កម្មករ និង​វិស័យ​ឯកជន​ថា វិធានការ​បន្ថែម​របស់​រដ្ឋាភិបាល​ក្នុង​ការ​ជួយ​សេដ្ឋកិច្ច នៅ​មិន​ទាន់​គ្រប់គ្រាន់

ដោយ មាន ឫទ្ធិ
2021-03-26
Share
កម្មករ និង​វិស័យ​ឯកជន​ថា វិធានការ​បន្ថែម​របស់​រដ្ឋាភិបាល​ក្នុង​ការ​ជួយ​សេដ្ឋកិច្ច នៅ​មិន​ទាន់​គ្រប់គ្រាន់ លោក​នាយក​រដ្ឋមន្ត្រី ហ៊ុន សែន (ស្ដាំ) ជួប​សំណេះសំណាល​ជាមួយ​កម្មករ​កម្មការិនី​រោងចក្រ​នៅ​មជ្ឈមណ្ឌល​កោះ​ពេជ្រ ក្រុង​ភ្នំពេញ ថ្ងៃ​ទី​២០ ខែ​សីហា ឆ្នាំ​២០១៧។
Photo courtesy of PM Hun Sen's Facebook Page

កម្មករ និង​សហជីព​អះអាង​ថា រដ្ឋាភិបាល​គួរតែ​អន្តរាគមន៍​ជួយ​ផ្អាក​ការ​សង​បំណុល​ធនាគារ ទើប​ជា​រឿង​ប្រសើរ​។ ការ​លើកឡើង​នេះ គឺ​បន្ទាប់​ពី​រដ្ឋាភិបាល បាន​បន្ថែម​វិធានការ​មួយចំនួន ដើម្បី​ជួយ​សេដ្ឋកិច្ច​កម្មករ និង​វិស័យ​ឯកជន ក្នុង​វិបត្តិ​ជំងឺ​កូវីដ១៩ (Covid-19)

ការ​ជួយ​ឧបត្ថម្ភ​បន្តិចបន្តួច​របស់​រដ្ឋាភិបាល មិន​ទាន់​គ្រប់គ្រាន់ និង​មិន​អាច​ធ្វើ​ឲ្យ​កម្មករ និង​វិស័យ​ឯកជន ដោះស្រាយ​វិបត្តិ​សេដ្ឋកិច្ច ក្នុង​ស្ថានភាព​ជំងឺ​កូ​វីដ​១៩​នេះ​ទេ​។ ពួកគាត់​មាន​បញ្ហា​ប្រឈម​ចំពោះមុខ គឺ​ការ​សង​បំណុល​ធនាគារ ទើប​ជា​រឿង​លំបាក​បំផុត ក្នុង​ស្ថានភាព​នេះ។

កម្មការិនី​ម្នាក់ ធ្វើការ​នៅ​រោងចក្រ ជា ស៊ីណាត (CHEA SINAT GARMENT CO., LTD) ក្នុង​ខណ្ឌ​ច្បារអំពៅ លោកស្រី អែម លីលី ឲ្យ​ដឹង​ថា រោងចក្រ​មួយ​ចំនួន ម្ដុំ​លោកស្រី ធ្វើ​ការ​មិន​ទាន់​ព្យួរ​ការងារ​កម្មករ ដូច​កាល​ពី​លើក​មុន​ទេ។ ទោះ​យ៉ាងណា លោកស្រី​មិន​ចង់​ឲ្យ​រោងចក្រ​ព្យួរ​​ការងារ​ទេ ព្រោះ​លុយ​ឧបត្ថម្ភ​របស់​រដ្ឋាភិបាល មិន​គ្រប់​លទ្ធភាព​សងបំណុល​ធនាគារ​ទេ។ កម្មការិនី​រូប​នេះ ចង់​ឲ្យ​រដ្ឋាភិបាល រក​មធ្យោបាយ​ជួយ​ឧបត្ថម្ភ ឲ្យ​បាន​ច្រើន​ជាង​៤០​ដុល្លារ ក្នុង​មួយ​ខែ៖ «អូ! វា​មិន​គ្រប់គ្រាន់​ទេ ចាយវាយ​៤០​ដុល្លារ បន្តិច​ទៅ​វា​អស់ហើយ​។ ប៉ុន្តែ​បើ​គេ​ឲ្យ ក៏​យើង​បាន​បណ្ដោះ ធូរ​មួយ​ភ្លែត​អ៊ីចឹង​ដែរ ហើយ​បើ​មិន​ឲ្យ អត់​ហើយ​។ (៤០​ដុល្លារ​) វា​មិនបាន​ជួយ​ស្អី​ទេ គ្រាន់​ថា វា​បណ្ដោះ​បាន​ចាយ​បួន ប្រាំ​ថ្ងៃ ត​ទៀត​បាន​។ បើ​ថា ឲ្យ​បណ្ដោះ​អ្វី មិន​បាន​អ្វី​ទេ ៤០​ដុល្លារ​នោះ​បង»

រដ្ឋាភិបាល បាន​ដាក់​ចេញ​វិធានការ បន្ត​ជួយ​កម្មករ ក្នុង​វិស័យ​កាត់ដេរ វាយនភណ្ឌ ស្បែកជើង ផលិត​ផល​ធ្វើ​ដំណើរ កាបូប និង​វិស័យ​ទេសចរណ៍ ក្នុង​ម្នាក់ ចំនួន​៤០​ដុល្លារ ហើយ​ថៅកែ ត្រូវ​ជួយ​ឧបត្ថម្ភ លុយ ៣០​ដុល្លារ សរុប​៧០​ដុល្លារ រយៈពេល​៣​ខែ ចាប់​ពី​ខែមេសា​ទៅ ក្នុង​ករណី​ព្យួរ​កិច្ចសន្យា ឬ​ពន្យារ​ការ​ព្យួរ​កិច្ចសន្យា ស្របតាម​ច្បាប់​ការងារ។

រដ្ឋាភិបាល ក៏​បន្ត​លើកលែង​ការ​បង់ពន្ធ​ប្រចាំ​ខែ គ្រប់​ប្រភេទ ចំពោះ​សណ្ឋាគារ ផ្ទះសំណាក់ ភោជនីយដ្ឋាន និង​ក្រុមហ៊ុន​ភ្នាក់ងារទេសចរណ៍ ដែល​បាន​ចុះបញ្ជី និង​មាន​សកម្មភាព​អាជីវកម្ម នៅ​រាជធានី​ភ្នំពេញ ខេត្តសៀមរាប ខេត្ត​ព្រះសីហនុ ខេត្ត​កែប ខេត្តកំពត ក្រុង​បាវិត និង​ក្រុង​ប៉ោយប៉ែត រយៈពេល​៣​ខែ ចាប់ពី​ខែ​មេសា​ទៅ​ដែរ។

តែ​ម្ចាស់​អាជីវកម្ម​ទាំងនោះ នៅតែ​ជាប់​កាតព្វកិច្ច​ដាក់​លិខិត​ប្រកាស​ពន្ធអាករ និង​ប្រើប្រាស់​ប្រព័ន្ធ​អនឡាញ (Online) សម្រាប់​ការគ្រប់គ្រង​អាករ​តម្លៃបន្ថែម (E-VAT) រៀងរាល់​ខែ​។ ការ​បង់​វិភាគទាន របប​សន្តិសុខ​សង្គម ក៏​ត្រូវ​បន្ត​ផ្អាក​បង់ ក្នុង​រយៈពេល​ដូចគ្នា។

ក្នុង​វិស័យ​អាកាសចរណ៍ រដ្ឋាភិបាល បន្ត​លើកលែង​ការ​បង់​ពន្ធ​អប្បបរមា (Minimum tax) និង​អនុញ្ញាត​ឲ្យ​ពន្យារ​ការ​បង់​ប្រាក់​ជំពាក់​កម្រៃ​អាកាសចរ​ស៊ីវិល រយៈពេល​៣​ខែ​ដូចគ្នា​។ រដ្ឋាភិបាល ក៏​បន្ត​ឧបត្ថម្ភ​សាច់ប្រាក់​ជូន​ជន​គ្រួសារ​ក្រីក្រ និង​ងាយ​រងគ្រោះ បន្ត​ទៀត​ដែរ។

ទោះជា​យ៉ាងនេះ​ក្តី ម្ចាស់​អាជីវកម្ម មិន​ទាន់​ពេញចិត្ត នឹង​ការ​អនុគ្រោះ​ពន្ធ ឬ​ការ​ជួយឧបត្ថម្ភ​ត្រឹមនេះ​ទេ ព្រោះ​ពួកគាត់ នៅតែ​ប្រឈម​ការ​បិទ​អាជីវកម្ម​ដដែល។

ម្ចាស់​សណ្ឋាគារ​បុរីរតនៈ ខេត្តសៀមរាប លោកស្រី ជួង ណារិន ឲ្យ​ដឹង​ថា លោកស្រី កំពុង​ពិចារណា បិទ​សណ្ឋាគារ​នេះ ដោយសារ គ្មាន​ភ្ញៀវ និង​គ្មាន​លទ្ធភាព​ជួល​អគារ​បន្ត​។ លោកស្រី​ឲ្យ​ដឹង​ថា ត្បិត​រដ្ឋាភិបាល បាន​ជួយ​សម្រួល​លក្ខខណ្ឌ​ពន្ធ​ច្រើន តែ​ម្ចាស់​សណ្ឋាគារ​នៅតែ​ជាប់​កាតព្វកិច្ច បង់ថ្លៃ​ពន្ធ​ប៉ាតង់​ប្រចាំឆ្នាំ​ដដែល​។ ទន្ទឹម​នឹង​នេះ ម្ចាស់​សណ្ឋាគារ ក៏​ត្រូវ​បង់ថ្លៃ​ជួល​អគារ​ដដែល ខណៈ​គ្មាន​ភ្ញៀវ​មក​ស្នាក់នៅ​សូម្បីតែ​ម្នាក់ ក្នុង​ស្ថានភាព​វិបត្តិ​កូវីដ​១៩​នេះ។ លោកស្រី ចង់​ឲ្យ​រដ្ឋាភិបាល​រក​យន្តការ​ជួយ​ដល់​ម្ចាស់​សណ្ឋាគារ​បន្ថែម​ទៀត ដើម្បី​បន្ត​អាជីវកម្ម និង​រក្សា​ការងារ​ឲ្យ​បុគ្គលិក៖ «ដល់ពេល​អ៊ីចឹង​ទៅ ផល​លំបាក គឺ​លំបាក​មែនទែន​ហ្មង​។ ពិបាក​រាល់ថ្ងៃ ចង់​តែ​បិទ​ហ្មង​។ តែ​ថា រាល់ថ្ងៃ​ទ្រាំ ព្រោះ​ម្ចាស់​អូតែល (អគារ​) គាត់​បាន​បន្ធូរ​ដែរ​។ តែ​ថា បន្ធូរ​ហ្នឹង ក៏​ក្នុង​ន័យ​ថា បើ​គាត់​បន្ធូរ​តែ​ពាក់កណ្ដាល​ហ្នឹង បើសិនជា​បញ្ហា​កូវីដ​នៅតែ​បន្ត ក៏​អាច​ឈប់​ដែរ មិន​យូរ​ទេ​។ ទាល់តែ​គាត់​ឈប់​យក​ថ្លៃ​អូតែល​តែម្ដង ទើប​ទៅរួច»

អាស៊ីសេរី​មិនអាច​ទាក់ទង​ប្រធាន​អង្គភាព​អ្នកនាំពាក្យ​រដ្ឋាភិបាល លោក ផៃ ស៊ីផាន និង​អ្នកនាំពាក្យ​ក្រសួង​ការងារ​លោក ហេង សួរ ដើម្បី​សាកសួរ​រឿង​នេះ​បានទេ នៅ​ថ្ងៃទី​២៦ មីនា​។​

ប្រធាន​សហព័ន្ធ​កម្មករ​វិស័យ​ទេសចរណ៍ និង សណ្ឋាគារ លោក ម៉ម រិទ្ធី យល់​ថា ការ​ជួយ​ឧបត្ថម្ភ​របស់​រដ្ឋាភិបាល មិន​ស្មើភាព​គ្នា​ទេ ព្រោះ​កម្មករ ក្នុង​វិស័យ​ផ្សេងទៀត ដូចជា កាស៊ីណូ ក្រុម​អ្នក​សេដ្ឋកិច្ច​ក្រៅ​ប្រព័ន្ធ កសិករ​គ្រប់​ប្រភេទ ក៏​រង​ផល​ប៉ះពាល់​ធ្ងន់ធ្ងរ ពី​វិបត្តិ​ជំងឺ​កូវីដ​១៩​ដូចគ្នា ប៉ុន្តែ​ពួកគេ​ទទួល​ជំនួយ​តិចតួច ឬ​ខ្លះ​មិន​ទទួល​បាន​តែម្តង។

លោក​បន្ត​ថា ទាំង​កម្មករ និង​វិស័យ​ឯកជន​ទាំងអស់ ចង់​ឲ្យ​រដ្ឋាភិបាល​ជួយ​អន្តរាគមន៍ ពន្យារ​ការ​សង​បំណុល​ធនាគារ​ទាំងស្រុង ទើប​ជា​ចំណុចរួម។ មិនតែប៉ុណ្ណោះ លោក​ជំរុញ​ឲ្យ​រដ្ឋាភិបាល បន្ថែម​ការ​ឧបត្ថម្ភ ប្រាក់​ឲ្យ​កម្មករ​ឲ្យ​បាន​គ្រប់​វិស័យ៖ «រឿង​សំខាន់ គឺ​ធនាគារ​រាល់ថ្ងៃ​ហ្នឹង វា​ជា​រឿង​សំខាន់ ព្រោះ​ធនាគារ គេ​អត់​លើកលែង​ទេ​។ ទោះបី គាត់ (​ធនាគារ​) មាន​គោលការណ៍​ថា ឥឡូវ​ផ្អាក​បង់ ប៉ុន្តែ​អា​លុយ​ដែល​ការប្រាក់ និង​លុយ​ដើម​ហ្នឹង យក​មក​គរ​ធ្វើជា​ការប្រាក់ វា​ឡើង​ទ្វេគុណ ឬមួយ ក៏​ឲ្យ​បង់​តែ​ការ ឬក៏​បង់​តែ​ការប្រាក់ ឬ​អត់​បង់​ដើម សុទ្ធតែ​លុយ វា​នៅ​ដដែល​ទេ​។ អត់​មានរឿង​អ្វី​ជួយ​សម្រួល​បានទេ​។ ចុងក្រោយ ពេល​ចប់​កូវីដ​ហ្នឹង ប្រជាជន​ដែល​បង់​ធនាគារ នឹង​ទទួលរង​ផល​ប៉ះពាល់​កាន់តែ​ធ្ងន់​ហើយ ដោយសារតែ​អា​រឿង​លុយ​(​ជំពាក់​)គេ​ហ្នឹង​ហើយ​។ តែ​អាហ្នឹង ជា​រឿង​ថ្ងៃ​អនាគត ចប់​កូវីដ តែ​ឥឡូវ​ប្រជាជន​រកលុយ​បង់​(​ធនាគារ​)​អត់​បាន»

ទាក់ទង​រឿង​បំណុល​នេះ មន្ត្រី​ជាន់ខ្ពស់​រដ្ឋាភិបាល ធ្លាប់​លើកឡើង​ថា រដ្ឋាភិបាល​មិនអាច​បង្គាប់​ស្ថាប័នហិរញ្ញវត្ថុ​ឱ្យ​ព្យួរ​ការ​សង​បំណុល​របស់​ពលរដ្ឋ​នោះ​ទេ ហើយ​ជំរុញ​ឱ្យ​ពលរដ្ឋ​ដោះស្រាយ​បញ្ហា​នេះ ជាមួយ​ស្ថាប័ន​ផ្តល់​កម្ចី​ទាំង​នោះ​វិញ​។ តំណាង​ស្ថាប័ន​មីក្រូហិរញ្ញវត្ថុ​នៅ​កម្ពុជា បាន​បញ្ជាក់​ថា អ្នក​ជំពាក់​បំណុល​មីក្រូហិរញ្ញវត្ថុ ដែល​រង​ផល​ប៉ះពាល់​ធ្ងន់ធ្ងរ ពី​វិបត្តិ​ជំងឺ​កូ​វីដ​១៩ អាច​ដាក់​ពាក្យ​ស្នើ​សុំ​រៀបចំ​កម្ចី ឬ​ពន្យារ​ពេល​សង​ប្រាក់​ដើម​ឡើង​វិញ។

ក្នុង​ឆ្នាំ​២០២០ រដ្ឋាភិបាល បាន​ឧបត្ថម្ភ​ថវិកាជាតិ សរុប​ប្រមាណ​ជិត​ពីរ​រយ​លាន (១៦០​លាន​)​ដុល្លារ​អាមេរិក ដល់​ពលរដ្ឋ​ក្រីក្រ ក្នុង​វិបត្តិ​ជំងឺ​កូវីដ១៩​។ ចំណែក ក្នុង​វិស័យ​កាត់ដេរ និង​ទេសចរណ៍​វិញ ក្នុង​ឆ្នាំ​២០២០​ដូចគ្នា រដ្ឋាភិបាល បាន​ឧបត្ថម្ភ​លុយ​ជាតិ ឲ្យ​កម្មករ​បាន​ជាង​បី​សែន (៣៤​ម៉ឺន​)​នាក់ សរុប​ទឹកប្រាក់ ជាង​ម្ភៃ (២៣)​លាន​ដុល្លារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល