កម្ពុជា​នឹង​បន្ត​ជួប​ព្យុះ​២​បន្ថែម​ទៀត ដែល​បង្ក​ជា​ជំនន់​ទឹកភ្លៀង​លិច​ខេត្ត​មួយ​ចំនួន​ទៀត

ដោយ ហេង រស្មី
2020-10-10
អ៊ីម៉ែល
មតិ
Share
បោះពុម្ព
ស្ថានភាព​ទឹក​ជំនន់ នៅ​ខេត្ត​បាត់​ដំបង កាល​ពី​ថ្ងៃ​ទី៩ ខែ​តុលា ឆ្នាំ​២០២០។
ស្ថានភាព​ទឹក​ជំនន់ នៅ​ខេត្ត​បាត់​ដំបង កាល​ពី​ថ្ងៃ​ទី៩ ខែ​តុលា ឆ្នាំ​២០២០។
រូប​រដ្ឋបាល​ខេត្ត​បាត់ដំបង

ក្រសួង​ធនធាន​ទឹក​ប្រកាស​ថា កម្ពុជា​នឹង​បន្ត​ជួប​ព្យុះ ២​បន្ថែម​ទៀត ដែល​បង្ក​ឲ្យ​មាន​ជំនន់​ទឹកភ្លៀង​លិច​តំបន់​មួយ​ចំនួន​ទៀត​នៅ​បណ្ដា​ខេត្ត​ពាយ័ព្យ និង​ភាគ​ខាងជើង ស្ថិតនៅ​តំបន់​ភ្នំ​។ អាជ្ញាធរ​ខេត្ត​មួយ​ចំនួន​បាន​ជម្លៀស​ពលរដ្ឋ សត្វ​ចិញ្ចឹម និង​សម្ភារៈ​របស់​ពលរដ្ឋ​ដែល​ងាយ​រងគ្រោះ​ទៅលើ​ខ្នងភ្នំ និង​ទី​ទួល​មាន​សុវត្ថិភាព បន្ទាប់ពី​ជំនន់​ទឹកភ្លៀង​ធ្លាក់​ជាប់ៗ ​គ្នា ​នៅ​ប៉ុន្មាន​ថ្ងៃ​ចុងក្រោយ​នេះ។យ៉ាងហោចណាស់​ក៏​មាន​មនុស្ស​ពីរ​នាក់​ស្លាប់ ដោយសារ​លង់ទឹកក្នុង​គ្រោះ​ជំនន់​ទឹកភ្លៀង​នេះ។

រដ្ឋមន្ត្រី​ក្រសួង​ធនធាន​ទឹក និង​ឧតុនិយម លោក លឹម គានហោ ថ្លែងប្រាប់​ក្រុម​អ្នកសារព័ត៌មាន​នៅ​ពេល​ចុះ​ពិនិត្យ​ស្ថានភាព​ជំនន់​ទឹកភ្លៀង​នៅ​ខេត្ត​បាត់ដំបង​ថា ភ្លៀង​ធ្លាក់​ប៉ុន្មាន​ថ្ងៃ​ជាប់​គ្នា គឺ​ចាប់ពី​ថ្ងៃ​ទី​៧ ដល់​ទី​១០ តុលា បង្ក​ជា​ទំនន់​ទឹកភ្លៀង គឺ​ដោយសារ​កម្ពុជា​កំពុង​ទទួលរង​ឥទ្ធិពល​នៃ​ប្រព័ន្ធ​សម្ពាធ​ទាប (ITCZ)​។ លោក​ថា តំបន់​មួយ​ចំនួន​នៅ​ភាគ​ពាយ័ព្យ និង​ភាគ​ខាងជើង ព្រមទាំង​តំបន់​ភ្នំ ដូចជា​ខេត្ត​ប៉ៃលិន ខេត្ត​បាត់ដំបង ខេត្ត​ពោធិ៍សាត់ ខេត្ត​ឧត្តរមានជ័យ និង​បន្ទាយមានជ័យ​ជាដើម​ងាយ​នឹង​រង​គ្រោះ​ដោយ​ជំនន់​ទឹកភ្លៀង៖ «យើង​មិន​អាច​ជម្នះ​នូវ​ធម្មជាតិ​បានទេ គ្រាន់​តែ​​ធ្វើ​ម៉េច​សម្រួល​កុំ​ឲ្យ​មាន​ផល​ប៉ះពាល់ និង​មាន​ការ​ខូចខាត​ធ្ងន់ធ្ងរ​តែប៉ុណ្ណោះ​។ ហើយ​ក្រសួង​នឹង​ធ្វើ​សេចក្តី​ជូន​ដំណឹង​មួយ​ជម្រាប​ជូន​ថា សភាពការណ៍​នៅ​បន្តៗ​ទៅមុខ​ទៀត គឺ​អាច​មាន​ព្យុះ ២ កើត​​ខាងមុខ​ទៀត​។ ព្យុះ​នោះ ឆាប់ៗ​នេះ​នឹង​មាន​កកើត​ទៅ​វិសម្ពាធ​ហើយ តែ​ឥទ្ធិពល​មិន​ធ្ងន់ធ្ងរ​ពេក​ទេ​ចំពោះ​កម្ពុជា​យើង»

ជំនន់​ទឹកភ្លៀង ដែល​បាន​ហូរ​បុក​ផ្ដាច់​ទំនប់​អាងទឹក​បាសាក់ ស្ថិតនៅ​ឃុំ​ព្រែកជីក និង​ឃុំ​បាសាក់ ស្រុក​រុក្ខគិរី ខេត្ត​បាត់ដំបង ធ្វើ​ឲ្យ​លិចលង់​ដល់​ភូមិ​ប្រជាពលរដ្ឋ និង​ប៉ះពាល់​ដំណាំ​ដាំ​ដុះ​នៅ​ផ្នែក​ទំនាប ហើយ​ជន់​លិច​ស្រុក​មួយ​ចំនួន​ដូចជា ស្រុក​រុក្ខគិរី ស្រុក​មោងឫស្សី ស្រុក​សំឡូត ស្រុក​សំពៅ​លូន ស្រុក​ភ្នំព្រឹក និង​ស្រុក​បវេល ជាដើម។

ពលរដ្ឋ​រងគ្រោះ​ដោយសារ​ជំនន់​ទឹកភ្លៀង​នៅ​ឃុំ​ព្រែកជីក ស្រុក​រុក្ខគិរី ខេត្ត​បាត់ដំបង លោកស្រី ធួន ធនធាន រៀបរាប់​ថា ភ្លៀង​ធ្លាក់​លិច​ផ្ទះ​លោកស្រី មិន​អាច​ចុះទៅ​ណា​បាន​នោះ​ទេ ដោយសារ​លោកស្រី​មាន​កូន​តូចៗ ហើយ​ត្រូវ​ឲ្យ​កូនប្រុស​លោកស្រី​ម្នាក់ទៀត​ហែល​ទឹក​ទៅ​ទិញ​ចំណីអាហារ ឬ​សម្ភារៈ​ផ្សេងៗ​ជូន​លោកស្រី​។ ក្រៅពី​បារម្ភ​ពី​សុវត្ថិភាព​របស់​កូនៗ លោកស្រី​ថា ជំនន់​ទឹកភ្លៀង​ធ្វើ​ឱ្យ​ខូចខាត​ដំណាំ​ជាច្រើន​នៅ​ក្នុង​ភូមិ​ចំនួន ៧​នោះ ដូចជា​ស្រូវ​២​ហិកតារ ស្លឹកគ្រៃ​១​ហិកតារ ផលដំណាំ​ផ្សេងទៀត៖ «លិច​ទាំងអស់​ត្រឹម​ទ្រូង​ហ្មង បង្គោល​របង​ភូមិ​អី​លិច​ផុត​អស់ អត់​មានអី​ទេ ស្រូវ​អី​ខូចខាត​ទាំងអស់ ម្នាស់​ស្អីៗ​ហ្នឹង​មិន​មាន​ទេ​អូន​។ សុំ​សំណូមពរ​រាជរដ្ឋាភិបាល​ឲ្យ​ជួយ​ដល់​គ្រួសារ​បង​ផ្ទាល់ ហើយ​នឹង​ប្រជាជន​ទាំងអស់​គ្នា​ហ្នឹង​អូន​។ ជនរងគ្រោះ​អ៊ីចឹង​សុំ​ឲ្យ​គាត់​ជួយ​កុំ​ឲ្យ​សុំ​រើសអើង សុំ​ឲ្យ​ជួយ​ទាំងអស់​គ្នា​ទៅ​អ្នករងគ្រោះ​ហ្នឹង បង​សុំ​ចង់បាន​ប៉ុណ្ណឹង​ណា​អូន ព្រោះ​បង​អត់​ដែល​បាន​អី​ទេ​អូន ខូចខាត​អី​ក៏ដោយ»

រីឯនៅ​ខេត្ត​ប៉ៃលិន​វិញ ក្រសួង​ធនធាន​ទឹក និង​ឧតុនិយម ឱ្យ​ដឹង​ថា ផល​ប៉ះពាល់​ធ្ងន់ធ្ងរ និង​ការខូចខាត​ដោយសារ​ជំនន់​ទឹកភ្លៀង គឺ​នៅ​ស្រុក​សាលា​ក្រៅ ទឹក​ជន់​លិច​ផ្ទះ​ប្រជាពលរដ្ឋ ៣៩៨ខ្នង សាលារៀន ១​កន្លែង វត្ត​ចំនួន ២​កន្លែង និង​កំពុង​បន្ត​ជន់​លិច​ចូល​ចំណុច​ផ្សេងទៀត គិត​ត្រឹម​ថ្ងៃ​ទី​១០ ខែ​តុលា ឆ្នាំ​២០២០។

ពលរដ្ឋ​រងគ្រោះ​ដោយសារ​ជំនន់​ទឹកភ្លៀង​នៅ​ឃុំ​ស្ទឹងត្រង់ ស្រុក​សាលា​ក្រៅ ខេត្ត​ប៉ៃលិន​លោក រឿន រ៉ុង ឲ្យ​អាស៊ីសេរី​ដឹង​ថា ភ្លៀង​ធ្លាក់​ខ្លាំង​ចុងក្រោយ​នេះ ធ្វើ​ឲ្យ​ទឹក​ជន​លិច​ផ្ទះ ភូមិ ស្រុក​ជាច្រើន ក្នុង​ខេត្ត​ប៉ៃលិន និង​ខូចខាត​សម្ភារៈ ដំណាំ​ដំឡូង​របស់​លោក ចំនួន ៣​ហិកតារ ស្រូវ​២​ហិកតារ និង​សត្វ​ចិញ្ចឹម​របស់​លោក​រាប់​សិប​ក្បាល​ងាប់ និង​ហូរ​ទៅតាម​ខ្សែទឹក​។ លោក​បន្ត​ថា សត្វ​ចិញ្ចឹម​របស់​អ្នកភូមិ និង​ពលរដ្ឋ​ជាច្រើន រួម​ទាំង​ក្មេង​តូចៗ​ត្រូវ​បាន​ជម្លៀស​ទៅលើ​ខ្នងភ្នំ និង​ទីទួល​មាន​សុវត្ថិភាព​ជាដើម។

លោក រឿន រ៉ុង បញ្ជាក់ទៀត​ថា លោក​មានការ​លំបាក​ក្នុង​ការ​ធ្វើដំណើរ ដោយសារ​ទឹក​ជន់​លិច​ផ្លូវ ដែល​មាន​កម្ពស់​ខ្ពស់​ផុត​ទ្រូង ហើយ​ត្រូវ​ហែល​ទឹក​គ្រប់​ពេល ដូចជា​ទិញ​អីវ៉ាន់ ឬ​ទៅ​ធ្វើ​អ្វីមួយ​ជាដើម​៖ «គេ​ឡើង​ទៅ​ភ្នំ​អស់ នៅតែ​ផ្ទះ មនុស្ស​ទុកចោល​គេ​ឡើង​ទៅ​ភ្នំ​អស់ អត់​មាន​អ្នក​ហ៊ាន​នៅ​ទេ ព្រោះ​វា​លិច​ជ្រៅ​ពេក​។ សុំ​ឲ្យ​គាត់​ជួយ​ដោះស្រាយ​ដល់​ប្រជាពលរដ្ឋ​លិចលង់​ហ្នឹង​ឲ្យ​គាត់​ជួយ​ដោះស្រាយ​ផង ព្រោះ​វា​លិចលង់​អស់​តែ​ហ្មង លិច​អស់​តែ​ហ្មង ដំឡូង ស្រូវ លិច​អស់​តែ​ហ្មង និយាយ​រួម​វា​ជម្រៅ​ទឹក​ជ្រៅ​មែនទែន​តែ​ហ្មង»

ក្រសួង​ធនធាន​ទឹក និង​ឧតុនិយម អំពាវនាវ​ឲ្យ​ប្រជាពលរដ្ឋ​ដែល​រស់នៅ​តំបន់​ងាយ​រងគ្រោះ បន្ត​ប្រុងប្រយ័ត្ន​ខ្ពស់ ដើម្បី​ចៀសវាង​នូវ​គ្រោះថ្នាក់​ផ្សេងៗ ដែល​អាច​កើតមានឡើង ស្រប​ពេល​អាជ្ញាធរ​នៅ​តំបន់​ដែល​មាន​ទឹកជំនន់ កំពុង​មមាញឹក​ក្នុង​ប្រតិបត្តិការ​ជួយសង្គ្រោះ និង​ជម្លៀស​ពលរដ្ឋ។

ចំណែក​នៅ​ក្នុង​ខេត្ត​ពោធិ៍សាត់​វិញ ឥទ្ធិពល​ព្យុះ និង​ភ្លៀង​ធ្លាក់​បន្តបន្ទាប់​រយៈពេល ៥ថ្ងៃ​ជាប់ៗ ​គ្នា​នេះ បាន​បង្ក​ឲ្យ​មាន​ទឹកជំនន់​ទឹកភ្លៀង តាម​ដងស្ទឹង​ពោធិ៍សាត់ ចំនួន ៥ក្រុង​/​ស្រុក និង ​២៩ឃុំ​/​សង្កាត់ ដែល​បាន​ប៉ះពាល់​ដល់​លំនៅឋាន ស្រូវ និង​ហេដ្ឋារចនាសម្ព័ន្ធ នៅ​ក្នុង​ស្រុក​វាលវែង ក្រុង​ពោធិ៍សាត់ ស្រុក​កណ្ដៀង ស្រុក​ភ្នំ​ក្រវាញ និង​បាកាន។

កាលពី​ថ្ងៃ​ទី​១០ តុលា កម្ពស់​ទឹក នៅ​ស្រុក​ក្រវាញ មាន​ចំនួន​ជាង ៧​ម៉ែត្រ ​(៧,១៩​ម៉ែត្រ​) ចំណែក​នៅ​ក្រុង​ពោធិ៍សាត់ កំពុង​ឡើង​បន្ត​ទៀត ដែល​ទាមទារ​ឲ្យ​ប្រជាពលរដ្ឋ​មាន​ការ​ប្រុងប្រយ័ត្ន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល