តុលាការ​ខេត្ត​មណ្ឌលគិរី​កោះហៅ​អ្នក​ពាក់ព័ន្ធ​បទល្មើស​ព្រៃឈើ រួម​នឹង​មន្ត្រី​ជំនាញ ចំនួន ២០​នាក់

ដោយ ជី វិតា
2019-08-05
Share
​ឈើ​ក្រុមហ៊ុន វិជ្ជរី កោះញែក ត​មណ្ឌលគិរី ៦២២ ទីតាំង​ឈើ​របស់​ក្រុមហ៊ុន វិជ្ជរី ក្នុង​ស្រុក​កោះញែក ខេត្ត​មណ្ឌលគិរី ដែល​កងរាជអាវុធហត្ថ​ចាប់​បាន​កាល​ពី​អំឡុង ខែ​កក្កដា ឆ្នាំ​២០១៩២០១៩។
រូប​ពី​សកម្មជន​បរិស្ថាន

តំណាង​អយ្យការ​អម​សាលាដំបូង ខេត្ត​មណ្ឌលគិរី​បាន​កោះហៅ មន្ត្រី​ជំនាញ​រដ្ឋបាល​ព្រៃឈើ ថៅកែ​ជនជាតិ​ចិន និង​អ្នក​ពាក់ព័ន្ធ​បទល្មើស​ព្រៃឈើ​ប្រមាណ ២០​នាក់​ទៀត ឱ្យ​ចូលខ្លួន​បំភ្លឺ​នៅ​អំឡុង​ចុងខែ​សីហា​នេះ​។ សកម្មជន​បរិស្ថាន​ថា ជនសង្ស័យ​ដែល​តុលាការ​កោះហៅ និង​ឃុំខ្លួន​កន្លងមក​ទាក់ទិន​ប្រព្រឹត្ត​បទល្មើស​ព្រៃឈើ នៅ​តិច​តូច​នៅឡើយ​ទេ។

អ្នកនាំពាក្យ​សាលាដំបូង​ខេត្ត​មណ្ឌលគិរី លោក ម៉េត ប្រុស ឱ្យ​ដឹង​នៅ​ថ្ងៃ​ទី៤ សីហា ថា មក​ទល់​ពេល​នេះ តុលាការ​សម្រេច​ឃុំខ្លួន​មន្ត្រី​រដ្ឋបាល​ព្រៃឈើ ២​នាក់ ឈ្មួញ​ឈើ ៣​នាក់ និង​ជនជាតិ​ចិន ៣​នាក់​ទៀត សរុប​ទាំងអស់ ៨​នាក់​។ រីឯ​​នាយក​ដែន​ជម្រក​សត្វព្រៃ​ភ្នំ​ព្រេច លោក ហាន សុខន ត្រូវ​បាន​ដោះលែង​ឱ្យ​ស្ថិត​នៅ​ក្រៅ​ឃុំ​ក្រោម​ការ​ត្រួតពិនិត្យ​ពី​តុលាការ។ លោក​បញ្ជាក់​ថា អ្នក​ទាំងនោះ​ត្រូវ​បាន​ចៅក្រម​ឃុំខ្លួន​ជា​បណ្ដោះអាសន្ន ដើម្បី​សាកសួរ និង​ស៊ើបអង្កេត​បន្ត​ទៀត។ លោក​បន្ថែម​ថា ថ្មីៗ​នេះ​តំណាង​អយ្យការ​បាន​កោះហៅ ភាគី​ពាក់ព័ន្ធ​បទល្មើស​ព្រៃឈើ​ប្រមាណ ២០​នាក់​ទៀត ក៏ប៉ុន្តែ​លោក​មិន​បញ្ជាក់​លម្អិត​ពី ឈ្មោះ​និង​តួនាទី​ជនសង្ស័យ​ទាំង​នោះ​ទេ៖ «ឃុំខ្លួន​មន្ត្រី​រដ្ឋបាល​ព្រៃឈើ ២​នាក់ ខាង​អ្នក​រកស៊ី​ឈើ ៣​នាក់ ចិន ៣​នាក់​។ មន្ត្រី​យើង​ចោទប្រកាន់​ពី​បទ ផ្សំគំនិត ប្រមូល​ផល និង​អនុផល​ព្រៃឈើ។ ចិន​ចោទប្រកាន់​បទ​ព្រហ្មទណ្ឌ​បទ​កំហែង​យក។ ចៅក្រម​ឃុំ​បណ្ដោះអាសន្ន ដើម្បី​ធ្វើការ​ស៊ើបអង្កេត។ ២០​រូប​ទៀត ខ្ញុំ​អត់​ដឹង​ទេ ព្រោះ​គេ​អត់​ទាន់​ចូលខ្លួន​មក​បំភ្លឺ ហៅ​ហ្នឹង​ទើប​ចេញពី​អាទិត្យ​មុន​ទេ មិន​ដឹង​ហៅ​ពី​ណាខ្លះ​? ខ្ញុំ​អត់​ដឹង​ទេ»

សកម្មជន​បរិស្ថាន លោក ហេង ស្រស់ ឱ្យ​ដឹង​ថា ពួកគេ​នឹង​បន្ត​តាមដាន​យ៉ាង​យកចិត្តទុកដាក់ ពី​ប្រសិទ្ធភាព​ការងារ​របស់​តុលាការ​។ លោក​ថា ការ​ឃុំខ្លួន និង​កោះហៅ​ជនសង្ស័យ​ប្រព្រឹត្ត​បទល្មើស​ព្រៃឈើ​ទាំងនេះ នៅ​តិច​តូច​នៅឡើយ​។ លោក​ចោទ​ថា ក្រុម​ឧក្រិដ្ឋ​ព្រៃឈើ​ជាច្រើន​ទៀត ដូចជា​ឧកញ៉ា​ទ្រី ភាព ឧកញ៉ា គង់ ក្រឹង លោក សាន ចយ និង​ម្នាស់​ក្រុមហ៊ុន សំអឿន សុវណ្ណ ជាដើម នៅ​មិនទាន់​ឃើញ​តុលាការ និង​គណៈកម្មការ​ជាតិ​មាន​វិធានការ​ច្បាប់​ទៅលើ​ពួកគេ​នៅឡើយ​ទេ។ លោក​បន្ថែម​ថា ការ​អនុវត្ត​ច្បាប់​របស់​គណៈកម្មការ​ជំនាញ​មួយ​នេះ ខ្វះ​ចន្លោះ​ច្រើន ខណៈ​ដែល​ក្រុមហ៊ុន លឹម រ៉ូយ៉ាល់ (Lim Royal) របស់​ឧកញ៉ា លឹម ប៊ុណ្ណា ហៅ ខ្នា ដែល​ជាប់​ពាក់ព័ន្ធ​បទល្មើស​ព្រៃឈើ​ខ្នាត​ធំ​ជាច្រើន​ឆ្នាំ​មក​ហើយ បែរជា​ត្រូវ​រួចខ្លួន​ទៅវិញ៖ «ក្រុម​ទាំងនោះ​បើ​ទទួល​បាន​ដី​សម្បទាន​សេដ្ឋកិច្ច សុទ្ធតែ​ជា​អគ្គនាយក គាត់​ជា​ប្រធាន​ក្រុមហ៊ុន​ទាំងអស់ ហេតុ​អី​បាន​គិត​រក​ល្បិច​ដើម្បី​បំផ្លាញ​សម្បត្តិ​ធនធានធម្មជាតិ​របស់​ខ្មែរ​? យើង​គិត​ថា ចំណាត់ការ​របស់​តុលាការ​លើក​នេះ យើង​មើល​ឃើញ​ថា វា​ជា​សញ្ញា​មួយ​ដែល​ផ្ដល់​ឱ្យ ពលរដ្ឋ​ខ្មែរ​តាមដាន​ថា តើ​នរណាខ្លះ​ដែល​ជាប់​ពាក់ព័ន្ធ​ការ​កាប់​បំផ្លាញ​ព្រៃឈើ​នៅ​ប្រទេស​កម្ពុជា​? យើង​ចង់​ឃើញ គណៈកម្មការ​មួយ​នេះ គាត់​ស្រាវជ្រាវ និង​ចាប់​វ៉ៃ​ខ្នោះ​លើ ក្រុម​ឧក្រិដ្ឋជន​ទាំងនេះ ផ្ទាល់ៗ​តែម្ដង»

ឆ្លើយតប​រឿង​នេះ អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី មាន​ប្រសាសន៍​ថា គណៈកម្មការ​ជាតិ​កំពុង​ស៊ើបអង្កេត ទីតាំង​ក្រុមហ៊ុន លឹម រ៉ូយ៉ាល់ តែ​ពុំ​ទាន់​បង្ហាញ​លទ្ធផល​បែប​ណា​នៅឡើយ​ទេ​។ ចំពោះ​សំនួរ​ដែល​សួរ​ថា តើ​គណៈកម្មការ នឹង​អនុវត្ត​ច្បាប់​ចំពោះ​លោក​ឧកញ៉ា ទ្រី ភាព ដែល​ឬទេ​? អ្នកនាំពាក្យ​រូប​នេះ​ឆ្លើយ​យ៉ាង​ខ្លី​ថា សូម​ឱ្យ​សួរ​ទៅ​តំណាង​អយ្យការ​វិញ​៖ «យើង​កំពុង​ធ្វើការ​ងារ​ហ្នឹង ហើយ​ស្អែក​គណៈកម្មការ​គេ​នឹង​ចុះទៅ​មើល វាយតម្លៃ​។ អាហ្នឹង​សុំ​ឱ្យ​គាត់​សួរ​ទៅ​ខាង អយ្យការ ព្រោះ​អយ្យការ​ជា​អ្នកស៊ើប​អង្កេត»

របាយការណ៍​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃ​បង្ហាញ​ថា រយៈពេល​ពេល​ប៉ុន្មាន​ខែ​ចុងក្រោយ​នេះ គណៈកម្មការ​ជំនាញ បាន​រឹបអូស​ឈើ​ជិត ១​ម៉ឺន​ម៉ែត្រ​គូប និង​ដុត​កម្ទេច​រថយន្ត​ដែល​បម្រើ​ឱ្យ​មធ្យោបាយ​ដឹកជញ្ជូន​ឈើ​ជាង ១​រយ​គ្រឿង។ រីឯ​រថយន្ត និង​មធ្យោបាយ​ដឹកជញ្ជូន​ឈើ​មួយ​ចំនួន​ដែល​អាច​ប្រើប្រាស់​បាន​ត្រូវ​រង់ចាំ​តុលាការ​សម្រេច។

មន្ត្រី​ពង្រឹង​សិទ្ធិ​អំណាច​សហគមន៍ នៃ​សមាគម​អាដហុក (Adhoc) លោក ប៉ែន ប៊ុណ្ណារ៍ កត់សម្គាល់​ថា ពុំ​មែន​មានតែ​មនុស្ស ២០ ទៅ ៣០​នាក់​ទេ នាំ​ឱ្យ​ជំនួញ​ឈើ​ដ៏​ធំ​សម្បើម​ឆ្លងដែន​ទៅ​លក់​នៅ​ប្រទេស​វៀតណាម​បាន​ជោគជ័យ​ជាច្រើន​ឆ្នាំ​មក​ហើយ​នោះ។ លោក​សង្ស័យ​ថា មាន​ពាក់ព័ន្ធ​អាជ្ញាធរ​ពាក់ព័ន្ធ​ចាប់ពី​ថ្នាក់​ខេត្ត រហូតដល់​ថ្នាក់​ជាតិ ប្រព្រឹត្ត​អំពើពុករលួយ បទល្មើស​ឧក្រិដ្ឋ​ព្រៃឈើ ផ្ទុយ​ពី​បទ​បញ្ជា​ប្រមុខ​រដ្ឋាភិបាល​។ ហេតុនេះ​គណៈកម្មការ​ជំនាញ​ត្រូវតែ​ចាប់ខ្លួន​អ្នក​ទាំងនោះ មក​អនុវត្ត​ច្បាប់ និង​សង​ការខូចខាត​ដល់​មជ្ឈដ្ឋាន​ព្រៃឈើ​៖ «អ្នក​ដែល​ប្រព្រឹត្ត​ទាំងអស់​ហ្នឹង អ្នក​ដែល​ផ្តើម​គំនិត​ហ្នឹង ត្រូវតែ​សង​ផល ខូចខាត​នៃ​ព្រៃឈើ​ហ្នឹង ពុំ​មែន​គ្រាប់​តែ​មាន​ទោស​ហើយ រួចខ្លួន​ទេ​។ ដូច​សម្ដេច តេជោ លើកឡើង​អ៊ីចឹង មិន​ត្រឹម​នេះ​ទេ បង្កក​ទ្រព្យសម្បត្តិ​ហើយ រឹបអូស​ទ្រព្យសម្បត្តិ​ថែម​ទៀត ដើម្បី​ឆ្លើយតប​បទល្មើស​ឧក្រិដ្ឋ​របស់​ខ្លួន ដែល​ខ្លួន​ប្រព្រឹត្ត​ហ្នឹង ហើយ​ច្បាប់​ព្រៃឈើ​មាន​ចែង​ច្បាស់​មាត្រា ៩៤ បាទ»

ក្រុម​សកម្មជន​បរិស្ថាន និង​មន្ត្រី​សង្គម​ស៊ីវិល​បន្ថែម​ថា ការ​ចុះ​បង្ក្រាប​បទល្មើស​ព្រៃឈើ និង​អនុវត្ត​ច្បាប់​របស់​គណៈកម្មការ​ជាតិ នៅតែ​ខ្វះ​ចន្លោះ​ច្រើន មិន​ទាន់​ធ្វើ​ឱ្យ​ពួកគេ​ស្ងប់​អារម្មណ៍​នៅឡើយ​ទេ​។ ពួកគេ​អះអាង​ថា ក្រុមហ៊ុន​ស៊ីបាយអូថេក (Ci-Biotech Co., Ltd.) នៅ​ខេត្ត​ក្រចេះ និង​ក្រុមហ៊ុន​សំអឿន សុវណ្ណ នៅ​ខេត្ត​ព្រះវិហារ​ជាប់​ពាក់ព័ន្ធ​កាប់​បំផ្លាញ​ព្រៃឈើ​ទ្រង់ទ្រាយ​ធំ ពួកគេ​មិនទាន់​ឃើញ​គណៈកម្មការ​ជំនាញ​មួយ​នេះ​អនុវត្ត​ច្បាប់ និង​ដក​អាជ្ញាប័ណ្ណ​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល