ប្រជាសហគមន៍ភូមិឡុំ នៅខេត្តរតនគីរី តាមព្រំដែនកម្ពុជា-វៀតណាមអះអាងថា ក្រុមឈ្មួញកំពុងសម្រុកចូលកាប់ និងដឹកជញ្ជូនឈើ ចេញពីតំបន់ព្រៃការពារ និងព្រៃសហគមន៍ភូមិឡុំ យកទៅលក់នៅប្រទេសវៀតណាមដោយសេរីជារៀងរាល់ថ្ងៃ។ ចំណែកអាជ្ញាធរពាក់ព័ន្ធនៅតំបន់នោះវិញ មិនបានចុះទប់ស្កាត់នោះទេ ទោះបីពួកគេស្នើទៅអាជ្ញាធរជាច្រើនសាយ៉ាងណាក្ដី។
ប្រជាសហគមន៍ភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី អះអាងថា ក្រុមឈ្មួញបានលួចចូលទៅកាប់និងដឹកជញ្ជូនឈើ នៅក្នុងតំបន់ព្រៃសហគមន៍ភូមិឡុំ និងតំបន់ការពារផ្សេងទៀត យកទៅលក់នៅប្រទេសវៀតណាមដោយសេរី និងមិនឃើញមានអាជ្ញាធរពាក់ព័ន្ធចុះទប់ស្កាត់បទល្មើសព្រៃឈើ និងមិនមានវិធានការច្បាប់ទៅលើក្រុមឈ្មួញនោះទេ។ ក្រុមឈ្មួញបានកាប់ប្រភេទឈើកម្រមានតម្លៃ ដូចជា សុក្រំ ស្រឡៅ គគីរ និងផ្ចឹក។
សហគមន៍បន្តថា ពួកគេបានស្នើទៅអាជ្ញាធរពាក់ព័ន្ធឲ្យជួយចុះទប់ស្កាត់បទល្មើសព្រៃឈើ ប៉ុន្តែអាជ្ញាធរពាក់ព័ន្ធមិនបានអើពើចុះជួយទប់ស្កាត់សហគមន៍នោះទេ ផ្ទុយទៅវិញសហគមន៍រងការគំរាមកំហែងពីសំណាក់ក្រុមជនល្មើសនិងអាជ្ញាធរដែលជាប់ពាក់ព័ន្ធរកស៊ីឈើតំបន់នោះ។
ប្រធានសហគមន៍ព្រៃឈើភូមិឡុំ លោក សល់ ញុង អះអាងប្រាប់វិទ្យុអាស៊ីសេរីនៅថ្ងៃទី៣០ ខែធ្នូ ថា សកម្មភាពកាប់ និងដឹកជញ្ជូនឈើយកទៅលក់នៅប្រទេសវៀតណាម កាន់តែកើតមានខ្លាំងឡើង ដោយមិនឃើញមានសមត្ថកិច្ចពាក់ព័ន្ធចុះទប់ស្កាត់នោះទេ ។ លោកបន្តថា ក្រុមឈ្មួញតែងតែលួចចូលទៅកាប់ឈើនៅក្នុងព្រៃសហគមន៍របស់លោក ហើយសហគមន៍ពិបាកក្នុងការទប់ស្កាត់បទល្មើស ព្រោះជនល្មើសខ្លះមានអាវុធកែច្នៃដាក់តាមខ្លួន ចំណែកអាជ្ញាធរមូលដ្ឋាននៅតំបន់នោះ មិនព្រមសហការជាមួយសហគមន៍ដើម្បីចុះល្បាត និងទប់ស្កាត់បទល្មើសឡើយ។
លោក សល់ ញុង ៖ «គេចាំយកលុយ ប៉ូលិស ប៉ូលិសព្រំដែនខ្លះមកចាំនៅភូមិ ខ្លះថាខ្លួនវាកាសែតដែរយកលុយដែរ នឹងហើយដែលខ្ញុំទប់អត់ឈ្នះ សំណូមពរឲ្យរដ្ឋាភិបាលចុះជួយរាល់ថ្ងៃ»។
ស្រដៀងគ្នានេះដែរ ប្រជាពលរដ្ឋម្នាក់ សុំមិនបញ្ចេញឈ្មោះ ដោយព្រួយបារម្ភពីសុវត្ថិភាព ឲ្យដឹងថា ក្រុមឈ្មួញបានដឹកជញ្ជូនឈើឆ្លងកាត់ព្រំដែនច្រកភ្នំក្រហម ដែលមានប៉ុស្តិ៍វារៈការពារព្រំដែនគោកប្រចាំការនៅទីនោះ និងមិនអនុញ្ញាតឲ្យពលរដ្ឋធម្មតាចេញចូលឡើយ ក្រៅពីក្រុមឈ្មួញដឹកឈើទៅលក់នៅប្រទេសវៀតណាម។
ពលរដ្ឋម្នាក់ថ្លែងលាក់ឈ្មោះ៖ «ដឹងពេលថ្ងៃពេលយប់ មិនថាយប់មិនថាថ្ងៃ ឈើមួយថ្ងៃៗមាន៥០ទៅ១០០គ្រឿងម៉ូតូ ដឹកឈើអ៊ីចឹងណា រលូនហ្មងឥឡូវដូចថា ដូចថា នៅព្រំដែនគេដឹងទៅដូចថា របស់អ្វីដែលយើងថាខុសច្បាប់ហើយ ដឹងថាដល់ប្រទេសវៀតណាមហើយ បងឯងគិតមើលទៅ វាយ៉ាងម៉េច»។
ជុំវិញរឿងនេះ វិទ្យុអាស៊ីសេរីមិនអាចទាក់ទង អភិបាលខេត្តរតនគីរី លោក ញ៉ែម សំអឿន និងអភិបាលស្រុកអូរយ៉ាដាវ លោក ម៉ា វិចិត្រ ដើម្បីសុំការអត្ថាធិប្បាយបានទេ នៅថ្ងៃទី៣០ ខែធ្នូ ដោយទូរស័ព្ទចូលគ្មានអ្នកទទួល។
ទាក់ទិននឹងបញ្ហានេះ អ្នកស្រាវជ្រាវនិងឃ្លាំមើលធនធានធម្មជាតិនៅកម្ពុជា លោក សេង សុខហេង សង្កេតឃើញថា សកម្មភាពកាប់និងដឹកជញ្ជូនឈើចេញពីប្រទេសកម្ពុជាយកទៅលក់នៅប្រទេសវៀតណាមនៅតែបន្តកើតមាន ដោយសារតែមន្ត្រីពាក់ព័ន្ធនៅតំបន់នោះគប់គិតគ្នាជាមួយឈ្មួញ ទើបការរត់ពន្ធឈើឆ្លងដែនបាន។
លោក សេង សុខហេង៖ «មន្ត្រីពាក់ព័ន្ធនិងអាជ្ញាធរពាក់ព័ន្ធមួយចំនួននឹងគឺទទួលបានផលប្រយោជន៍អំពីបទល្មើសព្រៃឈើ ពីការធ្វើពាណិជ្ជកម្មឈើឆ្លងដែន អ៊ីចឹងហើយបានជាដឹកជញ្ជូនឈើ វានៅតែរលូនព្រោះថាបើសិនជាអាជ្ញាធរ ឬក៏សមត្ថកិច្ចគាត់មិនបានបើកភ្លើងខៀវ មិនបានផ្ដល់ឱកាសមិនបានជួយសម្រួលទេ វាមិនអាចធ្វើឲ្យការដឹកជញ្ជូនឈើ នឹងទៅក្រៅយ៉ាងរលូននោះទេ»។
ព្រៃសហគមន៍ភូមិឡុំ ស្ថិតនៅភូមិឡុំ ឃុំប៉ក់ញ៉ៃ ស្រុកអូរយ៉ាដាវ ដែលមានផ្ទៃដីជាង ៨ពាន់ហិកតារជាប់ព្រំដែនកម្ពុជា-វៀតណាម បច្ចុប្បន្នព្រៃសហគមន៍មួយនេះ ត្រូវបានសហគមន៍ជនជាតិដើមភាគតិចចារាយពឹងអាស្រ័យ ដោយសហគមន៍តែងតែចូលទៅរកអនុផលព្រៃឈើនៅទីនោះចាប់តាំងពីឆ្នាំ២០១១មកម្ល៉េះ។
សហគមន៍ទទូចទៅរដ្ឋាភិបាល ត្រូវចាត់ឲ្យអាជ្ញាធរថ្នាក់ជាតិចុះទប់ស្កាត់ និងស្រាវជ្រាវស្វែងរកអ្នកដែលជាប់ពាក់ព័ន្ធយកមកផ្ដន្ទាទោសទៅតាមច្បាប់ បើពុំដូច្នោះទេពួកគេថា ព្រៃឈើដែលនៅជាប់ព្រំប្រទល់ កម្ពុជា-វៀតណាមនឹងរងវិនាសហិនហោចជាក់ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។