សកម្មជន​បរិស្ថាន​រិះគន់​រដ្ឋាភិបាល​កាត់​ដី​ឧទ្យានជាតិ​សមុទ្រ​ព្រះសីហនុ​រាម​ឱ្យទៅ​ក្រុមហ៊ុន​ចិន​ចំនួន​៤

ដោយ នៅ វណ្ណារិន
2023.10.16
សកម្មជន​បរិស្ថាន​រិះគន់​រដ្ឋាភិបាល​កាត់​ដី​ឧទ្យានជាតិ​សមុទ្រ​ព្រះសីហនុ​រាម​ឱ្យទៅ​ក្រុមហ៊ុន​ចិន​ចំនួន​៤ សកម្មជន​បរិស្ថាន​ចលនា​មាតាធម្មជាតិ កញ្ញា មាន លីសា ថ្លែង​ក្នុង​យុទ្ធនាការ​​ដាក់​កោះកុង​ក្រៅ​ជា​ឧទ្យាន​ជាតិ​សមុទ្រ កាលពីថ្ងៃទី៩ មេសា ២០២៣។
រូប៖ ពលរដ្ឋផ្ដល់ឱ្យ

សកម្មជន​បរិស្ថាន​រិះគន់​រដ្ឋាភិបាល​ដែល​កាត់​ឆ្វៀល​ដី​នៅ​តំបន់​ឧទ្យានជាតិ​សមុទ្រ​ព្រះសីហនុ​រាម​ប្រមាណ​ជាង ២៦​ហិកតារ​ឱ្យទៅ​ក្រុមហ៊ុន​ចិន​ចំនួន​៤ ដើម្បី​ធ្វើជា​កន្លែង​ទេសចរណ៍។ ពួកគាត់​សង្កេត​ឃើញ​ថា គម្រោង​វិនិយោគ​ភាគច្រើន​មិនបាន​ផ្ដល់​ផលប្រយោជន៍​ដល់​ពលរដ្ឋ​នៅ​មូលដ្ឋាន​នោះ​ទេ ផ្ទុយ​វិញ​គឺជា​ការ​ផ្ដល់​សិទ្ធិអំណាច​ឱ្យ​ក្រុមហ៊ុន​ឯកជន​បំផ្លាញ​ធនធាន​ជាតិ​ធម្មជាតិ ។

សកម្មជន​បរិស្ថាន​សោកស្ដាយ​ដែល​រដ្ឋាភិបាល​នៅតែ​កាត់​ដី​ឧទ្យានជាតិ​ដែល​ការពារ​ដោយ​ច្បាប់​សម្រាប់​ការពារ​ដែន​ធម្មជាតិ​និង​ប្រព័ន្ធ​អេកូឡូស៊ី ដើម្បី​ទុកជា​ប្រយោជន៍​ឲ្យ​មនុស្ស​គ្រប់​ជំនាន់​នោះ​ឱ្យទៅ​ក្រុមហ៊ុន​ឯកជន​ជា​បន្តបន្ទាប់។

ការ​លើកឡើង​នេះ​គឺ​បន្ទាប់ពី​អតីត​នាយករដ្ឋមន្ត្រី​លោក ហ៊ុន សែន បាន​ចេញ​អនុក្រឹត្យ​កាល​ពី​ថ្ងៃទី​៣០ ខែ​ឧសភា ឆ្នាំ​២០២៣ កាត់​ឆ្វៀល​ដី​ឧទ្យានជាតិ​សមុទ្រ​ព្រះសីហនុរាម ទំហំ​ជាង ២៦​ហិកតារ​(២៦.៥០) ស្ថិតនៅ​ឃុំ​រាម ស្រុក​ព្រៃនប់ ខេត្ត​ព្រះសីហនុ ឱ្យទៅ​ក្រុមហ៊ុន​ចិន​ចំនួន​៤​រួមមាន​ក្រុមហ៊ុន​ស៊ុយ គួ លែន (Shuiku land Co.,LTD) ក្រុមហ៊ុន​ស៊ីណូរាមលែន (Sinoream land) ក្រុមហ៊ុន​កូហ្វូហ្វលែន (Kofuf land) និង​ក្រុមហ៊ុន​អ៊ីជៀនជួយទិ (Yijianzhuidi )។ក្នុងចំណោម​ក្រុមហ៊ុន​ចិន​ចំនួន ៤​នេះ​មាន​ក្រុមហ៊ុន​ចំនួន ៣ គ្រប់គ្រង​ដោយ​ថៅកែ​ជា​ជនជាតិ​ចិន​ឈ្មោះ វ៉ាងយីងសៀន (Wang yingxian ) និង​ឪឈឹងស៊ៀវ (Ou Chengxiao)

អនុក្រឹត្យ​ដែល​វិទ្យុ​អាស៊ីសេរី ទើប​ទទួល​បាន​នៅ​ថ្ងៃទី​១៥ ខែ​តុលា បង្ហាញ​ថា លោក ហ៊ុន សែន កាត់​ដី​ឧទ្យាន​ជាតិ​សមុទ្រ​ព្រះសីហនុ​រាម​ក្រុមហ៊ុន​ឯកជន​ទាំង​៤​នេះ ដើម្បី​យក​ទីនោះ​ធ្វើ​ជា​កន្លែង​ទេសចរណ៍។

ក្រុមហ៊ុន​នីមួយៗ​ទទួល​បាន​ដី​ចន្លោះ​ពី ៦​ហិកតារ ទៅ​ដល់ ៧​ហិកតារ ក្នុង​តំបន់​ប្រើប្រាស់​ដោយ​ចិរភាព​នៃ​ឧទ្យាន​ជាតិ​សមុទ្រ​ព្រះសីហនុ​រាម​នេះ​ក្រោម​ការចាត់ចែង​របស់​ក្រសួងបរិស្ថាន។

សកម្មជន​ចលនា​មាតា​ធម្មជាតិ​កញ្ញា មាន លីសា ប្រាប់​វិទ្យុ​អាស៊ីសេរី​នៅ​ថ្ងៃទី​១៥ តុលា ថា កញ្ញា​ព្រួយបារម្ភ​ចំពោះ​គម្រោង​វិនិយោគ​នៅ​តំបន់​ឧទ្យាន​ជាតិ​សមុទ្រ​រាម​នេះ នឹង​បំផ្លាញ​ជីវចម្រុះ និង​ប្រព័ន្ធ​អេកូ​ទេសចរណ៍​ធម្មជាតិ។

កញ្ញា មាន លីសា៖ «អ្វី​ដែល​រដ្ឋ​អាច​ធ្វើ​បាន គឺ​បង្ហាញ​ពី​ភាព​ស្អាតស្អំ​របស់​ខ្លួន​ឯង ជាមួយ​ក្រុមហ៊ុន​ឯង​ជន​ទាំង​៤​ហ្នឹង​ក្នុង​ការ​បង្ហាញ​ថា ការ​អភិវឌ្ឍ​ពិតជា​ការអភិវឌ្ឍ​បែប​អេកូ​ទេសចរណ៍​និង​ប៉ះពាល់​ទៅ​ប្រជាពលរដ្ឋ និង​បរិស្ថាន​នៅ​ទីនោះ និង​សូម​បង្ហាញថា ក្រុមហ៊ុន​ទាំង​៤​ហ្នឹង​អាច​អភិវឌ្ឍន៍​បែប​អេកូ​ទេសចរណ៍ និង​ជា​គំរូ​ដល់​ការ​អភិវឌ្ឍ​ក្រោយៗ​ទៀត»

វិទ្យុ​អាស៊ីសេរី​មិន​អាច​ទាក់ទង​អភិបាល​ខេត្ត​ព្រះសីហនុ​លោក គួច ចំរើន និង​អ្នកនាំពាក្យ​ក្រសួងបរិស្ថាន​លោក ផៃ ប៊ុនឈឿន បាន​ទេ​នៅ​ថ្ងៃទី​១៥ តុលា។

ជុំវិញ​បញ្ហា​នេះ​មន្ត្រី​សម្របសម្រួល​គម្រោង​នៃ​សមាគម​បណ្ដាញ​យុវជន​កម្ពុជា (CYN) លោក អូត ឡាទីន មាន​ប្រសាសន៍​ថា ការ​កាត់​ដី​នៅ​តំបន់​ឧទ្យាន​ជាតិ​សមុទ្រ​រាម​ឱ្យទៅ​ក្រុមហ៊ុន​ឯកជន​កាន់កាប់​មិនមែន​ជា​ការ​ផ្ដល់​ផលប្រយោជន៍ ឬ​ការ​លើក​កម្ពស់​ជីវភាព​ពលរដ្ឋ​ដែល​រស់នៅ​ក្បែរ​តំបន់​នោះ​ទេ។ លោក​សង្កេត​ឃើញ​ថា រដ្ឋាភិបាល​ចាស់ និង​រដ្ឋាភិបាល​ថ្មី​ហាក់​បរាជ័យ​ក្នុង​ការ​ការពារ​ព្រៃឈើ និង​សម្បត្តិ​ធម្មជាតិ​ដែល​ធ្វើ​ឱ្យ​ធនធាន​ទាំងនោះ​កាន់តែ​សឹករិចរិល។

លោក អូត ឡាទីន៖ «ការ​បន្ត​ការ​ផ្ដល់​ដី​សម្បទាន​ទៅ​ក្រុមហ៊ុន​ឯកជន នៅក្នុង​ស្ថានភាព​បែបនេះ​ក្នុង​កាលៈទេសៈ​នេះ ខ្ញុំ​គិត​ថា រដ្ឋាភិបាល​គួរតែ​ធ្វើការ​ពិចារណា​ឡើងវិញ​ធ្វើ​យ៉ាងណា​ជំរុញ​ឱ្យ​មាន​ការ​អភិវឌ្ឍ​​ហើយ​សហគមន៍​ជា​អ្នកដឹកនាំ​ហើយដោយ​រដ្ឋាភិបាល​ជា​អ្នកធ្វើ​ជាមួយ​សហគមន៍​ផ្ដល់​ការ​គាំទ្រ​គ្រប់បែបយ៉ាង​ទាំង​ជំនួយ​បច្ចេកទេស​ធនធានមនុស្ស ធនធាន​ហិរញ្ញវត្ថុ​ហើយ​ធ្វើ​កិច្ច​ការងារ​ជាមួយ​អាជ្ញាធរ​ខ្ញុំ​គិតថា​ធ្វើ​របៀប​នេះ វា​មាន​និរន្តរភាព​ហើយ​ពលរដ្ឋ​គាត់​អាច​ទទួល​បាន​ចំណូល​ផង»

កាលពី​ឆ្នាំ​២០១៩ ក្រុមហ៊ុន​ដែល​ទទួល​បាន​សិទ្ធិ​វិនិយោគ​កន្លែង​ទេសចរណ៍​នៅ​តំបន់​ឧទ្យាន​ជាតិ​សមុទ្រ​រាម​នេះ ធ្លាប់​មាន​ប្រវត្តិ​រំលោភ​យក​ដី​ប្រជាពលរដ្ឋ​ប្រមាណ​ជិត​២០០​គ្រួសារ​នៅ​ស្រុក​ព្រៃនប់​ដែល​ធ្វើ​ឱ្យ​ប៉ះពាល់​ដី​ធ្វើស្រែ​ចម្ការ​របស់​ពួកគាត់​រាប់​សិប​ហិកតារ។

ឧទ្យាន​ជាតិ​ព្រះសីហនុ​«​រាម​» ឬ​ក្រោយ​មក​កែប្រែ​ទៅជា​ឧទ្យាន​ជាតិ​សមុទ្រ​ព្រះសីហនុ​រាម​បាន​ចុះបញ្ជី​ជា​តំបន់​អភិរក្ស​ដោយ​ព្រះរាជក្រឹត្យ​ព្រះបាទ​នរោត្តម សីហនុ កាលពី​ឆ្នាំ​១៩៩៣ ដែល​មាន​ផ្ទៃដី​ជិត​៤​ម៉ឺន​ហិកតារ​។ កន្លងទៅ​អាជ្ញាធរ​ខេត្ត​ព្រះសីហនុ​ធ្លាប់​រង​ការរិះគន់​ពី​សកម្មជន​បរិស្ថាន​និង​មន្ត្រី​ការពារ​បរិស្ថាន​ថា បណ្ដែតបណ្ដោយ​ឱ្យ​ក្រុម​ឈ្មួញ​អចលនទ្រព្យ​លុប​ដី​ឆ្នេរ​ឧទ្យាន​ជាតិ​ព្រះសីហនុ​រាម ដើម្បី​ពុះ​ដី​ឡូត៍​លក់ ដែល​ធ្វើ​ឱ្យ​ប៉ះពាល់​ដល់​ជីវចម្រុះ និង​ប្រព័ន្ធ​អេកូឡូស៊ី​ក្នុង​តំបន់ឆ្នេរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ពលរដ្ឋ​ខ្មែរ​នៅ​អូស្ត្រាលី​ធ្វើ​បាតុកម្ម​ទាមទារ​ឱ្យ​មេដឹកនាំ​កម្ពុជា​ស្ដារ​ប្រជាធិបតេយ្យ​និង​គោរព​សិទ្ធិ​មនុស្ស
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។