ពលរដ្ឋថា ការចាក់ដីលុបផ្នែកខ្លះនៃទន្លេបាទីធ្វើឱ្យប៉ះពាល់ដល់ជីវភាពពួកគាត់
2024.12.11
ទិដ្ឋភាពទន្លេបាទី ស្ថិតនៅឃុំក្រាំងធ្នុង ស្រុកបាទី ខេត្តតាកែវ។
រូប៖ ពលរដ្ឋផ្ដល់ឱ្យ
ពលរដ្ឋដែលរស់នៅជាប់ទន្លេបាទីព្រួយបារម្ភថា ការចាក់ដីលុបផ្នែកខ្លះនៃទន្លេបាទីបានធ្វើឱ្យប៉ះពាល់ដល់ជីវភាពពួកគាត់។ ការលើកឡើងនេះគឺស្របពេលមានឡានដឹកដីជាច្រើនគ្រឿងធ្វើសកម្មភាពចាក់ដីបំពេញ នៅផ្នែកខាងក្រោមនៃទន្លេបាទី ប៉ុន្តែពលរដ្ឋមិនទាន់ដឹងថា ខាងភាគីក្រុមហ៊ុនឯកជនណាមួយ ឬក៏អាជ្ញាធរឡើយដែលចាក់ដីលុបនេះ ។
ស្ថិតនៅខាងក្រោមនៃរមណីយដ្ឋានទន្លេបាទីស្ទើរតែទាំងស្រុងមានស្មៅដុះខ្ចី ហើយផ្ទៃទឹកចាប់ផ្ដើមរីងស្ងួតដោយសារតែរដ្ឋាភិបាលបានបិទទំនប់ទឹកនៅខាងលើ។ ពលរដ្ឋមួយចំនួនកាន់បាវ និងកណ្ដៀវចុះច្រូតស្មៅឱ្យគោក្របីរបស់ពួកគាត់ ហើយពលរដ្ឋខ្លះទៀតកំពុងបង់សំណាញ់យកត្រីចង្វា ត្រីក្រាញ់ និងត្រីអណ្ដែងជាដើមសម្រាប់ធ្វើម្ហូប។
ពលរដ្ឋដែលរស់នៅជាប់ទន្លេបាទីកំពុងច្រូតស្មៅ លោក ជា ប៉ូច ថា ទីតាំងដែលលោកកំពុងច្រូតស្មៅនេះគឺជាទន្លេបាទីដែលមានទឹកពេញកាលពីប៉ុន្មានខែមុន ហើយមានឡានដឹកដីចាក់ដីលុបទន្លេបាទីផ្នែកខាងក្រោមនេះអស់រយៈពេលជាច្រើនខែមកហើយ។ លោកមិនទាន់ដឹងថា ការលុបទន្លេបាទីបានបម្រើផលប្រយោជន៍អ្វីដល់ពលរដ្ឋនោះទេ ប៉ុន្តែលោកព្រួយបារម្ភថា ផ្ទៃទឹកនៃទន្លេបាទីនឹងរួមតូចទៅ ហើយធ្វើឱ្យប៉ះពាល់ប្រភពត្រី សម្រស់នៃផ្ទៃទន្លេបាទី និងការអត្តសញ្ញាណនៃខេត្តតាកែវផងដែរ។
លោក ជា ប៉ូច ៖«រដ្ឋាភិបាល យើងមិនហ៊ានថាមិនហ៊ានអីទេ ព្រោះអីរដ្ឋាភិបាលលោកត្រូវការអភិវឌ្ឍន៍ទៅក្រែងលោថ្ងៃក្រោយវាល្អជាងហ្នឹងទៀតទៅយើងមិនដឹង តែបើអត់ល្អទេ យើងប្រជាជនបង់ខាតច្រើន ត្រីសាច់អីយើងមករកទន្លេបាទីហ្នឹងណា»។
រមណីយដ្ឋានទន្លេបាទីស្ថិតនៅឃុំក្រាំងធ្នង់ ស្រុកបាទី ខេត្តតាកែវ ហើយរមណីយដ្ឋាននេះក៏បានទាក់ទាញភ្ញៀវទេសចរឱ្យមក គយគន់ថ្ងៃលិច និងជិះទូកកម្សាន្តជាដើម។ ទោះជាយ៉ាងណា អតីតលោកនាយករដ្ឋមន្ត្រីកាលពីខែមីនា ឆ្នាំ២០២២ កន្លងទៅបានបានសម្រេចកាត់ឆ្វៀលដីតំបន់ប្រវត្តិសាស្ត្រទន្លេបាទីជាង ២រយហិកតារ (២២២) ប្រគល់ឱ្យបុគ្គលម្នាក់ ឈ្មោះ ស្រ៊ុន ប៊ុនលាភ ដែលស្ថិតនៅឃុំទ្រា ខេត្តកណ្ដាល និងឃុំក្រាំងធ្នង់ខេត្តតាកែវ ប៉ុន្តែអនុក្រឹត្យមិនបានបញ្ជាក់ថា នឹងបុគ្គលរូបនេះនឹងយកដីទៅធ្វើអ្វីនោះឡើយ។ រដ្ឋាភិបាលរក្សាទុកផ្ទៃទឹកទន្លេបាទីត្រឹមតែ៩៧ ហិកតារប៉ុណ្ណោះជាសម្បត្តិរដ្ឋ។
ឡានដឹកដីជាច្រើនគ្រឿងបើកបរកាត់ទន្លេបាទីនេះ ទៅចាក់ដីបំពេញផ្នែកខាងក្រោម។ នៅក្បែរទន្លេបាទី គេក៏ឃើញមានការដាក់លក់ដី ផ្ទះល្វែង និងបុរីជាហូរហែផងដែរ។
ទន្លេបាទីស្ថិតនៅក្បែរភ្នំតាម៉ៅ និងព្រលានយន្តហោះអន្តរជាតិភ្នំពេញថ្មីដែលរដ្ឋាភិបាលគ្រោងនឹងបើកដំណើរការនៅពាក់កណ្ដាលឆ្នាំក្រោយ។ នៅក្បែរទន្លេបាទីក៏មានប្រាសាទតាព្រហ្ម ដែលសាងសង់ឡើងក្នុងរជ្ជកាលព្រះបាទជ័យវរ្ម័នទី៧ និងប្រាសាទយាយពៅដែលកសាងឡើងក្នុងសតវត្សទី១២ ផងដែរ។
ពលរដ្ឋកំពុងបង់សំណាញ់ លោក ចាន់ តឿ លើកឡើងថា លោកតែងមករកត្រីនៅទីនេះនៅថ្ងៃដែលលោកសម្រាកពីការងារជាជាងសំណង់។ លោកបានចំណាយពេលមួយព្រឹកហើយ ប៉ុន្តែលោកនៅតែមិនអាចរកត្រីគ្រប់គ្រាន់សម្រាប់អាហារមួយពេលឱ្យក្រុមគ្រួសារបាននៅឡើយ។
លោក ចាន់ តឿ ថាទន្លេបាទីបានផ្ដល់ផលប្រយោជន៍ដោយផ្ទាល់ដល់ពលរដ្ឋចំនួនពីរស្រុកគឺ កណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ តាមរយៈការធ្វើស្រែ នេសាទត្រី និងរកកម្រៃពីភ្ញៀវទេសចរជាដើម។ លោកសង្ឃឹមថា រដ្ឋាភិបាលអាចនឹងលុបចោលគម្រោងទាំងឡាយណាដែលធ្វើឱ្យប៉ះពាល់ ឬឈានដល់ទន្លេបាទីនេះ។
លោក ចាន់ តឿ៖ «គ្រាន់ថាភាគច្រើនគេមិនចង់ឱ្យលុបបំបាត់ មិនចង់លុបបំបាត់ដើម្បីអី អាហ្នឹងរបស់កេរ្តិ៍ពីដូនតា តែដល់ពេលបច្ចុប្បន្នឥឡូវមិនគិតដូចពីដើមទេ»។
ដោយឡែកសកម្មជនបរិស្ថាន កញ្ញា ធួន ស្រីពៅ លើកឡើងថា ទន្លេបាទីគឺជាសម្បត្តិធនធានធម្មជាតិមួយដែលមិនអាចកាត់ថ្លៃបាន ហើយការកាត់ឆ្វៀលដីតំបន់ប្រវត្តិសាស្ត្រទន្លេបាទីទៅឱ្យបុគ្គលជននេះមិនបានបម្រើផលប្រយោជន៍ដល់ពលរដ្ឋខ្មែរនោះទេ។ ប៉ុន្តែផ្ទុយទៅវិញការកាត់ឆ្វៀលទន្លេបាទីនេះនឹងធ្វើពលរដ្ឋខ្មែរជំនាន់ក្រោយលែងទទួលបានអត្ថប្រយោជន៍បែបនេះតទៅទៀត។
កញ្ញា ធួន ស្រីពៅ៖«ពួកយើងអត់ចង់ឃើញការបំផ្លាញធនធានធម្មជាតិបន្តនៅក្នុងជំនាន់នេះទេ ព្រោះយើងចង់ឱ្យបញ្ឈប់ត្រឹមជំនាន់នេះ យើងអត់ចង់ឱ្យកូនចៅជំនាន់ក្រោយមកដៀលពួកយើងជាយុវជន ដែលជាខ្មែរនៅជំនាន់នេះត្រូវបាត់បង់ធនធានធម្មជាតិ ដែលមិនបន្សល់ទុកដល់កូនចៅជំនាន់ក្រោយនោះទេ»។
ទាក់ទងនឹងករណីនេះអ្នកនាំពាក្យសាលាខេត្តកណ្ដាលលោក ឌឹម បូរ៉ា ថា លោកនៅមិនទាន់ទទួលបានព័ត៌មានអំពីការចាក់ដីលុបផ្ទៃបឹងនៃទន្លេបាទីនៅឡើយទេ។
ចំណែកអភិបាលខេត្តតាកែវ លោក វ៉ី សំណាង ថាលោកនៅមិនទាន់ទទួលបានព័ត៌មានពីការចាក់ដីលុបទន្លេបាទីនៅឡើយដែរ ប៉ុន្តែលោកគ្រោងនឹងជួបជាមួយឈ្មោះ ស្រ៊ុន ប៊ុនលាភ ដើម្បីធានាថា ការអភិវឌ្ឍនឹងមិនប៉ះពាល់ដល់ពលរដ្ឋ និងបរិស្ថាន។
លោក វ៉ី សំណាង៖ «បើមិនទាន់ដឹងគាត់យកអភិវឌ្ឍធ្វើអីផង ផលប្រយោជន៍ពូម៉េចអាចឆ្លើយប្រាប់បាន ពេលខ្ញុំជួបគាត់ ពេលគាត់ឡើងគម្រោង ឡើងអីអាហ្នឹងបានយើងដឹងថា ផលប៉ះពាល់ ឬក៏ផ្នែកសេដ្ឋកិច្ចវារីកចម្រើនយើងម៉េច ផលប៉ះពាល់សង្គម ផលប៉ះពាល់បរិស្ថានយ៉ាងម៉េច»។
រហូតមកដល់ពេលនេះគេនៅមិនទាន់ដឹងថា បុគ្គល ស្រ៊ុន ប៊ុនលាភ ជាអ្នកជំនួញ ឬមន្ត្រីរាជការនៅឡើយទេ។ ប៉ុន្តែកន្លងមក អ្នកស្រុកបាទី ឱ្យដឹងថា បុគ្គល ស្រ៊ុន ប៊ុនលាភ នេះពួកគាត់ធ្លាប់ឮតែឈ្មោះតែប៉ុណ្ណោះ ហើយប្រជាពលរដ្ឋសង្ស័យថា ការចាក់ដីបំពានចូលផ្ទៃទឹកទន្លេបាទី ពីសំណាក់អ្នកមានអំណាចកន្លងមកនេះ អាចមានជាប់ពាក់ព័ន្ធនឹងបុគ្គលរូបនេះនៅពីក្រោយខ្នង។
វិទ្យុអាស៊ីសេរីនៅមិនអាចទាក់ទងសុំការឆ្លើយតប បុគ្គល ស្រ៊ុន ប៊ុនលាភ បានទេ នៅថ្ងៃទី៩ ខែធ្នូ។
នាយកប្រតិបត្តិ នៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថារដ្ឋាភិបាលគួរតែបញ្ឈប់នូវការកាត់ដីអនុប្រយោគឱ្យទៅក្រុមបុគ្គលឯកជនមួយក្រុមដែលមិនបានផ្ដល់ផលប្រយោជន៍ដល់ពលរដ្ឋនោះទេ ប៉ុន្តែពួកគេបែរបំផ្លាញធនធានធម្មជាតិ និងផលប្រយោជន៍សហគមន៍ទៅវិញ។
លោក ហេង គឹមហុង៖ «ហើយបើយើងនាំគ្នាលុបអ៊ីចឹងទៅ ប្រជាពលរដ្ឋគាត់ជាអ្នករងគ្រោះមុនគេ អ៊ីចឹងយើងមានការព្រួយបារម្ភ បន្ទាប់មកគឺរដ្ឋដែលខាតបង់មុនគេដែលខាតបង់ផលប្រយោជន៍សាធារណរបស់ខ្លួនហើយៗ ខាតបង់ផលប្រយោជន៍រដ្ឋទៀត ហើយអ្នកដែលបានពីផលប្រយោជន៍ពីការអភិវឌ្ឍន៍គឺមនុស្សម្នាក់ពីរនាក់ហ្នឹង ដូច្នេះជារឿងមួយដែលយើងមានការព្រួយបារម្ភ ហើយរដ្ឋត្រូវពិចារណាឡើងវិញ»។
អតីតនាយករដ្ឋមន្ត្រី លោក ហ៊ុន សែន និងបច្ចុប្បន្នជាប្រធានព្រឹទ្ធសភាបានកាត់ដីបឹងធម្មជាតិជាច្រើនក្នុងពេលដែលលោកបានកាន់អំណាចជិត៤០ឆ្នាំមកនេះ ទៅឱ្យក្រុមបក្ខពួកដែលជិតស្និទ្ធនឹងលោករួមមានបឹងតាមោក បឹងកក់ និងបឹងទំពន់ នៅរាជធានីភ្នំពេញ។ ក្រៅពីការបំផ្លាញបឹងធម្មជាតិហើយនោះ ពលរដ្ឋបានរងគ្រោះពីការបណ្ដេញចេញ បាត់បង់មុខរបបចិញ្ចឹមជីវិត ហើយពលរដ្ឋខ្លះរងអំពើហិង្សារហូតដល់ជាប់ពន្ធនាគារក៏មានដោយសារសកម្មភាពតស៊ូមតិការពារផ្ទះសម្បែងរបស់ពួកគាត់។ ពលរដ្ឋ និងអ្នកឃ្លាំមើលសង្គមថាដើម្បីបញ្ឈប់ការលុបទន្លេបាទីជោគជ័យបាន ពលរដ្ឋគ្រប់រូបហ៊ានតវ៉ាជាមួយរដ្ឋាភិបាលដូចជាករណីសួនសត្វភ្នំតាម៉ៅជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
