ក្រសួង​បរិស្ថាន​គ្រោង​បញ្ចូល​បញ្ហា​ប្រែប្រួល​អាកាសធាតុ​នៅ​កម្រិត​ថ្នាក់​មត្តេយ្យ​សិក្សា

ដោយ អ៊ុំ រង្សី
2015-09-17
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​បរិស្ថាន លោក សាយ សំអាល់ ថ្លែង​ក្នុង​កិច្ច​ប្រជុំ​ពិគ្រោះ​យោបល់​ស្ដីពី «ការ​ចូលរួម​ចំណែក​របស់​កម្ពុជា ដើម្បី​អនុវត្ត​អនុសញ្ញា​ក្របខ័ណ្ឌ​សហប្រជាជាតិ ស្ដីពី​ការ​ប្រែប្រួល​អាកាសធាតុ» កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៥។
រដ្ឋមន្ត្រី​ក្រសួង​បរិស្ថាន លោក សាយ សំអាល់ ថ្លែង​ក្នុង​កិច្ច​ប្រជុំ​ពិគ្រោះ​យោបល់​ស្ដីពី «ការ​ចូលរួម​ចំណែក​របស់​កម្ពុជា ដើម្បី​អនុវត្ត​អនុសញ្ញា​ក្របខ័ណ្ឌ​សហប្រជាជាតិ ស្ដីពី​ការ​ប្រែប្រួល​អាកាសធាតុ» កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៥។
RFA/Um Rainsey

ទាញ​យក​កម្មវីធី

ក្រសួង​បរិស្ថាន ចាត់​ទុក​ការ​ប្រែប្រួល​អាកាសធាតុ​ជា​បញ្ហា​អាទិភាព​របស់​ជាតិ។ ទន្ទឹម​គ្នា​នេះ ដើម្បី​ឆ្លើយ​តប​នឹង​បន្ស៊ាំ​ការ​ប្រែប្រួល​អាកាសធាតុ រដ្ឋមន្ត្រី​ក្រសួង​បរិស្ថាន លោក សាយ សំអាល់ គ្រោង​នឹង​ដាក់​បញ្ចូល​បញ្ហា​ប្រែប្រួល​អាកាសធាតុ ចាប់​ពី​កម្រិត​ថ្នាក់​មត្តេយ្យ​សិក្សា​នៅ​ក្នុង​កម្មវិធី​សិក្សា​របស់​ក្រសួង​អប់រំ នា​ពេល​ឆាប់ៗ​ខាង​មុខ​នេះ។

រដ្ឋមន្ត្រី​ក្រសួង​បរិស្ថាន លោក សាយ សំអាល់ លើក​ឡើង​ថា ការ​បញ្ចូល​បញ្ហា​ប្រែប្រួល​អាកាសធាតុ​នៅ​ក្នុង​កម្មវិធី​សិក្សា​របស់​ក្រសួង​អប់រំ យុវជន និង​កីឡា ចាប់​ពី​កម្រិត​ថ្នាក់​មត្តេយ្យ​សិក្សា គឺ​ជា​ការ​ប្ដេជ្ញា​ចិត្ត​ថ្មី​មួយ ក្នុង​ការ​ការពារ​ការ​ប្រែប្រួល​អាកាសធាតុ ដើម្បី​ធានា​និរន្តរភាព​ស្បៀង​នៅ​កម្ពុជា។

ការ​លើក​ឡើង​របស់​រដ្ឋមន្ត្រី​ក្រសួង​បរិស្ថាន នៅ​ពេល​នេះ ធ្វើ​ឡើង​នៅ​ក្នុង​កិច្ច​ប្រជុំ​ពិគ្រោះ​យោបល់​ស្ដីពី «ការ​ចូលរួម​ចំណែក​របស់​កម្ពុជា ដើម្បី​អនុវត្ត​អនុសញ្ញា​ក្របខ័ណ្ឌ​សហប្រជាជាតិ ស្ដីពី​ការ​ប្រែប្រួល​អាកាសធាតុ» នៅ​ថ្ងៃ​ទី​១៦ ខែ​កញ្ញា។

ថ្លែង​ក្នុង​កិច្ច​ប្រជុំ រដ្ឋមន្ត្រី​ក្រសួង​បរិស្ថាន លោក សាយ សំអាល់ មាន​ប្រសាសន៍​ថា កម្ពុជា ងាយ​រងគ្រោះ​បំផុត ទោះ​បី​កម្ពុជា ចូលរួម​តិចតួច​បំផុត​ក្នុង​ការ​ធ្វើ​ឲ្យ​ប្រែប្រួល​អាកាសធាតុ​ក៏ដោយ។ លោក​បន្ត​ថា កន្លង​មក​រដ្ឋាភិបាល​បាន​អនុម័ត​កម្មវិធី​បន្ស៊ាំ​នឹង​ការ​ប្រែប្រួល​អាកាសធាតុ ក៏​បញ្ហា​នេះ​នៅ​តែ​ជា​ក្តី​កង្វល់​របស់​វិស័យ​កសិកម្ម​កម្ពុជា។

លោក​ថា ក្នុង​នាម​ជា​ប្រទេស​សមាជិក​របស់​អង្គការ​សហប្រជាជាតិ ក្រសួង​បរិស្ថាន កំពុង​រិះរក​គ្រប់​មធ្យោបាយ​ដើម្បី​ដោះស្រាយ​បញ្ហា​នេះ តាម​រយៈ​ការ​អប់រំ​ទាំង​ក្រៅ​ប្រព័ន្ធ និង​ក្នុង​ប្រព័ន្ធ។ ជាង​នេះ រដ្ឋមន្ត្រី​ក្រសួង​បរិស្ថាន បាន​ឲ្យ​ដឹង​បន្ត​ថា ក្រសួង​កំពុង​សហការ​ជាមួយ​ក្រសួង​អប់រំ ដាក់​បញ្ចូល​បញ្ហា​ប្រែប្រួល​អាកាសធាតុ​ចាប់​ពី​ថ្នាក់​មត្តេយ្យ​សិក្សា ដើម្បី​ផ្លាស់ប្ដូរ​ផ្នត់​គំនិត​កុមារ​តាំង​ពី​ថ្នាក់​តូច ឲ្យ​បាន​យល់​ដឹង​ពី​ការ​ប្រែប្រួល​អាកាសធាតុ៖ «ខ្ញុំ​ចឹង​ឃើញ​កម្មវិធី​សិក្សា​នេះ នឹង​ធ្វើ​ឲ្យ​កុមារ​តូចៗ​ផ្លាស់ប្ដូរ​ផ្នត់​គំនិត​កុមារ​តាំង​ពី​ថ្នាក់​តូច ឲ្យ​ពួក​គេ​ចេះ​កាត់​បន្ថយ​ការ​ប្រើប្រាស់​ថាមពល​ឲ្យ​មាន​ប្រសិទ្ធភាព ក្នុង​ការ​កាត់​បន្ថយ​បញ្ហា​ប្រែប្រួល​អាកាសធាតុ»

ចំណែក​ឯ​នាយក​ប្រតិបត្តិ​នៃ​វេទិកា​អង្គការ​មិន​មែន​រដ្ឋាភិបាល​ស្ដីពី​កម្ពុជា (NGO-Forum) លោក តឹក វណ្ណារ៉ា សាទរ​ចំណាត់​ការ​នេះ ព្រោះ​វា​ជា​ដំណើរ​ថ្មី​មួយ រួម​ចំណែក​ដោះស្រាយ​បញ្ហា​ប្រែប្រួល​អាកាសធាតុ​នៅ​កម្ពុជា។ លោក​ថា ប៉ុន្មាន​ឆ្នាំ​ចុង​ក្រោយ​នេះ កម្ពុជា ទទួល​រង​ឥទ្ធិពល​ពី​បញ្ហា​នេះ ដែល​បង្ក​ឲ្យ​មាន​របប​ទឹក​ភ្លៀង​មិន​ទៀងទាត់ ទឹក​ជំនន់ គ្រោះ​រាំង​ស្ងួត និង​ខ្យល់​ព្យុះ​ជាដើម។ លោក​ស្នើ​ឲ្យ​រដ្ឋាភិបាល គួរ​តែ​យក​ចិត្ត​ទុក​ដាក់​ខ្លាំង​លើ​ពីរ​ផ្នែក​សំខាន់ គឺ​ផ្នែក​បរិស្ថាន​ត្នោត និង​ផ្នែក​បរិស្ថាន​បៃតង៖ «ផ្នែក​បរិស្ថាន​ត្នោត រដ្ឋាភិបាល​ត្រូវ​តែ​ផ្ដោត​លើ​ការ​អនុវត្ត​ទីក្រុង ទាំង​លក្ខណៈ​ការ​ដឹក​ជញ្ជូន​ជា​សាធារណៈ ទាក់ទង​ការ​សន្សំ​ថាមពល​អគ្គិសនី និង​ផ្នែក​បរិស្ថាន​បៃតង ស្នើ​ឲ្យ​មាន​ការ​ទទួល​ស្គាល់​សហគមន៍​ព្រៃ​ឈើ សហគមន៍​នេសាទ សហគមន៍​ជនជាតិ​ដើម​ភាគ​តិច ដើម្បី​ឲ្យ​ការ​គ្រប់​និរន្តរភាព​បរិស្ថាន​នៅ​កម្ពុជា មាន​ប្រសិទ្ធភាព»

វិទ្យុ​អាស៊ីសេរី មិន​អាច​ទាក់ទង​រដ្ឋមន្ត្រី​ក្រសួង​អប់រំ យុវជន និង​កីឡា លោក ហង់ ជួនណារ៉ុន ដើម្បី​បញ្ជាក់​បន្ថែម​ពី​កម្មវិធី​សិក្សា ស្ដីពី​ការ​ប្រែប្រួល​អាកាសធាតុ​របស់​ក្រសួង​កន្លង​មក បាន​នៅ​ឡើយ​នៅ​ថ្ងៃ​ទី​១៦ ខែ​កញ្ញា។

យ៉ាង​ណា​ក៏ដោយ រដ្ឋមន្ត្រី​ក្រសួង​បរិស្ថាន លោក សាយ សំអាល់ មិន​ទាន់​បាន​បញ្ជាក់​ច្បាស់​ពី​ដំណើរ​បញ្ចូល​បញ្ហា​ប្រែប្រួល​អាកាសធាតុ ទៅ​ក្នុង​កម្មវិធី​សិក្សា​របស់​ក្រសួង​អប់រំ យុវជន និង​កីឡា ចាប់​ពី​កម្រិត​ថ្នាក់​មត្តេយ្យ​សិក្សា​ជាក់លាក់​បាន​នៅ​ឡើយ ប៉ុន្តែ​លោក​បាន​ឲ្យ​ដឹង​ថា គណៈកម្មការ​របស់​ក្រសួង​ទាំង​ពីរ កំពុង​ពិភាក្សា​ពី​បញ្ហា​នេះ។

ក្រៅ​ពី​ការ​ដាក់​បញ្ចូល​កម្មវិធី​សិក្សា​ការ​ប្រែប្រួល​អាកាសធាតុ​នៅ​ក្នុង​ថ្នាក់​មត្តេយ្យ​សិក្សា ក្រសួង​បរិស្ថាន គ្រោង​នឹង​រៀបចំ​អភិរក្ស​តំបន់​ទេសចរណ៍​ទាំង​វប្បធម៌ និង​ប្រព័ន្ធ​ជីវចម្រុះ​ឡើង​វិញ ដោយ​ផ្ដោត​លើ​ទីតាំង​បី​សំខាន់ៗ គឺ​ទី​១ នៅ​របៀង​ឦសាន​ជាប់​ព្រំដែន​ឡាវ។ ទី​២ របៀង​ជីវចម្រុះ​ខាង​ជើង​ទន្លេ​សាប ជាប់​ព្រំដែន​ថៃ ដែល​មាន​ខេត្ត​ព្រះវិហារ កំពង់ធំ សៀមរាប និង​ទី​៣ របៀង​ខាង​ត្បូង​បឹង​ទន្លេ​សាប រួម​មាន តំបន់​បូកគោ គិរីរម្យ ភ្នំ​ក្រវាញ និង​កោះកុង។

ជាង​នេះ​ទៀត ក្រសួង​បរិស្ថាន ក៏​បាន​អនុម័ត​ផែនការ​យុទ្ធសាស្ត្រ​ឆ្លើយ​តប​នឹង​ការ​ប្រែប្រួល​អាកាសធាតុ​កម្ពុជា ឆ្នាំ​២០១៤-២០២៣ ដែល​មាន​ចក្ខុ​វិស័យ​កសាង​កម្ពុជា ឆ្ពោះ​ទៅ​រក​សង្គម​មួយ​ដែល​បៃតង បញ្ចេញ​កាបូនិច ធន់​នឹង​ការ​ប្រែប្រួល​អាកាសធាតុ សមធម៌ ចីរភាព និង​ពឹង​ផ្អែក​លើ​ចំណោះ​ដឹង​ជា​គោល ក្នុង​គោលដៅ​ធានា​បាន​នូវ​សន្តិសុខ​ថាមពល ទឹក និង​ស្បៀង​អាហារ​នៅ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

រីមសារាយ

សុំទោសខ្ញុំខង់សួរថាតើថ្នាក់សង្គមនិងថ្នាក់វិជ្ជាសាស្រ្តខុសគ្នាដូចម្ដេចប្រាប់បានឣត់ខ្ញុំមិនដឹងថាវារំខានឣត់ទេសុំទោសបើបងៗពូៗណាប្រាប់បានទំនាក់ទំនងតាមលេខទូរស័ព្ទ0978272689

Oct 30, 2015 11:06 AM

អ្នក​អាន​អនាមិក

I WONDER HOW MANY BANANA OR COCONUT TREES HE HAS PLANTED SO FAR. IF NOT,TAKE OFF YOUR SUIT AND TIE GO TO GROW SOME THEN COME BACK TO TELL PEOPLE AGAIN.

Sep 18, 2015 10:10 AM

គេហទំព័រ​ទាំងមូល