ប្រជា​សហគមន៍​ព្រៃឡង់​ថា អាជ្ញាធរ​បើក​ដៃ​ឱ្យ​ពលរដ្ឋ​សម្រុក​កាប់​ឈើ​លក់​ក្នុង​ព្រៃឡង់​ មុន​ពេល​បោះ​ឆ្នោត

ដោយ មាន ឫទ្ធិ
2022.03.31
Share on WhatsApp
Share on WhatsApp
ប្រជា​សហគមន៍​ព្រៃឡង់​ថា អាជ្ញាធរ​បើក​ដៃ​ឱ្យ​ពលរដ្ឋ​សម្រុក​កាប់​ឈើ​លក់​ក្នុង​ព្រៃឡង់​ មុន​ពេល​បោះ​ឆ្នោត រថយន្ត​ច្នៃ​របស់​ក្រុមហ៊ុន​វៀតណាម​ឈ្មោះ ភីអ៊ិនធី (PNT) ដឹក​ឈើ​ចេញ​ពី​ព្រៃ​ឡង់​ចូល​ដី​សម្បទាន​របស់​ខ្លួន នៅ​ថ្ងៃ​ទី២១ ខែមេសា ឆ្នាំ២០២១។
រូប៖ ពលរដ្ឋ​ផ្ដល់​ឲ្យ

ប្រជា​សហគមន៍​ព្រៃឡង់​អះអាង​ថា ​ពលរដ្ឋ​នៅ​មូលដ្ឋាន ​និង​ពលរដ្ឋ​ចំណូល​ស្រុក​រាប់​រយ​នាក់​​កំពុង​សម្រុក​កាប់ឈើ​មាន​តម្លៃ ​និង​ទន្ទ្រាន​ព្រៃ​រាន​យក​ដី​កាន់​តែ​ខ្លាំង ​ក្នុង​ដែន​ជម្រក​សត្វ​ព្រៃឡង់​ ក្នុង​ខេត្តក្រចេះ ​និង ​ខេត្តស្ទឹងត្រែង ​ដោយ​គ្មានការ​ទប់ស្កាត់​។ ​ពួកគេ​អះអាង​ថា​ អាជ្ញាធរ​បណ្តោយ​ឱ្យ​ពលរដ្ឋ​ប្រព្រឹត្ត​បទល្មើស​​ព្រៃឈើ​តាម​អំពើ​ចិត្ត ​នៅមុន​កាល​បោះឆ្នោត​ឃុំ ​សង្កាត់​ ដោយ​ខ្លាចក្រែង​ប៉ះពាល់​សន្លឹក​ឆ្នោត​របស់​គណបក្ស​កាន់​អំណាច​។

បណ្ដាញ​សហគមន៍​ព្រៃឡង់ និង​អ្នក​ឃ្លាំ​មើល​បរិស្ថានសង្កេតឃើញថា​​ សកម្មភាព​កាប់ឈើ​មាន​តម្លៃ ​និង ​កាប់ព្រៃ​ទន្ទ្រាន​យក​ដី ​ក្នុង​ដែន​ជម្រក​សត្វ​ព្រៃឡង់​​ធ្វើជា​កម្មសិទ្ធិ​នៅតែ​បន្ត​កើតមាន​កាន់តែ​ខ្លាំង​ឡើង ​នៅ​រយៈ​ពេល​ជាង​ ៣​ ខែ​ចុង​ក្រោយ​នេះ​។

ពួកគេ​អះអាង​ថា ​អាជ្ញាធរ​កំពុង​យក​ព្រៃឈើ ​ជាថ្នូរ​ដោះដូរ​សន្លឹកឆ្នោត​ ដោយ​មិន​គិតពី​គ្រោះ​មហន្តរាយ​ព្រៃឈើ ​ដែល​កំពុង​កើត​មាន​យ៉ាង​គគ្រឹក​គគ្រេង ​ក្នុង​តំបន់​អភិរក្ស​។

សមាជិក​សហគមន៍​ព្រៃឡង់​ខេត្តស្ទឹងត្រែង​លោក ​គង់ រី​ ប្រាប់​វិទ្យុអាស៊ីសេរី ​នៅ​ថ្ងៃ​ទី​៣១ ខែ​មីនា​ថា ​បច្ចុប្បន្ន​សកម្មភាព​កាប់ឈើ ​និង​ដឹកជញ្ជូន​ឈើ​កើត​មាន​យ៉ាង​ពេញ​ទំហឹង​ ខុស​ពី​ថ្ងៃ​ធម្មតា​ ដោយ​គ្មាន​ការបង្ក្រាប​ពី​អាជ្ញាធរ​ទាល់​តែ​សោះ។​ លោកថា​ ស្ទើរ​ជា​រៀងរាល់​ថ្ងៃ​មាន​ម៉ូតូ​យ៉ាង​ហោច​ណាស់​ ១០០​គ្រឿង ​និង​ គោយន្ត​ ៥០​គ្រឿង ​ដឹកឈើ​ចេញ​ពី​ព្រៃឡង់ ​កាត់​ភូមិសាស្ត្រ​ឃុំកាំងចាម​ និង​ឃុំសៀមបូក ​ស្រុកសៀមបូក ​ឆ្លង​កាត់​ទី​ស្នាក់ការ​មន្ត្រីបរិស្ថាន ​និង​នគរបាលមូលដ្ឋាន​។

លោក​អះអាង​ថា ​នគរបាល ​មន្ត្រី​អាវុធហត្ថ ​និង​ឆ្មាំអភិរក្ស​របស់​ក្រសួង​បរិស្ថាន​ ដែល​ឈរ​ជើង​យាមព្រៃ ​នៅ​កៀក​ព្រៃឡង់ ​មិនអើ​ពើបង្ក្រាប​បទល្មើស​ព្រៃឈើ​ទាំង​​នេះ​​ទេ​។ ​លោក​សង្កត់​ធ្ងន់​ថា​ ក្រុម​អ្នក​ដឹកឈើ​ត្រូវ​បង់​លុយ​ឱ្យ​សមត្ថកិច្ច​ តាម​ស្នាក់ការ​នីមួយៗ ​ទើប​អាច​ដឹក​ឈើ​បាន​៖ «អនាគត​ទៅ​ព្រៃឈើ​យើង​នឹង​អស់ ​នឹង​រលាយ​អស់​ ពី​មុន​មាន​ព្រៃ​ធំ ​គេ​កាប់​អស់​ ទៅ​ជា​ព្រៃ​របោះ​ទៅ​វិញ។​ វា​ហិន​ហោច​ខ្លាច​ផ្សា​ណាស់​ អ្នក​ធំ​ក៏​ទិញ ​ពលរដ្ឋ​លក់​ បើ​គ្មាន​អ្នក​ទិញ​ ក៏​គ្មាន​អ្នក​កាប់​ទេ»។​

​សកម្មជន​ព្រៃឡង់​រូបនេះ​បន្ថែម​ថា ​សកម្មភាព​កាប់​ព្រៃ​ទន្ទ្រាន​យក​ដី ​ក្នុង​ព្រៃឡង់ ​ក្នុង​ឃុំ​កាំងចាម​ ឃុំ​អន្លង់ជ្រៃ ​និង​ ឃុំចម្ការ​លើ​ស្រុក​ថាឡាបរិវ៉ាត់​ នៅតែ​កើត​មាន​ច្រើន ​ធ្វើឱ្យព្រៃស្រោង​ជាជម្រក​សត្វ​ព្រៃ និង​ព្រៃ​របោះ បានប្រែ​ក្លាយ​ជា​វាល​រហោឋាន​យ៉ាងឆាប់រហ័ស និង​មាន​ព្រៃ​ខ្លះ​ទៀត ត្រូវ​គេ​អារ​រំលំ​ឈើ​ទុក​ជា​គំនរ មិន​ទាន់​ដុត​បំផ្លាញ​ចោល។ លោកឱ្យដឹងថា លោកនឿយណាយ នឹងរាយការណ៍រឿងនេះ ប្រាប់អាជ្ញាធរ ព្រោះអាជ្ញាធរគ្រប់លំដាប់ថ្នាក់ ហាក់ធ្វើមិនដឹងមិនឮ ចំពោះឧក្រិដ្ឋកម្មព្រៃឈើ ក្នុងដែនអភិរក្ស។

ស្រដៀងគ្នា​នេះ សមាជិក​បណ្តាញ​សហគមន៍​ព្រៃឡង់​ខេត្តក្រចេះ​លោក ​ហ៊ឹម ​ជំនោរ​ សង្កេត​ឃើញ​ថា ​ដើមឈើ​ធំៗ​ប្រភេទ​ឈ្លីច ​និង​ ឈើទាល​ជាដើម ​ក្នុង​ព្រៃឡង់ ​នៅតែ​ទទួល​រង​ការ​កាប់​រំលំ​ ដឹក​ចូល​ការដ្ឋាន​​ក្រុមហ៊ុន​ស៊ីង​បាយ​អូថេក (​Think Biotech Cambodia) ដោយ​គ្មាន​ការ​រារាំង​។ លោក​បារម្ភ​ថា​ អាជ្ញាធរ​បើក​ដៃ​ឱ្យ​ពលរដ្ឋ​កាប់ឈើ​លក់ ​ក្នុង​ព្រៃឡង់​មុន​ពេល​បោះឆ្នោត​ នឹង​ធ្វើឱ្យ​ព្រៃឡង់​ឋិត​ក្នុង​ស្ថានភាព​គ្រោះថ្នាក់ ​បណ្តាល​ឱ្យ​ដើមឈើ​ផលិតជ័រ​ទឹក​ និងឈើ​មាន​តម្លៃ​បន្សល់​ចុងក្រោយ​វិនាស​ហិន​ហោច​៖ «វា​ចូល​ពីរ​ទៅ ​បី​ខែ​នេះ​ សម្បើម​មែន​ទែន​ គឺ​ដឹក​តាំង​ហ្វូងៗ​ សមត្ថកិច្ច​ជំនាញ​អត់​ខ្លាច​ហ្មង ​សូម្បី​តែ​អ្នក​កាសែត​ក៏​អត់​ខ្លាច​ដែរ​»។

វិទ្យុអាស៊ី​សេរី​មិនទាន់​អាច​ទាក់ទង​ មេការក្រុមហ៊ុន​ ស៊ីង​បាយ​អូ​ថេ​កលោក សំ ណូ ដើម្បី​សុំ​ការ​បំភ្លឺ​ជុំវិញ​ការ​ចោទ​ប្រកាន់​នេះ​ បាន​នៅ​ឡើយ​ទេ នៅ​ថ្ងៃ​ទី ៣១ មីនា។

ចំណែក អ្នក​នាំ​ពាក្យក្រសួងបរិស្ថាន​លោក ​នេត្រ ភក្ត្រា និងអ្នកនាំពាក្យគណបក្សប្រជាជនកម្ពុជាលោក សុខ ឥសាន  ក៏​មិន​អាច​សុំការអធិប្បាយ​បាន​ដែរ​នៅ​ថ្ងៃ​ដដែល​នេះ​។

ប៉ុន្តែលោក នេត្រ ភក្ត្រា ប្រាប់វិទ្យុអាស៊ីសេរី កាលពីខែកុម្ភៈថា បច្ចុប្បន្ន ស្ថានភាព​ព្រៃ​អភិរក្ស​មាន​ភាព​ល្អ​ប្រសើរ ដោយ​ភាព​រេចរឹល​បាន​ធ្លាក់​ចុះ។ លោកបញ្ជាក់​ថា មន្ត្រី​ឧទ្យានុរក្ស​កំពុង​បំពេញ​តួនាទី​ប្រកប​ដោយ​ការ​ទទួល​ខុស​ត្រូវ និង​វិជ្ជាជីវៈ ការពារ​ធនធាន​ធម្មជាតិ។

រីឯ​អភិបាល​ស្រុក​ថាឡាបរិវ៉ាត់ លោក ជា សារឿន បាន​ថ្លែង​ប្រាប់​ប្រជា​សហគមន៍ កាល​ពី​ខែកុម្ភៈ​ថា កុំ​ទាន់​ផ្តល់​ព័ត៌មាន​ពី​បទល្មើស​ព្រៃឈើ​ទៅ​ប្រព័ន្ធ​ផ្សព្វផ្សាយ ​ដោយ​ត្រូវ​រង់ចាំ​ការ​បោះ​ឆ្នោត​ឃុំ-សង្កាត់​រួច​រាល់​សិន។

មន្ត្រី​សម្របសម្រួល​គម្រោង​នៃ​សមាគម​បណ្ដាញ​យុវជន​កម្ពុជា (CYN) ដែល​ចុះ​អង្កេត​រឿង​នេះ គឺ​លោក អូត ឡាទីន សង្កេត​ឃើញ​ថា ​នៅពេល​ដែល​ពួកលោក ​និង​ ប្រជា​សហគមន៍​រក​ឃើញ​បទល្មើស​ព្រៃឈើ​ភ្ជាប់​ភស្តុតាង​ជាច្រើន​ ដោយ​ស្នើឱ្យ​អាជ្ញាធរ​ទប់ស្កាត់ ​អាជ្ញាធរ​ពាក់ព័ន្ធ​ តែងតែ​ឆ្លើយ​ដោះសារ​យក​រួច​ខ្លួន​ដដែលៗ ​ដោយ​គ្មាន​ការ​ស៊ើប​អង្កេត​ឡើយ។

លោក​ឆ្ងល់​ថា ​តើ​បច្ចុប្បន្ន​ក្រសួង​បរិស្ថាន ​កំពុង​ធ្វើ​កិច្ច​ការ​អ្វីខ្លះ បាន​ជា​សកម្មភាព​កាប់​ឈើ ​និង​ទន្ទ្រាន​ព្រៃ​រាន​យក​ដី ​នៅតែ​កើត​មាន​ឡើង​ដដែលៗ ​ដោយ​គ្មាន​​ដំណោះស្រាយ​៖ «យើង​មាន​ការព្រួយ​បារម្ភ​ប្រសិន​បើមន្ត្រី​រដ្ឋបាលការពារ​របស់​ក្រសួង​បរិស្ថាន​ ជាពិសេស​មន្ត្រី​ឧទ្យានុរក្ស ​មិនព្រម​យកចិត្ត​ទុក​ដាក់​អនុវត្ត​ច្បាប់ ​និង​អន្តរាគមន៍​ឱ្យ​ទាន់​ពេល​វេលា​ អាហ្នឹង​ព្រៃឡង់​បាត់បង់​។ ​ដល់​ពេល​បាត់បង់​បាន​ចេញ​មក​ស្តារ​ព្រៃឡង់​វិញ ​អាហ្នឹង​វា​ហួសពេល​ គួរតែ​ចាប់​ផ្តើម​ពី​ពេល​ហ្នឹង​ទៅ ​អត់​ទាន់​ហួស​ពេល​ទេ​»។

​ប្រជា​សហគមន៍​ព្រៃឡង់​បន្ថែម​ថា ​បច្ចុប្បន្ន​បទល្មើស​ព្រៃឈើ​ក្នុង​ព្រៃឡង់​កើត​មាន​ពីរ​ទម្រង់​ ធំៗ​ គឺ​សកម្មភាព​កាប់​ឈើ​ធំៗ​មាន​តម្លៃ ​និង ​កាប់ព្រៃ​ទន្ទ្រាន​យក​ដី ធ្វើ​ឱ្យ​ព្រៃ​ឡង់​វិនាស​ហិនហោច​។ ពួកគេ​អះអាង​ថា ​អំពើ​ពុក​រលួយ​ជា​ថ្នូរ​ឱ្យ​ជនល្មើស​រួចខ្លួន​ បាន​កា្លយជា​ទម្លាប់​ដដែលៗ ​ដោយ​គ្មាន​ដំណោះ​ស្រាយ​ទាល់​តែ​សោះ ជាច្រើន​ឆ្នាំ​មក​ហើយ។

ព្រៃ​ឡង់​ឋិត​ក្នុង​ចន្លោះ​ខែត្រ​ចំនួន​បួន ដូចជា​ខែត្រ​ក្រចេះ ស្ទឹងត្រែង ព្រះវិហារ និង​ខែត្រ​កំពង់ធំ ត្រូវ​រដ្ឋាភិបាល​ប្រកាស​បង្កើត​ជា​ដែន​ជម្រក​សត្វ​ព្រៃ​កាល​ពី​ថ្ងៃ​ទី​៩ ខែ​ឧសភា ឆ្នាំ២០១៦ មាន​ផ្ទៃដី​ជាង ៤សែន​ហិកតារ (៤៣១.៦៨៣ហិកតារ) ដែល​ឋិត​ក្រោម​ការ​គ្រប់គ្រង​របស់​ក្រសួង​បរិស្ថាន។ ប៉ុន្តែរបាយការណ៍​នានា​បង្ហាញ​ថា ព្រៃអភិរក្ស​មួយ​នេះ​បានបាត់បង់អស់ជាច្រើន​ម៉ឺនហិកតារ​ដោយ​សារ​ការកាប់បំផ្លាញព្រៃឈើ និង​ការ​ទន្ទ្រានយក​ដីធ្វើ​ជាកម្មសិទ្ធិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។