កសិករចិញ្ចឹមមាន់នៅខេត្តសៀមរាបត្អូញត្អែរ ពីបញ្ហាទីផ្សារចុះថ្លៃ និងជំងឺ
2024.09.11
មាន់ស្រែ ដែលពលរដ្ឋចិញ្ចឹមនៅខេត្តសៀមរាប។
រូប៖ ពលរដ្ឋផ្ដល់ឱ្យ
កសិករចិញ្ចឹមមាន់មួយចំនួននៅខេត្តសៀមរាប ត្អូញត្អែរថា ទីផ្សារមាន់ស្រែ ចុះថ្លៃខ្លាំង រយៈពេលប៉ុន្មានខែចុងក្រោយនេះ ធ្វើឱ្យពលរដ្ឋ ខ្លះបោះបង់អាជីពចិញ្ចឹមមាន់ ព្រោះពុំអាចរកចំណូលសម្រាប់ផ្គត់ផ្គង់គ្រួសារ ស្របពេល ដែលមាន់ ភាគច្រើន ប្រឈមជំងឺឆ្លងផង។ មន្ត្រីសង្គមស៊ីវិលថា អាជ្ញាធរពាក់ព័ន្ធ ជាពិសេស ក្រសួងកសិកម្មគួរតែរកដំណោះស្រាយ ជូនពលរដ្ឋឱ្យបានឆាប់ ហើយ កាត់បន្ថយការនាំចូលសាច់មាន់ ពីក្រៅដែលជាហេតុ ធ្វើឱ្យតម្លៃមាន់ក្នុងស្រុកចុះថ្លៃ
ប្រជាកសិករមួយចំនួននៅស្រុក ជីក្រែងនិង ស្រុកប្រាសាទបាគង ខេត្តសៀមរាបចិញ្ចឹមមាន់ស្រែលក់ ដើម្បីដោះស្រាយជីវភាពគ្រួសារ។ ក៏ប៉ុន្តែ រយៈពេលជាង ៥ខែមកនេះ ទីផ្សារមាន់ធ្លាក់ចុះ មាន់មួយក្បាល លក់បាន១ម៉ឺន ២ពាន់(១២,០០០) ទៅ១ម៉ឺន ៣ពាន់(១៣,០០០) រៀល ហើយ បើប្រៀបធៀបនឹង កាលពីមុន មានលក់បានចន្លោះ ១ក្បាល ១ម៉ឺន៥ពាន់(១៥,០០០) រៀល ទៅ១ម៉ឺន៦ពាន់(១៦,០០០)រៀល។ ពួកកាត់ថា ប្រសិនបើតម្លៃទីផ្សារ នៅតែជាប់គាំងបែបនេះ ពលរដ្ឋកាន់តែលំបាក ព្រោះតម្លៃទីផ្សារ មាន់ បច្ចុប្បន្ន មិនឆ្លើយតបជាមួយនឹងការចំណាយជាក់ស្ដែងនោះទេ។កសិករចិញ្ចឹមមាន់ស្រែ លោក ឆិ ប៊ុនហើន នៅសង្កាត់សាលាកំរើកក្រុងសៀមរាប ដែលមានកសិដ្ឋាន ចិញ្ចឹមមាន់នៅស្រុកប្រាសាទបាគង ប្រាប់វិទ្យុអាស៊ីសេរី នៅថ្ងៃទី១០ ខែកញ្ញាថា មុខរបរចិញ្ចឹមមាន់ស្រែលក់ ពុំសូវមានទីផ្សារនោះទេ នាពេលបច្ចុប្បន្ន។ លោកថា ករណីនេះ បណ្ដាលឱ្យពលរដ្ឋខ្លះ បានបោះបង់ចិញ្ចឹមមាន់ ព្រោះ រកចំណូលពុំសូវបាន សម្រាប់ផ្គត់ផ្គង់គ្រួសារ។ ចំណែក ពលរដ្ឋខ្លះទៀត ជួបបញ្ហា មាន់ មានជំងឺ បណ្ដាលឱ្យងាប់ ប្រឈមការខាតបង់ច្រើន។
លោក ឆិ ប៊ុនហើន៖ «វាធ្លាក់ថោកហើយ ចំណីការុងឡើងថ្លៃទីផ្សារវាអត់មានថេរភាព បើគាត់ដាក់ទៅវាខាតពេល គាត់សុខចិត្ត យកពេលទៅធ្វើអីវិញ វាអត់ចំណេញ។ គួរតែ ទប់ស្កាត់ ការនាំចូល(សាច់មាន់)។ តាមពិតទៅមិនចាំបាច់នាំចូល ក៏ក្នុងស្រុកយើងផ្គត់ផ្គង់បានដែរ ដើម្បីស្ថិរភាព ទីផ្សារ និងផ្ដល់តម្លៃឱ្យពួកគាត់មានទឹកចិត្ត»។
ពលរដ្ឋឱ្យដឹងថា កាលពី៤ ទៅ៥ឆ្នាំមុន ប្រជាពលរដ្ឋភាគច្រើន អាចរកចំណូលបានចន្លោះពី ៣០ម៉ឺនទៅ៤០ម៉ឺនរៀល ក្នុង១ខែ ពីការលក់មាន់។ ក៏ប៉ុន្តែរយៈពេលប៉ុន្មាន ខែចុងក្រោយនេះ ទីផ្សារ ធ្លាក់ចុះ មាន់មួយក្បាល លក់បានតម្លៃ តិចតូច។ ពួកគាត់ថា តម្លៃនេះ មិនស្របនឹងការចំណាយជាក់ស្ដែងនោះទេ ព្រោះថាកសិករខ្លះ ចិញ្ចឹមមាន់ ៥០ក្បាល ទៅ១០០ក្បាល ហើយ ការចំណាយមួយលើកៗ លើចំណី និងវ៉ាក់សាំង បង្ការជំងឺមាន់ អស់ចន្លោះពី ២០ម៉ឺន ទៅ៣០ម៉ឺនរៀល ទម្រាំនឹងបានលក់ចេញទៅកាន់ទីផ្សារ។
កសិករចិញ្ចឹមមាន់ម្នាក់ទៀត នៅស្រុក ជីក្រែង លោកស្រី ឡុង តាំង ចេះ ចិញ្ចឹមមាន់ស្រែលក់ ពីអ្នកភូមិ តៗគ្នា ពុំដែលបានរៀនបច្ចេកទេស ចិញ្ចឹមមាន់បានត្រឹមត្រូវនោះទេ។ លោកស្រីថា ជារឿង ល្អ ប្រសិនបើអាជ្ញាធរពាក់ព័ន្ធ ផ្ដល់វគ្គបណ្ដុះបណ្ដាល ពីបច្ចេកទេស ចិញ្ចឹមមាន់ ឱ្យបានត្រឹមត្រូវ និងផ្ដល់សម្ភារៈគាំទ្រ មួយចំនួនដើម្បីកាត់បន្ថយហានិភ័យ។ បន្ថែមពីនោះ លោកស្រីថា សព្វថ្ងៃ ពលរដ្ឋបាក់ទឹកចិត្ត លែងចង់ចិញ្ចឹមមាន់ទៀត ព្រោះទីផ្សារថោក ហើយការចំណាយ អស់ច្រើន ជាងចំណូល។
លោកស្រី ឡុង តាំង៖ «ទី១ ចង់ឱ្យ អាជ្ញាធរជួយជំរុញខាងទីផ្សារមាន់ស្រែយើងឱ្យមានតម្លៃ ប្រសិនណាបើ ជាតម្លៃចាប់ពី១ម៉ឺន ៥០០(ពាន់រៀល) ឡើងទៅ អត់ខាត ទេអាចចិញ្ចឹមបាន តែបើចុះពី ១ម៉ឺន ៥០០មក អត់ចំណេញតែម្ដង ហើយសូមឱ្យរដ្ឋាភិបាលជួលផ្ដល់បច្ចេកទេសណា ដែលអាចទប់ស្កាត់ជំងឺបាន ទាក់ទង វ៉ាក់សាំង ទាក់ទងការថែមទាំ គឺយើងនៅមានកម្រិត ហើយចង់បានបច្ចេកទេសបន្ថែម»។
កសិករចិញ្ចឹមមាន់ស្រែ នៅស្រុកជីក្រែង និងស្រុកប្រាសាទបាគង ភាគច្រើន បង្កើតសហគមន៍ចិញ្ចឹមមាន់ស្រែ ចែករំលែក ចំណេះដឹងគ្នា តាមរបៀបបុរាណ ដោយតម្រូវឱ្យមាន់ផឹកទឹករុក្ខជាតិ ដូចជា បណ្ដូលពេជ្រ ស្លឹកគ្រៃ ស្លឹកស្ដៅ ដើម្បីកុំឱ្យមាន់ងាប់ និងការចិញ្ចឹម ឱ្យចំណីប្រភេទ រុក្ខជាតិ ជុំវិញផ្ទះ ដូចជា ត្រកួន ស្លឹកបាស ក្ទម្ពទេស លាយជាមួយពោត កន្ទក់ជាប្រចាំ ធ្វើឱ្យមាន់មានភាពធំធាត់ល្អ និងទិន្នផលក៏ទទួលបានខ្ពស់។ បន្ថែមពីនោះ កសិករខ្លះទៀត ក៏បាន ទិញចំណីពីផ្សារ ផងដែរ ។ តែយ៉ាងណា បញ្ហាជំងឺឆ្លងផ្សេងៗ នៅតែ ជាហានិភ័យខ្ពស់ដែល បណ្ដាលឱ្យមាន់ របស់កសិករ ងាយប្រឈមងាប់ជាបន្តបន្ទាប់។
បន្ថែមពីនោះ កសិករចិញ្ចឹមមាន់ ក៏ព្រួយបារម្ភពីទីផ្សារមាន់ក្នុងស្រុកធ្លាក់ចុះកាន់តែខ្លាំង ដោយសារតែការនាំចូលសាច់មាន់ ពីបណ្ដាប្រទេសជិតខាង ច្រើនលើសលប់ ដែលធ្វើឱ្យការបញ្ជាទិញសាច់មាន់ នៅក្នុងស្រុកធ្លាក់ចុះ។ ចំណែក តម្លៃវិញ ក្រុមឈ្មួញ តែងតែឱ្យតម្លៃទាបដែលធ្វើឱ្យប៉ះពាល់ដល់ជីវភាពកសិករ ពុំសូវទទួលបានផលចំណេញ។ ករណីនេះ ពួកគាត់ស្នើឱ្យក្រសួងពាក់ព័ន្ធ គួរតែទប់ស្កាត់ការនាំចូលសាច់មាន់ពីខាងក្រៅច្រើនពេក ហើយងាកមកលើកម្ពស់វត្ថុធាតុ ដើមក្នុងស្រុកនោះ ទើបជាការប្រសើរ ដើម្បីឱ្យពលរដ្ឋមានចំណូលចិញ្ចឹមគ្រួសារ។
វិទ្យុអាស៊ីសេរី ពុំអាចទាក់ទងប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប លោក ទា គឹមសុទ្ធ ដើម្បីឆ្លើយតប ជុំវិញរឿងនេះបាននៅឡើយទេ នៅថ្ងៃទី១០ ខែកញ្ញា។ រីឯ អ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ កញ្ញា អឹម រចនា ប្រាប់វិទ្យុអាស៊ីសេរីថា ករណីបញ្ហាកង្វះទីផ្សារ និងបញ្ហាជំងឺមាន់ នេះ មិនទាន់អាចឆ្លើយតបបាននោះទេ ដោយកញ្ញាថា ត្រូវការពេលពិនិត្យជាមួយនឹងភាគីពាក់ព័ន្ធជាមុនសិន។
ទាក់ទិនរឿងនេះ ប្រធានសមាគមបណ្ដាញអ្នកចិញ្ចឹមសត្វ លោក ជួប វិបុល ប្រាប់វិទ្យុអាស៊ីសេរីថា ការធ្លាក់ចុះទីផ្សារសាច់មាន់ស្រែ របស់ពលរដ្ឋនៅខេត្តសៀមរាបនេះ គឺបណ្ដាលមកពី ការនាំចូលសាច់មាន់មកពីបណ្ដា ប្រទេសជិតខាងច្រើនពេក ដូចជាថៃ និងវៀតណាមជាដើម។ លោកថា រដ្ឋាភិបាលគួរតែទប់ស្កាត់ការនាំចូល ផលិតផល ពីខាងក្រៅ នោះទើបអាចជំរុញឱ្យសេដ្ឋកិច្ចរបស់ពលរដ្ឋល្អប្រសើរឡើងវិញ។
លោក ជួប វិបុល៖ «ប្រជាពលរដ្ឋខ្មែរ គឺជាអ្នកចិញ្ចឹមសត្វដ៏ជំនាញ បើទោះជាលក្ខណៈ គ្រួសារក៏ដោយ ប៉ុន្តែ លោកអាចចិញ្ចឹមសត្វរហូតដល់ចាល។ ដូចជាចិញ្ចឹមសត្វមាន់ រហូតដល់ចាលមិនអាចលក់ចេញបាន ឬចិញ្ចឹមជ្រូក ត្រី អ៊ីចឹង ទាល់តែចាល។ អ៊ីចឹងចំពោះការចិញ្ចឹម ខ្ញុំគិតថា លោកគាត់មានលទ្ធភាពការផ្គត់ផ្គង់ទៅលើទីផ្សារ។ សំខាន់រដ្ឋរបស់យើង ថាតើ គាត់ត្រូវការប៉ុន្មាន ជាក់លាក់ដើម្បីដាក់ផែនការ ឱ្យពលរដ្ឋ ចិញ្ចឹមដើម្បី សមស្រប ជាមួយនឹងទីផ្សារ»។
បន្ថែមពីនោះ លោកថា ការចិញ្ចឹមមាន់ របស់ពលរដ្ឋភាគច្រើន កើតឡើងដោយក្ដីស្រឡាញ់ និង ការប្រឹងប្រែងរកចំណូល ដោយខ្លួនឯង ពុំសូវមានការជំរុញ និងលើកទឹកចិត្ត តាមតម្រូវការទីផ្សារ ដែលដាក់ ចេញដោយរដ្ឋាភិបាលនោះទេ។ ការណ៍នេះ លោកថា ជាចំណុចអវិជ្ជមានរបស់អាជ្ញាធរពាក់ព័ន្ធ ដែលធ្វើឱ្យកសិករភាគច្រើន ប្រឈមការខាតបង់ ពីការចិញ្ចឹមសត្វ ដូចជា ជួបបញ្ហាជំងឺ និងកង្វះទីផ្សារ។ លោកបន្តថា កន្លងទៅ កម្ពុជាមានលទ្ធភាពផលិតសត្វមាន់ បានប្រមាណ១០ម៉ឺនក្បាលក្នុង១ថ្ងៃ ចំណែក តម្រូវការទីផ្សារប្រមាណ ១០ម៉ឺនក្បាល ក្នុង១ថ្ងៃ។ ដូច្នេះ លោកថា កម្ពុជា មិនត្រូវនាំចូលមាន់រស់ ឬសាច់មាន់ ពីបណ្ដាលប្រទេសជិតខាងនោះទេ ដែលធ្វើឱ្យប៉ះពាល់ដល់ជីវភាពពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សេដ្ឋកិច្ច
