ជាង​ថតរូប​នៅ​តំបន់​អង្គរ​ប្រឈម​នឹង​អស់​អាជីព ដោយសារ​ភ្ញៀវ​ទេសចរ​ប្រើ​កាមេរ៉ា​​ទូរស័ព្ទ​ដៃ

ដោយ សុជីវី
2022.11.03
Share on WhatsApp
Share on WhatsApp
ជាង​ថតរូប​នៅ​តំបន់​អង្គរ​ប្រឈម​នឹង​អស់​អាជីព ដោយសារ​ភ្ញៀវ​ទេសចរ​ប្រើ​កាមេរ៉ា​​ទូរស័ព្ទ​ដៃ ទេសចរកម្សាន្ត​នៅតំបន់អង្គរ ខេត្ត​សៀមរាប។
Photo Courtesy

ជាង​ថតរូប​នៅ​តាម​រមណីយដ្ឋាន​នានា​ក្នុង​ខេត្ត​សៀមរាប ត្អូញត្អែរ​ពី​បញ្ហា​ជីវភាព បន្ទាប់ពី​របរ​មួយ​នេះ​ហាក់​លែង​ទទួល​បាន​ការ​គាំទ្រ​ពី​ភ្ញៀវ​ទេសចរ​។ ពួកគាត់​បារម្ភ​បាត់បង់​អាជីព​មួយ​នេះ ដោយសារ​ទេសចរ​ភាគច្រើន​ជ្រើសរើស​ការ​ថតរូប​ក្នុង​ទូរស័ព្ទ​ដៃ ជាជាង​ប្រើប្រាស់​សេវាកម្ម​របស់​ពួកគាត់។

អាជីវកម្ម​ថតរូប​នៅ​តាម​តំបន់​រមណីយដ្ឋាន កន្លែង​ទេសចរណ៍ នៅ​ខេត្ត​សៀមរាប ក្នុង​ពេល​បច្ចុប្បន្ន​កំពុង​ប្រឈម​នឹង​ការ​បាត់បង់​បន្តិច​ម្ដងៗ ដោយសារ​បច្ចេកវិទ្យា​កាន់​តែ​មាន​ភាព​ជឿនលឿន និង​ទីផ្សារ​ប្រកប​របរ​កាន់តែ​រួម​តូច។

ជាង​ថតរូប​នៅ​រមណីយដ្ឋាន​អង្គរវត្ត លោក រិន សំអាត ប្រាប់​វិទ្យុ​អាស៊ីសេរី​ឱ្យ​ដឹង​នៅ​ថ្ងៃទី​២ វិច្ឆិកា ថា សព្វថ្ងៃ​លោក​មិនសូវ​រក​ចំណូល​បាន​ពី​ការ​ថតរូប​នោះ​ទេ ព្រោះ​បណ្ដាល​មក​ពី​ជាង​ថតរូប​មានការ​កើនឡើង ខណៈ​ភ្ញៀវ​ទេសចរ​នៅ​មាន​ចំនួន​តិច​នៅ​ឡើយ​។ លោក​ឱ្យដឹង​ថា ជា​រៀងរាល់ថ្ងៃ​លោក​ត្រូវ​ដើរ ឬ​ឈរ​រង់ចាំ និង​និយាយ​បញ្ចុះបញ្ចូល​ទៅកាន់​ភ្ញៀវ​ទេសចរ ដោយពេល​ខ្លះ​ទទួល​បាន​ការប្រើប្រាស់​សេវាកម្ម និង​ពេលខ្លះ​ទៀត​មិន​ទទួល​បាន​នោះ​ឡើយ​។ ម្យ៉ាងទៀត​លោក​ឃើញថា បច្ចុប្បន្ន​ប្រជាពលរដ្ឋ​មាន​ទូរស័ព្ទ​កាន់​ស្ទើរ​គ្រប់​ដៃ មាន​ភាព​ងាយស្រួល​ក្នុង​ការ​ប្រើប្រាស់ និង​ទទួល​បាន​រូប​ឆាប់រហ័ស​ថែមទៀត​ផង។

លោក រិន សំអាត៖ «បើ​តាម​គំនិត​ខ្ញុំៗ​គិតថា បើ​ភ្ញៀវ​ទេសចរ​គាត់​មកលេង​អ៊ីចឹង គួរតែ​ថតរូប​ទុក​ជា​អនុស្សាវរីយ៍​របស់​ពួកគាត់​ជាមួយ​នឹង​កាមេរ៉ា ដោយសារតែ​កាមេរ៉ា​មាន​ទំហំ​ធំ​ហើយ មាន​រូប​ស្អាត​ទៀត»

ស្រដៀង​គ្នា​នេះ​ដែរ លោក ជិន វណ្ណៈ បាន​ចាប់​មុខរបរ ជា​អ្នក​ថតរូប​នៅ​មុខ​ប្រាសាទអង្គរវត្ត​តាំង​ពី​ឆ្នាំ​២០១៨​មក លើកឡើង​ថា បច្ចុប្បន្ន​នេះ ទោះបី​ស្ថានភាព​ជំងឺ​កូវីដ​១៩ បាន​ធូរស្រាល និង​មាន​ភ្ញៀវ​ទេសចរ​មក​ទស្សនា​ច្រើន​ប្រាសាទអង្គរវត្ត​កើនឡើង​ក្ដី ក៏​លោក​នៅតែ​បន្ត​បាត់បង់​ចំណូល​។ លោក​បញ្ជាក់​ថា ការ​រីក​ចម្រើន​នៃ​បច្ចេកវិទ្យា​កាមេរ៉ា​នៅ​លើ​ទូរស័ព្ទ​ដៃ ដែល​ទាក់ទាញ​អ្នក​ចូលចិត្ត​ថតរូប ងាក​មក​ប្រើ​ម៉ាស៊ីនថតរូប​ពហុ​ជំនាញ​នេះ​វិញ​។ លោក​បន្ត​ថា ជា​រៀងរាល់ថ្ងៃ​លោក និង​អ្នក​ថតរូប​ដទៃទៀត តែងតែ​អង្គុយ​នៅ​ក្រោម​ដើមឈើ រង់ចាំ​ភ្ញៀវ ដើម្បី​សួរនាំ​រក​អ្នក​ដែល​ចង់​ថតរូប​។ លោក​ថា ថ្ងៃ​ខ្លះ លោក​មិនអាច​រក​ចំណូល​បាន​សូម្បី​១​ដុល្លារ​ឡើយ ទន្ទឹម​គ្នា​នេះ លោក​ក៏​មាន​គម្រោង​បោះបង់​មុខរបរ​នេះ ហើយនឹង​ទៅ​ធ្វើ​ការ​ស៊ីឈ្នួល​គេ​វិញ។

លោក ជិន វណ្ណៈ៖ «វា​មិន​ទៀង​ទេ ថ្ងៃ​ណា​បាន​ក៏​បាន​ទៅ ថ្ងៃ​ណា​អត់​ក៏​អត់​។ ថ្ងៃ​ខ្លះ​ក៏បាន​១​ម៉ឺន ទៅ​២​ម៉ឺន ថ្ងៃ​ខ្លះ​៥​ម៉ឺន តែ​ថ្ងៃ​ខ្លះ​១​រយ​រៀល​មិន​បាន​ផង»

ជា​រៀងរាល់​ថ្ងៃ នៅ​មុខ​ក្លោងទ្វារ និង​នៅក្នុង​បរិវេណ​ប្រាសាទ​អង្គរវត្ត មាន​ជាង​ថតរូប​ច្រើន​នាក់​ដើរ​តាម​ភ្ញៀវ​ទេសចរ​និង​បញ្ចុះបញ្ចូល​ពួកគេ​ឱ្យ​ប្រើ​ប្រាស់​សេវាកម្ម​របស់​ខ្លួន​។ ប៉ុន្តែ​ភ្ញៀវ​ភាគច្រើនៗ​តែង​បដិសេធ​ដោយសារ​ពួកគេ​មាន​ទូរស័ព្ទ​ដៃ​ទំនើបៗ ដែល​មាន​សមត្ថភាព​អាច​ថតរូប​បាន​តាម​តម្រូវការ​របស់​ពួកគេ។

តម្លៃ​ថតរូប​នៅ​តំបន់​ប្រាសាទ​អង្គរវត្ត ក្នុង​មួយ​ប៉ុស្តិ៍​មាន​តម្លៃ ២​ពាន់​រៀល ចំពោះ​រូប​ធម្មតា និង​៤​ពាន់​រៀល​(.០០០​រៀល​)​ចំពោះ​រូប​ដែល​មាន​ការ​កែ​លម្អ​បន្ថែម​ដោយ​ជាង​ថត​ត្រូវ​ផ្ញើ​រូប​ទៅ​ក្នុង​ទូរស័ព្ទ​របស់​ភ្ញៀវ​តាម​ប្រព័ន្ធ​តេឡេក្រាម។ ដោយឡែក​ចំពោះ​ភ្ញៀវ​ទេសចរ​ណា​ដែល​ចង់​ថតរូប និង​ផ្ដិត​យក​រូបភាព​ភ្លាមៗ តម្លៃ​អាច​កើន​ដល់​១​ម៉ឺន​រៀល​(១០.០០០​រៀល​) ក្នុង​មួយ​សន្លឹក។

ភ្ញៀវ​ទេសចរ​ម្នាក់ យុវជន នង សារ៉ូត ឱ្យ​ដឹង​ថា លោក​មិន​ដែល​ប្រើប្រាស់​សេវាកម្ម​ថតរូប​នៅ​ពេល​ទៅ​កម្សាន្ត​ប្រាសាទ​អង្គរវត្ត និង​កន្លែង​ផ្សេងៗ​ទៀត​នោះ​ឡើយ ព្រោះ​លោក​ចង់​សន្សំសំចៃ​ថវិកា មិន​ចង់​ចំណាយ​ច្រើន​ក្នុង​ពេល​ដើរ​កម្សាន្ត ខណៈ​លោក​ក៏​មាន​ទូរស័ព្ទ​ដែល​អាច​ថតរូប​ច្បាស់​ផង​ដែរ​។ ម្យ៉ាងទៀត​លោក​បន្ត​ថា ការ​ថតរូប​ដោយ​ទូរស័ព្ទ​ផ្ទាល់ខ្លួន​អាច​ថត​បាន​ច្រើន​ដង នៅ​គ្រប់​ពេល​វេលា គ្រប់​ទីកន្លែង និង​ទទួល​បាន​រូប​ភ្លាមៗ ដើម្បី​បង្ហោះ​នៅ​លើ​បណ្ដាញ​សង្គម៖ «យើង​ខ្សោយ​ថវិកា ដល់​ពេល​អ៊ីចឹង​យើង​ទុក​ថវិកា​ហ្នឹង​ចាក់​សាំង​ផង ផ្ញើ​ម៉ូតូ​ផង​អី​ផង អ៊ីចឹង​ទៅ​យើង​ថត​កាមេរ៉ា​យើង​ទៅ​វា​អត់​អស់​លុយ»

ចាប់តាំងពី​កម្ពុជា​បើក​ប្រទេស​ឡើងវិញ​ក្រោយ​វិបត្តិ​កូវីដ​-១៩ កាលពី​ខែវិច្ឆិកា ឆ្នាំ​២០២១ វិស័យ​ទេសចរ​នៅ​កម្ពុជា​នៅ​មិន​ទាន់​មាន​ភាព​ល្អ​ប្រសើរ​ឡើង​វិញ​នៅ​ឡើយ​ទេ ដែល​ជា​ហេតុ​ធ្វើ​ឱ្យ​ប៉ះពាល់​ដល់​អ្នក​ប្រកប​របរ​ក្នុង​វិស័យ​នេះ​។ ទន្ទឹម​នឹង​ពិភពលោក​មាន​ការ​រីក​ចម្រើន​ខាង​ផ្នែក​បច្ចេកវិទ្យា និង​ប្រព័ន្ធ​ឌីជីថល វា​ក៏​ជា​ផ្នែក​មួយ​ដែល​ធ្វើ​ឱ្យ​អ្នក​ប្រកប​អាជីព​កម្ម​ថតរូប​នៅ​តាម​កន្លែង​ទេសចរណ៍​រង​ផល​ប៉ះពាល់​បន្ថែម​ទៀត​មួយ​កម្រិត​ទៀត។

ទោះជា​យ៉ាងណា អ្នក​ថតរូប​នៅ​តំបន់​ទេសចរ​អង្គរ​ស្នើ​ឱ្យ​ភ្ញៀវ​ទេសចរ​ដែល​មក​លេង​កម្សាន្ត​នៅ​ប្រាសាទ​អង្គរវត្ត ងាក​មក​ប្រើប្រាស់​សេវាកម្ម​ថតរូប​ដោយ​ប្រើ​កាមេរ៉ា​ឌីជីថល​អាជីព​វិញ​ម្ដង​ដើម្បី​លើក​កម្ពស់​ជីវភាព និង​ផ្ដល់​ឱកាស​ការងារ​ដល់​ពលរដ្ឋ​មូលដ្ឋាន​។ ពួកគេ​ថា​ទោះជា​ការ​ថតរូប​សន្លឹក​មិន​សូវ​ទំនើប​ក៏​ពិតមែន តែ​ភ្ញៀវ​ទេសចរ​គូរ​ចំណាយ​លើ​ការ​ថត​ជុំគ្នា​ទុកជា​អនុស្សាវរីយ៍ ដោយសារ​រូប​សន្លឹក​ថត​ដោយ​កាមេរ៉ា​ឌីជីថល​មាន​កម្រិត​គុណភាព​ច្បាស់​ជាង​ទូរស័ព្ទ និង​រក្សាទុក​បាន​យូរ​ជាង។

ជុំវិញ​រឿង​នេះ ប្រធាន​សមាគម​ទីភ្នាក់ងារ​ទេសចរណ៍​កម្ពុជា អ្នកស្រី ឆាយ ស៊ីវលីន លើកឡើង​ថា ការ​ប៉ះពាល់​ទៅលើ​អាជីវកម្ម​ថតរូប​នៅ​តាម​តំបន់​ទេសចរណ៍​នៅ​កម្ពុជា បណ្ដាលមកពី​បដិវត្ត​ឧស្សាហកម្ម ៤.០ ដែល​ផ្ដោត​លើ​ការ​អភិវឌ្ឍ​បច្ចេកវិទ្យា​។ យ៉ាងណា​អ្នកស្រី​ថា បញ្ហា​នេះ​មិនមែន​ប៉ះពាល់​តែ​មក​លើ​កម្ពុ​ជាមួយ​នោះ​ឡើយ តែ​រដ្ឋាភិបាល​ត្រូវធ្វើ​បែបនេះ​ដើម្បី​ដើរ​ទាន់​ការ​វិវត្ត​របស់​ពិភពលោក​។ អ្នកស្រី​បន្ថែម​ថា រដ្ឋាភិបាល​នៅ​មិន​ទាន់​មាន​វិធានការ​ណាមួយ​ដោះស្រាយ​បញ្ហា​នេះ​នៅ​ឡើយ​ទេ តែ​អ្នកស្រី​មើល​ឃើញ​ថា វិស័យ​ឯកជន​នៅ​តាម​តំបន់​ទេសចរ​បាន​បន្ថែ​ម​សេវាកម្ម​ថ្មីៗ ដូចជា​ជួល​សម្លៀកបំពាក់​បុរាណ ដែល​នឹង​ផ្ដល់​ឱកាស​ឱ្យ​ជាង​ថតរូប​បាន​ទទួល​ចំណូល​ផង​ដែរ។

អ្នកស្រី ឆាយ ស៊ីវលីន៖ «ទោះ​បី​យ៉ាងណា​ក៏ដោយ យើង​ត្រូវតែ​ទទួល​ស្គាល់​ថា យើង​មាន​ការ​វិវត្ត​ចាប់​យក​ឧស្សាហកម្ម ៤.០ ហ្នឹងហើយ គឺ​ត្រូវតែ​ប៉ះពាល់​ទៅលើ​ផ្នែក​ណាមួយ​ហើយ»

មុន​ពេល​មានការ​ឆ្លង​រាតត្បាត​វីរុស​កូវីដ​-១៩ និង​ក្នុង​អំឡុង​ពេល​នោះ ពិភពលោក​រួម​ទាំង​កម្ពុជា បាន​ផ្ដោត​ទៅ​លើ​បដិវត្ត​ឧស្សាហកម្ម ៤.០ ដោយ​អភិវឌ្ឍ​លើ​បច្ចេកវិទ្យា​ឌីជីថល ដើម្បី​ឱ្យ​ការ​ធ្វើ​ទំនាក់ទំនង​របស់​មនុស្ស​កាន់តែ​មាន​ភាព​ងាយស្រួល ទំនើប និង​លឿន​ឆាប់រហ័ស​។ ជាមួយ​គ្នា​នេះ ទូរស័ព្ទ​ដៃ​ឆ្លាត​វៃ (Smart Phone) ជា​ឧបករណ៍​ទំនើប ពេញ​និយម និង​មាន​តម្លៃ​សមរម្យ​ដែល​អាច​ឱ្យ​ប្រជា​ពលរដ្ឋ​មាន​ជីវភាព​កម្រិត​មធ្យម​ប្រើប្រាស់​បាន ខណៈ​កាមេរ៉ា​នៅ​លើ​ទូរស័ព្ទ កាន់តែ​មានគុណ​ភាពល្អ​ជាង​មុន​ជា​លំដាប់។

ទាក់ទិន​រឿង​នេះ ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គឹមអេង មើលឃើញ​ថា បច្ចុប្បន្ន​ប្រជាពលរដ្ឋ​មាន​សម្ភារៈ​ប្រើប្រាស់​ទំនើបៗ​ស្ទើរ​គ្រប់គ្នា និង​ខ្លះ​ថែមទាំង​មាន​ចំណេះដឹង​ទាក់ទង​នឹង​ការ​ថតរូប​ថែម​ទៀត​ផង ធ្វើ​ឱ្យ​ពួកគេ​មិន​ចាំបាច់​ប្រើប្រាស់​សេវាកម្ម​នោះ​ឡើយ​។ តែ​លោក​យល់​ឃើញ​ថា ជាង​ថតរូប​គួរ​អភិវឌ្ឍ​ខ្លួន ស្វែងរក​អ្វី​ដែល​ប្លែក ថ្មី ទាក់ទាញ បម្រើ​ឱ្យ​អាជីវកម្ម​របស់​ខ្លួន ដោយ​មិន​ត្រូវ​ពឹងផ្អែក​ទៅលើ​ការ​ថត​បែប​ប្រពៃណី​នោះ​ឡើយ ខណៈ​ក្រសួង​-​ស្ថាប័ន​ពាក់ព័ន្ធ​ត្រូវ​លើកទឹកចិត្ត និង​បណ្ដុះបណ្ដាល​ពួកគាត់​លើ​ផ្នែក​ឌីជីថល​ផង​ដែរ។

លោក យង់ គឹមអេង៖ «យើង​គិត​មើល​ស្អី​ដែល​ប្លែក ស្អី​ដែល​ខុសពី​អ្នកប្រើប្រាស់​កាមេរ៉ា​ទូរស័ព្ទ​ដៃ​របស់​ខ្លួន​ថត ទាល់តែ​យើង​គិត​អ៊ីចឹង​បាន​អាច​ទៅ​បាន​។ បើ​មិន​អ៊ីចឹង​ទេវា​នឹង​ដូច​នៅ​បណ្ដា​ប្រទេស​មួយ​ចំនួន​គឺ​យើង​ពិបាក​រក​អ្នក​ថតរូប​ណាស់»

ក្រៅពី​នៅ​តំបន់​ប្រាសាទ​អង្គរវត្ត នៅ​តាម​បណ្ដា​រមណីយដ្ឋាន​ប្រវត្តិសាស្ត្រ​ដទៃទៀត ក៏​មាន​អ្នក​ប្រកប​អាជីវកម្ម​ថតរូប​នេះ​ផង​ដែរ ដូចជា​នៅ​មុខ​ព្រះបរមរាជវាំង វត្តភ្នំ ក្នុង​រាជធានី​ភ្នំពេញ និង​ភ្នំ​កំពង់ត្រាច នៅ​ខេត្ត​កំពត។ ប៉ុន្តែ​នៅ​កន្លែង​ខ្លះ​អាជីវកម្ម​នេះ​បាន​បាត់​ខ្លួន​ទាំងស្រុង​តែម្ដង ដោយសារ​ជាង​ថតរូប​បោះបង់​លែង​ធ្វើ​តទៅ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។