ក្រុមសមត្ថកិច្ចចម្រុះខេត្តរតនគិរី បានរកឃើញទីតាំងធ្វើអាជីវកម្មរ៉ែមាសខុសច្បាប់មួយកន្លែងដែលប្រើប្រាស់ម៉ាស៊ីនកិនរ៉ែមាស និងកម្មករវៀតណាម និងខ្មែរ កំពុងជីករកមាសក្នុងតំបន់សិក្សាស្រាវជ្រាវរបស់ក្រុមហ៊ុនស្រាវជ្រាវរ៉ែលោហៈ អង្គរ ហ្គ្រល (Angkor Gold) នៃប្រទេសអូស្ត្រាលី។
ក្រុមសមត្ថកិច្ច បានរឹបអូសម៉ាស៊ីនកិនរ៉ែមាស និងគ្រឿងសម្ភារៈមួយចំនួនទៀត ពាក់ព័ន្ធនឹងការធ្វើអាជីវកម្មនេះ ក៏ប៉ុន្តែមិនមានឃាត់ខ្លួនជនណាម្នាក់ឡើយ។
មន្ត្រីឃ្លាំមើលធនធានធម្មជាតិនៅខេត្តរតនគិរី អំពាវនាវឲ្យមន្ត្រីអយ្យការតុលាការខេត្ត ស៊ើបអង្កេតរកជនពាក់ព័ន្ធធ្វើអាជីវកម្មរ៉ែមាសខុសច្បាប់មួយកន្លែង ដែលពាក់ព័ន្ធភរិយាមន្ត្រីប៉ូលិសនៃស្នងការដ្ឋានប៉ូលិសខេត្តឈ្មោះ ម៉ម គឹមឆេង ជាអនុប្រធានការិយាល័យកណ្ដាលមធ្យោបាយ។
ការអំពាវនាវនេះ ធ្វើឡើងនៅថ្ងៃទី២៤ ខែមិថុនា បន្ទាប់ពីស្ត្រីមួយរូបមិនប្រាប់ឈ្មោះ ប៉ុន្តែត្រូវគេស្គាល់ថាជាភរិយាមន្ត្រីប៉ូលិសឈ្មោះ ម៉ម គឹមឆេង ចេញមុខទទួលស្គាល់ថា ទីតាំងជីកយកមាស និងគ្រឿងសម្ភារៈទាំងអស់ជារបស់ខ្លួន ក៏ប៉ុន្តែស្ត្រីនោះទាមទារឲ្យសមត្ថកិច្ចបង្ក្រាបកន្លែងធ្វើអាជីវកម្មមាសខុសច្បាប់ ២ ទៅ ៣កន្លែងទៀត ដែលស្ត្រីនោះអះអាងថា នៅតំបន់ភ្នំជិតគ្នានេះ។
មន្ត្រីសម្របសម្រួលសមាគមអាដហុក (Adhoc) ខេត្តរតនគិរី លោក ឆាយ ធី មានប្រសាសន៍ថា ការចេញមុខរបស់ស្ត្រីរូបនេះ គឺជាសាក្សីសំខាន់សម្រាប់ជាមូលដ្ឋានស៊ើបអង្កេតករណីនេះ។ លោកកត់សម្គាល់ថា ក្នុងការស៊ើបអង្កេតបឋមរបស់អង្គការលោករកឃើញថា ទីតាំងជីករកមាសខុសច្បាប់នេះ មានពាក់ព័ន្ធមនុស្សជាច្រើន ក្នុងនោះក៏មានក្រុមពាក់ព័ន្ធសមត្ថកិច្ចនៅមូលដ្ឋានអាចជាអ្នកឃុបឃិតផងដែរ៖ «ទៅដល់យើងឃើញមានការអះអាងជាច្រើន កម្មករខ្លះថាជារបស់ខ្លួន ខ្លះថាជារបស់មេ។ អ៊ីចឹងយើងឃើញថា ការជីកមាសនៅទីតាំងនោះមានការរៀបចំ មានការចាត់តាំង មានខ្សែរយៈ មានខ្នងបង្អែកជាច្រើន»។
នៅព្រឹកថ្ងៃទី២៤ ខែមិថុនា បុគ្គលិកក្រុមហ៊ុន អង្គរ ហ្គ្រល មន្ត្រីមន្ទីររ៉ែ និងថាមពល មន្ត្រីឃ្លាំមើលសិទ្ធិមនុស្សខេត្ត រួមទាំងប៉ូលិសមូលដ្ឋាន បានទៅដល់ទីតាំងធ្វើអាជីវកម្មរ៉ែមាសនោះឃើញមានរោងប្រក់សំពត់កៅស៊ូចំនួន៤ នៅចំណុចភ្នំក្រូច និងតាមមាត់អូរជាប់ជ្រលងភ្នំនេះ។ នៅទីនោះ ជនជាតិវៀតណាម ៤នាក់ បានជម្លៀសខ្លួនឡើងភ្នំ បន្ទាប់ពីក្រុមសមត្ថកិច្ចទៅដល់អណ្ដូងរ៉ែមួយដែលពួកគេកំពុងជីក។ នៅរោងចំនួនពីរទៀត មានកម្មករខ្មែរប្រមាណ ៦នាក់ កំពុងស្នាក់នៅក្នុងរោងនោះ។
តំណាងក្រុមហ៊ុន អង្គរ ហ្គ្រល លោក ម៉ា សំអាត ទទួលស្គាល់ថា អណ្ដូងជីករ៉ែមាសថ្មីមួយកន្លែងជម្រៅជាង ១០ម៉ែត្រ មុខកាត់ជាង ១ម៉ែត្រ ត្រូវគេជីកប្រមាណបីថ្ងៃ បន្ទាប់ពីក្រុមហ៊ុនដកចេញពីការដ្ឋានស្រាវជ្រាវរ៉ែនៅតំបន់នោះ។ លោកអះអាងថា ក្រុមជនល្មើសព្យាយាមជាថ្មី ជីករ៉ែមាសនៅតំបន់នោះ បើទោះបីអាជ្ញាធរបានចុះហាមឃាត់ក្រុមអ្នកជីកមាសអនាធិបតេយ្យកាលពីខែឧសភា កន្លងទៅក្តី៖ «បួនថ្ងៃយើងបានដកចេញពីទីតាំងហ្នឹង។ បួនថ្ងៃមុនយើងកំពុងខួងនៅទីតាំងហ្នឹង គាត់អត់មានសកម្មភាពទេ។ ខ្ញុំឮព័ត៌មានហ្នឹងក៏ភ្ញាក់ផ្អើលដែរ។ ខ្ញុំទើបដកចេញ គាត់ចូលមកធ្វើ សំខាន់កន្លែងហ្នឹងជីកថ្មី។ គាត់អត់ប្រាប់ឈ្មោះទេ ប៉ុន្តែប៉ូលិសថាប្ដីគាត់ឈ្មោះ ឆេង ធ្វើប៉ូលិស គាត់ថាកម្មសិទ្ធិហ្នឹងជារបស់គាត់ បើចាប់ៗទៅចាប់ទាំងអស់គ្នា ឲ្យចាប់ម៉ាស៊ីនផ្សេងទៀត»។
បុរសម្នាក់កំពុងស្នាក់នៅក្នុងរោងមួយជិតរោងដាក់ម៉ាស៊ីនកិនរ៉ែមាស ឈ្មោះ ជុំ ស្រ៊ាង អះអាងថា ជនជាតិវៀតណាម បានមកជួលដីនោះពីគាត់ជាម្ចាស់ដី ដើម្បីជីករកមាសប្រមាណបីថ្ងៃកន្លងទៅនេះ។ លោក ជុំ ស្រ៊ាង បដិសេធថាកម្មករខ្មែរដែលស្នាក់នៅក្នុងរោង មិនមែនជាអ្នកជីកមាសទេ គឺកម្មករធ្វើចម្ការដែលគាត់ជួលមកពីខេត្តក្រចេះ៖ «គេសុំដីខ្ញុំធ្វើ ខ្ញុំអត់ដឹងស្អីដែរ គេថាបានផលបានគេឲ្យខ្ញុំចាយ។ លោក រិទ្ធិ គេមកទាក់ទងខ្ញុំ គេថាឲ្យកូនចៅគេចុះមក ទើបមកបីបួនថ្ងៃ គ្នាគេ ៤នាក់ អត់ឮនិយាយខ្មែរ»។
វិទ្យុអាស៊ីសេរី មិនអាចទាក់ទង លោក ម៉ម គឹមឆេង សុំបំភ្លឺករណីស្ត្រីជាភរិយារបស់លោក ដែលអះអាងជាម្ចាស់គ្រឿងសម្ភារៈជីកមាសនោះបានទេ នៅថ្ងៃទី២៤ ខែមិថុនា។
យ៉ាងនេះក្តី ស្នងការរងប៉ូលិសខេត្តរតនគិរី លោក វ៉ាន់ សាវាត បញ្ជាក់ថា លោកចាត់មន្ត្រីប៉ូលិសចុះស្រាវជ្រាវករណីនេះ ដើម្បីធ្វើរបាយការណ៍ជូនស្នងការប៉ូលិស។ ដោយឡែកអធិការប៉ូលិសស្រុកលំផាត់ លោក សូយ ថាវ បញ្ជាក់ដែរថា សមត្ថកិច្ចប៉ូលិសកំពុងកសាងសំណុំរឿងនេះដូចគ្នា៖ «ឥឡូវយើងបញ្ជាឲ្យចុះទៅហើយ យើងរាយការណ៍ឲ្យស្នងការ»។
តំបន់ភ្នំក្រូច ជាតំបន់មានរ៉ែមាស។ កន្លងទៅ គេឃើញរណ្ដៅជីកយករ៉ែមាសនៅតាមជើងភ្នំមកកិនរែងយកមាស ហើយបង្ហូរសារធាតុគីមី និងដីកខ្វក់ចូលទៅអូរធម្មជាតិ ដែលប្រជាពលរដ្ឋជនជាតិដើមនៅតំបន់ជិតនោះប្រើប្រាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។