ពលរដ្ឋមួយចំនួនរស់នៅតាមបន្ទាត់ព្រំដែនកម្ពុជា-ថៃ បាននាំគ្នាចំណាកស្រុកទៅរកការងារធ្វើនៅប្រទេសថៃ ដើម្បីរកប្រាក់សងបំណុលធនាគារ ដោយសារពួកគេមិនអាចរកការងារធ្វើបាននៅក្នុងស្រុក និងដាំដំណាំកសិកម្មរងការខាតបង់ធ្ងន់ធ្ងរ។ មន្ត្រីសង្គមស៊ីវិលបារម្ភខ្លាចពលរដ្ឋទាំងនោះទៅធ្វើការងារឆ្លងដែន ដោយចាញ់បោកមេខ្យល់ និងប្រឈមនឹងការឃាត់ខ្លួនពីអាជ្ញាធរប្រទេសនោះ។
ពលរដ្ឋម្នាក់រស់នៅ ក្រុងសំរោង ខេត្តឧត្តរមានជ័យ លោក ទិម សារ៉ាត់ ប្រាប់វិទ្យុអាស៊ីសេរី នៅថ្ងៃទី១៦ ខែឧសភា ថា ពលរដ្ឋនៅក្នុងភូមិរបស់លោកជាង ៨០ភាគរយ បាននាំគ្នាធ្វើចំណាកស្រុកទៅរកការងារធ្វើនៅប្រទេសថៃ ដើម្បីបានប្រាក់ផ្គត់ផ្គង់គ្រួសារ និងសងបំណុលធនាគារ ដោយសារប៉ុន្មានខែកន្លងមកនេះមានគ្រោះរាំងស្ងួតធ្វើឲ្យពលរដ្ឋនៅតំបន់នោះខាតបង់ពីការដាំដំណាំកសិកម្ម និងមិនអាចរកការងារបានធ្វើនៅក្នុងស្រុក។ លោកបន្ថែមថា លោកក៏គ្រោងទៅធ្វើការនៅប្រទេសថៃនៅចុងខែឧសភានេះដែរ បន្ទាប់ពីលោកធ្វើស្រែចម្ការរួចរាល់ ចំណែកឯកូនៗរបស់លោកទុកផ្ញើនឹងឪពុកម្ដាយ។
លោក ទិម សារ៉ាត់៖ «យើងវាអត់មានលុយបង់ធនាគារផង ហើយធ្វើដំឡូងលុយភ្ជួរស្រែក៏មិនដឹងទៅរកលុយមកពីខាងណាបាន បើទៅខ្ចីធនាគារទៀតគេលែងឲ្យដោយសារកន្លងមកមានអ្នករកលុយបង់ស្ទឹងមិនបាន ដោយសារដាំដំណាំកសិកម្មយើងវាខូចខាត ដូច្នេះខ្ញុំក៏សម្រេចថា ទៅនឹងគេដែរ ព្រោះវាទាល់តម្រិះហើយទឹកលិចដល់ច្រមុះហើយខ្ញុំថាទៅរយៈពេលមួយគ្រាសិន»។
ពលរដ្ឋម្នាក់ទៀតរស់នៅស្រុកស្វាយចេក ខេត្តបន្ទាយមានជ័យ កញ្ញា គាត សុជា បានឲ្យដឹងថា នៅក្នុងភូមិរបស់កញ្ញាបច្ចុប្បន្នមានតែមនុស្សចាស់ និងកុមារ ដែលឪពុកម្ដាយទុកឲ្យជីដូនមើលថែ ហើយពួកគេនាំគ្នាទៅធ្វើការនៅប្រទេសថៃ ដើម្បីរកប្រាក់សងបំណុលធនាគារ។ កញ្ញាបន្ថែមថា ពលរដ្ឋទាំងនោះបានបង្ខំកូនឲ្យឈប់រៀន ហើយនាំពួកគេទៅធ្វើការងារជាមួយ ដោយទទួលបានប្រាក់ចាប់ពី១០ដុល្លារក្នុងមួយថ្ងៃ ចំណែកបុរសពេញវ័យក្នុងមួយថ្ងៃបានប្រាក់១៥ដុល្លារ។
កញ្ញា គាត សុជា៖ «វាដើរទទឹមគ្នា អ្នកខ្លះជំពាក់បំណុលគេផង អ្នកខ្លះអត់មានចំណេះដឹង អ៊ីចឹងគាត់អត់មានចេះធ្វើការអ្វីក្រៅពីនាំគ្នាទៅធ្វើសំណងព្រោះគាត់អត់ចេះអក្សរផង ដូចនៅក្នុងភូមិនេះអ៊ីចឹង ពួកគាត់ទៅធ្វើការអត់បានយូរអង្វែងទេពីរទៅបីខែ នៅពេលពួកគាត់ត្រឡប់មកវិញមានជំងឺជាប់ខ្លួន អ្នកខ្លះអត់បានមកដល់ផ្ទះផង អ្នកខ្លះក៏ស្លាប់»។
ជុំវិញរឿងនេះ វិទ្យុអាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការអត្ថាធិប្បាយបានទេ នៅថ្ងៃទី១៦ ខែឧសភា។
ចំណែកអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍ថា បញ្ហាវិបត្តិសេដ្ឋកិច្ចនេះ មិនមែនតែប្រជាពលរដ្ឋនោះទេ ដែលជួបប្រទះ សូម្បីវិស័យធនាគារ និងមីក្រូហិរញ្ញវត្ថុ ក៏កំពុងជួបវិបត្តិនេះដូចគ្នាដែរ ហើយកន្លងទៅ ខាងសមាគមមីក្រូហិរញ្ញវត្ថុកម្ពុជា តែងតែស្វែងរកដំណោះស្រាយដល់ប្រជាពលរដ្ឋជាបន្តបន្ទាប់។ លោកជំរុញឲ្យប្រជាពលរដ្ឋដែលមានភាពពិបាកក្នុងការសងប្រាក់ត្រឡប់ទៅធនាគារវិញ ត្រូវហ៊ានប្រឈមមុខជាមួយធនាគារស្វែងរកដំណោះស្រាយ និងត្រូវរាយការណ៍ ឬប្ដឹងទៅសមាគមមីក្រូហិរញ្ញវត្ថុកម្ពុជា ដើម្បីស្វែងរកកិច្ចអន្តរាគមន៍ជួយសម្របសម្រួលបញ្ហាទាំងនោះ។
លោក កាំង តុងងី៖ «ដំណោះស្រាយដែលមានប្រសិទ្ធភាពគឺយកបញ្ហាទាំងអស់នេះទៅជជែកជាមួយគ្រឹះស្ថាន ដើម្បីស្វែងរកដំណោះស្រាយដែលមានប្រសិទ្ធភាព នោះទើបជាដំណោះស្រាយពិតប្រាកដ ទទឹមនឹងនេះប្រសិនបើបងប្អូនបានដោះស្រាយជាមួយគ្រឹះស្ថានហើយ ហាក់បីមិនអាចរកដំណោះស្រាយបានទេ បងប្អូនអាចរាយការណ៍ឬប្ដឹងទៅសមាគមមីក្រូហិរញ្ញវត្ថុកម្ពុជា»។
ទាក់ទិននឹងបញ្ហានេះ ប្រធានផ្នែកប្រយុទ្ធប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់ (Central) លោក ឌី ថេហូយ៉ា សង្កេតឃើញថា ពលរដ្ឋចំណាកស្រុកទាំងនោះ ភាគច្រើនសុទ្ធសឹងតែជាអ្នកដែលមានជីវភាពលំបាក និងជាប់បំណុលធនាគារ ដូច្នេះទើបពួកគាត់នាំគ្នាធ្វើចំណាកស្រុកទាំងបង្ខំ ដើម្បីរកប្រាក់ផ្គត់ផ្គង់ជីវភាពគ្រួសារ និងសងបំណុលធនាគារ។ លោកបន្ថែមថា ដើម្បីដោះស្រាយបញ្ហាចម្បងអាជ្ញាធរ ត្រូវតែជួយសម្រួលឯកសារស្របច្បាប់ដល់ពលរដ្ឋចំណាកស្រុក និងត្រូវស្វែងរកទីផ្សារការងារនៅក្នុងស្រុកឲ្យបានច្រើន ជាពិសេសរកទីផ្សារសម្រាប់ពលរដ្ឋដែលជាកសិករ។
លោក ឌី ថេហូយ៉ា៖ «បើមិនអ៊ីចឹងទេបញ្ហាចំណាកស្រុកនេះវានឹងក្លាយទៅជាបញ្ហាដ៏យូរអង្វែង ហើយវាផ្ដល់ផលប៉ះពាល់ធំធេងដល់ប្រជាពលរដ្ឋខ្មែរ ដែលត្រូវចាញ់បោកគេត្រូវគេធ្វើបាប ហើយកូនរបស់ពួកគាត់មិនបានចូលសាលា មិនទទួលបានការអប់រំ ការអភិវឌ្ឍន៍ផ្នែកសមត្ថភាពនិងចំណេះជំនាញជាដើម»។
ពលរដ្ឋនៅគ្រប់កន្លែងត្អូញត្អែរអំពីបញ្ហាលំបាក បាត់បង់ការងារធ្វើ បាត់បង់ប្រាក់ចំណូល ព្រមទាំងរងសម្ពាធយ៉ាងធ្ងន់ធ្ងរពីធនាគារ និងគ្រឹះស្ថានមីក្រូហិរញ្ញវត្ថុ បណ្ដាឲ្យប្រជាពលរដ្ឋទាំងនោះនាំគ្នាបង្ខំចិត្តធ្វើចំណាកស្រុក ព្រាត់ប្រាសក្រុមគ្រួសារ និងបង្ខំឲ្យកុមារឈប់រៀន ដើម្បីទៅតាមឪពុកម្ដាយ ដែលស្វះស្វែងរកប្រាក់ទ្រទ្រង់គ្រួសារ និងដោះបំណុល ហើយមានអ្នកខ្លះទៀត ជួបវិបត្តិផ្លូវចិត្តរហូតដល់សម្រេចបញ្ចប់ជីវិតខ្លួនឯងក៏មាន។
កាលពីថ្ងៃទី៦ ខែឧសភា អង្គការសម្ព័ន្ធខ្មែរជំរឿន និងការពារសិទិ្ធមនុស្សលីកាដូ អង្គការសមធម៌កម្ពុជា អង្គការសមាគមធាងត្នោត រួមជាមួយអង្គការហ្វីយែន (FIAN) របស់អាល្លឺម៉ង់(Germany) បានបង្ហោះខិត្តប័ណ្ណជាច្រើនសន្លឹកនៅលើបណ្ដាញសង្គម ដោយបង្ហាញអំពីការជាប់បំណុលដ៏ច្រើនលើសលប់របស់ប្រជាពលរដ្ឋខ្មែរជាច្រើន និងការអនុវត្តការផ្ដល់កម្ចីបែបកេងប្រវ័ញ្ចរបស់គ្រឹះស្ថានមីក្រូហិរញ្ញវត្ថុមួយចំនួន និងអ្នកផ្ដល់កម្ចីខ្នាតតូចជាច្រើន ដែលកំណត់គោលដៅផ្ដល់កម្ចីរបស់ខ្លួនលើសហគមន៍ជនជាតិដើមភាគតិច ពលរដ្ឋក្រីក្រ និងងាយរងគ្រោះជាច្រើន។
ពលរដ្ឋស្នើទៅរដ្ឋាភិបាលឲ្យជួយសម្រួលឬពន្យារពេល ក្នុងការសងប្រាក់ត្រឡប់ទៅធនាគារវិញ ពីព្រោះបច្ចុប្បន្នប្រជាពលរដ្ឋកំពុងជួបទុកលំបាក នូវគ្រោះរាំងស្ងួតដាំដំណាំកសិកម្មមិនទទួលបានផល ព្រមទាំងពិបាកក្នុងរកការងារធ្វើនៅក្នុងស្រុកបន្ថែមទៀត។ ពួកគេសង្ឃឹមថា រដ្ឋាភិបាលនឹងគិតគូរដល់ប្រជាពលរដ្ឋក្រីក្រ និងជួយសម្រាលទុកលំបាករបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។