អ្នកឃ្លាំមើលបរិស្ថានស្នើឱ្យអាជ្ញាធរស្វែងរកប្រភពប្រេង ដែលអណ្ដែតលើឆ្នេរព្រែកត្រែងខេត្តព្រះសីហនុ
2025.02.04

អ្នកឃ្លាំមើលបរិស្ថានស្នើដល់អាជ្ញាធរ ឲ្យស្វែងរកប្រភពនៃការលេចធ្លាយប្រេង ដែលអណ្ដែតលើឆ្នេរព្រែកត្រែង ដើម្បីរកអ្នកទទួលខុសត្រូវ។ ការស្នើសុំនេះ ធ្វើឡើងបន្ទាប់ពីអាជ្ញាធរពាក់ព័ន្ធ ចុះសម្អាតប្រេងប្រមាណ២ពាន់លីត្រ ដែលបានអណ្ដែតមកលើឆ្នេរព្រែកត្រែង ក្នុងខេត្តព្រះសីហនុ កាលពីដើមខែកុម្ភៈ។
អ្នកឃ្លាំមើលបញ្ហាបរិស្ថាន លើកឡើងថា ការលេចធ្លាយប្រេង នៅលើឆ្នេរព្រែកត្រែង ស្ថិតនៅក្រុងព្រះសីហនុ ខេត្តព្រះសីហនុ កាលពីពេលថ្មីៗនេះ អាចបណ្ដាលឲ្យប៉ះពាល់ដល់ជីវចម្រុះនៅក្នុងទឹក និងប្រព័ន្ធអេកូឡូស៊ី ដែលទាមទារឲ្យអាជ្ញាធរស្វែងរកប្រភព នៃការលេចធ្លាយ និងអ្នកទទួលខុសត្រូវ។
អ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង ប្រាប់វិទ្យុអាស៊ីសេរី នៅថ្ងៃទី៣ ខែកុម្ភៈថា ប្រេងឥន្ធនៈ ទោះបីប្រើប្រាស់ដោយមានបច្ចេកទេស ដូចជានៅតាមរោងចក្រ សហគ្រាស និងចំហេះពីយានយន្តក៏ដោយ ក៏នៅតែបង្កផលប៉ះពាល់ដល់បរិស្ថាន ។ លោកបន្ថែមថា ផលប៉ះពាល់ទាំងនេះ នឹងរឹតតែធ្ងន់ធ្ងរថែមទៀត នៅពេលប្រេងឥន្ធនៈ ត្រូវបានលេចធ្លាយចូលទៅក្នុងប្រភពទឹក ដែលអាចប៉ះពាល់ដល់ជីវចម្រុះ និងប្រព័ន្ធអេកូឡូស៊ី។ លោកស្នើដល់អាជ្ញាធរ ឲ្យស្វែងរកប្រភពនៃការលេចធ្លាយ ដើម្បីមកទទួលខុសត្រូវ។
លោក សេង សុខហេង៖ «ចំណុចនេះ វាមិនមែនជារឿងថ្មីទេ បើយើងមើលទៅលើភាពធ្វេសប្រហែសរបស់អ្នកដែលបានប្រព្រឹត្ត ដែលនៅក្នុងច្បាប់គឺមានយូរហើយ អ្វីដែលសំខាន់គឺរដ្ឋ និងក្រសួងដែលពាក់ព័ន្ធ អាជ្ញាធរដែលពាក់ព័ន្ធ ត្រូវរកអ្នកណា ដែលជាអ្នកបង្ក ឬអ្នកណា ដែលជាអ្នកធ្វើឲ្យមានការលេចធ្លាយ បំពុលដល់បរិស្ថាន និងធនធាននៅតំបន់ហ្នឹង មកទទួលខុសត្រូវតាមច្បាប់ ព្រោះច្បាប់មានចែងហើយអ្នកណា ដែលធ្វើឲ្យប៉ះពាល់ដល់បរិស្ថាន កម្រិតប៉ុន្មានៗ ទៅតាមច្បាប់កំណត់»។
ការស្នើសុំនេះ ធ្វើឡើងបន្ទាប់ពីមន្ត្រី នៃក្រសួងបរិស្ថាន ក្រសួងរ៉ែ និងថាមពល និងស្ថាប័នពាក់ព័ន្ធមួយចំនួនទៀត បានចុះសម្អាតឆ្នេរព្រែកត្រែង ស្ថិតនៅក្រុងព្រះសីហនុ ខេត្តព្រះសីហនុ កាលពីថ្ងៃទី១ ខែកុម្ភៈ បន្ទាប់ពីមានប្រេងប្រមាណ ២ពាន់លីត្រ បានអណ្ដែតមកលើឆ្នេរនៅតំបន់នេះ។
ក្រសួងបរិស្ថាន កាលពីថ្ងៃទី១ ខែកុម្ភៈឲ្យដឹងថា អាជ្ញាធរបានសម្អាតប្រេង ដែលអណ្ដែតនៅលើឆ្នេរព្រែកត្រែងបានប្រមាណ ៩០ភាគរយហើយ ដោយមានការចូលរួមពីក្រុមហ៊ុនប្រេងឥន្ធនៈមួយចំនួនទៀត។ ក្រសួងបរិស្ថាន ឲ្យដឹងទៀតថា ថ្នាក់ដឹកនាំក្រសួងបរិស្ថាន ស្ថាប័នពាក់ព័ន្ធ និងរដ្ឋបាលខេត្តព្រះសីហនុ បានវាយតម្លៃករណីមានប្រេងអណ្ដែតនេះថា «មិនបានប៉ះពាល់ដល់បរិស្ថាន ដែលគួរឲ្យ អំពីការសម្អាតប្រេងអណ្ដែតនៅឆ្នេរព្រែកត្រែង បាននៅឡើយទេ នៅថ្ងៃទី៣ ខែកុម្ភៈ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ អាស៊ីសេរីតាមបណ្ដាញសង្គមតេលេក្រាមថា គិតត្រឹមល្ងាចថ្ងៃទី៣ កុម្ភៈ អាជ្ញាធរបានសម្អាតប្រេង ដែលអណ្ដែតមកលើឆ្នេរព្រែកត្រែងបានប្រមាណ ៩៥ ភាគរយ ហើយស្ថានភាពឆ្នេរព្រែកត្រែង និងផ្ទៃទឹកសមុទ្រ ក៏មានភាពប្រសើរឡើងដែរ។ លោក បន្តថា អាជ្ញាធរកំពុងសម្អាតបន្តទៀត ដើម្បីធានាថា គុណភាពទឹកសមុទ្រនឹងវិលទៅរកសភាពដើមវិញ។
អ្នកនាំពាក្យរូបនេះ ស្នើសុំការយោគយល់ពីភ្ញៀវទេសចរ ដែលមានបំណងចង់ទៅកម្សាន្តនៅឆ្នេរព្រែកត្រែង អាចលេងកម្សាន្តនៅលើឆ្នេរខ្សាច់បានធម្មតា ប៉ុន្តែសូមផ្អាកចុះលេងទឹកបណ្ដោះអាសន្ន ដើម្បីឲ្យអាជ្ញាធរសម្អាតបន្ត និងចៀសវាងផលប៉ះពាល់។
ចំណែកឯ ប្រភពនៃការលេចធ្លាយ លោកថា ក្រសួងបរិស្ថាន និងក្រសួងរ៉ែ និងថាមពល កំពុងធ្វើការបន្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។