ក្រុមគ្រួសារសកម្មជនការពារព្រៃឈើ លោក ឈុត វុទ្ធី គ្រោងធ្វើពិធីរំឭកខួបគម្រប់ ៨ឆ្នាំនៃមរណភាពរបស់លោក នៅថ្ងៃទី២៦ ខែមេសា នៅតំបន់ព្រៃឡង់ ស្ថិតក្នុងខេត្តព្រះវិហារ។ ការធ្វើពិធីរំឭកខួបនេះ គឺដើម្បីបន្តទាមទារយុត្តិធម៌ និងឧទ្ទិសកុសលជូនដល់វិញ្ញាណក្ខន្ធលោក ឈុត វុទ្ធី ដែលត្រូវបានមន្ត្រីកងរាជអាវុធហត្ថបាញ់សម្លាប់ ខណៈលោកកំពុងស៊ើបអង្កេតការកាប់ឈើខុសច្បាប់នៅខេត្តកោះកុង កាលពីថ្ងៃទី២៦ ខែមេសា ឆ្នាំ២០១២។
កូនប្រុស លោក ឈុត វុទ្ធី គឺលោក ឆឺយ ឧត្តមរស្មី ប្រាប់អាស៊ីសេរីថា ពិធីបុណ្យខួប៨ឆ្នាំនេះ នឹងមានការចូលរួមពីមន្ត្រីសង្គមស៊ីវិល សកម្មជនបរិស្ថាន និងប្រជាសហគមន៍ព្រៃឈើតាមបណ្ដាខេត្តនានា ។ លោកបញ្ជាក់ថា នៅថ្ងៃបុណ្យខួបនោះ ពួកលោកនឹងធ្វើយុទ្ធនាការបង្ហោះសារលើបណ្ដាញសង្គមហ្វេសប៊ុក (Facebook) ដើម្បីរំឭកឡើងវិញនូវការងារ និងការលះបង់របស់លោក ឈុត វុទ្ធី ក្នុងកិច្ចការការពារព្រៃឈើ ព្រមទាំងស្នើសុំឱ្យរដ្ឋាភិបាល បន្តស្វែងរកឃាតកពិតដែលបានបាញ់សម្លាប់លោក ឈុត វុទ្ធី យកមកផ្ដន្ទាទោសតាមច្បាប់។
ទោះជាយ៉ាងណា លោក ឆឺយ ឧត្តមរស្មី ដែលជាប្រធានអង្គការការពារធនធានធម្មជាតិ បន្តការងារពីឪពុករបស់លោក ត្អូញត្អែរថា គ្រួសាររបស់លោកកំពុងជួបប្រទះបញ្ហាថវិកាសម្រាប់ធ្វើពិធីបុណ្យខួបនេះ។ លោក សំណូមពរដល់សប្បុរសជនទាំងក្នុង និងក្រៅប្រទេស ជួយឧបត្ថម្ភថវិកាសម្រាប់ពិធីបុណ្យនេះផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។