អ្នក​ឃ្លាំ​មើល​អំពាវនាវ​ឲ្យ​មន្ត្រី​ជំនាញ​ចុះ​ពិនិត្យ​មើល​ភាព​មិន​ប្រក្រតី​នៃ​អាជីវកម្ម​រ៉ែ​មាស​ខែត្រ​ក្រចេះ

ដោយ តាំង សារ៉ាដា
2017-11-28
អ៊ីម៉ែល
មតិ
Share
បោះពុម្ព
រណ្តៅ​ជីក​រ៉ែ​មាស​ឋិត​នៅ​ឃុំ​ក្បាលដំរី ស្រុក​សំបូរ ខែត្រ​ក្រចេះ។ រូបថត​ថ្ងៃ​ទី​២៩ ខែ​សីហា ឆ្នាំ​២០១៧។ Photo Provided
រណ្តៅ​ជីក​រ៉ែ​មាស​ឋិត​នៅ​ឃុំ​ក្បាលដំរី ស្រុក​សំបូរ ខែត្រ​ក្រចេះ។ រូបថត​ថ្ងៃ​ទី​២៩ ខែ​សីហា ឆ្នាំ​២០១៧។ Photo Provided
Photo Provided

មន្ត្រី​សង្គម​ស៊ីវិល​បារម្ភ​ពី​ផល​ប៉ះពាល់​បរិស្ថាន និង​អាយុ​ជីវិត​របស់​ពលរដ្ឋ បន្ទាប់​ពី​អ្នក​ភូមិ​ត្រូន ខែត្រ​ក្រចេះ មួយ​ចំនួន​បាន​នាំ​គ្នា​លួច​ជីក​រក​រ៉ែ​មាស​ខុស​ច្បាប់​ដោយ​ខ្វះ​ជំនាញ​បច្ចេកទេស។ ការ​ព្រួយ​បារម្ភ​នេះ បន្ទាប់​ពី​កម្មករ ៥​នាក់​ស្លាប់ និង​របួសធ្ងន់​ម្នាក់ ដោយសារ​លួច​ជីក​យក​រ៉ែ​មាស​នៅ​តំបន់​នោះ។

អ្នក​ឃ្លាំមើល​បរិស្ថាន នៅ​អង្គារ ថ្ងៃ​ទី​២៨ ខែ​វិច្ឆិកា អំពាវនាវ​ឲ្យ​ក្រសួង​រ៉ែ និង​ថាមពល ចុះ​ពិនិត្យ​ពី​ភាព​មិន​ប្រក្រតី​នៃ​អាជីវកម្ម​រ៉ែ​មាស​មួយ​កន្លែង ដែល​អ្នក​ភូមិ​ត្រូន ឃុំ​ក្បាលដំរី ស្រុក​សំបូរ នាំ​គ្នា​ជីក​ខ្វះ​លក្ខណៈ​បច្ចេកទេស​បង្ក​ឲ្យ​ប៉ះពាល់​បរិស្ថាន និង​អាយុ​ជីវិត​ពលរដ្ឋ។

​មន្ត្រី​ស៊ើបអង្កេត​នៃ​សមាគម​អាដហុក (ADHOC)  ខែត្រ​ក្រចេះ លោក ប៊ី វ៉ាន់នី ដែល​ចុះ​អង្កេត​ករណី​នេះ​ឲ្យ​ដឹង​ថា រណ្ដៅ​រ៉ែ​មាស​ប្រហែល ៤០​រណ្ដៅ​ថ្មី​ទៀត ត្រូវ​បាន​អ្នក​ភូមិ​ត្រូន លួច​ជីក​ថ្មីៗ​នេះ ដែល​មាន​អ្នក​មាន​ឥទ្ធិពល​នៅ​ពីក្រោយ​ខ្នង បើ​ទោះ​បី​ជា​តំណាង​អយ្យការ​ខែត្រ​ក្រចេះ ធ្លាប់​ចុះ​បិទ​អាជីវកម្ម​នេះ​កន្លង​ទៅ​ក្ដី។

លោក​បារម្ភ​ថា ពលរដ្ឋ​ប្រថុយប្រថាន​ជីក​រក​រ៉ែ​មាស​នោះ ខ្វះ​បច្ចេកទេស អាច​ប្រឈម​គ្រោះថ្នាក់ និង​ប៉ះពាល់​បរិស្ថាន ដែល​ទាមទារ​ឲ្យ​មន្ត្រី​ជំនាញ​ត្រួត​ពិនិត្យ​បញ្ហា​នេះ និង​ស្វែង​រក​ឈ្មួញ​មាន​ឥទ្ធិពល​នៅ​ពី​ក្រោយ​ខ្នង​មក​ទទួល​ខុស​ត្រូវ​ផ្លូវ​ច្បាប់។

​លោក ប៊ី វ៉ាន់នី បន្ថែម​ថា កន្លង​ទៅ​កម្មករ ៥​នាក់​ស្លាប់ និង​របួស​ធ្ងន់​ម្នាក់ បន្ទាប់ពី​ពួកគាត់​បាន​ជីក​យក​រ៉ែ​មាស​ក្នុង​រណ្ដៅ​ជម្រៅ​ជាង ៣០​ម៉ែត្រ ហើយ​ក្រោយ​ពី​កម្មករ​បាន​ស្លាប់ អាជ្ញាធរ​ជំនាញ​បាន​ចុះ​ត្រួត​ពិនិត្យ និង​ប្រកាស​ឲ្យ​បិទ​អាជីវកម្ម​នោះ​ភ្លាមៗ។

​លោក​រក​ឃើញ​ថា កម្មករ​ទាំង​នោះ​បាន​ស្លាប់​ក្នុង​រណ្ដៅ ដោយសារ​បាក់​ដី និង​ថ្ម​សង្កត់ ព្រោះ​សកម្មភាព​ទាញ​យក​រ៉ែ​មាស​នោះ​ខ្វះ​បច្ចេកទេស​ផង៖ «ការ​ធ្វើ​រ៉ែ​មាស​បែប​អនាធិបតេយ្យ​នេះ គឺ​ធ្វើ​ឲ្យ​បាត់បង់​ធនធាន​រ៉ែ​របស់​យើង ហើយ​ពលរដ្ឋ​ប្រឈម​គ្រោះថ្នាក់​ដល់​ជីវិត និង​ប្រឈម​បរិស្ថាន​ទៀត​ផង ពាក់ព័ន្ធ​របៀប​នៃ​ការ​យក​រ៉ែ»

អាស៊ីសេរី មិន​អាច​រក​ប្រភព​ទាក់ទង​ប្រធាន​មន្ទីរ​រ៉ែ និង​ថាមពល ខែត្រ ក្រចេះ ដើម្បី​សុំ​ការ​អធិប្បាយ​រឿង​នេះ​បាន​ទេ នៅ​ថ្ងៃ​ទី​២៨ ខែ​វិច្ឆិកា។

​កាល​ពី​ចុង​ខែ​សីហា ឆ្នាំ​២០១៧ តំណាង​អយ្យការ​ខែត្រ​ក្រចេះ បាន​បិទ​រណ្ដៅ​អាជីវកម្ម​រ៉ែ​មាស​នោះ​ក្រោយ​ពី​កម្មករ ៥​នាក់ ជួប​គ្រោះថ្នាក់ នៅ​គ្រា​ដែល​ចូល​ក្នុង​រណ្ដៅ​ជម្រៅ ៣០​ម៉ែត្រ បង្ក​ឲ្យ​បាក់​ដី​សង្កត់​ស្លាប់​ក្នុង​រណ្ដៅ​នោះ។

​មេ​ប៉ុស្តិ៍​រដ្ឋបាល​ឃុំ​ក្បាលដំរី លោក ជិត បូរ៉ា ឲ្យ​ដឹង​ថា នគរបាល​មូលដ្ឋាន​ពុំ​ទាន់​ទទួល​ដំណឹង​ថា មាន​ការ​លួច​ជីក​រ៉ែ​មាស​នៅ​តំបន់​នោះ​ទេ។ តែ​យ៉ាងណា​លោក​ថា ប៉ុស្តិ៍​រដ្ឋបាល​នឹង​ចុះ​ពិនិត្យ​រឿង​នេះ​បន្ទាប់ពី​ទទួល​ដំណឹង​នេះ៖ «សួរ​តាម​ពលរដ្ឋ​គេ​នៅ​តែ​បន្ត​ធ្វើ​រ៉ែ​លើ​គោក។ គេ​ថា រ៉ែ គល់​ព្រេច រ៉ែ​លើ និង​រ៉ែ​ក្រោម​ខ្ញុំ​អត់​ដឹង​ដែរ»

អនុ​ភូមិ​ត្រូន ឧបសម្ពន្ធ​ភូមិ​អូរពោរ លោក ប៉ិច ប៊ិន ទទួល​ស្គាល់​ថា ពិត​ជា​មាន​ការ​លួច​ជីក​រ៉ែ​មាស​នៅ​តំបន់​នោះ​មែន តែ​ការ​ជីក​នោះ​គឺ​ធ្វើ​ឡើង​ដោយ​ដៃ ដែល​មាន​ជម្រៅ​ពី ៣​ម៉ែត្រ ទៅ ៤​ម៉ែត្រ ពុំ​ប៉ះពាល់​ដល់​បរិស្ថាន​នោះ​ទេ។

លោក​ថា ពលរដ្ឋ​មួយ​ចំនួន​បាន​យក​អាចម៍​ដី​រែង​យក​រ៉ែ​មាស​ជា​លក្ខណៈ​គ្រួសារ ដើម្បី​រក​ប្រាក់​ដោះស្រាយ​ជីវភាព​ប្រចាំថ្ងៃ៖ «គាត់​ជីក​លក្ខណៈ​រាក់ៗ លើ​ដី​លើៗ កាល​មុន​ចិន ធ្វើ តែ​បើ​ចិន ធ្វើ​ផ្អាក​ទៅ រ៉ែ​នៅ​សល់​ហ្នឹង​តាម​រន្ធ​រណ្ដៅ​ចាស់ៗ វា​យក​កាយ​យក​កាក​សំណល់​ចិន ធ្វើ​សល់ និង​ចិន វ៉ៃ​រ៉ែ​នៅ​សល់»

​តំបន់​ដែល​កម្មករ​ជួប​គ្រោះថ្នាក់​នោះ គឺ​ឋិត​នៅ​ភូមិ​ត្រូន ឧបសម្ពន្ធ​ភូមិ​អូរពោរ ឃុំ​ក្បាលដំរី ស្រុក​សំបូរ ដែល​ក្រុមហ៊ុន​ចិន ធ្លាប់​ធ្វើ​អាជីវកម្ម​រ៉ែ​មាស ហើយ​ពលរដ្ឋ​នៅ​មូលដ្ឋាន​ធ្វើ​ជា​កម្មករ​អោយ​ក្រុមហ៊ុន ក៏ប៉ុន្តែ​ក្រុមហ៊ុន​ចិន បាន​ផ្អាក​អាជីវកម្ម​មួយ​រយៈ​បន្សល់​រណ្ដៅ​ជីក​រ៉ែ​មាស និង​កាកសំណល់​ផ្សេងៗ ដែល​ក្រុម​កម្មករ​ទាំង​នោះ​នៅ​បន្ត​មុខ​របរ​នេះ​រហូត​ដល់​បច្ចុប្បន្ន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល