ពលរដ្ឋរស់នៅក្រុងសៀមរាប និងក្រុមមគ្គុទ្ទេសក៍អង្គរ បង្ហាញក្ដីកង្វល់ជាថ្មីទៀត ពីការធ្លាក់ចុះភ្ញៀវទេសចរជនជាតិចិន ក្រោយពីផ្ទុះវីរុស កូរ៉ូណា (Coronavirus)នៅរយៈពេលប៉ុន្មានខែចុងក្រោយនេះ។ ពួកគេសង្កេតឃើញថា ការធ្លាក់ចុះភ្ញៀវទេសចរច្រើនបែបនេះ ធ្វើឱ្យម្ចាស់សណ្ឋាគារ ផ្ទះសំណាក់ និងកន្លែងផ្ដល់សេវាកម្មទេសចរមួយចំនួន បានបង្ខំចិត្តបញ្ឈប់បុគ្គលិក និងបិទទ្វារ។
ពលរដ្ឋរស់នៅក្រុងសៀមរាប និងក្រុមមគ្គុទ្ទេសក៍អង្គរ ថ្លែងថា ឆ្នាំ២០១៩ និងដើមឆ្នាំ២០២០ នេះ ជាពេលដ៏អាក្រក់ពុំធ្លាប់មានចំពោះពួកគាត់ ដោយសារភ្ញៀវទេសចរធ្លាក់ចុះយ៉ាងគំហុក។ ពួកគេអះអាងថា បន្ទាប់ពីវិបត្តិនយោបាយអូសបន្លាយពេលជិត ៣ឆ្នាំកន្លងទៅនេះ ភ្ញៀវទេសចរអឺរ៉ុបបានធ្លាក់ចុះខ្លាំង ក៏ប៉ុន្តែកើនឡើងភ្ញៀវទេសចរជនជាតិចិន ធ្វើឱ្យតម្រូវការមគ្គុទ្ទេសក៍ភាសាចិនកើនឡើងខ្ពស់។
ប្រធានសមាគមមគ្គុទ្ទេសក៍អង្គរ លោក ខៀវ ធី ឱ្យដឹងនៅថ្ងៃទី៣ កុម្ភៈថា ភ្ញៀវទេសចរជនជាតិចិន កើនឡើងខ្ពស់លំដាប់លេខ១ នៅរយៈពេលប៉ុន្មានឆ្នាំចុងក្រោយនេះ ក៏ប៉ុន្តែ បែរជាធ្លាក់ចុះវិញយ៉ាងគំហុកក្នុងពេលប៉ុន្មានខែនេះ បន្ទាប់ពីផ្ទុះវីរុសកូរ៉ូណាប្រភេទថ្មី។ លោកថា ការធ្លាក់ចុះភ្ញៀវទេសចរជនជាតិចិននេះ បង្កផលប៉ះពាល់មួយកម្រិតទៀត ដល់កន្លែងផ្ដល់សេវាកម្មទេសចរណ៍ និងសេដ្ឋកិច្ចប្រជាជនក្នុងតំបន់ ហើយការលក់សំបុត្រចូលទស្សនារមណីយដ្ឋានអង្គរ ក៏ធ្លាក់ចុះដែរ៖ «មានផ្ទុះមេរោគកូរ៉ូណា គឺថា ភ្ញៀវជនជាតិចិន ភ្ញៀវមកច្រើនជាងគេ នៅតំបន់សៀមរាបអង្គរអត់មកទេ។ អត់មកខាតភ្ញៀវជនជាតិចិនច្រើន។ មួយរយៈនេះ ផ្ទុះមេរោគហ្នឹងមក ជនជាតិចិនអត់មកទេ ព្រោះរដ្ឋាភិបាលចិនហាមមិនឱ្យមក ខ្លាចឆ្លងមេរោគទៅប្រទេសដទៃ » ។
បុគ្គលិកសណ្ឋាគារមួយ ក្នុងក្រុងសៀមរាប លោក អាង ឆាល ថ្លែងថា ក្រោយពីមានករណីផ្ទុះវីរុសកូរ៉ូណា ភ្ញៀវទេសចរធ្លាក់ចុះមួយកម្រិតទៀត ធ្វើឱ្យម្ចាស់សណ្ឋាគារមួយចំនួន បញ្ឈប់បុគ្គលិក និងសណ្ឋាគារខ្លះទៀត បង្ខំចិត្តបិទទ្វារ។ លោកថា កន្លែងផ្ដល់សេវាកម្មទេសចរ ដូចជា ហាងលក់វត្ថុអនុស្សាវរីយ៍ ភោជនីយដ្ឋាន និងសេវាកម្មដឹកភ្ញៀវទេសចរកំពុងជួបបញ្ហាសេដ្ឋកិច្ច ដោយសារស្ទើរតែគ្មានភ្ញៀវទេសចរ៖ «មួយរយៈនេះភ្ញៀវធ្លាក់ចុះយ៉ាងគំហុក ធ្លាក់ចុះច្រើនមែនទែន គ្រាន់តែមួយថ្ងៃៗ Cancel រាប់សិបបន្ទប់ហើយ មួយថ្ងៃៗ Cancel ក្រុមចិន ទាំងភ្ញៀវរាយ និងភ្ញៀវជាក្រុមរាប់សិបបន្ទប់។ ល្វីងមុខហើយមួយរយៈនេះ។ អូតែល (HOTEL) មួយចំនួនធំនៅខេត្តសៀមរាប កំពុងឱ្យបុគ្គលិកសម្រាកមួយអាទិត្យដោយមិនបង់លុយឱ្យ។ ពីរឆ្នាំនេះអាក្រក់ជាងគេ ប៉ុន្តែយើងថែមមួយកម្រិតទៀត អាជំងឺហ្នឹងមក គឺកាន់តែអាក្រក់ថែមទៀត » ។
ចំណែក អ្នករត់ម៉ូតូកង់បីដឹកភ្ញៀវទេសចរ លោក វិន ភារម្យ ត្អូញថា ភ្ញៀវទេសចរធ្លាក់ចុះ ធ្វើឱ្យក្រុមអ្នករត់ម៉ូតូកង់បី ថយចុះប្រាក់ចំណូល បង្កឱ្យប៉ះពាល់ជីវភាពគ្រួសារ។ រីឯអ្នកលក់ដូរម្ហូបអាហារ ក្នុងតំបន់អង្គរវិញ លោកថា ក៏កំពុងប្រឈមបញ្ហាសេដ្ឋកិច្ចធ្ងន់ធ្ងរដែរ។ លោកចាត់ទុកការផ្ទុះវីរុសកូរ៉ូណាថ្មីនេះ ជះឥទ្ធិពលអាក្រក់ដល់វិស័យទេសចរ និងសេដ្ឋកិច្ចប្រជាជនក្នុងខេត្តសៀមរាប៖ «ឥឡូវភោជនីយដ្ឋាន អូតែល (Hotel) និងផ្ទះសំណាក់ ចាប់ផ្ដើមបិទទ្វារបណ្ដើរៗ បិទជាច្រើន បន្ទាប់ពីកើតមេរោគនេះមក ស្ងាត់ភ្ញៀវ ធ្លាក់ខ្លាំងមែនទែន ស្ងាត់សូន្យភាគរយ។ អ្នកលក់ដូរតាមប្រាសាទ គាត់បើកលក្ខណៈ Restaurant ( ភោជនីយដ្ឋាន ) តាមប្រាសាទ ឥឡូវជិតបិទហើយបង វាអត់មានភ្ញៀវ កាន់តែប៉ះពាល់មែនទែនធ្ងន់ជាងមុន » ។
របាយការណ៍លក់សំបុត្រចូលទស្សនារមណីយដ្ឋានអង្គរ របស់គ្រឹះស្ថានអង្គរបង្ហាញថា នៅអំឡុងខែមករា ឆ្នាំ២០២០ ចំនួនភ្ញៀវទិញប័ណ្ណទស្សនាអង្គរមានជាង ២២ម៉ឺននាក់ (២២២.៥៦១) ថយចុះជិត ១៨% (១៧,៨៩%)ហើយទទួលបានចំណូល ជាង ១០លានដុល្លារ (១០.៥៤៧.៣៣២) ថយចុះជិត ១៥ភាគរយ (១៤,៨១) ប្រៀបធៀបនឹងរយៈពេលដូចគ្នា កាលពីខែមករា ឆ្នាំ២០១៩។
អាស៊ីសេរីបានព្យាយាមទាក់ទងអ្នកនាំពាក្យក្រសួងទេសចរណ៍ លោក តុប សុភ័ក ដើម្បីសុំការបំភ្លឺករណីនេះ តែទូរស័ព្ទហៅចូលច្រើនដង គ្មានអ្នកទទួលនៅថ្ងៃទី២ កុម្ភៈ។
ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ កត់សម្គាល់ថា ការផ្ទុះមេរោគកូរ៉ូណា កំពុងជះឥទ្ធិពលមិនល្អដល់វិស័យទេសចរកម្ពុជា ដែលពិបាករកដំណោះស្រាយភ្លាមៗ។ ក៏ប៉ុន្តែលោកថា ការត្រៀមរៀបចំបង្ការជំងឺកូរ៉ូណា មិនឱ្យឆ្លងរាលដាលដល់ពលរដ្ឋកម្ពុជា ជាវិធានការដ៏ចាំបាច់ ហើយការរៀបចំកែលម្អស្ថានភាពទេសចរនៅកម្ពុជា ក៏ត្រូវតែអនុវត្តឱ្យល្អប្រសើរដែរ៖ «វិធានការត្រៀមបង្ការនេះបានន័យថា សព្វថ្ងៃត្រៀមបង្ការ ដើម្បីកុំឱ្យពលរដ្ឋកម្ពុជាឆ្លងមេរោគ។ ប្រសិនជាមានពលរដ្ឋកម្ពុជាឆ្លងមេរោគ វារឹតតែជាព័ត៌មានអាក្រក់សម្រាប់ទេសចរដែរ ហើយវត្តមានជនបរទេសនៅកម្ពុជា ហើយទី២ គឺការត្រៀមទុកនូវរៀបចំធ្វើឱ្យប្រសើរឡើង តម្រូវការរបស់អ្នកទេសចរក្នុងការមកកាន់កម្ពុជា » ។
របាយការណ៍ ក្រសួងទេសចរណ៍ចុះផ្សាយ កាលពីថ្ងៃទី១ ខែកុម្ភៈ ឆ្នាំ ២០២០ ឱ្យដឹងថា នៅឆ្នាំ ២០១៩ កន្លងទៅនេះ ភ្ញៀវទេសចរបរទេស ដែលមកទស្សនាកម្ពុជាច្រើនជាងគេ គឺ ជនជាតិចិន មានជាង២លាននាក់ និងវៀតណាម ជិត ១លាននាក់ ស្របពេលភ្ញៀវទេសចរថៃ ឡាវ អាមេរិក ម៉ាឡេស៊ី បារាំង និង អង់គ្លេស មានចន្លោះពីជាង ១សែននាក់ ទៅជាង ៤សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។