តំណាង​អយ្យការ​ខេត្ត​ក្រចេះ សម្រេច​ដោះលែង​សកម្មជន​ការពារ​ព្រៃ​ឈើ​វិញ​ហើយ

ដោយ វ៉ែន សុមេធ
2020-03-16
អ៊ីម៉ែល
មតិ
Share
បោះពុម្ព
លោក អ៊ូច ឡេង (កាន់​ថង់​ក្រហម) និង​សហគមន៍​ព្រៃ​ឡង់ ៣នាក់​ទៀត នៅ​ក្រោយ​ពេល​តំណាង​អយ្យការ​ខេត្ត​ក្រចេះ សម្រេច​ដោះលែង នៅ​ថ្ងៃ​ទី១៦ ខែ​មីនា ឆ្នាំ២០២០។
លោក អ៊ូច ឡេង (កាន់​ថង់​ក្រហម) និង​សហគមន៍​ព្រៃ​ឡង់ ៣នាក់​ទៀត នៅ​ក្រោយ​ពេល​តំណាង​អយ្យការ​ខេត្ត​ក្រចេះ សម្រេច​ដោះលែង នៅ​ថ្ងៃ​ទី១៦ ខែ​មីនា ឆ្នាំ២០២០។
រូប៖ សកម្មជន​បរិស្ថាន

តំណាង​អយ្យការ​អម​សាលា​ដំបូង​ខេត្ត​ក្រចេះ​សម្រេច​ដោះ​លែង លោក អ៊ូច ឡេង និង​សហគមន៍​ព្រៃ​ឡង់ ៣នាក់​ទៀត នៅ​វេលា​ម៉ោង ១២:០០ ថ្ងៃ​ទី១៦ ខែ​មីនា ក៏​ប៉ុន្តែ​តម្រូវ​ឱ្យ​ពួក​គេ​ធ្វើ​កិច្ចសន្យា ទទួល​ស្គាល់​កំហុស និង​បញ្ឈប់​សកម្មភាព​ការពារ​ព្រៃ​ឈើ។

បើ​ទោះ​ជា​ត្រូវ​បាន​ដោះ​លែង​ហើយ​ក្ដី ក៏​សកម្មជន​បរិស្ថាន​ទាំង ៤នាក់ ខក​ចិត្ត​ចំពោះ​ទង្វើ​របស់​អាជ្ញាធរ​រដ្ឋាភិបាល ដែល​បាន​គាប​សង្កត់​សេរីភាព​ក្នុង​បេសកកម្ម​ការពារ​ព្រៃ​ឈើ​របស់​ពួក​គេ តែ​មិន​បាន​អនុវត្ត​ច្បាប់​លើ​ក្រុម​ឧក្រិដ្ឋជន ដែល​កាប់​បំផ្លាញ​ព្រៃ​ឈើ។

ការ​សម្រេច​ដោះ​លែង​នេះ ក្រោយ​ពី​ផ្ទុះ​ការ​តវ៉ា​អស់​រយៈ​ពេល ២ថ្ងៃ​ជាប់​គ្នា ពី​សំណាក់​ក្រុម​ពលរដ្ឋ ​អ្នក​ស្រឡាញ់​បរិស្ថាន ព្រះសង្ឃ និង​អង្គការ​សង្គម​ស៊ីវិល​ជាង ៥០នាក់ ដើរ​ហែ​ក្បូន​ធម្មយាត្រា កាន់​បដា​ ស្រែក​តាម​ផ្លូវ​សាធារណៈ និង​នៅ​ខាង​មុខ​សាលា​ដំបូង​ខេត្ត​ក្រចេះ ដើម្បី​ទាមទារ​ឱ្យ​ដោះ​លែង​អ្នក​ទាំង ៤នាក់​នោះ។ ពួក​គេ​បាន​កាន់​បដា សរសេរ​ថា អ្នក​កាប់​ឈើ​មិន​ចាប់ បែរ​ជា​ចាប់​អ្នក​ការពារ​ព្រៃ​ឈើ​ទៅ​វិញ សកម្មជន​ការពារ​ព្រៃ​ឈើ ពុំ​មែន​ជា​ឧក្រិដ្ឋជន​ទេ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស​អាដហុក (ADHOC) លោក ស៊ឹង សែនករុណា ឱ្យ​ដឹង​នៅ​ថ្ងៃ​ទី១៦ មីនា​ថា តំណាង​អយ្យការ​ខេត្ត​ក្រចេះ ពុំ​បាន​ចោទ​ប្រកាន់​ពួក​គាត់​ទាំង ៤នាក់​នោះ​ទេ ប៉ុន្តែ​ព្រះរាជអាជ្ញា​បាន​ដាក់​ឱ្យ​ពួក​គេ ឋិត​ក្នុង​ការ​ស៊ើប​អង្កេត ដែល​ជា​កត្តា​ប្រឈម​ធ្វើ​ឱ្យ​រាំង​ខ្ទប់​ដល់​បេសកកម្ម​ការពារ​ព្រៃ​ឈើ​របស់​ពួក​គាត់ ខណៈ​ដែល​ឧក្រិដ្ឋកម្ម​ព្រៃ​ឈើ​បន្ត​កើត​មាន​ជា​រៀងរាល់​ថ្ងៃ។ លោក​បន្ថែម​ថា​ តំណាង​អយ្យការ​រក​ឃើញ​រូបភាព វីដេអូ និង​សម្ភារៈ របស់​អ្នក​ទាំង ៤នាក់​នោះ ដែល​បង្ហាញ​ពី​បទ​ល្មើស​ព្រៃ​ឈើ​ខ្នាត​ធំ​ក្នុង​តំបន់​ព្រៃ​ឡង់។ ហេតុនេះ​ព្រះរាជ​អាជ្ញា​គួរ​តែ​ស៊ើប​អង្កេត​ឧក្រិដ្ឋកម្ម​ព្រៃ​ឈើ​នៅ​តំបន់​នោះ៖«ប្រអប់​ភស្តុតាង​ដែល​បាន​ចាប់​យក​ពី​លោក អ៊ូច ឡេង យើង​មើល​ឃើញ​ថា ភស្តុតាង​ទាំង​អស់​នោះ គឺ​សុទ្ធតែ​ជា​ភស្តុតាង​ដែល​ក្រុម​សកម្មជន​ព្រៃ​ឈើ​បាន​ថត​យក​រូបភាព សុទ្ធតែ​បទ​ល្មើស​ព្រៃ​ឈើ​ក្នុង​តំបន់​ព្រៃ​ឡង់ មាន​ទាំង​ដាក់​រូប GPS ដឹង​ពី​កន្លែង​កាប់​បំផ្លាញ​ទាំង​អស់​ហ្នឹង​ទៀត។ អ៊ីចឹង​ទាំង​អស់​ហ្នឹង គួរតែ​លោក ព្រះរាជអាជ្ញា​ហ្នឹង ធ្វើ​ការ​បើក​ការ​ស៊ើប​អង្កេត ទៅ​លើ​បទ​ល្មើស​ព្រៃ​ឈើ​ទាំង​អស់​ហ្នឹង​វិញ ដោយ​សហការ​ជាមួយ​នឹង​សកម្មជន ដែល​បាន​ឃាត់​ខ្លួន​ប៉ុន្មាន​ថ្ងៃ​ហ្នឹង។ អា​ហ្នឹង​គឺ​ជា​រឿង ដែល​ល្អ​ប្រសើរ​បំផុត»

មន្ត្រី​សិទ្ធិ​មនុស្ស​រូប​នេះ​បន្ថែម​ថា អ្នក​ទាំង ៤នាក់​នោះ បាន​ឯកភាព​ផ្ដិត​មេដៃ ធ្វើ​កិច្ចសន្យា បញ្ឈប់​សកម្មភាព និង​ទទួល​ស្គាល់​កំហុស ក៏​ប៉ុន្តែ​ខ្លឹមសារ​ក្នុង​កិច្ចសន្យា​នោះ មិន​បាន​បញ្ជាក់​ថា ពួក​គេ​បាន​ប្រព្រឹត្ត​កំហុស​អ្វី​នោះ​ទេ។ លោក​យល់​ថា ការ​សម្រេច​ដោះ​លែង​នេះ គួរ​តែ​កើត​ចេញ​ពី​សមត្ថកិច្ច​តាំង​ពី​ថ្នាក់​មូលដ្ឋាន​មក​ម្ល៉េះ ចៀសវាង​អូស​បន្លាយ​ពេល​ឃុំ​ខ្លួន និង​សាកសួរ​ពួក​គេ​អស់​រយៈ​ពេល ៤ថ្ងៃ បង្ក​ឱ្យ​ប៉ះពាល់​សិទ្ធិ​សេរីភាព​របស់​ពួក​គាត់៖ «យើង​មាន​ការ​ព្រួយ​បារម្ភ ព្រោះ​ទឹក​ចិត្ត​ពួក​គាត់ នៅ​តែ​ចង់​ធ្វើ​ការងារ​ការពារ​ព្រៃ​ដដែល​ទាំង​មាន​កិច្ច​សន្យា​អ៊ីចឹង បើ​សិន​ជា គាត់​នៅ​តែ​បន្ត​ធ្វើ​យើង​សោក​ស្ដាយ បើ​សិន​ជា​មាន​កិច្ច​សន្យា​បែប​ហ្នឹង ធ្វើ​ឱ្យ​មាន​ការ​សោក​ស្ដាយ បើ​ខាង​ក្រុមហ៊ុន ឬ​ក៏​ឧក្រិដ្ឋ​ជន​ព្រៃ​ឈើ ដូច​ជា អត់​មាន​កិច្ច​សន្យា​អី​ផង គេ​នៅ​តែ​បន្ត​ធ្វើ គេ​នៅ​តែ​បំផ្លាញ​ព្រៃ​ឈើ ប៉ុន្តែ​ពួក​គាត់​វិញ បែរ​ជា​រាំង​ខ្ទប់​សកម្មភាព​ដោយ​កិច្ចសន្យា​បែប​ហ្នឹង​ទៅ​វិញ»

មុន​ពេល​ដោះលែង សកម្មជន​បរិស្ថាន​ទាំង ៤នាក់ តំណាង​អយ្យការ​ខេត្ត​ក្រចេះ បាន​បង្គាប់​ឱ្យ​ពួក​គេ​ផ្ដិត​មេ​ដៃ​រួមគ្នា ធ្វើ​កិច្ច​សន្យា បញ្ឈប់​សកម្មភាព រហូត​ដល់​ថ្ងៃ​ដែល​ចុះ​បញ្ជី​ក្នុង​ក្រសួង​មហាផ្ទៃ​រួចរាល់។ ខ្លឹមសារ​កិច្ចសន្យា​នោះ​បន្ថែម​ថា ពួក​គេ​ទាំង ៤នាក់ បាន​ទទួល​ស្គាល់​កំហុស ហើយ​ប្រសិន​បើ​មិន​អនុវត្ត​តាម​កិច្ច​សន្យា​ទេ ព្រះរាជអាជ្ញា​នឹង​ចោទ​ប្រកាន់​តាម​ច្បាប់។

លោក អ៊ូច ឡេង ជា​ម្ចាស់​ពានរង្វាន់​វីរជន​បរិស្ថាន Goldman Environmental Prize និង​ជា​ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា រួម​ទាំង​អ្នក​សហគមន៍​ព្រៃ​ឡង់ ៣នាក់​ទៀត គឺ​លោក ស្រី ថី លោក ខេម សុឃី និង​លោក មេត ម៉ាត់ ត្រូវ​បាន​កង​សន្តិសុខ​របស់​ក្រុមហ៊ុន ស៊ីង បាយអូថេក (Think Biotech) ចាប់​ឃាត់​ខ្លួន​កាល​ពី​ម៉ោង ៩ព្រឹក ថ្ងៃ​ទី១៣ ខែ​មីនា នៅ​គ្រា​ដែល​ពួកគេ​ចុះ​ស៊ើបអង្កេត​អាជីវកម្ម​ឈើ​ខុស​ច្បាប់ ក្នុង​តំបន់​ព្រៃ​ឡង់។

ប្រធាន​សហគមន៍​ព្រៃ​ឡង់​ខេត្ត​ព្រះវិហារ ដែល​អាជ្ញាធរ​ឃាត់​ខ្លួន គឺ លោក ស្រី ថី និយាយ​ថា បើ​ទោះ​បី​ជា អាជ្ញាធរ និង​ក្រុមហ៊ុន​ធ្វើ​ទុក្ខ​បុក​ម្នេញ​លោក បែប​នេះ​ក្តី ក៏​លោក​នៅ​តែ​ប្ដេជ្ញា​បន្ត​បេសកកម្ម​ការពារ​ព្រៃ​ឈើ​ស្រប​តាម​រដ្ឋធម្មនុញ្ញ​ដដែល។ លោក​បញ្ជាក់​ថា សហគមន៍​ព្រៃ​ឡង់ គ្មាន​ចេតនា​ធ្វើ​ឱ្យ​ប៉ះពាល់ ដំណើរ​ការ​វិនិយោគ​របស់​ក្រុមហ៊ុន​ឯកជន​ណា​មួយ​នោះ​ទេ។ ប្រសិន​បើ​ក្រុមហ៊ុន​មិន​បំផ្លាញ​ព្រៃ​ឈើ ក្នុង​តំបន់​ព្រៃ​ឡង់ និង​អនុវត្ត​ឲ្យ​ត្រឹម​ត្រូវ​តាម​ច្បាប់​នោះ។ ក៏​ប៉ុន្តែ​ផ្ទុយ​ទៅ​វិញ​នៅ​តែ​មាន​រថយន្ត​ដឹក​ឈើ និង​ការ​កាប់​បំផ្លាញ​ព្រៃ​ឈើ​ខុស​ច្បាប់ ក្នុង​តំបន់​ព្រៃ​ឡង់​យ៉ាង​ពេញ​អនាធិបតេយ្យ ហើយ​អំពើ​នេះ​មាន​ជាប់​ពាក់ព័ន្ធ និង​ក្រុមហ៊ុន​សម្បទាន​សេដ្ឋកិច្ច​មួយ​ចំនួន៖ «ទឹក​ចិត្ត​របស់​ខ្ញុំ មិន​ទាន់​ជា​រាំង​ស្ទះ​ទេ​នៅ​ឡើយ​ទេ។ ខ្ញុំ​មិន​បាន​ធ្វើ​មក​លើ​ក្រុមហ៊ុន​ទេ ខ្ញុំ​ធ្វើ​មក​លើ​ព្រៃ​ឡង់​តែ​ម្ដង។ ឡាន​ដឹក​ឈើ​ក៏​មាន ការ​កាប់​បំផ្លាញ​ព្រៃ​ឈើ​ក្នុង​ព្រៃ​ឡង់​ក៏​មាន អត់​ចេះ​ខ្វះ​ទេ។ គាត់ (ព្រះរាជអាជ្ញា) បាន​មើល​រូបភាព ដែល​ខ្ញុំ​ថត​បាន​អស់​ហើយ ប៉ុន្តែ​ពួក​ខ្ញុំ​មិន​ទាន់​ស្នើសុំ​ឱ្យ​គាត់ (តំណាង​អយ្យការ) ធ្វើ​ស៊ើប​អង្កេត​ទៅ​លើ​បទ​ល្មើស​អី​នៅ​ឡើយ​ទេ»

អាស៊ី​សេរី​បាន​ព្យាយាម​ទាក់ទង​តំណាង​អយ្យការ​ខេត្ត​ក្រចេះ លោក សោ វុទ្ធី និង​តំណាង​ក្រុមហ៊ុន ស៊ីង បាយអូថេក​ (Think-Biotech) ដើម្បី​សុំ​ការ​បំភ្លឺ​បន្ថែម​រឿង​នេះ តែ​ទូរស័ព្ទ​ហៅ​ចូល​ច្រើន​ដង​គ្មាន​អ្នក​ទទួល នៅ​ថ្ងៃ​ទី១៦ មីនា។

សហគមន៍​ព្រៃ​ឡង់ ខេត្ត​ស្ទឹងត្រែង លោក យឹម សុភ័ក្ត្រ អះអាង​ថា អាជ្ញាធរ​អនុវត្ត​ច្បាប់​មាន​ស្តង់ដារ​ពីរ មាន​ន័យ​ថា អាជ្ញាធរ​មិន​បាន​អនុវត្ត​ច្បាប់​លើ​អ្នក ដែល​បំផ្លាញ​ព្រៃ​ឈើ​ខុស​ច្បាប់​ទេ បែរ​ជា​ចាប់​ចង និង​ធ្វើ​ទុក្ខ​បុក​ម្នេញ​លើ​អ្នក​ដែល​ការពារ​ព្រៃ​ឈើ​ទៅ​វិញ៖ «យើង​នៅ​តែ​មិន​ទាន់​ជ្រះ​ស្រឡះ​ក្នុង​ចិត្ត ជាមួយ​នឹង​ចំណាត់​ការ​របស់​អាជ្ញាធរ ដែល​ធ្វើ​ការ​គាបសង្កត់ តែ​អ្នក​ដែល​ការពារ​ព្រៃ​ឈើ ប៉ុន្តែ​រាល់​សកម្មភាព​ឧក្រិដ្ឋ​ជន​ព្រៃ​ឈើ​យើង ពុំ​ទាន់​ឃើញ​មាន​ចំណាត់​ការ​ដែល មាន​ភាព​សកម្ម​ដូច​គ្នា​នេះ។ នេះ​មាន​ន័យ​ថា រាល់​ការ​អនុវត្ត​ច្បាប់​លើ​ឧក្រិដ្ឋជន​ព្រៃ​ឈើ និង​អ្នក​ដែល​ការពារ​ព្រៃ​ឈើ​ហ្នឹង វា​មាន​ស្តង់ដារ​ពីរ»

លោក យឹម សុភ័ក្ត្រ បញ្ជាក់​ទៀត​ថា សហគមន៍​ព្រៃ​ឡង់ កំពុង​មាន​ភាព​ចម្រូងចម្រាស ជាមួយ​ក្រសួង​បរិស្ថាន ដែល​ជា​ហេតុ​ធ្វើ​ឱ្យ​ពួក​គេ​លំបាក​ចុះ​ល្បាត​ព្រៃ និង​ឃ្លាំមើល​បទ​ល្មើស​ព្រៃ​ឈើ​ក្នុង​តំបន់​ព្រៃ​ឡង់ ហេតុ​នេះ​ពួក​គេ​កំពុង​ពិភាក្សា​គ្នា រក​ដំណោះ​ស្រាយ ដើម្បី​ឲ្យ​ពួក​គេ​អាច​ការពារ​ព្រៃ​ឈើ និង​ធនធាន​ធម្មជាតិ បាន​ដោយ​គ្មាន​ការ​រារាំង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល