មន្ត្រី​ជាន់​ខ្ពស់​រដ្ឋាភិបាល​ណែនាំ​ឱ្យ​អ្នក​រង​គ្រោះ​ក្នុង​ការ​វិនិយោគ​ទុន​ជាមួយ​ក្រុមហ៊ុន CIC រៀបចំ​ឯកសារ​ប្ដឹង​ទៅ​តុលាការ និង​ស្ថាប័ន​ពាក់ព័ន្ធ

ដោយ ខាន់ លក្ខិណា
2024.03.25
មន្ត្រី​ជាន់​ខ្ពស់​រដ្ឋាភិបាល​ណែនាំ​ឱ្យ​អ្នក​រង​គ្រោះ​ក្នុង​ការ​វិនិយោគ​ទុន​ជាមួយ​ក្រុមហ៊ុន CIC រៀបចំ​ឯកសារ​ប្ដឹង​ទៅ​តុលាការ និង​ស្ថាប័ន​ពាក់ព័ន្ធ ​អ្នកឧកញ៉ា គួច ម៉េងលី ដែលរងគ្រោះ​អស់​លុយ​ជិត ៣០ម៉ឺន​ដុល្លារ ក្នុង​ការ​វិនិយោគ​ជាមួយ​ក្រុមហ៊ុន ស៊ីអាយស៊ី (CIC)។
រូប៖ ហ្វេសប៊ុកទស្សនៈរបស់អ្នកឧកញ៉ាវេជ្ជបណ្ឌិត គួច ម៉េងលី

មន្ត្រី​ជាន់ខ្ពស់​រដ្ឋាភិបាល ណែនាំ​ឱ្យ​អ្នក​រងគ្រោះ​ក្នុង​ការ​វិនិយោគ​ទុន​ជាមួយ​ក្រុមហ៊ុន ស៊ីអាយស៊ី (CIC) រៀបចំ​ឯកសារ​ប្ដឹង​ទៅ​តុលាការ និង​ស្ថាប័ន​ពាក់ព័ន្ធ ដើម្បី​ឱ្យ​រក​យុត្តិធម៌។ ការ​លើក​ឡើង​នេះ  គឺ​បន្ទាប់​អ្នក​រងគ្រោះ ក្នុង​ការ​វិនិយោគ​ក្នុង​ក្រុមហ៊ុន ស៊ីអាយស៊ី ស្នើ​ឱ្យ​មាន​ការ​ស៊ើបអង្កេត​លើ​ក្រុមហ៊ុន​មួយ​នេះ ក្រោយ​ពី​បាន​បាត់​បង់​ប្រាក់​រាប់​លាន​ដុល្លារ ហើយ​គ្រួសារ និង​ជីវិត​មនុស្ស​ជា​ច្រើន​នាក់ បាន​រង​នូវ​ផល​ប៉ះពាល់ និង​ការ​ឈឺចាប់។

អ្នក​នាំ​ពាក្យ​ក្រសួង​ពាណិជ្ជកម្ម លោក ប៉ែន សុវិជាតិ លើក​ឡើង​ថា  ប្រាប់​វិទ្យុ​អាស៊ីសេរី នៅ​ថ្ងៃ​ទី២៥ មីនា ថា ក្រសួង​ពាណិជ្ជកម្ម​មិន​ដែល​លើក​ទឹក​ចិត្ត ឬ​ក៏​មិន​ដែល​ទទួល​ស្គាល់​ចំពោះ​ក្រុមហ៊ុន ដែល​ប្រព្រឹត្ត​នូវ​អំពើ​មិន​សុចរិត​នោះ​ទេ។

លោក​បន្ថែម​ថា អ្នក​ដែល​អះអាង​ថា សិទ្ធិ​របស់​ពួកគាត់ ត្រូវ​បាន​បំពាន ឬ​ត្រូវ​បាន​គេ​បោក​បន្លំ ដោយ​អំពើ​បញ្ឆោត ឬ​ការ​ផ្សាយ​ពាណិជ្ជកម្ម​មិន​គប្បី ចាំ​បាច់​ត្រូវ​តែ​រៀបចំ​ឯកសារ​អម​ផ្សេងៗ ដើម្បី​ប្ដឹង​ទៅ​តុលាការ ឬ​តាម​យន្តការ​កិច្ចការពារ​អ្នក​ប្រើប្រាស់​នៃ​ក្រសួង​ពាណិជ្ជកម្ម។

លោក ប៉ែន សុវិជាតិ៖ «ក៏​ប៉ុន្តែ​ដើម្បី​ក្រសួង​អនុវត្ត​កិច្ចការ​នេះ​បាន  វា​ចាំបាច់​ត្រូវ​មាន​ពាក្យ​បណ្ដឹង ។ ពាក្យ​បណ្ដឹង​ត្រូវ​អម​មក​ជាមួយ​នឹង​ឯកសារ​ផ្សេងៗ ដើម្បី​យើង​នឹង​អនុវត្ត​ការងារ​ទៅ​តាម​វិធាន​នៃ​ច្បាប់ គឺ​ច្បាប់​កិច្ច​ការពារ​អ្នកប្រើប្រាស់ និង​លិខិត​បទដ្ឋាន​គតិយុត្តិ​នានា ដែល​អម​ច្បាប់​នោះ។ នេះ ជា​ចំណុច​ជាក់​ស្ដែង។ អ៊ីចឹង សំណួរ​របស់​ប្អូន​ចុះ​បញ្ជី ឬ​មិន​ចុះបញ្ជី វា​មិន​សំខាន់​ទេ ទោះ​បី​ជា​ចុះបញ្ជី​ក៏ដោយ ក៏​មិន​ធានា​នូវ​សុចរិត​ភាព ឬ​មិន​ធានា​នូវ​គុណភាព​ថា ក្រុមហ៊ុន​ហ្នឹង បាន​ធ្វើ​ល្អ ឬ មិនល្អ​ទេ វា​អាស្រ័យ​ទៅ​ការ​ប្រព្រឹត្ត​ប្រចាំ​ថ្ងៃ​ទៀត​របស់​គាត់»

អ្នក​ដាក់​ទុន​ធំ​ម្នាក់ វិនិយោគ​ក្នុង​ក្រុមហ៊ុន CIC ប្រាប់​វិទ្យុ​អាស៊ី​សេរី ដោយ​សុំ​មិន​បញ្ចេញ​ឈ្មោះ និង​សំឡេង ដោយ​ព្រមាន​អំពី​លទ្ធភាព​ប្ដឹង​ទៅ​តុលាការ ប្រសិន​បើ​គ្មាន​ដំណោះស្រាយ​សមរម្យ។

ចំណែក​អ្នកឧកញ៉ា គួច ម៉េងលី ដែល​អស់​លុយ​ជិត ៣០ម៉ឺន​ដុល្លារ ក្នុង​ការ​វិនិយោគ​ជាមួយ​ក្រុមហ៊ុន ស៊ីអាយស៊ី ដែរ បាន​ប្រាប់​វិទ្យុ​អាស៊ី​សេរី នៅ​ថ្ងៃ​ទី២៥ មីនា ថា មាន​អ្នក​តំណាង​ជន​រង​គ្រោះ ទើប​តែ​ជួល​មេធាវី​បាន និង​កំពុង​មាន​ការ​រៀបចំ​ឯកសារ ដើម្បី​ធ្វើ​ការ​ប្ដឹងផ្ដល់ បើ​ទោះបី​ជា​លោក​មិន​បាន​បញ្ជាក់​ថា នឹង​ត្រូវ​ប្ដឹង​ទៅ​ស្ថាប័ន​ណា​ក៏​ដោយ។

ឧកញ៉ា គួច ម៉េងលី៖ «ខ្ញុំ​បាន​ទាក់ទង​គេ! គេ​ថា គេ​មាន​ក្រុម​មេធាវី រៀបចំ​ក្រដាស​ស្នាម ប៉ុន្តែ​ប្រហែល​ជា​គេ​មិន​ទាន់​បាន​ដាក់​ទេ មើល​ទៅ​តាម​ខ្ញុំ​ដឹង ព្រោះ​គេ​ទើប​រៀបចំ​ក្រដាស​ស្នាម ហើយ​រៀបចំ​ជួល​មេធាវី​បាន។ អ៊ីចឹង​ប្រហែល​ជា​គេ​រៀបចំ​ដាក់​ឆាប់ៗ​ហើយ គេ​កំពុង​រឿង​ទាន់​ក្ដៅ​អ៊ីចឹង​បាទ»

ជុំវិញ​បញ្ហា​នេះ អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន សរសេរ​នៅ​លើ​ទំព័រ​ហ្វេសប៊ុក​របស់​លោក​នៅ​ថ្ងៃ​ទី២៥ មីនា ថា ករណី​រឿង​ក្រុមហ៊ុន CIC គឺ​ជា​ក្រុមហ៊ុន​ដែល​មាន​ការ​ចុះ​បញ្ជី ដើម្បី​ធ្វើការ​វិនិយោគ និង​មាន​ក្រុម​ប្រឹក្សាភិបាល​គ្រប់គ្រង​ច្បាស់លាស់។ លោក​អះអាង​ថា ស្ថាប័ន​មាន​សមត្ថកិច្ច​យក​ចិត្ត​ទុក​ដាក់​ខ្ពស់​ចំពោះ​រឿង​នេះ និង​ខិតខំ​សម្របសម្រួល រក​ដំណោះស្រាយ​ការពារ​ផល​ប្រយោជន៍​របស់​អ្នក​វិនិយោគ​តាម​ច្បាប់។

វិទ្យុ​អាស៊ី​សេរី​មិន​អាច​ទាក់ទង​សុំ​ការ​អត្ថាធិប្បាយ​បញ្ហា​នេះ  ពី​ស្ថាបនិក​ជាន់ខ្ពស់​នៃ​ក្រុមហ៊ុន ស៊ីអាយស៊ី និង​ជា​គ្រូ​ជោគជ័យ លោក ឃីម សុខហេង បាន​ទេ នៅ​ថ្ងៃ​ទី២៥ មីនា ដោយសារ​ទូរស័ព្ទ​ចូល​គ្មាន​អ្នក​ទទួល។ នៅ​ពេល​វិទ្យុ​អាស៊ី​សេរី​ទាក់ទង​តាម​លេខ​ទូរស័ព្ទ​របស់​ក្រុមហ៊ុន បុគ្គលិក​មួយ​រូប បាន​ឆ្លើយ​ថា គាត់​មិន​ដឹង​រឿង​នេះ​ទេ។

បុគ្គលិក៖ «ខ្ញុំ​ត្រឹម​បុគ្គលិក​ខ្ញុំ​អត់​ដឹង​ដែរ​បង ចំពោះ​រឿង​ហ្នឹង ទាល់​តែ​ជួប​ជាមួយ​ខាង​ថ្នាក់​លើ ។ ចំពោះ​ខ្ញុំ​អត់​ដឹង​ថា ម៉េច​ទេ។ ខ្ញុំ​មាន​តួនាទី ចាំ​ទទួល​លេខ​របស់​ក្រុមហ៊ុន»

នៅ​ពេល​វិទ្យុ​អាស៊ី​សេរី សួរ​អំពី​ការ​ស្នើ​របស់​ជន​រងគ្រោះ​ជា​ច្រើន​នាក់ ឱ្យ​មាន​ការ​ស៊ើបអង្កេត​លើ​ក្រុមហ៊ុន ស៊ីអាយស៊ី (CIC) ដើម្បី​នាំ​ខ្លួន​ឧក្រិដ្ឋជន​ទៅ​ផ្ដន្ទាទោស តាម​ច្បាប់​នោះ អ្នក​នាំ​ពាក្យ​រង​ក្រសួង​មហាផ្ទៃ លោក ទូច សុខៈ បាន​លើក​ឡើង​ថា តាម​ផ្លូវ​ច្បាប់​ប្រជាពលរដ្ឋ ដែល​មាន​មូលដ្ឋាន​សំអាង ឬ​មាន​ភស្តុតាង ទាក់ទង​នឹង ​ការ​រងគ្រោះ​របស់​ពួកគាត់ មាន​សិទ្ធិ​ប្ដឹង​ទាមទារ ចំពោះ​អំពើ​ទាំង​ឡាយ​ណា ដែល​នាំ​ឱ្យ​មាន​ការ​ខូចខាត​ផល​ប្រយោជន៍​របស់​ខ្លួន។

លោក ទូច សុខៈ បាន​ពន្យល់​ប្រាប់​វិទ្យុ​អាស៊ី​សេរី នៅ​ថ្ងៃ​ទី២៤ មីនា ថា ភាគី​ដែល​អះអាង​ថា ពួក​គាត់​រង​គ្រោះ អាច​បង្ហាញ​ភស្តុតាង និង​ប្ដឹង​ផ្ដល់​ទៅ​កាន់​ អាជ្ញាធរ​សមត្ថកិច្ច​ពាក់ព័ន្ធ ដោយ​សហការ​តាម​បែបបទ​រដ្ឋបាល និង​ច្បាប់។

លោក ទូច សុខៈ៖ «មួយ​ទៀត គឺ​យើង​អាច​ប្ដឹង​ដោយ​ផ្ទាល់​ទៅ​កាន់​តុលាការ​តែ​ម្ដង។ អ៊ីចឹង​ហើយ​ពេល​ខ្លះ ទាមទារ​ឱ្យ​មាន​ការ​ចូលរួម ដាក់​ពាក្យ​បណ្ដឹង​ពី​សំណាក់​ភាគី​រងគ្រោះ ពីព្រោះ​ពេល​ខ្លះ សមត្ថកិច្ច​លោក​មិន​អាច​ក្ដាប់​បាន ដែល​ហៅ​ថា គ្រប់​រឿង​ហេតុ ឬ​ក៏​រឿង​រ៉ាវ​ទេ ទាល់​តែ​មាន​ការ​ប្ដឹង​ផ្ដល់ ទើប​យើង​អាច​បើក​នៅ​ការ​ស៊ើបអង្កេត ស្រាវជ្រាវ ដើម្បី​ឈាន​ទៅ​រក​ការ​កំណត់​នៅ​អ្នក​ណា​ដែល​ប្រព្រឹត្ត​កំហុស»

កន្លង​មក ក្នុង​រឿង​សំណុំ​ពុករលួយ​នៅ​​ក្រុមហ៊ុន ស៊ីអាយស៊ី នេះ ពុំ​មាន​ជន​រងគ្រោះ​ណា ប្ដឹង​ក្រុមហ៊ុន ស៊ីអាយស៊ី ទៅ​តុលាការ​នៅ​ឡើយ​ទេ និង​ក៏​មិន​ទាន់​ ឃើញ​អ្នក​ទទួល​ខុស​ត្រូវ​ជាន់ខ្ពស់​រូប​ណា​របស់​ក្រុមហ៊ុន ត្រូវ​ប្រឈម​មុខ​ច្បាប់​ដែរ ប៉ុន្តែ មាន​តែ​បណ្ដឹង​មួយ​គត់ គឺ​រដ្ឋ​មន្ត្រី​ប្រតិភូ​អម​នាយករដ្ឋមន្ត្រី លោក ព្រាប កុល ប្ដឹង​លោក យ៉ង ប៉ាក់ ដែល​ធ្លាប់​បញ្ជាក់​ថា ជា​ជន​រងគ្រោះ នៅ​ក្នុង​ការ​វិនិយោគ​ជាមួយ​ក្រុមហ៊ុន​ទៅ​វិញ។

លោក យ៉ង ប៉ាក់ ត្រូវ​បាន​អាជ្ញាធរ​ចាប់​ដាក់​គុក តាម​បណ្ដឹង​របស់​លោក ព្រាប កុល ដោយ​គ្រាន់​តែ​សំអាង​លើ​លិខិត​បំភ្លឺ​ពីរ​ទំព័រ​ពី​ក្រុមហ៊ុន ស៊ីអាយស៊ី ដែល​ថា លោក ព្រាប កុល មិន​ពាក់ព័ន្ធ។ ប៉ុន្តែ មិន​បង្ហាញ​ការ​ស៊ើបអង្កេត​ហ្មត់ចត់​ឡើយ។

លោក យ៉ង ប៉ាក់ ធ្លាប់​បាន​អះអាង​នៅ​មុន​ការ​ចាប់​ខ្លួន​ថា លោក​មាន​ភស្តុតាង​ ដែល​បញ្ជាក់​អំពី​ការ​ជាប់​ពាក់ព័ន្ធ​របស់​លោក ព្រាប កុល ក្នុង​ការ​កិបកេង​លុយ​ជាង ៨០លាន​ដុល្លារ។

ដោយ​ឡែក​ម្ចាស់​អាខោន (គណនី) ហ្វេសប៊ុក​ជា​ភាសា​អង់គ្លេស ឈ្មោះ Maly Cambodia បាន​អះអាង​ថា ខ្លួន​ក៏​ជា​ជន​រងគ្រោះ​ដ៏​ឈឺ​ចុក​ចាប់​ម្នាក់ ក្នុង​ការ​ដាក់​លុយ​ឱ្យ​ក្រុមហ៊ុន CIC ខ្ចី ដើម្បី​យក​ការ​ប្រាក់​ត្រឹម​តែ ១.២ ភាគរយ (,%) ក្នុង​មួយ​ខែ។

ប្រភព​ដដែល​សរសេរ​ថា ក្រុមហ៊ុន ស៊ីអាយស៊ី ព្យាយាម​ពន្យារ​ពេល​មិន​សង​លុយ​ដល់​គាត់​វិញ តាំង​ពី​ខែមិថុនា ឆ្នាំ២០២៣ រហូត​ដល់​បច្ចុប្បន្ន ហើយ​ថា ពេល​គាត់​និយាយ​ខ្លាំង​ក្នុង​គ្រុប​តេឡេក្រាម (Group Telegram Private) សោះ  ក៏​ខល​មក​គំរាម​អាយុ​ជីវិត​គ្រួសារ​របស់​គាត់។

អ្នក​ឧកញ៉ា គួច ម៉េងលី ដែល​ជា​ជន​រងគ្រោះ អស់​លុយ​ជិត ៣០ ម៉ឺន​ដុល្លារ បាន​លើក​ឡើង​ថា រដ្ឋាភិបាល មិន​អាច​នៅ​ស្ងៀម​ស្ងាត់​ចំពោះ​រឿង​ក្រុមហ៊ុន ស៊ីអាយស៊ី ទេ ពីព្រោះ​សំណុំ​រឿង​ព្រហ្មទណ្ឌ គួរ​តែ​ត្រូវ​ចាប់​ផ្ដើម​ស៊ើបអង្កេត យក​អ្នក​ទទួល​ខុស​ត្រូវ​ទៅ​ផ្ដន្ទាទោស។

លោក​និយាយ​ថា ករណី​ក្រុមហ៊ុន ស៊ីអាយស៊ី និង​ការ​ក្លែង​បន្លំ នៅ​កន្លែង​ផ្សេង​ទៀត ដែល​ជួប​បញ្ហា​ជា​បន្តបន្ទាប់​ពី​មួយ​រឿង​ទៅ​មួយ​រឿង ធ្វើ​ឱ្យ​ប្រជាពលរដ្ឋ​រងគ្រោះ​ច្រើន​ណាស់។

ឧកញ៉ា គួច ម៉េងលី៖ «ធ្វើ​ឱ្យ​ប៉ះទង្គិច​ទឹក​ចិត្ត​ក្រុម​គ្រួសារ សេដ្ឋកិច្ច​គ្រួសារ​គេ គឺ​ធ្ងន់ធ្ងរ ប្រជាជន​លែងលះ​គ្នា ប្រជាជន​ឈ្លោះ​គ្នា បាក់​បែក​គ្រួសារ​រប៉ាត់រប៉ាយ ការ​រស់នៅ​វេទនា​តោកយ៉ាក គឺ​រហេមរហាម ដោយសារ​ការ​បោក​បំផ្លាញ​ទាំង​អស់​នេះ។ អ៊ីចឹង​ដូច​រាល់​ថ្ងៃ ប្រជាជន​កំពុង​មាន​បញ្ហា​ផ្លូវ​ចិត្ត ប្រជាជន​កំពុង​ជំពាក់​ធនាគារ ប្រជាជន​កំពុង​មាន​សតិអារម្មណ៍​ក្នុង​គ្រួសារ​ច្រើន ដែល​ជា​លទ្ធផល​មក​ពី​ឆបោក​មក​ចំនួន​ទាំង​អស់​នេះ ដែល​សំបូរ​បែប​នៅ​ក្នុង​ប្រទេស​យើង ដែល​រដ្ឋាភិបាល​កំពុង​ប្រឈម​នឹង​ការ​ដោះស្រាយ ហើយ​បើ​សិន​ជា​មាន​រឿង​មួយ ហើយ​មាន​រឿង​ពី​ដោះស្រាយ​រឿង​ពីរ វា​ធ្វើ​ឱ្យ​ប្រជាពលរដ្ឋ​ដែល​ជា​អ្នក​រងគ្រោះ​នោះ យ៉ាង​ហោច​ណាស់ វា​មាន​ភាព​ត្រជាក់​ចិត្ត»

អ្នក​ឧកញ៉ា គួច ម៉េងលី បាន​លើក​ឡើង​ថា បើ​មិន​រក​យុត្តិធម៌ និង​បណ្ដោយ​ឱ្យ​រឿង​បែប​នេះ បន្ត​កើត​ឡើង​ទៀត ប្រជាជន​នឹង​បាត់​បង់​ជំនឿ លើ​រដ្ឋាភិបាល​និង​​ប្រព័ន្ធ​យុត្តិធម៌ រដ្ឋាភិបាល​នឹង​បាត់​បង់​ជំនឿ​ពី​សហគមន៍​អន្តរជាតិ ហើយ​នឹង​ឈាន​ទៅ​ដល់​ការ​បំផ្លិចបំផ្លាញ​សេដ្ឋកិច្ច​កម្ពុជា។

ឆ្លើយ​តប​នឹង​ប្រតិកម្ម​នានា ព័ត៌មាន​ចុង​ក្រោយ​បង្អស់ គិត​ត្រឹម​ល្ងាច​ថ្ងៃ​ទី២៥ មីនា ទាក់ទង​នឹង​ក្រុមហ៊ុន ស៊ីអាយស៊ី ដែល​ប្រកាស​ដោយ​និយ័តករ​មូលបត្រ​កម្ពុជា (...) បង្ហាញ​ថា ទ្រព្យ​សកម្ម​របស់​ក្រុមហ៊ុន ត្រូវ​បាន​ប្រមូល​មក​វិញ​ប្រមាណ ៩០% នៃ​ចំនួន​ទឹក​ប្រាក់​សរុប ដែល​និយ័តករ​មូល​បត្រ​កម្ពុជា កំពុង​ជំរុញ​ការ​រៀបចំ​វេច​ខ្ចប់​ឱ្យ​បាន​ត្រឹមត្រូវ​តាម​ផ្លូវ​ច្បាប់ ដើម្បី​ការពារ​ផល​ប្រយោជន៍​របស់​​វិនិយោគិន​ស្រប​ច្បាប់។

និយ័តករ​មូលបត្រ​កម្ពុជា អះអាង​នៅ​ក្នុង​សេចក្ដី​ប្រកាស​ព័ត៌មានថា នឹង​បន្ត​ពិនិត្យ គ្រប់គ្រង​ការងារ​របស់​គណៈកម្មការ​ស្ដារ​ក្រុមហ៊ុន​ និង​មូលនិធិ​ជា​បន្ត និង​ឃ្លាំមើល ជា​ប្រចាំ ព្រម​ទាំង​បាន​ពិនិត្យ​ជា​ស្រេច នូវ​គោល​ការណ៍​ច្បាប់ និង​បទប្បញ្ញត្តិ​នៃ ​វិស័យ​មូលបត្រ ដើម្បី​ការពារ​ឱ្យ​បាន​ជា​អតិបរមា នូវ​ផល​ប្រយោជន៍​របស់​វិនិយោគិន​ស្រប​ច្បាប់​ទាំង​អស់ ទោះបី​ក្នុង​ស្ថានភាព​ដែល​ក្រុមហ៊ុន​កំពុង​ជួប​​ការ​លំបាក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។