ពលរដ្ឋ​រងគ្រោះ​ដីធ្លី​នៅ​ឃុំ​រួសរាន់ ខេត្តព្រះវិហារ​ថា ខ្លួន​បន្ត​ការពារ​ព្រៃឈើ ទោះ​រង​ការ​គំរាម​កំហែង

ដោយ សុជីវី
2024.02.09
ពលរដ្ឋ​រងគ្រោះ​ដីធ្លី​នៅ​ឃុំ​រួសរាន់ ខេត្តព្រះវិហារ​ថា ខ្លួន​បន្ត​ការពារ​ព្រៃឈើ ទោះ​រង​ការ​គំរាម​កំហែង ប្រជា​សហគមន៍​ព្រៃឡង់ និង​ក្រុម​យុវជន​ប្រទះឃើញ​គំនរ​ឈើ​ហ៊ុប​រាប់រយ​ដើម នៅ​តាម​ដងផ្លូវ​ចូល​ព្រៃ​ឡង់ ក្បែរ​ការដ្ឋាន​របស់​ក្រុមហ៊ុនវៀតណាម​ភីអ៊ិនធី (PNT Co., Ltd.) កាល​ពី​ថ្ងៃទី២៨ ខែ​ឧសភា ឆ្នាំ​២០២១។
Photo Provided

ពលរដ្ឋ​កំពុង​រងគ្រោះ​ដីធ្លី រស់នៅ​ឃុំ​រួសរាន់ ខេត្តព្រះវិហារ តស៊ូ​ការពារ​ព្រៃឈើ​ដែនជម្រកសត្វព្រៃ​ព្រៃឡង់ បើ​ទោះបី​ពួកគេ​ប្រឈម​បាត់បង់​ដីស្រែ​ចម្ការ និង​រង​ការ​គំរាមកំហែង​យ៉ាង​ណាក៏ដោយ រីឯ​ពលរដ្ឋ​ខ្លះទៀត​កំពុង​ជាប់​បណ្ដឹង​នៅ​តុលាការ​នៅ​ឡើយ បន្ទាប់​ពី​ពួកគេ​ចេញ​មុខ​តវ៉ា​ជាមួយ ក្រុមហ៊ុន​ដី​សម្បទាន​សេដ្ឋកិច្ច ភី អិន ធី ខូ អិលធីឌី (PNT Co.,Ltd) ដែល​បាន​រំលោភ​យក​ដីធ្លី​របស់​ពួកគេ។

ពលរដ្ឋ​រស់នៅ​ភូមិ​ឫស្សីស្រុក ឃុំ​រួសរាន់ ស្រុក​រវៀង ខេត្តព្រះវិហារ ដែល​មាន​វិវាទ​ដីធ្លី​ជាមួយ​ក្រុមហ៊ុន ភី អិន ធី ជិត​១​ទសវត្ស​មកនេះ ពួកគេ​បាន​កៀរគរ​គ្នា​តស៊ូ​ប្រយុទ្ធ​ប្រឆាំង​មិន​ឲ្យ​ក្រុមហ៊ុន និង​អ្នក​មាន​អំណាច​ចូល​កាប់​បំផ្លាញ​ព្រៃឈើ​នៅក្នុង​ដែន​ជម្រក​សត្វព្រៃ​ព្រៃឡង់ បើ​ទោះ​បី​ពួកគេ​កំពុង​រង​ពាក្យបណ្ដឹង​ពី​ក្រុមហ៊ុន និង​រង​ការ​គំរាមកំហែង​យ៉ាង​ក្ដី។

បុរស​មាឌ​ល្អិត​សម្បុរ​ខ្មៅ និង​ជា​អ្នក​ចេញមុខ​តវ៉ា​ប្រឆាំង​ការ​កាប់​ឈើ​ខុសច្បាប់​នៅ​តំបន់​ព្រៃឡង់ លោក ខេម សុឃី បាន​រៀបរាប់​ប្រាប់​វិទ្យុ​អាស៊ីសេរី​នៅ​ថ្ងៃទី​០៧ ខែ​កុម្ភៈ​ថា ក្រុមហ៊ុន​បាន​ដាក់​គ្រឿងចក្រ​មក​ឈូស​ឆាយ​ដី​ស្រែចម្ការ​របស់​ពលរដ្ឋ​ជិត ១​ទសវត្ស​មក ដោយ​មិនទាន់​ឃើញ​មានការ​ដោះស្រាយ​នោះ​ទេ មិនតែប៉ុណ្ណោះ​ក្រុមហ៊ុន​បាន​ប្ដឹង​ប្រជាពលរដ្ឋ​ចំនួន​៤​នាក់​ទៅ​តុលាការ ពី​បទ​ញុះញង់​ថែម​ទៀត។ ទោះបី​រងគ្រោះ​ដីធ្លី និង​រង​ពាក្យបណ្ដឹង​យ៉ាង​ក្ដី ក៏​បុរស​វ័យ​៤០​ឆ្នាំ​រូប​នេះ ស្ម័គ្រចិត្ត តស៊ូ​មតិ​ជាមួយ​ក្រុមហ៊ុន និង​ចូលរួម​ការពារ​ព្រៃឈើ​នៅក្នុង​ដែន​ជម្រក​សត្វព្រៃ​ឡង់​ដែល​ជា​សម្បត្តិ​ដូនតា​របស់​ពួកគេ។

លោក ខេម សុឃី តែងតែ​ប្រមូល​ពលរដ្ឋ​ស្ម័គ្រចិត្ត នៅ​ក្នុង​ភូមិ ចុះ​ល្បាត​ព្រៃ និង​ស្រាវជ្រាវ​រក​បទល្មើស​ព្រៃ​ឈើ​នៅក្នុង​តំបន់​ការពារ​ព្រៃឡង់ ដោយ​ប្រឈម​ការ​ចាប់ខ្លួន​ម្ដង​ហើយ​ម្ដង​ទៀត តែ​យ៉ាងណា​លោក​ថា មិន​ខ្លាច​ញញើត និង​រាថយ ក្នុង​ការ​ការពារ​ទ្រព្យសម្បត្តិ​ជាតិ និង​មិន​ខ្លាច​ការ​គំរាមកំហែង​នោះ​ទេ។

លោក ខេម សុឃី៖ «ធ្វើការ​ទៅលើ​វិស័យ​ធនធាន​ធម្មជាតិ​ដូចជា​ដីធ្លី ព្រៃឈើ​កន្លងមក​យើង​វា​ធ្លាប់​គេ​ចាប់ខ្លួន ធ្លាប់​មាន​ដីកាកោះ ខ្ញុំ​នៅតែ​មាន​ឆន្ទៈ​ក្នុង​ការ​ការពារ​លុះត្រាតែ​ខ្ញុំ ជីវិត​ខ្ញុំ​សូន្យ​បាន​ខ្ញុំ​លែង​ការពារ​នូវ​សម្បត្តិ​ជាតិ​ដែល​ជា​សម្បត្តិ​រួម​របស់​យើង​ទាំងអស់​គ្នា»

ពលរដ្ឋ​ម្នាក់​ដែល​បាន​ចូល​ល្បាត​ព្រៃ​ជា​ញឹកញាប់ លោក គង់ ថុល បាន​រៀបរាប់​ឲ្យ​ដឹង​ថា លោក​ចូលរួម​ជាមួយ​អ្នកភូមិ​ដើម្បី​ការពារ​ព្រៃឈើ នៅក្នុង​តំបន់​ព្រៃ​ឡង់​ដែល​ជា​សម្បត្តិ​ជាតិ​ទាំងអស់គ្នា និង​ទុក​សម្រាប់​កូនចៅ​ជំនាន់​ក្រោយ​។ លោក​ថា ចាប់តាំង​ពី​លោក​ដឹងក្ដី​មក អ្នក​ភូមិ​តែងតែ​ចូល​ទៅ​រក​អនុផល​ព្រៃឈើ ក្នុង​តំបន់​ព្រៃ​ឡង់​ដើម្បី​រក​ប្រាក់​ផ្គត់ផ្គង់​គ្រួសារ ប៉ុន្តែ​មួយ​រយៈ​ចុង​ក្រោយ​នេះ បទល្មើស​ព្រៃឈើ​បាន​កើន​ឡើងជា​បន្ត​បន្ទាប់ ពី​សំណាក់​ក្រុមហ៊ុន​នៅ​តំបន់​នោះ ចំណែក​មន្ត្រី​ឈរ​ជើង​នៅ​តំបន់​នោះ មិន​អើពើ​ទប់ស្កាត់​បទល្មើស​ទាំង​អស់​នេះ​ឡើយ ទើប​សហគមន៍​នាំគ្នា​ការពារ​ព្រៃឈើ​ទុក​សម្រាប់​កូនចៅ​ជំនាន់​ក្រោយ។

លោក គង់ ថុល៖ «ការពារ​ព្រៃឈើ​ទុក​ឲ្យ​ក្មេង​ជំនាន់ក្រោយ ឲ្យ​បាន​ដឹង​ថា ព្រៃឈើ​យើង​អាស្រ័យ​ផល​បាន​អ្វី​ខ្វះ នៅសល់​ព្រៃឈើ​យើង​បាន​ប្រយោជន៍​អ្វីខ្លះ បាន​ច្រើន​មែន​ទែន គិត​ទៅ​ទទួល​អាស្រ័យ​ផល»

ទាក់ទង​នឹង​ការ​ការពារ​ព្រៃឈើ​នេះ​ដែរ មេឃុំ​រួសរាន់ លោក ប្រាក់ វេត ឲ្យ​ដឹង​ថា កន្លងទៅ​អាជ្ញាធរ​ឃុំ​តែងតែ​ចូលរួម​ជាមួយ​ជា​ពលរដ្ឋ​ដើម្បី​ទប់ស្កាត់​បទល្មើស​ព្រៃឈើ ហើយ​លោក​លើកទឹកចិត្ត​និង​គាំទ្រ​ឲ្យ​ពលរដ្ឋ​នៅក្នុង​ឃុំ​បន្តការងារ​ការពារ​ព្រៃឈើ​ថែមទៀត ដើម្បី​ថែរក្សា​ការពារ​ព្រៃឈើ​ទុក​សម្រាប់​កូនចៅ​ជំនាន់​ក្រោយ។

លោក ប្រាក់ វេត៖ «ការ​ស្ម័គ្រចិត្ត​របស់​ពួកគាត់​មាន​អ្វី ការ​ខិតខំ​ប្រឹងប្រែង​របស់​ពួកគាត់​មាន​តែ​គាំទ្រ ប្រជាពលរដ្ឋ​យើង​ក៏​បាន​អាស្រ័យ​ផល​ពី​ធនធាន​ធម្មជាតិ​ដែរ ជាពិសេស​ពួកគាត់​ដែល​ខំប្រឹង​ការពារ​នេះឯង»

កាលពី​ឆ្នាំ​២០១៥ ក្រុមហ៊ុន​ចំនួន​២ គឺ​ក្រុមហ៊ុន ភី អិន ធី និង​ក្រុមហ៊ុន​វៀតណាម ឈ្មោះ ធី ង៉ា (Ty Nga) បាន​រំលោភ​យក​ដីស្រែ​ចម្ការ​របស់​ប្រជាពលរដ្ឋ​ចំនួន ៣​ឃុំ គឺ​ឃុំ​រៀបរយ ឃុំ​រួសរាន់ និង​ឃុំ​រតនៈ នៅ​ស្រុក​រវៀង ខេត្ត​ព្រះវិហារ រាប់ពាន់​ហិកតារ ដោយ​ក្រុមហ៊ុន​ទាំងនោះ​អះអាង​ថា ពួកគេ​ទទួល​បាន​ដី​សម្បទាន​សេដ្ឋកិច្ច​ពី​រដ្ឋាភិបាល ក្រោម​រូបភាព​ធ្វើ​ការ​អភិវឌ្ឍ ហើយ​សហគមន៍​រាប់​រយ​នាក់ ក៏បាន​ចេញ​តវ៉ា​យក​ដីស្រែ​ចម្ការ​របស់​ពួកគេ​មកវិញ ប៉ុន្តែ​នៅ​មិន​ទាន់​មាន​ដំណោះស្រាយ​នៅឡើយ​រហូត​មក​ទល់​ពេល​នេះ។ បច្ចុប្បន្ន​នេះ​ក្រុមហ៊ុន​ទាំងពីរ​មិនបាន​អភិវឌ្ឍ​អ្វី​ទៅតាម​គោលការណ៍​នោះ​ទេ ក្រៅពី​កាប់​ប្រមូល​ឈើ​លក់​ដើម្បី​ជា​ប្រយោជន៍​ផ្ទាល់ខ្លួន​ប៉ុណ្ណោះ។

ជុំវិញ​រឿង​នេះ អ្នកសម្របសម្រួល​គម្រោង​នៃ​សមាគម​បណ្ដាញ​យុវជន​កម្ពុជា (CYN) លោក អូត ឡាទីន យល់​ឃើញ​ថា សហគមន៍​នៅតែ​បន្ត​ការពារ​ព្រៃឈើ​របស់​ពួកគាត់ និង​បន្ត​ស្វែងរក​យុត្តិធម៌​បញ្ហា​ដីធ្លី​សម្រាប់​សហគមន៍​របស់​ពួកគាត់ វា​ជា​សហគមន៍​គំរូ​មួយ​ដែល​ចេះ​សាមគ្គី​គ្នា ប្រយុទ្ធ​ប្រឆាំង​អំពើ​អយុត្តិធម៌ និង​ការ​បំផ្លិចបំផ្លាញ​ធនធាន​ធម្មជាតិ​នៅ​តំបន់​ការពារ ។ លោក​លើកទឹកចិត្ត​ទៅ​ដល់​អ្នកភូមិ​ឫស្សីស្រុក ឲ្យ​បន្ត​ខិតខំ​ប្រឹងប្រែង​បន្ថែម​ទៀត បើ​ទោះបី​រង​ការ​គំរាមកំហែង ដើម្បី​ជា​គំរូ​ភាព​ដល់​ក្មេងៗ​ជំនាន់​ក្រោយ។

លោក អូត ឡាទីន៖ «សំណុំរឿង​របស់​ពួកគាត់​នៅក្នុង​ដៃ​តុលាការ​នៅ​ឡើយ ប៉ុន្តែ​ពួកគាត់​ក៏​នៅ​មាន​ស្មារតី​សង្គម​ស្រឡាញ់​ទ្រព្យសម្បត្តិ​របស់​ជាតិ​ដែរ ហើយ​ពួកគាត់​ចូលរួម​ក្រាញ​ននៀល​ក្នុង​ការ​រួមចំណែក​ការពារ​ព្រៃឈើ នៅក្នុង​តំបន់​ព្រៃឡង់​យ៉ាងសកម្ម»

ក្រុមហ៊ុន ភី អិន ធី ទទួល​បាន​ដី​សម្បទាន​សេដ្ឋកិច្ច​ពី​រដ្ឋាភិបាល ជិត​៨​ពាន់​ហិកតារ (៧៩០០) ដើម្បី​ធ្វើ​ការ​វិនិយោគ​ដាំ​ដំណាំ​កៅស៊ូ។ ក្រោយមក​ក្រុមហ៊ុន​មួយ​នេះ ត្រូវ​បាន​ក្រសួង​កសិកម្ម រុក្ខា ប្រមាញ់ និង​នេសាទ កាល​ពី​ឆ្នាំ​២០២០ អនុញ្ញាត​ឱ្យ​ក្រុមហ៊ុន ម៉ាឃល ឡូជីស្ទីក (ខេមបូឌា) (MACLE LOGISTICS) របស់​លោក សយ សុផល ធ្វើ​ការ​កាប់​ប្រមូល​ផល​អនុផល​ព្រៃឈើ​ក្នុង​អនុតំបន់ II អនុតំបន់ III និង​អនុតំបន់ IV នៃ​ដី​សម្បទាន​សេដ្ឋកិច្ច​របស់​ក្រុមហ៊ុន ភី អ៊ិន ធី។ មាន​ទីតាំង​ជាប់​តំបន់​ព្រៃឡង់ ស្រុក​រវៀង ខេត្ត​ព្រះវិហារ។

ក្រុម​សកម្មជន​បរិស្ថាន និង​ប្រជា​សហគមន៍ បាន​រក​ឃើញ​ថា បរិវេណ​ក្រុមហ៊ុន ភី អិន ធី បាន​ក្លាយជា​កន្លែង​ស្តុក​ឈើ​ខុសច្បាប់ របស់​ក្រុមហ៊ុន ម៉ាឃល ឡូជីស្ទីក ដែល​បាន​បញ្ជូន​កម្មករ​រាប់​រយ​នាក់​ចូល​ទៅ​កាប់​ឈើ​នៅក្នុង​តំបន់​ការពារ​ព្រៃឡង់។ សហគមន៍​បាន​អំពាវនាវ និង​រាយការណ៍​ទៅ​ក្រសួង​ពាក់ព័ន្ធ ជាច្រើន​សារ​ដើម្បី​ធ្វើការ​ទប់ស្កាត់ ប៉ុន្តែ​ស្ថាប័ន​ដែល​ទទួលខុសត្រូវ​ទាំងនេះ​មិន​ត្រឹមតែ​មិន​យកចិត្តទុកដាក់​ចាត់​វិធានកា​រ​បង្ក្រាប​ឧក្រិដ្ឋកម្ម​ព្រៃឈើ​ប៉ុណ្ណោះ​ទេ ថែមទាំង​ហាមឃាត់​មិន​ឱ្យ​សហគមន៍​ចូល​ល្បាត​ព្រៃ​នៅក្នុង​តំបន់​ព្រៃឡង់​ថែម​ទៀត ។ ប៉ុន្តែ​អ្នកភូមិ​ឫស្សីស្រុក នៅតែ​ក្រាញ​ននៀល ចុះ​ល្បាត​ការពារ​ព្រៃឈើ​នៅ​តំបន់​ព្រៃ​ឡង់ រហូត​ក្រុមហ៊ុន​ផ្អាក​សកម្មភាព​ចូល​កាប់​ឈើ​ទ្រង់ទ្រាយ​ធំ​នៅក្នុង​តំបន់​ព្រៃ​ឡង់​មួយរយៈ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។