ឧកញ៉ា ៣នាក់គេចមិនចូលបំភ្លឺនៅតុលាការក្នុងសំណុំរឿងបទល្មើសព្រៃឈើ
2019.08.31
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី។
Photo courtesy of Eng Hy Facebook
ឧកញ៉ា ៣រូប ពាក់ព័ន្ធប្រព្រឹត្តបទល្មើសឧក្រិដ្ឋព្រៃឈើ បានគេចខ្លួនមិនចូលបំភ្លឺនៅអយ្យការអមសាលាដំបូងខេត្តមណ្ឌលគិរី កាលពីថ្ងៃទី៣០ ខែសីហា។ អ្នកនាំពាក្យតំណាងអយ្យការខេត្តនេះអះអាងថា តុលាការនឹងផ្ដល់សិទ្ធិឱ្យមន្ត្រីនគរបាលយុត្តិធម៌ ឃាត់ខ្លួនជនសង្ស័យទាំងនោះ តាមការអនុវត្តនីតិវិធី និងកំពុងស៊ើបអង្កេតជាបឋម។
ឧកញ៉ា ៣នាក់ រួមមាន ឧកញ៉ា វន់ ប៊ុនថៃ ឧកញ៉ា ស្រ៊ុន ម៉េងលាង ជាម្ចាស់ក្រុមហ៊ុន ម៉េងលាង និងឧកញ៉ា តុប វីរដា ម្ចាស់ក្រុមហ៊ុន វិជ្ជរី ដែលជាជនសង្ស័យទាក់ទិនសំណុំរឿង បទល្មើសឧក្រិដ្ឋព្រៃឈើ មិនបានបំភ្លឺជូនតំណាងអយ្យការឡើយ។
អ្នកនាំពាក្យព្រះរាជអាជ្ញាអមសាលាដំបូងខេត្តមណ្ឌលគិរី លោក ម៉ម វ៉ាន់ដា ឱ្យដឹងនៅថ្ងៃទី៣១ សីហាថា មនុស្ស ២០នាក់ ដែលអយ្យការកោះហៅកន្លងទៅ បានចូលខ្លួនមកបំភ្លឺមួយចំនួន និងមួយចំនួនទៀតមិនចូលបំភ្លឺ។ លោកថា អ្នកដែលមិនចូលបំភ្លឺ អយ្យការនឹងផ្ដល់សិទ្ធិឱ្យមន្ត្រីនគរបាលយុត្តិធម៌ អនុវត្តច្បាប់ ដើម្បីស្វែងរកបទល្មើសព្រៃឈើ។ លោកមិនបញ្ជាក់លម្អិតថា មានជនសង្ស័យប៉ុន្មាននាក់ទេ ដែលចូលខ្លួនបំភ្លឺ ក្នុងចំណោម មនុស្ស ២០នាក់ ព្រោះលោកថា ករណីនេះ ជាកិច្ចការសម្ងាត់របស់អយ្យការ៖ «បើគាត់គេចវេះយើងនៅតែមាននីតិវិធីបន្ត ព្រោះយើងត្រូវការស៊ើបអង្កេតទៅលើបទល្មើសមួយចំនួនដែលពាក់ព័ន្ធក៏ដូចជា ជំនាញកងរាជអាវុធហត្ថ គឺថា អាចចាប់ និងនាំខ្លួន បង្ខំបុគ្គលហ្នឹងមកធ្វើការស្ដាប់ចម្លើយ។ និយាយរួម នីតិវិធីធ្វើបន្តបន្ទាប់នេះ គឺថា អ្នកណាដែលមានការពាក់ព័ន្ធយើងក៏បានបើកការស៊ើបសួរ បញ្ជូនទៅចៅក្រមស៊ើបសួរបន្តបន្ទាប់ហើយ ក៏មានការឃុំខ្លួនខ្លះហើយ ហើយក៏មានការដាក់ឱ្យឋិតក្រោមការពិនិត្យរបស់តុលាការ»។
កាលពីចុងខែកក្កដាកន្លងទៅ តំណាងអយ្យការអមសាលាដំបូង ខេត្តមណ្ឌលគិរីបានកោះហៅ មន្ត្រីជំនាញរដ្ឋបាលព្រៃឈើ ថៅកែជនជាតិចិន ឧកញ៉ា និងអ្នកពាក់ព័ន្ធបទល្មើសព្រៃឈើប្រមាណ ២០នាក់ទៀត ឱ្យចូលខ្លួនបំភ្លឺនៅថ្ងៃទី៣០ ខែសីហា ទាក់ទិនសំណុំរឿងប្រមូលផល អនុផលព្រៃឈើ គ្មានលិខិតអនុញ្ញាត។
សកម្មជនបរិស្ថានរកឃើញថា ក្រុមឧកញ៉ារត់គេចខ្លួន ឈ្មោះ វន់ ប៊ុនថៃ ឧកញ៉ា ស្រ៊ុន ម៉េងលាង និងឧកញ៉ា តុប វីរដា គឺជាមេខ្លោងធ្វើជំនួញឈើខ្នាតធំខុសច្បាប់ជាច្រើនឆ្នាំមកហើយ មានជាប់ពាក់ព័ន្ធជាមួយក្រុមហ៊ុនសម្បទានសេដ្ឋកិច្ច ឋិតក្នុងស្រុកកោះញែក ខេត្តមណ្ឌលគិរី។
អាស៊ីសេរីមិនទាន់អាចទាក់ទងឧកញ៉ាទាំង ៣រូប ដើម្បីសុំការបំភ្លឺសំណុំរឿងនេះ បានទេនៅថ្ងៃទី៣១ សីហា។
អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី ប្រាប់ថា វិធានការចំពោះ ការមិនចូលទៅបំភ្លឺតុលាការរបស់ឧកញ៉ាទាំងនេះ ជាសមត្ថកិច្ចរបស់តុលាការ នឹងអនុវត្តនីតិវិធីបន្ត៖ «នោះគឺជាសមត្ថកិច្ចរបស់តុលាការ អ៊ីចឹងការគេចខ្លួនសមត្ថកិច្ចតុលាការ នឹងឱ្យអាជ្ញាធរសាធារណៈ មានកងរាជអាវុធហត្ថ និងនគរបាលជាតិ ការដឹកនាំជាសមត្ថកិច្ចរបស់តុលាការ»។
សកម្មជនបរិស្ថាន លោក ហេង ស្រស់ សង្កត់ធ្ងន់ថា ប្រសិនបើគណៈកម្មការជាតិ និងតុលាការមិនព្រមចាប់ឧក្រិដ្ឋជន មកផ្ដន្ទាទោសទេ មានន័យថា ការអនុវត្តច្បាប់ព្រៃឈើនៅតែធូររលុង ហើយដំណោះស្រាយវិបត្តិព្រៃឈើរបស់គណៈកម្មការជាតិនឹងបរាជ័យម្តងទៀត។ លោកថា បញ្ហានេះជាការទទួលខុសត្រូវសំខាន់របស់គណៈកម្មការជាតិ និងតុលាការ គឺមិនត្រូវឱ្យក្រុមឧក្រិដ្ឋជន និងក្រុមឧកញ៉ាទាំងនេះរួច ពីសំណាញ់ច្បាប់ឡើយ៖ «យើងនឹងតាមដានថា តុលាការនឹងកោះហៅប៉ុន្មាននាក់ទៀត ហើយបើសិនជា តុលាការកោះហៅ របៀបរាក់កំភែលអ៊ីចឹងទៀត ឱ្យក្រុមឧក្រិដ្ឋជន និងជនល្មើសរត់រួចជាកំហុសតុលាការ និងកំហុសរបស់គណៈកម្មការជាតិ។ ចំពោះឧក្រិដ្ឋជនផ្សេងទៀតៗ យើងនឹងមានការបញ្ចេញឈ្មោះគាត់តទៀតថា នរណាគេជាមេ ឧក្រិដ្ឋជន ដែលរកស៊ីកាប់បំផ្លាញព្រៃឈើ ដឹកពីប្រទេសកម្ពុជា ទៅលក់នៅក្រៅប្រទេស»។
មន្ត្រីជាន់ខ្ពស់សមាគមអាដហុក (Adhoc) លោក ប៉ែន ប៊ុណ្ណារ៍ យល់ថា ប្រសិនបើជនសង្ស័យជាឧកញ៉ា និងអ្នកពាក់ព័ន្ធបទល្មើសព្រៃឈើរត់គេចខ្លួន តំណាងអយ្យការត្រូវតែចេញលិខិតបញ្ជាឱ្យនាំខ្លួន។ លោកសង្ឃឹមថា តុលាការនឹងស៊ើបអង្កេតសំណុំរឿងនេះត្រឹមត្រូវតាមច្បាប់ ចៀសវាងប្រព្រឹត្តអំពើពុករលួយ៖ «អ្នកដែលកោះហៅខ្លះ ពន្យារពេល តែមានឧកញ៉ា ៣នាក់គេចខ្លួន គេរកទៅផ្ទះអត់ឃើញ។ អ៊ីចឹងអ្នកគេចខ្លួនគេនឹងតាមស្រាវជ្រាវ យកមកនាំខ្លួន»។
គណៈកម្មការជាតិទប់ស្កាត់ និងបង្ក្រាបបទល្មើសព្រៃឈើបង្ហាញថា ក្រុមហ៊ុនចំនួន ៦ ប្រឈមដកអាជ្ញាប័ណ្ណរួមមាន ក្រុមហ៊ុនម៉ាស្ទ័រខេសិន ក្រុមហ៊ុនចិន យ៉ាន់ចាវ ក្រុមហ៊ុន ថាច់វូដ ក្រុមហ៊ុនវិជ្ជរី ក្រុមហ៊ុន លឹម រ៉ូយ៉ាល់ និងក្រុមហ៊ុនណេងណា។ សកម្មជនបរិស្ថានរកឃើញថា ឧកញ៉ា និងជនសង្ស័យទាំង ២០នាក់ ដែលតុលាការកោះហៅនោះ មានជាប់ពាក់ព័ន្ធប្រព្រឹត្តបទល្មើសព្រៃឈើ ជាមួយក្រុមហ៊ុនទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ