនេះកូដករចំនួន ៤នាក់កំពុងប្រឈមបញ្ហាផ្លូវច្បាប់ ក្រោយពីក្រុមហ៊ុនបានចោទពួកគេថា បានរំលោភលំនៅឋាន ធ្វើឱ្យខូចខាតដោយចេតនាដែលមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់។

កូដករពីរនាក់ក្នុងចំណោម៤នាក់នោះនឹងត្រូវឡើងតុលាការនៅថ្ងៃទី១៧ ខែតុលា។ លើសពីនេះ ក៏មានកូដករ និងមន្រ្តីសហជីព៩នាក់ផ្សេងទៀតត្រូវបានអាជ្ញាធរចាប់ដាក់ពន្ធនាគារអស់មួយរយៈពេល ដោយរងពីបទចោទធ្វើកូដកម្មខុសច្បាប់។

មន្រ្តីសង្គមស៊ីវិលចាត់ទុកករណីនេះ ថាជាការប្រើប្រាស់ប្រព័ន្ធតុលាការ ដើម្បីគំរាមកំហែងបំបាក់ស្មារតីក្រុមកូដករឱ្យបញ្ឈប់ការតវ៉ា។ ពួកគេជំរុញដល់អាជ្ញាធរ និងភាគីពាក់ព័ន្ធគួរដោះស្រាយវិវាទការងារនេះឱ្យស្របតាមច្បាប់ស្ដីពីការងារ ជាជាងប្រើប្រព័ន្ធតុលាការដើម្បីគាបសង្កត់កម្មករឱ្យទទួលយកសំណងមិនសមរម្យ។

ចំណែកក្រុមកូដករវិញ នៅតែប្ដេជ្ញាចិត្តបន្តធ្វើកូដកម្ម ទាមទារឱ្យថៅកែគោរពសិទ្ធិសហជីព និងច្បាប់កម្ពុជា ទោះបីជាមានការសម្លុតគំរាមកំហែងពីសំណាក់អាជ្ញាធរ និងក្រុមហ៊ុនគ្រប់រូបភាពយ៉ាងណាក្ដី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។