អាជ្ញាធរ​ខេត្ត​កំពត​នៅតែ​គ្មាន​វិធានការ​លើ​អ្នក​ ដែល​សង់​សំណង់​រឹង​រំលោភ​យក​ច្រាំង​ព្រែក​កំពត

ដោយ ទីន ហ្សាការីយ៉ា
2024.03.13
អាជ្ញាធរ​ខេត្ត​កំពត​នៅតែ​គ្មាន​វិធានការ​លើ​អ្នក​ ដែល​សង់​សំណង់​រឹង​រំលោភ​យក​ច្រាំង​ព្រែក​កំពត ទិដ្ឋភាព​ព្រែក​ក្នុង​​​​ខេត្តកំពត ដែល​ជន​ខិលខូច​ចាក់​លុប​ចូល​ផ្ទៃ​ទឹក ដើម្បី​រំលោភ​យក​ព្រែក ធ្វើ​ជា​កម្មសិទ្ធិ កាល​ពី​ថ្ងៃ​ទី២០ ខែកុម្ភៈ ឆ្នាំ២០២៣។
រូប៖ ពលរដ្ឋ​ផ្តល់ឱ្យ

ពលរដ្ឋ​រស់​នៅ​ខេត្ត​កំពត និង​មន្ត្រី​សង្គម​ស៊ីវិល​អះអាង​ថា សកម្មភាព​សាងសង់​សំណង់​រឹង​រំលោភ​បំពាន​ច្រាំង​ព្រែក​ដៃ​សមុទ្រ​ក្នុង​ខេត្ត​កំពត​នៅ​តែ​កើត​មាន​ច្រើន​ដោយ​គ្មាន​វិធានការ​ច្បាប់​នៅ​ឡើយ​ទេ។

ពលរដ្ឋ​នៅតែ​ខ្វល់​ពី​វិបត្តិ​បរិស្ថាន​ទាំង​នេះ គ្មាន​ដំណោះស្រាយ បើ​ទោះ​បី​ជា​មាន​ការ​ផ្លាស់​ប្ដូរ​អភិបាល​ខេត្ត​លោក ម៉ៅ ធនិន ចូល​កាន់​ដំណែង​ក្ដី។

ពលរដ្ឋ​រស់​នៅ​ខេត្ត​កំពត និង​មន្ត្រី​សង្គម​ស៊ីវិល​ឱ្យ​ដឹង​ថា អាជ្ញាធរ​មូលដ្ឋាន​ខេត្ត​កំពត​ខ្វះ​ការ​យក​ចិត្ត​ទុក​ដាក់ ការពារ​ភោគ​ទ្រព្យ​ជាតិ​ឱ្យ​គង់​វង្ស ស្រប​តាម​ច្បាប់ និង​បទ​បញ្ជា​របស់​រដ្ឋាភិបាល។

ការ​លើក​ឡើង​នេះ ក្រោយ​ពី​ព្រែក​មួយ​ចំនួន​មាន​បណ្ដាញ​ចរន្ត​ទឹក​ភ្ជាប់​ដៃ​សមុទ្រ រួម​មាន ព្រែក​ទឹក​ឈូ ព្រែក​កំពត ព្រែក​ក្បាល​រមាស និង​ព្រែក​កំពង់សំរោង នៅតែ​មាន​សកម្មភាព​សង់​សំណង់​រឹង​តាម​បណ្ដោយ​ច្រាំង​ព្រែក និង​ចាក់​ដី​លយ​ចូល​ព្រែក រំលោភ​​យក​ទ្រព្យ​សម្បត្តិ​សាធារណៈ​របស់​រដ្ឋ ធ្វើ​ជា​កម្ម​សិទ្ធិ​ជា​បន្ត​បន្ទាប់។

ពលរដ្ឋ​រស់​នៅ​ខេត្ត​កំពត លោក សួង សារ៉ាន ប្រាប់​វិទ្យុ​អាស៊ី​សេរី នៅ​ថ្ងៃ​ទី១២ មីនា​ថា អាជ្ញាធរ​មូលដ្ឋាន​ខេត្ត​នេះ ខ្វះ​ការ​ទទួល​ខុស​ត្រូវ រក្សា​សម្រស់​បរិស្ថាន និង​ដី​ចំណី​ព្រែក តាម​គន្លង​ធម្មជាតិ​ ស្រប​តាម​ច្បាប់ និង​បម្រាម​របស់​រដ្ឋាភិបាល។

 លោក​ថា អាជ្ញាធរ​នៅតែ​បណ្ដែតបណ្ដោយ​ឱ្យ​បុគ្គល​មាន​លុយ មាន​អំណាច​រំលោភ​បំពាន​ច្រាំង​ព្រែក​ជា​បន្ត​បន្ទាប់ នៅ​រយៈ​ពេល ៦ឆ្នាំ​កន្លង​ទៅ​នេះ ធ្វើ​ឱ្យ​ព្រែក​មួយ​ចំនួន កាន់​តែ​តូច​ចង្អៀត​ពិបាក​ធ្វើ​នាវាចរណ៍ និង​នេសាទ​ត្រី​របស់​ពលរដ្ឋ៖ 

លោក សួង សារ៉ាន៖ អាជ្ញាធរ​បម្រើ​ជួយ​មើល ជួយ​ថែ​រក្សា ធ្វើ​ម៉េច​កុំ​ឱ្យ​ប៉ះពាល់​របស់​បង​ប្អូន​ពលរដ្ឋ​នៅ​តំបន់​ហ្នឹង។ ព្រែក​ខុស​ពី​ទន្លេ​ ព្រែក​វា​ត្រូវ​ការ​ជោរ និង​នាច ទោះ​លុប​ប៉ុន្មាន​ក៏​ដោយ​ទឹក​នៅ​ស្មើ ចាល់​នៅ​ហ្នឹង។

វិទ្យុ​អាស៊ី​សេរី​មិន​ទាន់​អាច​ទាក់ទង សុំ​ការ​បំភ្លឺ​រឿង​នេះ ពី​អភិបាល​ខេត្ត​កំពត លោក ម៉ៅ ធនិន បាន​នៅ​ឡើយ​ទេ នៅ​ថ្ងៃ​ទី១២ មីនា ដោយ​ទូរស័ព្ទ​ហៅ​ចូល​តែ​គ្មាន​អ្នក​ទទួល។ ចំណែក​អភិបាល​ស្រុក​ទឹកឈូ លោក អ៊ឹម ច័ន្ទសោធន ក៏​មិន​ទាន់​អាច​ទាក់ទង​បាន​ដែរ។

កាល​ពី​ពេល​កន្លង​ទៅ អាជ្ញាធរ​ស្រុក​ទឹកឈូ​បាន​ចេញ ស..(សេចក្ដី​ជូន​ដំណឹង) ឱ្យ​រុះរើ​សំណង់​រឹង​ដែល​សង់​បំពាន​ច្រាំង និង​រំលោភ​ចូល​ព្រែក​ទាំង​អស់។ ក៏​ប៉ុន្តែ​ពលរដ្ឋ​ថា វិធានការ​គ្មាន​ប្រសិទ្ធភាព​នោះ​ទេ។

អ្នកភូមិ​អះអាង​ថា សកម្មភាព​ចាក់​ដី​លយ​ចូល​ព្រែក​ក្បាល​រមាស និង​ព្រែក​កំពង់​សំរោង ក្នុង​ស្រុក​ទឹកឈូ បាន​កើត​មាន​ជា​បន្ត​បន្ទាប់ តាំង​ពី​ឆ្នាំ២០១៩ ធ្វើ​ឱ្យ​ផ្ទៃ​ទឹក​រួម​តូច ដោយ​ជំនួស​មក​វិញ​នូវ​សំណង់​រឹង របង​ថ្ម ​និង​លំ​នៅ​ឋាន​របស់​បុគ្គល​មាន​លុយ​មាន​អំណាច។

ជុំវិញ​រឿង​នេះ មន្ត្រី​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក ខេត្តកំពត លោក យន់ ផល្លី អះអាង​ថា ក្រុម​ការងារ​លោក​ប្រទះ​ឃើញ​មាន​ការ​សង់​សំណង់​រឹង លយ​ចូល​ព្រែក​ទឹកឈូ ក្នុងស្រុក​ទឹកឈូ​ខុសច្បាប់ ​ធ្វើ​ឱ្យ​ព្រែក​កាន់​តែ​រួម​តូច ប៉ះពាល់​បរិស្ថាន និង​គុណភាព​ទឹក។

 លោក​ស្នើ​ឱ្យ​អភិបាលខេត្ត លោក ម៉ៅ ធនិន ចាត់​វិធានការ​ដោះស្រាយ​រឿង​នេះ​ ដើម្បី​កុំ​ឱ្យ​បញ្ហា​រីក​ធំ​ឡើង ពិបាក​ដោះស្រាយ​តាម​ក្រោយ។

លោក យន់ ផល្លី៖ «កំពុង​ឃើញ​ចាក់​ខឿន​ចូល​ព្រែក​តែ​ម្ដង ហើយ​ជាង​កំពុង​សាង​សង់ អ្វី​ដែល​ខ្ញុំ​ឃើញ​ជាក់​ស្ដែង​ គួរតែ​អាជ្ញាធរ​លោក​មាន​វិធានការ​ទប់ស្កាត់ មិន​អាច​បណ្ដែត​បណ្ដោយ​ឱ្យ​បុគ្គល​មួយ​ចំនួន​ចាក់​ដី​ចូល​ដង​ព្រែក​បាន​ទេ​ ជាពិសេស​គឺ​អាជ្ញាធរ​មូលដ្ឋាន​តែ​ម្ដង។

អនុក្រឹត្យ​ស្ដីពី​ការគ្រប់គ្រង​អាង​ទន្លេ មាត្រា​៨ ចែងថា ដី​ចំណី​ច្រាំង​ស្ទឹង និង​ព្រែក​មាន​ចម្ងាយ ៣០ម៉ែត្រ គិត​ពី​មាត់ច្រាំង​ព្រែក ហើយ​ដី​ចំណី​ច្រាំង​នេះ ចាត់​ទុកជា​សម្បត្តិ​សាធារណៈ​របស់​រដ្ឋ។

ច្បាប់​ភូមិបាល​ចែង​ថា ជន​ណា​ធ្វើ​ឱ្យ​ប៉ះពាល់​កម្មសិទ្ធិ​នៃ​ទ្រព្យ​សម្បត្តិ​សាធារណៈ ត្រូវ​ផ្ដន្ទាទោស​ពិន័យ​ជា​ប្រាក់​ពី ៥លាន​រៀល (.០០០.០០០) ដល់ ៥០លាន​រៀល (៥០.០០០.០០០) រៀល​និង​ផ្ដន្ទាទោស​ដាក់​ពន្ធនាគារ​ពី ១ឆ្នាំ ដល់ ៥ឆ្នាំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។