ក្រសួងកសិកម្មរងការចោទថា ទាំងអសមត្ថភាពការពារព្រៃ ថែមទាំងចូលដៃជាមួយឈ្មួញទៀត
2019.07.07
សកម្មជនបរិស្ថាន និងអង្គការសង្គមស៊ីវិលចោទក្រសួងកសិកម្មថា មិនត្រឹមតែអសមត្ថភាពការពារព្រៃឈើនោះទេ ក្រសួងនេះ គឺជាអ្នកចូលដៃជើងជាមួយឈ្មួញអនុញ្ញាតឱ្យមានក្រុមហ៊ុនសម្បទានសេដ្ឋកិច្ចជាច្រើន ធ្វើអាជីវកម្មឈើខ្នាតធំ នៅជាប់ព្រៃការពារធម្មជាតិគ្រប់តំបន់នៅខេត្តភាគឦសាន។ ការលើកឡើងនេះដោយសារតែ រដ្ឋមន្ត្រីក្រសួងកសិកម្មថ្មីៗនេះ បានទទួលស្គាល់ថា មានបទល្មើសព្រៃឈើដឹកជញ្ជូនទៅលក់នៅប្រទេសវៀតណាមនៅខេត្តមណ្ឌលគិរី និងស្នើឱ្យលោក សៅ សុខា មេកងរាជអាវុធហត្ថទទួលបន្ទុកកំណាត់ការរត់ពន្ធឈើចាត់វិធានការច្បាប់។
សកម្មជនបរិស្ថាន និងក្រុមអង្គការសង្គមស៊ីវិល សង្កេតឃើញថា មន្ត្រីរដ្ឋបាលព្រៃឈើ ដែលជាសេនាធិការរបស់ក្រសួងកសិកម្ម គឺជាចោរស្របច្បាប់ មានជំនាញខាងស៊ីញេឈើខុសច្បាប់ ឱ្យទៅជាឈើស្របច្បាប់ បម្រើមហិច្ឆតាឈ្មួញមានអំណាច និងដើម្បីប្រយោជន៍ផ្ទាល់ខ្លួន។ ពួកគេទាមទារឱ្យក្រសួងសាមីមួយនេះ ជាពិសេស រដ្ឋមន្ត្រីក្រសួងកសិកម្ម លោក វេង សាខុន ត្រូវទទួលខុសត្រូវចំពោះមុខច្បាប់ និងប្រវត្តិសាស្ត្រ។
សកម្មជនបរិស្ថាន លោក ហេង ស្រស់ ឱ្យដឹងនៅថ្ងៃទី៧ មិថុនា ថា ក្រសួងកសិកម្មជាអ្នករួមចំណែកយ៉ាងសំខាន់ អនុញ្ញាតឱ្យមានដីសម្បទានសេដ្ឋកិច្ច នៅជាប់តំបន់ព្រៃការពារធម្មជាតិ និងបណ្ដោយឱ្យឈ្មួញទុច្ចរិតកាប់ឈើពីព្រៃអភិរក្សដឹកចូលក្នុងក្រុមហ៊ុន បន្លំជាឈើស្របច្បាប់ ដែលមានមន្ត្រីរដ្ឋបាលព្រៃឈើឃុបឃិត។ លោកថា មានក្រុមហ៊ុន សំអឿន សុវណ្ណ នៅខេត្តព្រះវិហារ បានខ្ចីដីក្រុមហ៊ុនចិន ហេង ហ្វូ ធ្វើអាជីវកម្មឈើខ្នាតធំ ដឹកចេញពីព្រៃឡង់ និងព្រៃព្រះរកា និងព្រៃសហគមន៍មួយចំនួនទៀតចូលការដ្ឋាន រួចបន្លំជាឈើស្របច្បាប់ ដឹកចេញក្រៅ។ លើសពីនេះនៅខេត្តមណ្ឌលគិរី មានក្រុមហ៊ុនយ៉ាងហោចណាស់ ចំនួន ៦ ធ្វើអាជីវកម្មឈើខ្នាតធំ ជាប់ដែនជម្រកសត្វព្រៃភ្នំព្រេច ក្នុងស្រុកកោះញែក និងស្រុកស្នូល ខេត្តក្រចេះ៖ «ខ្លួនគាត់ទេ (ក្រសួងកសិកម្ម) ជាអ្នកអនុញ្ញាតឱ្យមានដីសម្បទានសេដ្ឋកិច្ច និងអ្នកស៊ីញេឱ្យឈើខុសច្បាប់ឱ្យទៅជាឈើស្របច្បាប់ទៅវិញ។ នេះហើយគាត់ត្រូវតែទទួលខុសត្រូវចំពោះមុខច្បាប់ និងទទួលខុសត្រូវចំពោះពលរដ្ឋ ទទួលខុសត្រូវការបាត់បង់ព្រៃឈើនៅប្រទេសកម្ពុជាទាំងមូលដោយសារ មានការអនុញ្ញាត មានការស៊ីញេឱ្យមានការកាប់បំផ្លាញព្រៃឈើ នៅភូមិភាគឦសានទៅលក់នៅប្រទេសវៀតណាម»។
សកម្មជនបរិស្ថានរូបនេះរកឃើញថា នៅមានក្រុមហ៊ុនជាច្រើនទៀត មានរូបភាពស្រដៀងគ្នានេះដែរ ដូចជាក្រុមហ៊ុនសេសានក្រោមពីរ នៅខេត្តស្ទឹងត្រែង បានធ្វើអាជីវកម្មឈើខ្នាតយក្សជាច្រើនឆ្នាំមកហើយ ក៏ប៉ុន្តែបានផ្អាកទៅវិញ នៅរយៈពេលប៉ុន្មានខែចុងក្រោយនេះ។ លើសពីនេះ មានក្រុមហ៊ុន ស៊ីបាយអូថេក នៅខេត្តក្រចេះ លួចកាប់ឈើចេញពីដែនជម្រកសត្វព្រៃឡង់ ខេត្តក្រចេះ និងខេត្តស្ទឹងត្រែង។ អាជីវកម្មឈើរបស់ក្រុមហ៊ុននេះ លោក វេង សាខុន រដ្ឋមន្ត្រីក្រសួងកសិកម្ម ជាអ្នកចុះហត្ថលេខាឱ្យមានការដ្ឋានអារឈើនៅតំបន់នោះទៀតផង៖ «ត្រូវតែលុបបំបាត់អំពើពុករលួយចោល ត្រូវតែត្រួតពិនិត្យមន្ត្រីរបស់គាត់ ក្រោមឱវាទ កន្លងមកយើងទទួលព័ត៌មានថា មន្ត្រីរបស់គាត់ក្រោមឱវាទ គឺអ្នកទទួលបានសំណូក សុទ្ធតែជាអ្នកទទួល លាភសក្ការៈពីគេ ក្នុងការបើកជំហរឱ្យមានការដឹកជញ្ជូនឈើ តំបន់ខ្លះដាក់ប៉ុស្តិ៍ដើម្បីយកលុយ»។
កាលពីចុងខែមិថុនា ឆ្នាំ២០១៩ រដ្ឋមន្ត្រីក្រសួងកសិកម្ម លោក វេង សាខុន បានសរសេរលិខិតស្នើសុំគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ អន្តរាគមន៍ទប់ស្កាត់បទល្មើសព្រៃឈើតាមច្រកព្រំដែនអន្តរជាតិដាក់ដាំ ខេត្តមណ្ឌលគិរី ខណៈដែលមន្ត្រីជំនាញរកឃើញថា មានរថយន្តសាំយ៉ុង រាប់រាប់រយគ្រឿងដឹកជញ្ជូនឈើឆ្លងដែន ទៅលក់នៅប្រទេសវៀតណាម។
អាស៊ីសេរីបានទាក់ទងអ្នកនាំពាក្យក្រសួងកសិកម្ម លោក ស្រី វុឌ្ឍី ដើម្បីសុំការបំភ្លឺជុំវិញការចោទប្រកាន់របស់សកម្មជនបរិស្ថាន តែទូរស័ព្ទហៅចូលគ្មានអ្នកទទួលនៅថ្ងៃទី៦ មិថុនា។
ប៉ុន្តែ អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី ប្រាប់អាស៊ីសេរីថា ការបង្ក្រាបបទល្មើសព្រៃឈើ ពុំមែនធ្វើទៅតាមសំណើរបស់ក្រសួងណាមួយនោះទេ គឺគណៈកម្មការជាតិអនុវត្តទៅតាមតួនាទី និងភារកិច្ចដែលរដ្ឋាភិបាលចេញសេចក្ដីសម្រេច។ លើសពីនេះ គណៈកម្មការជាតិបានចាត់តាំងមន្ត្រីជាន់ខ្ពស់កងរាជអាវុធហត្ថម្នាក់ ដឹកនាំកម្លាំងចម្រុះបង្ក្រាបបទល្មើសព្រៃឈើគ្រប់តំបន់។ លោករកឃើញថា មួយរយៈពេលនេះ មន្ត្រីរដ្ឋបាលព្រៃឈើ ខេត្តមណ្ឌលគិរី បានចេញលិខិតអនុញ្ញាត ឱ្យមានការដឹកជញ្ជូនឈើយ៉ាងច្រើន ហេតុនេះគណៈកម្មការជាតិ នឹងចុះទៅស្រាវជ្រាវ ថាតើការដឹកជញ្ជូនឈើទាំងនោះ កាប់ចេញពីដីសម្បទាន ឬពីខាងក្រៅ។ លោកបន្ថែមថា ប្រសិនបើរកឃើញថា មានក្រុមហ៊ុនសម្បទានសេដ្ឋកិច្ចណា និងបុគ្គលណាមួយ មានជាប់ពាក់ព័ន្ធបទល្មើសព្រៃឈើ គណៈកម្មការជំនាញនឹងអនុវត្តច្បាប់ដោយត្រូវបញ្ជូនសំណុំរឿងទៅតុលាការ៖ «ប្រធានគណៈកម្មការជាតិដើម្បីទប់ស្កាត់ បទល្មើសព្រៃឈើបានរៀបចំផែនការ រៀបចំការងារច្បាស់លាស់ ដូច្នេះលោកឧត្ដមសេនីយ៍ឯក ហុង វិណុល គាត់នឹងដឹកនាំកម្លាំងចម្រុះចុះធ្វើការងារ ទាក់ទិនអ្វីដែលថា ល្មើសច្បាប់ព្រៃឈើ។ មន្ត្រីណាក៏ដោយ គណៈកម្មការជាតិ ឱ្យតែរកឃើញថា គាត់ល្មើសច្បាប់ គឺយើងអនុវត្តតាមច្បាប់»។
មន្ត្រីពង្រឹងសិទ្ធិអំណាចសហគមន៍ នៃសមាគមអាដហុក លោក ប៉ែន ប៊ុណ្ណារ៍ យល់ថា ប្រសិនបើគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ មិនចាត់វិធានការមន្ត្រីខិលខូចណា ដែលឃុបឃិតប្រព្រឹត្តបទល្មើសព្រៃឈើទេ លោកមិនសង្ឃឹមថា បេសកកម្មបង្ក្រាបបទល្មើសព្រៃឈើរបស់គណៈកម្មការនេះនឹងមានប្រសិទ្ធភាពឡើយ។ លោកថា កន្លងទៅលោកមិនឃើញ គណៈកម្មការមួយនេះ ចាត់វិធានការមន្ត្រីជំនាញណា ដែលឃុបឃិតប្រព្រឹត្តបទអំពើពុករលួយនោះទេ ដែលជាហេតុធ្វើឱ្យមន្ត្រីគ្រាក់ៗផ្សេងៗទៀតមិនគោរពច្បាប់ ផ្ទុយទៅវិញនឹងបន្ថែមល្បឿនប្រព្រឹត្តបទល្មើសព្រៃឈើដដែលៗ៖ «ការព្រមានទាំងអស់ហ្នឹងគ្រប់វិធីទាំងអស់ មានហើយ វិធីមួយចុងក្រោយ គឺការផ្ដន្ទាទោសមន្ត្រី និងឧក្រិដ្ឋជន ព្រោះកន្លងគ្រាន់តែធ្វើឱ្យល្អមើល ពិសេសបំផុតគឺ ការនាំមន្ត្រីដែលពាក់ព័ន្ធ និងអំពើពុករលួយ ក្នុងវិស័យព្រៃឈើ មកផ្ដន្ទាទោស។ អ៊ីចឹង ចំនួនព្រៃឈើ ដែលបាត់បង់ បើមិនមានវិធានការបន្ទាន់ទេ ព្រៃឈើនឹងបាត់បង់ក្នុងរយៈពេលដ៏ខ្លីបំផុត ព្រោះចំនួនមន្ត្រីពាក់ព័ន្ធ និងឧក្រិដ្ឋជនកាន់តែកើន»។
សកម្មជនបរិស្ថានរកឃើញថា ក្រសួងកសិកម្ម គឺជាអ្នកបង្ករឿង ចូលដៃជើងជាមួយឈ្មួញចុះហត្ថលេខា បន្លំឈើខុសច្បាប់ឱ្យទៅជាឈើស្របច្បាប់ ហើយថែមទាំងរុញឱ្យស្ថាប័នផ្សេងជួយទប់ស្កាត់ទៅវិញ។ ពួកគេស្នើឱ្យក្រសួងសាមីមួយនេះ ត្រូវបកស្រាយ និងទទួលខុសត្រូវយ៉ាងសំខាន់ ចំពោះវិនាសកម្មព្រៃឈើនៅកម្ពុជា នៅគ្រាដែលពួកគេរកឃើញថា មន្ត្រីរដ្ឋបាលព្រៃឈើបានរួមចំណែកបំផ្លាញធនធានធម្មជាតិជាប្រព័ន្ធតាមរយៈ ប្រព្រឹត្តអំពើពុករលួយ កេងប្រវ័ញ្ចសម្បត្តិជាតិ និងចេញលិខិតអនុញ្ញាតមិនប្រក្រតីជាដើម៕