សហគមន៍កសិករកម្ពុជា ស្នើឱ្យរដ្ឋាភិបាល និងក្រសួងកសិកម្ម ត្រូវតែមានយន្តការច្បាស់លាស់ ដើម្បីធានាតម្លៃស្រូវសមរម្យ នៅពេលក្រុមឈ្មួញដើរប្រមូលទិញស្រូវពីកសិករ។
សំណូមពររបស់ប្រធានសម្ព័ន្ធសហគមន៍កសិករកម្ពុជា លោក ថេង សាវឿន នេះ បន្ទាប់ពីរបាយការណ៍របស់ក្រសួងកសិកម្មបង្ហាញថា អត្រានាំអង្ករចេញទៅលក់នៅក្រៅប្រទេស មានការកើនឡើង ក្នុងអំឡុងពេល ៤ខែដើមឆ្នាំ២០២០នេះ ទោះបីជាមានការរាលដាលសកលនៃជំងឺកូវីដ១៩ (Covid-19)។
លោក ថេង សាវឿន បន្តថា អត្រាកើនឡើងនៃការនាំចេញអង្ករនេះ គឺជាដំណឹងល្អសម្រាប់កសិករ ប៉ុន្តែលោកចង់ឱ្យ ទាំងកសិករនិងឈ្មួញទទួលបានផលចំណេញដូចគ្នា ដើម្បីលើកទឹកចិត្តឱ្យកសិករបន្តដាំដំណាំស្រូវបន្ថែមទៀត សម្រាប់តម្រូវការនាំអង្ករចេញទៅលក់នៅក្រៅប្រទេស៖ «ត្រូវធានារោងម៉ាស៊ីនកិនស្រូវនិងអ្នកប្រមូលទិញ ផ្ដល់តម្លៃសមរម្យសម្រាប់កសិករ កុំឱ្យពួកគាត់ខាតបង់។ ប្រសិនបើមានការកេងចំណេញ ដោយទម្លាក់តម្លៃស្រូវចំពោះកសិករ ប៉ុន្តែខ្លួនឯងយកចេញលក់តម្លៃល្អប្រសើរ។ ក្រសួងត្រូវអន្តរាគមន៍ ធ្វើយ៉ាងណាឱ្យអ្នកដាំ និងអ្នកនាំចេញបានទទួលផលចំណេញស្មើៗគ្នា»។
របាយការណ៍ក្រសួងកសិកម្មបង្ហាញថា នៅក្នុងរយៈពេល៤ខែ ដើមឆ្នាំ២០២០នេះ កម្ពុជាបាននាំចេញអង្ករទៅក្រៅប្រទេស សរុបជាង ៣០ម៉ឺនតោន (300,252 tons) ហើយបើប្រៀបធៀបអំឡុងពេលដូចគ្នា កាលពីឆ្នាំ២០១៩ គឺកើនឡើង ៤០,៥ % ។ ចំណែក ការនាំអង្ករចេញទៅប្រទេសចិនវិញ គឺមានជាង១២ម៉ឺនតោន (122,094 tons) ក្នុងអំឡុងពេល ៤ខែ ដើមឆ្នាំ២០២០ ដែលកើនឡើងប្រមាណ ២៨% បើធៀបទៅនឹង ៤ខែដើមឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។