ប្រភពពីប្រជាពលរដ្ឋឱ្យដឹងថា ពេលបច្ចុប្បន្ន សកម្មភាពកាប់ឈើយកទៅលក់ដូរ និងដើម្បីរុករានយកដីកំពុងកើតមានយ៉ាងខ្លាំងនៅតំបន់ការពាររបស់សហគមន៍នៃភូមិអូរតាម៉េង ស្រុកអន្លង់វែង ខេត្តឧត្តរមានជ័យ។ ប៉ុន្តែបើទោះបីជាមានការកាប់បំផ្លាញព្រៃឈើទាំងនោះក៏ដោយ ក៏សមត្ថកិច្ចពាក់ព័ន្ធ ដូចជាអាជ្ញាធរមូលដ្ឋាន និងរដ្ឋបាលព្រៃឈើជាដើម ហាក់មិនសូវចុះទៅបង្ក្រាបទេ។
ក្រុមបណ្ដាញការពារព្រៃឈើខេត្តឧត្តរមានជ័យ អំពាវនាវឱ្យអាជ្ញាធរជួយយកចិត្តទុកដាក់ទប់ស្កាត់ការកាប់បំផ្លាញព្រៃឈើ ដែលកំពុងកើតឡើងយ៉ាងខ្លាំងនៅក្នុងតំបន់សហគមន៍ការពារព្រៃឈើចំនួន២ ក្នុងស្រុកអន្លង់វែង។
តំបន់ដែលកំពុងគំរាមកំហែងទៅលើព្រៃឈើនោះ គឺនៅក្នុងសហគមន៍សាមគ្គីសង្គ្រោះព្រៃឈើភូមិអូរតាម៉េង និងសហគមន៍ព្រៃស្រោង នៃឃុំអន្លង់វែង។
ប្រធានសហគមន៍សាមគ្គីសង្គ្រោះព្រៃឈើ ភូមិអូរតាម៉េង គឺលោក ឡេវ សែត។ លោកអះអាងកាលពីរសៀលថ្ងៃច័ន្ទ ទី២៣ ខែមីនា ថា បច្ចុប្បន្នក្រុមឈ្មួញខ្លះកំពុងលួចចូលទៅកាប់ឈើក្នុងដែនសហគមន៍របស់លោកដើម្បីយកទៅលក់ដូរ ចំណែកប្រជាពលរដ្ឋជាច្រើនទៀត ក៏នាំគ្នាសម្រុកចូលទៅកាប់បំផ្លាញព្រៃឈើ ដើម្បីរុករានយកដីធ្វើស្រែចម្ការដែរ។
លោក ឡេវ សែត បញ្ជាក់ថា រូបលោកដែលជាប្រធានសហគមន៍ការពារព្រៃឈើទីនោះ មិនអាចទប់ស្កាត់ការកាប់បំផ្លាញព្រៃឈើទាំងនោះបានទេ ប្រសិនបើអាជ្ញាធរនិងមន្ត្រីរដ្ឋបាលព្រៃឈើ មិនយកចិត្តទុកដាក់ជួយបង្ក្រាប៖ «អារឿងកាប់ឈើលក់វាម្យ៉ាងហើយ ប៉ុន្តែមិនសំខាន់ដល់ចំការទេ។ រាល់ថ្ងៃគេកាប់រានយកដី ខ្ញុំព្រួយបារម្ភណាស់ ខ្ញុំដាក់របាយការណ៍ទៅរដ្ឋបាលព្រៃឈើក៏ស្ងាត់ ដាក់ទៅអាជ្ញាធរស្រុកក៏មិនមានវិធានការអី»។
លោក ឡេវ សែត ឱ្យដឹងថា ចាប់តាំងពីឆ្នាំ២០០៤ សហគមន៍របស់លោកបានទទួលភារកិច្ចការពារព្រៃឈើទំហំជាង ៤.១០០ហិកតារពីរដ្ឋាភិបាល ក៏ប៉ុន្តែបច្ចុប្បន្នព្រៃនេះបានបាត់បង់ស្ទើរតែពាក់កណ្ដាលទៅហើយ ដោយសារតែក្រុមមនុស្សមកពីខេត្តផ្សេងៗនាំគ្នាចូលទៅកាប់រុករានយកដី។ ចំណែកឯសហគមន៍ព្រៃស្រោង ដែលមានផ្ទៃដីការពារជាង ៦.០០០ហិកតារ នៅជិតគ្នានោះ បានបាត់បង់អស់ទៅហើយ ដោយសារតែការទន្ទ្រានកាន់កាប់ធ្វើជាកម្មសិទ្ធិ។
ទោះយ៉ាងណា វិទ្យុអាស៊ីសេរីមិនអាចទាក់ទងនាយខណ្ឌរដ្ឋបាលព្រៃឈើ ខេត្តឧត្តរមានជ័យ លោក ទៀង ដាវិទ្យ និងអាជ្ញាធរពាក់ព័ន្ធខ្លះទៀត ដើម្បីសុំការពន្យល់រឿងនេះបានថា យ៉ាងណានៅឡើយ។
ប្រធានបណ្ដាញសហគមន៍ការពារព្រៃឈើ ខេត្តឧត្តរមានជ័យ លោក សារ ថ្លៃ មានប្រសាសន៍ថា កន្លងទៅលោកតែងជួយអន្តរាគមន៍ដើម្បីការពារព្រៃឈើទាំងនោះ ក៏ប៉ុន្តែពេលនេះលោកមិនមានលទ្ធភាពទៀតទេ ពីព្រោះតែបណ្ដាញសហគមន៍របស់លោកអស់មូលនិធិធ្វើសកម្មភាពទៅហើយ។
ទោះយ៉ាងណាលោក សារ ថ្លៃ បញ្ជាក់ថា អន្តរាគមន៍របស់លោកដើម្បីការពារព្រៃឈើពេលនេះ គឺមានកម្រិតដូចជាបានត្រឹមតែធ្វើរបាយការណ៍ដាក់ជូនអាជ្ញាធរប៉ុណ្ណោះ៖ «ពេលដែលរឿងរាយការណ៍រាយអីហើយ គួរតែគាត់មានវិធានការដើម្បីទប់ស្កាត់រាល់បញ្ហាដែលកើតឡើងនោះ ក៏ប៉ុន្តែវាអត់មានសោះ»។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន ធ្លាប់ប្រាប់ឱ្យដឹងថា នៅខេត្តឧត្តរមានជ័យ ទាំងមូល គឺមានសហគមន៍ការពារព្រៃឈើទាំងអស់ចំនួន១៣ ក៏ប៉ុន្តែបច្ចុប្បន្ន សហគមន៍ព្រៃឈើជាច្រើនបានរលាយខ្លួនបាត់ជាបន្តបន្ទាប់ ដោយសារតែដីសហគមន៍ខ្លះត្រូវទាហានយកធ្វើជាបន្ទាយ និងដីខ្លះទៀតត្រូវបានគេទន្ទ្រានកាន់កាប់ ហើយអាជ្ញាធរហាក់ព្រងើយកន្តើយមិនជួយការពារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។