ប្រជាពលរដ្ឋ​ទីក្រុង​ភ្នំពេញ​ត្អូញត្អែរ​រឿង​ជំនន់​ទឹក​ភ្លៀង

ដោយ ម៉ៅ សុធានី
2020-08-09
អ៊ីម៉ែល
មតិ
Share
បោះពុម្ព
ដើម​ឈើ​ដួលរលំ តាម​ដង​ផ្លូវ​នៅ​រាជធានី​ភ្នំពេញ បន្ទាប់​ពី​ភ្លៀង​​លិច​ កាល​ពី​ថ្ងៃ​ទី៦ ខែ​សីហា ឆ្នាំ​២០២០។
ដើម​ឈើ​ដួលរលំ តាម​ដង​ផ្លូវ​នៅ​រាជធានី​ភ្នំពេញ បន្ទាប់​ពី​ភ្លៀង​​លិច​ កាល​ពី​ថ្ងៃ​ទី៦ ខែ​សីហា ឆ្នាំ​២០២០។
Photo courtesy of Urban Voice Cambodia

ប្រជា​ពលរដ្ឋ ក្នុង​ទីក្រុង ភ្នំពេញ​ស្ទើរ​គ្រប់​ខណ្ឌ​សង្កាត់​ទាំងអស់ ត្អូញត្អែរ​រឿង​ជំនន់​ទឹកភ្លៀង ដែល​បណ្ដាល​ឱ្យ​ទឹក​លិច​ផ្លូវ​ធ្វើដំណើរ​មិន​បាន បាត់បង់​ទ្រព្យសម្បត្តិ និង​កូនចៅ​របស់​ពួកគាត់​ងាយ​ប្រឈម​ការ​លង់ទឹក​។ អាជ្ញាធរ​រាជធានី​ភ្នំពេញ​ឆ្លើយ​ថា​មកពី​ភ្លៀង​ធំ​ពេក ទើប​ទប់​ជំនន់​មិន​ឈ្នះ តែ​ខាង​អង្គការ​សង្គម​ស៊ីវិល​ថា ទឹក​លិច​ក្រុង​ព្រោះតែ​ការ​លុប​បឹងបួ​អស់។

ប្រជាពលរដ្ឋ​នៅ សង្កាត់​ដេប៉ូ​១ ខណ្ឌ​ទួលគោក​លោកស្រី លីម សក្តា ត្អូញ​ថា ភ្នំពេញ​ឥឡូវ​ជំនន់​ទឹកភ្លៀង​ចង់​រាល់ថ្ងៃ ហើយ​ពេល​ភ្លៀង​ម្ដងៗ ទឹក​ហូរ​ពី​ថ្នល់​ចូល​មក​ផ្ទះ​ផង ទឹកផុស ពី​លូ​ឡើង​មក​ផង ទប់​មិន​ឈ្នះ​ទាល់តែ​ទឹក​ស្រក់​ទៅ​ដោយ​ខ្លួនឯង។

លោកស្រី លីម សក្ដា ថា ពេល​ទឹក​លិច​ផ្ទះ​ម្ដងៗ​លោកស្រី តែងតែ បង្ខាំង​កូន​តូច​ឲ្យ​នៅ​លើ គ្រែ​រាប់​ម៉ោង ហើយ​បិទ​កុងតាក់​ភ្លើង​ទៀត ព្រោះ​ខ្លាច​ភ្លើង​ឆក់​។ ចំណែក នៅ​ក្នុង​ផ្ទះ​វិញ លោកស្រី​ថា នៅ​ពេល​ទឹក​ស្រក​អស់ ទោះជា​ជូត​ស្ងួត​ហើយក៏​ដោយ ក៏​នៅតែ​ជាប់​ចំហាយ​ក្លិន​អសោច នៃ​ទឹក​លូ​ដែរ ហើយ​ក្លិន​មិនល្អ​នេះ​បាន​ធ្វើ​ឲ្យ​លោកស្រី និង​កូន​​តូច មាន​ជំងឺ​ផ្ដាសាយ​ជាប្រចាំ៖ «ឱ‌! មេឃ​ស្រទំៗ អីចឹង​ខ្លាច​តែ​ភ្លៀង អត់​ហ៊ាន​ទៅ​ណា​ឆ្ងាយ​ទេ ព្រោះ​ខ្លាច​លិច​ដូច​ពី​ម្សិល ពី​ម្សិល​បាចទឹក​មួយ​ល្ងាច​ហើយ ឥឡូវ​មិន​បាច់​និយាយ​ច្រើន​ទេ ភ្លៀង​តែ​កន្លះ​ម៉ោង​ក៏​លិច​ដែរ លិច​ទាំង​អស់ហ្នឹង លិច​ចូល​ផ្ទះ​។ ខ្សែភ្លើង​អី​នៅ​ពាសពេញ តែ​ទឹក​វា​ចូល​ទៅ​វា​លំបាក ព្រោះ​វា​មាន​ស្តុក​អីវ៉ែអីវ៉ាន់ មាន​អង្ករ មានអី​មាន​អាកុល មាន​អី ពេញ​ទឹក​ពេញ​ដី​ហ្នឹង កុំ​តែ​មាន​អីវ៉ាន់​អត់​អី​ទេ លិច​បណ្ដែត​ទាំង​មនុស្ស​ទៀត ក៏​អត់​អី​ដែរ អី ៗ ទៅ»

ចំណែក ប្រជាពលរដ្ឋ​នៅ​សង្កាត់​ស្ទឹងមានជ័យ លោកស្រី សេង អមរា ត្អូញត្អែរ​ថា រាល់ថ្ងៃ​នៅ​កន្លែងធ្វើការ​ឲ្យ​តែ​ឃើញ​មេឃ​ងងឹត លោកស្រី​ចេះតែ​ខ្វល់ខ្វាយ​ក្នុង​ចិត្ត​ខ្លាច​កូន​តូច ៗ​នៅផ្ទះ​ចុះ​លេង​ទឹក បណ្ដាល​ឲ្យ​មាន​គ្រោះថ្នាក់។

លោកស្រី​បន្ត​ថា ពេល​មាន​ភ្លៀង​ធ្លាក់ ទឹក​លិច​តាម​ផ្លូវ ធ្វើ​ឱ្យ​លោកស្រី​ត្រូវ​ចំណាយ​ពេល​យ៉ាងតិច​ក៏ ២​ម៉ោង​ដែរ ទើប​មក​ដល់​ផ្ទះ ដែល​ធម្មតា​ចំណាយ​ពេល​ត្រឹម​កន្លះ​ម៉ោង​ប៉ុណ្ណោះ៖ «ព្រោះ​អី​ផ្លូវ​ដេអិន ផ្លូវ​ឃ្លាំង​រំសេវ​អី​លិច​អស់ហើយ ផ្លូវ​ទាបៗ តាម​ភូមិ​លិច​តើ​អ៊ុំ ខ្ញុំ​ឥឡូវ​នៅ​ភូមិ​ឫស្សី ភូមិ​ឫស្សី​លិច​ដែរ​ហ្នឹង ម្សិលមិញ​លិច​ឡើង​ត្រឹម​ជង្គង់​។ អត់​ដែល​លិច​អីចឹង​ទេ ម្សិលមិញ​លិច​ទីស្នាក់ការ​ភូមិ ដោយសារ​ស្រុក​យើង​លុប​បឹង លុប​អី​ហ៎ ដល់​អីចឹង​រក​ផ្លូវ​ហូរ​ទឹក​អត់​មាន​លូ​តូច​ៗ»

រីឯ​បុរស​អ្នក​រត់​ម៉ូតូឌុប​ម្នាក់ ឈ្មោះ​ចៅ សំអឿន នៅ​សង្កាត់​លេខ ១​ខណ្ឌ​ឫស្សីកែវ​ថា ជំនន់​ទឹកភ្លៀង​នេះ​ឮ​តែ​ថា​អាជ្ញាធរ​លើក​ផែន​ការណ៍​ទប់​ស្កាត់ៗ រាប់​ឆ្នាំ​មក​ហើយ តែ​ជំនន់​ទឹកភ្លៀង​នៅ​តែ​មាន​ដដែល ។​បុរស​រត់​ម៉ូតូឌុប​រូប​នេះ​បន្ត​ទៀត​ថា ពេលណា​លោក​ឃើញ​មេឃងងឹត​ភ្លៀង​ម្ដងៗ លោក​ដឹង​ច្បាស់​ថា ថ្ងៃ​ហ្នឹង​លោក​អត់ លុយ​សម្រាប់​ទិញ​ម្ហូបអាហារ​ឲ្យ​ប្រពន្ធ​កូន​ទៀតហើយ ព្រោះ​ផ្លូវ​នឹង​លិច​គ្រប់ទិសទី មិន​អាច​រត់​ម៉ូតូឌុប​បាន៖ «មាន​ពេលខ្លះ​ភ្លៀង​មួយ​ម៉ោង​វា ត្រូវតែ​លិច លិច​ជាបន្ទាន់​ហ្មង បាទ លិច​ហ្នឹង​វា​មិន​ស្រក​ទៅវិញ​ដោយ​ឆាប់​ទេ​បង ដោយសារ​ទឹក​ហូរ​វា​មិនទាន់ ដោយសារ​ប្រព័ន្ធ​លូ​យើង​មានការ​កកស្ទះ​។ កំពុងតែ​រត់ៗ ចឹ​ង​ទៅ​ទឹក​លិច រលត់​ម៉ូតូ អូស​ម៉ូតូ​រាប់​គីឡូ​ដី​ណា​បង អីចឹង​ទៅ​ឲ្យ​លំបាក​ក្នុង​ការ​រក​ប្រាក់ ចិញ្ចឹម​កូនចិញ្ចឹម​ប្រពន្ធ ឃើញ​ថា លំបាក​ណាស់​បង»

ឆ្លើយតប​នឹង​កង្វល់​របស់​ប្រជាពលរដ្ឋ​នេះ អភិបាល​រាជធានី​ភ្នំពេញ លោក ឃួង ស្រេង ប្រាប់​អាស៊ីសេរី នៅ​ថ្ងៃ​ទី៨ សីហា​នេះ​ថា ទឹក​លិច​ទីក្រុង​ភ្នំពេញ​ពេលនេះ មក​អំពី​ភ្លៀង​ខ្លាំង មិន​មាន​មូលហេតុ​អ្វី​ក្រៅ​ពី​នេះ​ទេ​។ លោក​បន្ត​ថា ជំនន់​ទឹកភ្លៀង​ពេលនេះ​ខ្ពស់​ណាស់ កើន​រហូត​ទៅដល់ ១០៥) មីលីម៉ែត្រ។ លោក​ថា ជា​ធម្មតា កម្ពស់​ទឹកតែ​ត្រឹម ៧០មីលីម៉ែត្រ គឺ​ពិបាក​ទប់ទល់​ណាស់​ទៅ ហើយ​ស្ថាន​បែបនេះ​មិនមែន​កើតមាន​តែ​នៅ​កម្ពុជា​ទេ តែ​ប្រទេស​ជឿនលឿន​ក៏​មាន​ស្ថានភាព​ដូច​កម្ពុជា​ដែរ។

លោក ឃួង ស្រេង អះអាង​ទៀត​ថា ឆ្នាំនេះ​មិន​ដូច​ឆ្នាំ​មុនៗ​ទេ ព្រោះ​ទឹក​ជន់​លិច​យូរ​ត្រឹម​កន្លះ​ម៉ោង គឺ​ស្រក​ទៅវិញ​ហើយ ហើយ​ពេលនេះ​អាជ្ញាធរ​កំពុងតែ​ខ្នះខ្នែង​ស្ដារ​ប្រឡាយ និង​បន្ថែមចំនួន​ម៉ាស៊ីន​បូម​រំដោះ​ទឹក​ចេញពី​ក្រុង​ឱ្យ​ឲ្យ​បាន​ឆាប់​ជាង​នេះ​ទៀត៖ «ការពិត​គឺ​បញ្ហា មិនមែន​បញ្ហា​មកពី​ការ​លុប​បឹង​ទេ ការ​លុប​ទាំងអស់​នេះ សុទ្ធ​មានការ ការអភិវឌ្ឍន៍​សុទ្ធតែ​មានការ គិតគូរ​ពី​អ្នកបច្ចេកទេស​ជាន់ខ្ពស់ ជុំវិញ​បញ្ហា​ការ​រំដោះ​ទឹក ការ​ទប់​ទល់នឹង​បញ្ហា​ទឹកជំនន់​។​ល​។ បាន​យ៉ាង​ល្អ​ប្រសើរ មិនមែន​ជា​បញ្ហា​ហ្នឹង​ទេ ។ ប៉ុន្តែ​គឺ​បញ្ហា​មួយ​ដែល​ទឹកភ្លៀង​ឡើង​រហូតដល់​ទៅ ១០៥​មីលីម៉ែត្រ នេះ​ជា​សត្យានុម័ត​ទូទាំង​ពិភពលោក មិនមែន​ដោយឡែក​តែ​ទីក្រុង​ភ្នំពេញ​ទេ»

ផ្ទុយ​ពី​ការ​បញ្ជាក់​របស់​អាជ្ញាធរ​នេះ ប្រធាន​អង្គការ​សមាគម​ធាងត្នោត លោក សឿង សារ៉ន សង្កេត​ឃើញ​ថា ជំនន់​ទឹកភ្លៀង​នៅ​ភ្នំពេញ​កើតឡើង​កាន់តែ​ខ្លាំង ក៏​ព្រោះតែ​ការ​លុប​បឹង​មួយ​ចំនួន​នៅ​ជុំវិញ​ទីក្រុង​ភ្នំពេញ ដែល​ជា​អាង​សម្រាប់​ផ្ទុក​ទឹកភ្លៀង​នេះ​ឯង។

លោក សឿង សារ៉ន លើកឡើង​ទៀត​ថា ដើម្បី​ទប់ស្កាត់​ជំនន់​ទឹកភ្លៀង​នេះ ឲ្យ​មាន​ប្រសិទ្ធភាព អាជ្ញាធរ​គួរតែ​សហការ​ជាមួយ​នឹង​អង្គការក្រៅរដ្ឋាភិបាល​ជា​ដៃគូ​នានា ហើយ​លើក​ផែនការ​ឱ្យ​ច្បាស់លាស់​សម្រាប់​ដោះស្រាយ​បញ្ហា​នេះ៖ «រដ្ឋាភិបាល​គួរ​តែ​សិក្សា​អំពី​ផល​ប៉ះពាល់ អំពី​ការអភិវឌ្ឍន៍​ឡើងវិញ និង​ចេញផ្សាយ​ជា​សាធារណៈ ហើយ​ឲ្យ​មាន​អ្នក​ជំនាញ​គ្រប់​ភាគី​ពាក់ព័ន្ធ ចូលរួម​ដើម្បី​ពិគ្រោះ​យោបល់ និង​សិក្សា និង​កែលំអ​លើ​ប្រពន្ធ​ដែល​ទាក់ទង​ទៅ​ហ្នឹង​ទឹក​ក្នុង​រាជធានី​ភ្នំពេញ​ហ្នឹង​បាទ»

របាយការណ៍ ២៥​ទំព័រ របស់​សមាគម​ធាងត្នោត ដែល​ចេញផ្សាយ​កាលពី​អំឡុង​ខែ​ធ្នូ ឆ្នាំ​២០១៩ បាន​លាតត្រដាង​ពី​ផល​ប៉ះពាល់​បរិស្ថាន និង​សង្គម​ធ្ងន់ធ្ងរ បណ្ដាលមកពី អភិវឌ្ឍន៍​ទីក្រុង​រណប និង​បុរី​ជាច្រើន បាន​ចាប់ផ្ដើម​ចាក់​ដី​ខ្សាច់​លុប​បឹង​ធម្មជាតិ និង​តំបន់​ដី​សើម​ក្នុង​រាជធានី​ភ្នំពេញ ចាប់​តាំង​ពី​ឆ្នាំ​២០០៣ រហូត​មក​។ សមាគម​ធាងត្នោត​រក​ឃើញ​ថា បឹង​ធម្មជាតិ​ចំនួន​១៦ ត្រូវ​បាន​លុប​ទាំងស្រុង ហើយ​បឹង​ចំនួន​១០​ទៀត កំពុង​ចាក់​លុប​ខ្លះ​ៗ ក្នុងចំណោម​បឹង​ធម្មជាតិ​ចំនួន ២៦ នៅ​រាជធានី​ភ្នំពេញ​ដែល​ចាប់​តាំង​ពី​ឆ្នាំ​១៩៩០​មក ។ ក្នុង​នោះ​មាន​បឹង​មួយ​ចំនួន ដែល​ការពារ​ដោយ​អនុក្រឹត្យ កំពុង​ប្រឈម​ការ​ចាក់​លុប​ដូចគ្នា​ដែរ។

របាយការណ៍​បន្ថែម​ថា បឹង​ធម្មជាតិ និង​តំបន់​ដី​សើម​នៅ​រាជធានី​ភ្នំពេញ អាច​ប្រឈម​នឹង​ការ​បាត់​ទាំងស្រុង ហើយ​ប្រសិនបើ​ស្ថានភាព​ដូច​បច្ចុប្បន្ន​នៅតែ​បន្ត​ទីក្រុង​ភ្នំពេញ និង​តំបន់​ជុំវិញ នឹង​រង​គ្រោះ​ធ្ងន់ធ្ងរ​ដោយ​ទឹកជំនន់ បាត់បង់​ត្រី បាត់បង់​អាង​ប្រព្រឹត្តិកម្ម​ទឹក​កង្វក់​បែប​ធម្មជាតិ និង​ប៉ះពាល់​ជីវភាព​ប្រជា​ពលរដ្ឋ នៅ​មូលដ្ឋាន​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល