អាជ្ញាធរខេត្តពោធិ៍សាត់កំពុងរកមធ្យោបាយសង្គ្រោះស្រូវប្រាំងជិត ៥ម៉ឺនហិកតារកំពុងប្រឈមខ្វះខាតទឹកបូមបញ្ចូលស្រែ ស្របពេលដែលស្រូវប្រាំងរបស់កសិករជាង ២ពាន់ហិកតារទៀត បានងាប់ទាំងស្រុង។
អភិបាលខេត្តពោធិ៍សាត់ លោក ខូយ រីដា ថា អាជ្ញាធរភូមិ/ឃុំ និងសមត្ថកិច្ចដេកចាំនៅវាលស្រែ ដើម្បីអន្តរាគមន៍ឱ្យកសិករបូមដាក់ស្រែស្មើៗគ្នា ចៀសវៀងឈ្លោះទាស់ទែងគ្នា។
អាជ្ញាធរខេត្តពោធិ៍សាត់ ឱ្យដឹងនៅថ្ងៃទី២៥ មករា ថា ស្រូវប្រាំងរបស់កសិករជិត ៥ ម៉ឺនហិកតារ ខូចខាតមួយចំនួនហើយ ដោយសារកសិករធ្វើស្រែប្រាំងឆ្ងាយពីប្រភពទឹកដែលអាជ្ញាធរពិបាកនឹងជួយសង្គ្រោះ។
អភិបាលខេត្តពោធិ៍សាត់ លោក ខូ រីដា ប្រាប់វិទ្យុអាស៊ីសេរីថា អាជ្ញាធរបានបូមទឹកបញ្ចូលអូរ ប្រឡាយ និងបឹងមួយចំនួន ដោយកំណត់ឱ្យកសិករបូមទឹកដាក់ស្រែស្មើៗគ្នា។
លោកថា មន្ទីរកសិកម្មខេត្តពោធិ៍សាត់វាយតម្លៃថា គិតមកទល់ពេលនេះ ស្រែប្រាំងរបស់កសិករក្នុងស្រុកបាកាន និងស្រុកកណ្ដៀង ទំហំជាង ២ ពាន់ហិកតារ ងាប់ខូចទាំងស្រុងនៅតំបន់ឆ្ងាយពីប្រភពទឹក និងតំបន់ខ្លះទៀត កំពុងក្រៀមស្វិត ហើយអាជ្ញាធរកំពុងអន្តរាគមន៍សង្គ្រោះទាន់ពេល។
លោក ខូ រីដា៖ «អាជ្ញាធរយើង ទៅដេកជាមួយទាំងយប់ និងថ្ងៃ អភិបាលស្រុក/អភិបាលស្រុករង មេឃុំ កងកម្លាំងប្រដាប់អាវុធ ទៅដេកនៅតាមមាត់ប្រឡាយដើម្បីបែងចែកទឹក ធ្វើឱ្យស្ងប់ស្ងាត់ បែងចែកទឹក ដើម្បីទទួលយកបានទាំងអស់គ្នា។ បែងចែក ចំណាត់ការរបស់ខេត្តហ្នឹង»។
អភិបាលខេត្តរូបនេះបន្ថែមថា តម្លៃស្រូវឆ្នាំនេះ ហក់ឡើងថ្លៃ ទ្វេមួយជាពីរបើធៀបកាលពីឆ្នាំមុន តម្លៃស្រូវក្នុងមួយគីឡូក្រាម ៧០០ ដល់ ៨០០ រៀល ក៏ប៉ុន្តែឆ្នាំនេះស្រូវមានតម្លៃ ចន្លោះពី ១ពាន់ ៣រយរៀល (១៣០០) ដល់ ១ ពាន់ ៥រយរៀល(១៥០០) ក្នុងមួយគីឡូក្រាម។
លោកថា ប្រសិនបើសង្គ្រោះស្រូវប្រាំងរបស់កសិករទាន់ពេល នឹងជួយដល់ជីវភាពប្រជាកសិករ។ រីឯអាជ្ញាធរខេត្តបានស្នើទៅរដ្ឋាភិបាល កសាងទំនប់ទឹកធំៗ បន្ថែមទៀត ក្នុងស្ទឹងពោធិ៍សាត់ដើម្បីផ្តល់ទឹកឱ្យពលរដ្ឋធ្វើស្រែប្រាំងគ្រប់គ្រាន់។
ចាប់តាំងពីចុងខែធ្នូ រហូតមកទល់ពេលនេះ កសិកររស់នៅស្រុកបាកាន និងស្រុកកណ្ដៀង ខេត្តពោធិ៍សាត់ កំពុងមមាញឹកបូមទឹកបញ្ចូលស្រែ និងស្វះស្វែងរកទឹកពីមធ្យោបាយផ្សេងៗ ដើម្បីស្រោចស្រូវប្រាំងរបស់ពួកគាត់។ កសិករខ្លះជីកអណ្តូង ហើយកសិករខ្លះទៀតទិញទឹកតាមរថយន្ត យកពីតំបន់ឆ្ងាយៗ បាញ់ស្រោចស្រែប្រាំង របស់ពួកគាត់។ កសិករមួយចំនួនបានដណ្តើមគ្នាបូមទឹក ពីប្រឡាយ អូរ និងស្ទឹង ធ្វើឱ្យប្រភពទឹកធំៗ រីងខះ។
ថ្មីៗនេះ កសិករបង្ហោះសារតាមបណ្ដាញសង្គមហ្វេសបុក (Facebook) បង្ហាញពីទុក្ខលំបាករបស់កសិករមួយចំនួន ក្នុងស្រុកបាកានដែលត្រូវការទឹកបូមបញ្ចូលស្រែ ប្រើពេលវេលា ថវិកា និង កម្លាំងពលកម្មច្រើនទម្រាំអាចទាញទឹក ស្រោចស្រូវប្រាំងបានម្តងៗ។
ប្រជាកសិកររស់នៅខេត្តពោធិ៍សាត់ កញ្ញា សាយ លឹមជូរ សង្កេតឃើញថា វិបត្តិខ្វះទឹក ធ្វើស្រែប្រាំង មិនត្រឹមតែកើតឡើងនោះទេ រដ្ឋាភិបាលគួរតែទទួលខុសត្រូវលើកកម្ពស់ជីវភាពប្រជាកសិករ ហើយរកមធ្យោបាយឱ្យពួកគាត់ធ្វើកសិកម្មគ្រប់រដូវ។
កញ្ញាបន្ថែមថា វិបត្តិខ្វះខាតទឹកធ្វើស្រែប្រាំងនេះដោយសារតែរដ្ឋាភិបាល មិនទាន់កសាងប្រព័ន្ធធារាសាស្ត្រគ្រប់ច្រកល្ហក។
កញ្ញា សាយ លឹមជូរ៖ «រឿងហ្នឹងវាមិនមែនទើបតែកើតឡើងជាលើកទី១ បើយើងនិយាយពីទំនួលខុសត្រូវរបស់រដ្ឋ ក្នុងការធានាពីសុវត្ថិភាព និងលើកស្ទួយកសិករបង្កបង្កើនផល។ បើមានទឹកគ្រប់គ្រាន់ យើងអាចប្រើប្រាស់ដី វាចំណេញសម្រាប់កសិករ»។
ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង យល់ថា បញ្ហាកសិករខ្វះទឹកធ្វើស្រែប្រាំង កើតឡើងច្រើនឆ្នាំមកហើយ ល្មមដល់ពេលដែលរដ្ឋាភិបាលដោះស្រាយ ដោយត្រូវពន្លឿនកសាងប្រព័ន្ធធារាសាស្ត្រគ្រប់ច្រកល្ហកដើម្បីផ្តល់ទឹកគ្រប់គ្រាន់ចែកជូនពលរដ្ឋធ្វើកសិកម្មគ្រប់រដូវ។
លោក យង់ គិមអេង៖ «បង្កើតវេទិកាកសិកម្មមួយមក គួរតែរៀបចំ អញ្ជើញអ្នកជំនាញចម្រុះផ្ដោតលើកសិកម្ម។ បញ្ហាខ្លះ យើងមើលឃើញតែបើយើងគិតទៅ យើងថា ចាយលុយច្រើន តែបើយើងជជែកគ្នា ផុសផុលប្រហែលជាយើងរកឃើញដំណោះស្រាយ»។
មន្ត្រីសង្គមស៊ីវិលរូបនេះឆ្ងល់ថា រដ្ឋាភិបាលកំណត់ថា ប្រទេសកម្ពុជាប្រទេសកសិកម្មហើយកសិករមានរហូតដល់ ៨០ ភាគរយ ហេតុអ្វីបានជា វិស័យកសិកម្មក្នុងប្រទេសនៅតែប្រឈមបញ្ហាខ្វះទឹក? លោកថា បឹងបួ ស្ទឹង និងអូរ ដែលជាប្រភពទឹកសំខាន់ រដ្ឋាភិបាលគួរតែថែរក្សា និងជីកស្ដារពង្រីកបន្ថែម ដើម្បីបង្កើតចរន្តបង្ហូរទឹកលឿនងាយស្រួល កសិករធ្វើកសិកម្មហុចផលច្រើន។
អាជ្ញាធរខេត្តពោធិ៍សាត់បន្ថែមថា ផែនការកសាងទំនប់ទឹកធំៗ ចំនួន២ ក្នុងស្ទឹងពោធិ៍សាត់នឹងផ្តើមកសាងនៅឆ្នាំ ២០២៤នេះ ហើយគម្រោងនេះ អាចឱ្យកសិករខេត្តពោធិ៍សាត់ ឈប់ប្រឈមខ្វះទឹក នៅឆ្នាំ២០២៦ និងឆ្នាំ២០២៧ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។