អតិថិជនផ្ទុះការតវ៉ាករណីគម្រោងឧកញ៉ា ឡេង ណាវ៉ាត្រា ដែលបង់លុយច្រើនឆ្នាំមិនបានផ្ទះ
2023.05.22
ប្រធានក្រុមហ៊ុនលោក ឡេង ណាវ៉ាត្រា។
រូប៖ ហ្វេសប៊ុក
អតិថិជនទិញផ្ទះពីគម្រោងក្រុមហ៊ុនលោក ឡេង ណាវ៉ាត្រា ផ្ទុះការតវ៉ាជាបន្តបន្ទាប់ ដោយថា ពួកគេបង់លុយគ្រប់ចំនួនច្រើនឆ្នាំមកហើយ ប៉ុន្តែមិនទទួលបានផ្ទះតាមការសន្យា។ ជុំវិញបញ្ហានេះលោកឧកញ៉ា ឡេង ណាវ៉ាត្រា បកស្រាយថា ការសាងសង់យឺតយ៉ាវដោយសារទំនិញឡើងថ្លៃសុំឱ្យអតិថិជនយោគយល់។
អតិថិជនផ្ទុះការតវ៉ាបន្តបន្ទាប់ដោយអះអាងថា ពួកគាត់រកលុយបានដោយលំបាក ហើយខ្លះខ្ចីលុយពីធនាគារផងយកមកបង់ឱ្យក្រុមហ៊ុនលោក ឡេង ណាវ៉ាត្រា រាប់ឆ្នាំមកហើយ នៅមិនទទួលបានផ្ទះ ហើយមួយរយៈពេលចុងក្រោយនេះ ពួកគាត់សួរនាំទៅក្រុមហ៊ុនមួយនេះមិនមានការឆ្លើយតបទេ។
ការតវ៉ាគឺអ្នកខ្លះធ្វើឡើងដោយសរសេរសារតាមបណ្ដាញទំនាក់ទំនងសង្គម និងអ្នកខ្លះនិយាយជាវីដេអូផ្សព្វផ្សាយ ហើយពួកគេក៏បានបង្កើត ជាក្រុមឆាតតាមតេឡេក្រាមផងដែរ។ អ្នកតវ៉ាទាំងនេះ គ្រោងប្រមូលផ្តុំនៅថ្ងៃទី៣០ ខែឧសភា ខាងមុខនេះនៅសាខាណាមួយរបស់ក្រុមហ៊ុន ឡេង ណាវ៉ាត្រា។
អតិថិជនម្នាក់កញ្ញា ម៉ារី ណែត ថ្លែងថា កញ្ញាបានបង់លុយទៅក្រុមហ៊ុន លោក ឡេង ណាវ៉ាត្រា ជិត៣ឆ្នាំហើយ ចំនួន៣ម៉ឺន ៥ពាន់ដុល្លារ ទិញផ្ទះនៅ ផ្លូវជាតិលេខ៦ នៅក្នុងស្រុកមុខកំពូលខេត្តកណ្តាល។ កញ្ញាបន្តថា ការសម្រេចចិត្ត សរសេរផ្សព្វផ្សាយទាមទារ លើហ្វេសប៊ុកនេះ ដោយសារតែទីតាំងដី ដែលកញ្ញាទិញនោះ មិនទាន់បានសាងសង់ផ្ទះ ហើយមួយរយៈចុងក្រោយនេះសាកសួរតាមទូរស័ព្ទ និងទៅសួរដល់ការិយាល័យក៏មិនមានការឆ្លើយតប។
កញ្ញា ម៉ារី ណែត៖ «សម្រាប់ផ្ទះខ្ញុំគឺខ្ញុំទិញជិត៣ឆ្នាំហើយ តែអត់ទាន់មានជើងសសរមួយដើមផង។ទៅហ្នឹងដូចអត់មានមនុស្សផង មានតែបុគ្គលិកប៉ុន្មាននៅក្នុងOffice។ ខ្ញុំទៅហ្នឹងគឺទៅតែផ្ទះខ្ញុំទេ ព្រោះទៅofficeក៏អត់មានន័យអីដែរ ឆ្លើយដដែលៗ បុគ្គលិកឆ្លើយដដែលឆ្លើយលែងចេញហើយ សូម្បីតែខ្ញុំទាក់ទងតាមទូរស័ព្ទក៏អ៊ីចឹងដែរ។ និយាយទៅបុគ្គលិកអស់ពាក្យដោះសារជាមួយយើងតែម្តង»។
ចំណែកអតិថិជនម្នាក់ទៀត លោក ជីធី ភីណារ៉ាក់ សរសេរលើហ្វេសប៊ុករបស់លោកថា លោកបានទិញផ្ទះគម្រោងលោក ឡេង ណាវ៉ាត្រា នៅផ្លូវជាតិលេខ៦ដែរ ហើយលោកមានការភ័យខ្លាចដោយសារលុយលំបាករក ហើយបង់អស់ មិនបានផ្ទះ។
វិទ្យុអាស៊ីសេរីព្យាយាមទាក់ទងលោកឧកញ៉ា ឡេង ណាវ៉ាត្រា ទាំងតាមឆេតហ្វេសប៊ុក (Messenger)ផេក និងហៅតាមទូរស័ព្ទ នៅថ្ងៃទី២១ ខែឧសភា ប៉ុន្តែមិនមានការឆ្លើយតប។
ទោះយ៉ាងណាលោកបានបកស្រាយនៅលើហ្វេសប៊ុកផេករបស់លោកនៅថ្ងៃទី២១ ខែឧសភា ថា លោកមិនរត់ចោលអតិថិជនទេ ទោះជាមានការសាងសង់យឺតយ៉ាវបន្តិច។ ទន្ទឹមនឹងនេះលោក ឡេង ណាវ៉ាត្រា ចោទថា អ្នករិះគន់វាយប្រហារលោក គឺជាក្រុមប្រឆាំង នៅក្រៅប្រទេស ញុះញង់អតិថិជន។
លោក ឡេង ណាវ៉ាត្រា៖ «ពុកម៉ែបងប្អូនកុំឱ្យមានការព្រួយបារម្ភគឺក្រុមហ៊ុនមានការទទួលខុសត្រូវទាំងគុណភាពសំណង់ ទាំងការទទួលខុសត្រូវផ្សេងៗដែលមានការផ្តិតមេដៃ។ ហើយក៏សូមផ្តាំទៅជនអគតិជាពិសេស យើងអត់មានបោកអតិថិជន អត់ទេ នេះជាការបំភ្លៃការពិតទាំងស្រុង ហើយគាត់ថា យើងលក់បុរីខ្យល់ បុរីខ្យល់យ៉ាងម៉េច យើងបានសាងសង់ជាង១ម៉ឺនល្វែង ដែលអតិថិជន ពុកម៉ែបងប្អូនកំពុងរស់នៅ»។
នៅថ្ងៃទី២១ ខែឧសភា ដដែល នៅលើផេកហ្វេសប៊ុក លោក ឡេង ណាវ៉ាត្រា ផ្សព្វផ្សាយសារជាអក្សរនិងវីដេអូ ជាង២០សារជាបន្តបន្ទាប់ ដោយមិនព្យាយាមបកស្រាយលើសំណើរបស់អតិថិជនទេ ប៉ុន្តែផ្ដោតវាយប្រហារលើអ្នកតវ៉ាថា ជាក្រុមប្រឆាំង ឬជាក្រុមអគតិនៅក្រៅប្រទេស។
អ្នកសិក្សាកិច្ចការសង្គម និងនយោបាយលោក ជ្រី បូរ៉ា លើកឡើងថា វិស័យធំៗ ដែលទ្រទ្រង់សេដ្ឋកិច្ចជាតិមានទាំងសំណង់ ទេសចរណ៍ ឧស្សាហកម្មកាត់ដេរ និង កសិកម្មបានចុះខ្សោយទាំងអស់។ លោកបន្តថា ពលរដ្ឋដែលជួបការលំបាកខ្លាំងកំពុង បន្តឆ្លងដែនទៅរកការងារធ្វើនៅប្រទេសថៃ។
លោក ជ្រី បូរ៉ា បន្តថា បញ្ហារបស់ក្រុមហ៊ុន លោក ឡេង ណាវ៉ាត្រា និងឧកញ៉ាផ្សេងទៀតគឺជាវិបត្តិសេដ្ឋកិច្ចរួម ហើយថា បើរដ្ឋាភិបាលមិនមានវិធានការទប់ស្កាត់ជាក់លាក់ទេនោះ នឹងប៉ះពាល់ដល់ធនាគារព្រោះពលរដ្ឋមិនមានលុយបង់សង ហើយឈានដល់ប៉ះពាល់សេដ្ឋកិច្ចជាតិកាន់តែខ្លាំង។
លោក ជ្រី បូរ៉ា៖ «បើសិនជារដ្ឋាភិបាលមិនចាប់អារម្មណ៍ដោះស្រាយទេ វាអាចរុញទៅជាបន្តបន្ទាប់។ ឧទាហរណ៍ទី១ ពលរដ្ឋបាត់បង់ការងារធ្វើបន្ទាប់ពីបាត់បង់ការងារ ហើយគាត់បង់លុយសម្រាប់ដោះស្រាយបំណុលជាធនាគារ អ៊ីចឹងវាអាចមានបញ្ហាដល់វិស័យធនាគារ»។
ជុំវិញរឿងនេះអ្នកជំនាញសេដ្ឋកិច្ចបណ្ឌិត សុក ហាច មានប្រសាសន៍ថា កម្ពុជាកំពុងជួបបញ្ហាខ្វះសាច់ប្រាក់ពីការវិនិយោគទាំងពីប្រទេសចិននិង អឺរ៉ុប។ លោកបន្តថា ចំណូលពីវិស័យផ្សេងទៀតក៏ មានការធ្លាក់ចុះដែរ ទើបលោកសន្និដ្ឋានថា សេដ្ឋកិច្ចកំពុងប៉ះពាល់ខ្លាំង។
លោក សុក ហាច៖ «ពីមុនយើងមានធនធានធម្មជាតិច្រើនខុសច្បាប់ត្រូវច្បាប់អីយើងចេះតែកាប់លក់ទៅ ដូច្នេះមានលុយចូលមែន យើងមិននិយាយពីច្បាប់មិនច្បាប់ទេ យើងនិយាយពីសេដ្ឋកិច្ចសុទ្ធ។ ឥឡូវក៏អស់ទៀត ដូច្នេះសាច់លុយពីក្រៅ ការវិនិយោគក្រៅស្រុក តាមទេសចរណ៍ ឬក៏តាមការលក់ធនធានធម្មជាតិហ្នឹងបាត់ ដូច្នេះខ្ញុំជឿថា សេដ្ឋកិច្ចស្រុកយើងនឹងដុនដាបខ្លាំង»។
លោក សុក ហាច បន្តថា បច្ចុប្បន្ននេះ ឧកញ៉ាជាច្រើនកំពុងជួបបញ្ហាសេដ្ឋកិច្ច ខណៈឧកញ៉ាមួយចំនួនប្រកាសក្ស័យធន។ លោកជំរុញឱ្យរដ្ឋាភិបាលដាក់ចេញផែនការ ច្បាស់លាស់ក្នុងការដោះស្រាយបញ្ហានេះ រួមមានទាំងធ្វើកំណែទម្រង់នយោបាយដឹកនាំកុំឱ្យដើរផ្ទុយ ពីបណ្តាប្រទេសលោកសេរីព្រោះសេដ្ឋកិច្ចកម្ពុជាមួយផ្នែកធំពឹងផ្អែក លើសហភាពអឺរ៉ុប និងអាមេរិក។
នៅក្នុងរយៈពេល៥ខែដំបូងនៃឆ្នាំ២០២៣នេះ ឧកញ៉ា មួយចំនួនឈានដល់ការប្រកាសដោយបើកចំហពីការក្ស័យធនដូចជា ម្ចាស់ក្រុមហ៊ុនដីឡូត៍និងផ្ទះលោក ជា សារ៉ន ម្ចាស់ក្រុមហ៊ុនលក់ផ្ទះល្វែង ខេភីKP របស់អ្នកស្រី ម៉ន ដានី ម្ចាស់គម្រោងវិនិយោគលើការសាងសង់ផ្សារ រីសតនិងអចលនទ្រព្យផ្សេងៗលោក នួន អក ជាដើម។ ក្រៅពីឧកញ៉ាទាំងនេះ អ្នកជំនួញក្នុងទឹកប្រាក់រាប់សែន និងរាប់លានដុល្លារ ក៏ប្រកាសពីការក្ស័យ និងប្តឹងផ្តល់គ្នាទៅតុលាការបន្តបន្ទាប់ដែរ។
វិទ្យុអាស៊ីសេរី មិនអាចទាក់ទងអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីសុំអត្ថាធិប្បាយជុំវិញ បញ្ហានេះបានទេ នៅថ្ងៃទី២១ ខែឧសភា។
ទោះជាលោក ឡេង ណាវ៉ាត្រា បញ្ជាក់ថា ខ្លួនមិនទាន់ក្ស័យធនរត់ចោលអតិថិជនក៏ដោយ ក៏លោកនៅមិនទាន់កំណត់ពេលច្បាស់លាស់ថា អតិថិជនដែលបានបង់លុយហើយជិត៣ឆ្នាំ ពេលណាទទួលបានផ្ទះនោះទេ គឺគ្រាន់តែសុំការយោគយល់ព្រោះថា ក្រុមហ៊ុនលោកជួបការលំបាកផ្នែកហិរញ្ញវត្ថុដោយសារទំនិញលើទីផ្សារឡើងថ្លៃខ្ពស់រងឥទ្ធិពលពីវិបត្តិសេដ្ឋកិច្ចសកល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋ និងសង្គមស៊ីវិលរិះគន់ថា ការផ្ដល់សញ្ជាតិបរទេសមួយចំនួន ដែលប៉ះពាល់កេរ្តិ៍ឈ្មោះជាតិ
- អ្នកជំនាញថា ការលើកឡើងរបស់លោក ហ៊ុន ម៉ាណែត មិនឆ្លុះការពិតរឿងពាណិជ្ជកម្មជាមួយចិន
- ស្ថានភាពសិទ្ធិមនុស្ស «កាន់តែអាក្រក់» ក្រោមការដឹកនាំរបស់លោក ហ៊ុន ម៉ាណែត
- អគ្គនាយកដ្ឋានពន្ធដារព្រមានប្តឹងក្រុមហ៊ុនជិត៤០ទៅតុលាការ ក្រោយពេលបោះឆ្នោត
- កុមារភាគច្រើននៅកំពង់ធំបោះបង់ការសិក្សាដោយសារតែពុំមានសាលារៀនត្រឹមត្រូវ គ្រូមិនមកបង្រៀនទៀងទាត់