កម្ពុជា​នឹង​ឈប់​សាងសង់​ទំនប់​វារីអគ្គិសនី​នៅ​លើ​ទន្លេ​មេគង្គ​ក្នុង​រយៈពេល​១០​ឆ្នាំ

ដោយ យន់ សាមៀន
2020.03.19
ទំនប់​វារីអគ្គិសនី​សេសាន​ក្រោម​២ ២០១៦ ៨៥៥ ការដ្ឋាន​សាងសង់​ទំនប់​វារីអគ្គិសនី​សេសាន​ក្រោម​២ នៅ​ខេត្ត​ស្ទឹងត្រែង។ រូបថត​ថ្ងៃ​ទី​២៦ ខែ​មីនា ឆ្នាំ​២០១៦
RFA

មន្ត្រី​ក្រសួង​រ៉ែ និង​ថាមពល​អះអាង​ថា កម្ពុជា​កំពុង​សិក្សា​ស្វែងរក​ថាមពល​ផ្សេងទៀត​ដូច​ជា ឧស្ម័ន​ធម្មជាតិ ធ្យូង​ថ្ម និង​ព្រះអាទិត្យ ជាជាង​សាងសង់​ទំនប់​វារីអគ្គិសនី ក្នុង​រយៈពេល ១០​ឆ្នាំ​ទៀត។

អគ្គនាយក​នៃ​អគ្គនាយកដ្ឋាន​ថាមពល​នៃ​ក្រសួង​រ៉ែ និង​ថាមពល លោក វិចទ័រ ហ្សូនា (Victor Jona) ប្រាប់​ទីភ្នាក់ងារ​ព័ត៌មាន (Reuters)​ថា ការ​ផ្អាក​សាងសង់​ទំនប់​វា​រី​អគ្គីសនី​នេះ ដោយសារតែ មានការ​សិក្សា​មួយ​ធ្វើឡើង​ដោយ ទីប្រឹក្សា ជប៉ុន ដែល​បាន​ផ្តល់​អនុសាសន៍​ឱ្យ​កម្ពុជា​ស្វែងរក​ប្រភព​ថាមពល​ប្រភព​ផ្សេងទៀត​។

លោក វិចទ័រ ហ្សូនា ថា តាម​គម្រោង​រយៈពេល ១០​ឆ្នាំ ពី​ឆ្នាំ​២០២០ ដល់ ឆ្នាំ​២០៣០ កម្ពុជា​នឹង​មិន​សាងសង់​ទំនប់​វារីអគ្គិសនី​ទេ​។ សកម្មជន​បរិស្ថាន​ធ្លាប់​បាន​ព្រមាន​ថា ទំនប់​វារីអគ្គិសនី​នឹង​បណ្ដាល​ឱ្យ​មាន​គ្រោះ​មហន្តរាយ​ដល់​មច្ឆា​ជាតិ និង ស្រែ​ចម្ការ​នៅ​តាម​ដង​ទន្លេ​មេគង្គ​ក្រោម ដែល​មាន​ប្រវែង ប្រមាណ ពីរ​ពាន់ បី​រយ និង​កៅសិប គីឡូម៉ែត្រ ដែល​អាច​ប៉ះពាល់​ដល់​ពលរដ្ឋ​ប្រមាណ ៦០​លាន​នាក់​។

កាលពី​ឆ្នាំ​២០១៩ កម្ពុជា បាន​ជួបប្រទះ​កង្វះខាត​ថាមពល​យ៉ាង​ធ្ងន់ធ្ងរ​ដោយសារតែ តម្រូវការ​កើន​ឡើង បណ្ដាល​មកពី​កំណើន​នៃ​ការសាងសង់ ស្រប​ពេល​មានការ​វិនិយោគទុន​ពី​ចិន​។ មន្ត្រី​រដ្ឋាភិបាល​អះអាង​ថា កង្វះ​អគ្គិសនី​ដោយសារតែ កម្ពស់​ទឹក​ទំ​បន់​វារីអគ្គិសនី នៅ​តាម​ដង​ទន្លេ​មេគង្គ​ក្រោម និង​តាម​ដៃទន្លេ​មេគង្គ មាន​កម្រិត​ទាប​។ កម្ពុជា​ប្រើប្រាស់ អគ្គិសនី​បាន​មក​ពី​ទំនប់​វារីអគ្គិសនី ប្រមាណ ៤៨​ភាគរយ​។ កាលពី​ឆ្នាំ ២០១៩ កម្ពុជា​បាន​ទិញ​ភ្លើង​អគ្គិសនី ប្រមាណ ២៥​ភាគរយ ពី​ប្រទេស​វៀតណាម និង​ថៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។