សកម្មជន​បរិស្ថាន​ជំរុញ​ឱ្យ​អាជ្ញាធរ​​អនុវត្ត​ច្បាប់​តឹងរ៉ឹង​លើ​កាស៊ីណូ​ចិន​មួយ​កន្លែង​នៅ​កោះ​រ៉ុង​សន្លឹម ដែល​ប្រព្រឹត្ត​ល្មើស​ច្បាប់

ដោយ សេក បណ្ឌិត
2019-05-06
អ៊ីម៉ែល
មតិ
Share
បោះពុម្ព
មជ្ឈមណ្ឌល​កម្សាន្ត ជីនទីង (JINDING) នៅ​ភូមិ​កោះ​រ៉ុង​សន្លឹម សង្កាត់​កោះរ៉ុង​សន្លឹម ក្រុង​ព្រះសីហនុ ដែល​អាជ្ញាធរ​ខេត្ត​ព្រះសីហនុ​ឲ្យ​បិទ​អាជីវកម្ម​របស់​ខ្លួន​ជា​កំហិត នៅ​ថ្ងៃ​ទី២២ ខែ​មីនា ឆ្នាំ២០១៩។
មជ្ឈមណ្ឌល​កម្សាន្ត ជីនទីង (JINDING) នៅ​ភូមិ​កោះ​រ៉ុង​សន្លឹម សង្កាត់​កោះរ៉ុង​សន្លឹម ក្រុង​ព្រះសីហនុ ដែល​អាជ្ញាធរ​ខេត្ត​ព្រះសីហនុ​ឲ្យ​បិទ​អាជីវកម្ម​របស់​ខ្លួន​ជា​កំហិត នៅ​ថ្ងៃ​ទី២២ ខែ​មីនា ឆ្នាំ២០១៩។
រូប៖ Screenshot from video of Mother Nature Cambodia

អ្នក​ការពារ​​បរិស្ថាន ជំរុញ​ឱ្យ​អាជ្ញាធរ​ព្រះសីហនុ​ចាត់​វិធានការ​តាម​ផ្លូវ​ច្បាប់​ទៅ​លើ​​មជ្ឈមណ្ឌល​កម្សាន្ត​ចិន​មួយ​កន្លែង​នៅ​លើ​កោះ​រ៉ុង​សន្លឹម ដែល​បន្ត​​ធ្វើ​អាជីវកម្ម​ ផ្គើន​នឹង​បទ​បញ្ជា​របស់​អាជ្ញាធរ។ អាជ្ញាធរ​ខេត្ត​ព្រះសីហនុ​បញ្ជាក់​ថា នឹង​អនុវត្ត​ច្បាប់​លើ​​ទីតាំង​អាជីវកម្ម​នោះ។

សកម្មជន​បរិស្ថាន លោក ម៉េង ហេង ថ្លែង​ថា អាជ្ញាធរ​ខេត្ត​ព្រះសីហនុ​មិន​ចាំបាច់​ចំណាយ​ពេល​វេលា​ចុះ​ទៅ​ត្រួតពិនិត្យ​មជ្ឈមណ្ឌល​កម្សាន្ត ជីន ទីង (JINGDING) ទៀត​ទេ ព្រោះ​ទីតាំង​អាជីវកម្ម​មួយ​នេះ​មិន​បាន​គោរព​តាម​សេចក្ដី​ជូន​ដំណឹង​របស់​អាជ្ញាធរ​នោះ​ឡើយ​។ លោក​បន្ត​ថា សណ្ឋាគារ និង​កាស៊ីណូ​ចិន​មួយ​កន្លែង​នេះ នៅ​តែ​បើក​ដំណើរការ​ដូច​ធម្មតា មិន​បាន​បិទ​អាជីវកម្ម​ឡើយ​ ហេតុ​ដូច្នេះ​លោក​ថា ​អាជ្ញាធរ​ខេត្ត​ព្រះសីហនុ​ដល់​ពេល​ត្រូវ​​យក​ច្បាប់​មក​ប្រើ​ហើយ៖ «ប្រសិន​បើ​ដឹង​ថា មជ្ឈមណ្ឌល​ហ្នឹង​ខុស​ច្បាប់​ហើយ មិន​អាច​ចុះ​ទៅ​ពិនិត្យ​បាន​ទៀត​ទេ គឺ​មាន​តែ​បញ្ជា​ពី​ថ្នាក់​លើ​ទៅ ឱ្យ​អាជ្ញាធរ​មូលដ្ឋាន​ធ្វើ​ការ​បិទ​ចោល​តែ​ម្តង។ អា​ហ្នឹង​បើ​តាម​ផ្លូវ​ច្បាប់»

កាល​ពី​ខែ​មីនា​កន្លងទៅ អាជ្ញាធរ​ខេត្ត​ព្រះសីហនុ​បាន​ប្រកាស​បិទ​មជ្ឈមណ្ឌល​កម្សាន្ត ជីន ទីង ក្រោម​ហេតុ​ផល​ថា ទីតាំង​អាជីវកម្ម​នោះ​មិន​បាន​អនុវត្ត​ត្រឹម​ត្រូវ​តាម​ច្បាប់ និង​បង្ក​ផល​ប៉ះពាល់​ដល់​បរិស្ថាន​តំបន់​ឆ្នេរ។ សកម្ម​ភាព​ល្មើស​ច្បាប់​​ទាំង​នោះ​រួមមាន ការ​បង្ហូរ​ទឹក​កខ្វក់​ចូល​ក្នុង​​សមុទ្រ​ដោយ​មិន​បាន​ឆ្លង​កាត់​ការ​ចម្រោះ ការ​សាងសង់​ទីតាំង​កាស៊ីណូ​រំលោភ​លើ​ដី​ឆ្នេរ​សមុទ្រ ​ការ​ដាក់​ម៉ាស៊ីន​ភ្លើង​នៅ​លើ​ផែ​ធ្វើ​ឱ្យ​មាន​ប្រេង​ហូរ​ចូល​សមុទ្រ​ប៉ះពាល់​ដល់​បរិស្ថាន និង​ការ​ចាក់​ធុងបាស​ខ្លាំង​បង្ក​ការ​រំខាន​ដល់​ពលរដ្ឋ​ និង​ភ្ញៀវ​ទេសចរ។ ម្យ៉ាង​វិញ​ទៀត មជ្ឈមណ្ឌល​កម្សាន្ត​ចិន​មួយ​នេះ បាន​ប្រើប្រាស់​អាជ្ញាប័ណ្ណ​ល្បែង​ភ្នាល់​អនឡាញ​ដែល​ហួស​សុពល​ភាព និង​មាន​ករណី​បាញ់​បោះ​ហិង្សា ​ប្រព្រឹត្ត​ដោយ​អ្នក​គ្រប់​គ្រង​សន្តិសុខ​នៅ​ទីនោះ​ទៀត​ផង។

អាជ្ញាធរ​តម្រូវ​ឱ្យ​ម្ចាស់​មជ្ឈមណ្ឌល​កម្សាន្ត​ចិន​​មួយ​នេះ បិទ​អាជីវកម្ម​របស់​ខ្លួន​ជា​កំហិត​ ត្រឹម​ថ្ងៃ​ទី២២ មីនា កន្លង​ទៅ។ ក៏​ប៉ុន្តែ​សកម្មជន​បរិស្ថាន ​អះអាង​ថា មក​ដល់​ពេល​នេះ មជ្ឈមណ្ឌល​កម្សាន្ត​នេះ​នៅ​តែ​អាច​បើក​ដំណើរការ​ដដែល។

អាស៊ី​សេរី​មិន​អាច​ទាក់ទង​ម្ចាស់​មជ្ឈមណ្ឌល​កម្សាន្ត ជីន ទីង ដើម្បី​សុំ​ការ​បំភ្លឺ​អំពី​បញ្ហា​នេះ​បាន​ទេ គិត​ត្រឹម​ម៉ោង​ផ្សាយ​នេះ។

អ្នក​នាំ​ពាក្យ​សាលា​ខេត្ត​ព្រះសីហនុ លោក ឃាង ភារម្យ អះអាង​ថា រដ្ឋបាល​ខេត្ត​បាន​ដឹង​ពី​ព័ត៌មាន​​នេះ​ហើយ។ លោក​ថា ការ​ធ្វើ​បែបនេះ​ គឺ​ជា​ការ​ផ្គើន​នឹង​បទ​បញ្ជា​របស់​អាជ្ញាធរ ហើយ​អាជ្ញាធរ​នឹង​មាន​ចំណាត់​ការ​តឹងរ៉ឹង​ទៅ​លើ​ទីតាំង​អាជីវកម្ម​នោះ។ លោក​បន្ត​ថា ជំហរ​របស់​រដ្ឋបាល​ខេត្ត​ព្រះសីហនុ គឺ​មិន​គាំទ្រ​សកម្មភាព​ល្មើសច្បាប់​របស់​ទីតាំង​អាជីវកម្ម​ណាមួយ​ឡើយ៖ «គាត់​ធ្វើ​នៅ​លើ​ឆ្នេរ សំណង់​ហ្នឹង ដែល​មិន​មាន​ការ​ឯកភាព​ពី​រដ្ឋបាល​ខេត្ត​តាំង​ពី​ដើម​ទី អ៊ីចឹង​ការ​ដែល​គាត់​ផ្គើន​ជា​បន្ត​បន្ទាប់​ហ្នឹង អា​ហ្នឹង​ហើយ​ដែល​គេ​ត្រូវ​កសាង​សំណុំ​រឿង។ គាត់​មិន​អនុវត្ត​តាម​ការ​ណែនាំ​ ល្មើស​ច្បាប់ ហើយ​នៅតែ​បន្ត​ភាព​ល្មើស​ច្បាប់​ហ្នឹងហើយ ដែល​នឹង​ត្រូវ​ប្រឈម​មុខ​ចំពោះ​ផ្លូវ​ច្បាប់​ធ្ងន់ធ្ងរ»

ទោះ​ជា​យ៉ាង​ណា អ្នក​នាំ​ពាក្យ​រូប​នេះ​មិន​ទាន់​អាច​បញ្ជាក់​ពី​ពេល​វេលា​ពិត​ប្រាកដ​នៃ​ការ​ចាត់​វិធានការ​តាម​ច្បាប់​ទៅលើ​មជ្ឈមណ្ឌល​កម្សាន្ត​ ជីន ទីង នេះ​នៅឡើយ​ទេ។

សកម្មជន​បរិស្ថាន​លោក ម៉េង ហេង សង្ស័យ​ថា ការ​ដែល​មជ្ឈមណ្ឌល​កម្សាន្ត​ចិន​មួយ​កន្លែង​នេះ នៅ​តែ​អាច​បើក​ដំណើរ​ការ​បាន​ ទំនងជា​ដោយ​សារ​មាន​អ្នក​នៅ​ក្រោយ​ខ្នង​ជួយ​សម្របសម្រួល​រឿង​នេះ ឬ​ក៏​មាន​ពាក់ព័ន្ធ​ដោយ​ផ្ទាល់​ទៅ​នឹង​អំពើ​ពុករលួយ។ យុវជន​រូប​នេះ​សង្កត់​ធ្ងន់​ថា ប្រសិន​បើ​មជ្ឈមណ្ឌល​កម្សាន្ត​នេះ​នៅ​តែ​បន្ត​ធ្វើ​អាជីវកម្ម​ លោក​នឹង​ធ្វើ​បណ្តឹង​បរិហារ​ដាក់​ទៅ​តុលាការ​ខេត្ត​ព្រះសីហនុ ជុំវិញ​ការ​មិន​អនុវត្ត​ច្បាប់​របស់​អាជ្ញាធរ៖ «ស្រុក​ខ្មែរយើង​ ខ្មៅ​ទៅ​ជា​ស ល្អ​ទៅ​ជា​អាក្រក់ ហើយ​ជាមួយ​គ្នា​នេះ ខុស​ច្បាប់​ទៅ​ជា​ស្រប​ច្បាប់ អ៊ីចឹង​បាន​ន័យ​ថា មជ្ឈមណ្ឌល​កម្សាន្ត ជីន ទីង ហ្នឹង ប្រហែល​ជា​មាន​គេ​កាង​នៅ​ពី​ក្រោយ​ខ្នង ដើម្បី​ឱ្យ​អាជីវកម្ម​មួយ​ហ្នឹង​ពី​ខុស​ច្បាប់​ទៅ​ស្រប​ច្បាប់ ហើយ​វា​ពាក់ព័ន្ធ​នឹង​អំពើ​ពុក​រលួយ​ផ្សេងៗ ទៀត»

ក្រុម​អ្នក​ការពារ​បរិស្ថាន​នៅ​តែ​រិះគន់​ថា អាជ្ញាធរ​ខេត្ត​ព្រះសីហនុ ហាក់​ដូច​ជា​អសមត្ថភាព​ក្នុង​ការ​គ្រប់​គ្រង និង​អនុវត្ត​ច្បាប់​លើ​ក្រុមហ៊ុន​ចិន ដែល​ប្រព្រឹត្ត​ល្មើស​ច្បាប់​កម្ពុជា។ ពួក​គេ​បន្ត​ថា ​ការ​កៀរគរ​អ្នក​វិនិយោគ​ចិន ឱ្យ​មក​បណ្ដាក់​ទុន​រក​ស៊ី​​នៅ​ខេត្ត​ព្រះសីហនុ ដាច់ខាត​ត្រូវ​តែ​ឈរ​លើ​គោលការណ៍​ច្បាប់​ជា​ធំ ហើយ​ករណី​មជ្ឈមណ្ឌល​កម្សាន្ត ជីង ទីង នេះ អាជ្ញាធរ​ត្រូវ​តែ​ហ៊ាន​ធ្វើ​តាម​ច្បាប់ ដើម្បី​ជា​គំរូ​ដល់​ទីតាំង​អាជីវកម្ម​ដទៃ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល