ពលរដ្ឋ​ថា អាជីវកម្ម​រ៉ែ​មាស​ក្រុមហ៊ុន​ចិន​ក្នុង​ខេត្ត​កំពង់ធំ​បំផ្លាញ​ធនធាន​ធម្មជាតិ

ដោយ មាន ឫទ្ធិ
2024.05.15
ពលរដ្ឋ​ថា អាជីវកម្ម​រ៉ែ​មាស​ក្រុមហ៊ុន​ចិន​ក្នុង​ខេត្ត​កំពង់ធំ​បំផ្លាញ​ធនធាន​ធម្មជាតិ ទិដ្ឋភាពអាជីវកម្មរ៉ែមាស តំបន់ភ្នំជី ដែនជម្រកសត្វព្រៃឡង់ ក្នុងខេត្តកំពង់ធំ កាលពីខែកុម្ភៈ ២០២៣។
រូប៖ មន្ត្រីអង្គការ CYN ផ្តល់ឲ្យ

ក្រុមហ៊ុន​ចិន និង​បុគ្គល​មាន​លុយ​មានអំណាច​មួយ​ចំនួន​ទៀត​កំពុង​ដណ្តើម​គ្នា​ទាញ​យក​រ៉ែ​មាស​យ៉ាង​គគ្រឹកគគ្រេង​ក្នុង​តំបន់​ព្រៃ​ឡង់​ខេត្តកំពង់ធំ ជាប់​ព្រំប្រទល់​ខេត្តក្រចេះ។ ពលរដ្ឋ​រស់នៅ​ក្បែរ​តំបន់​នោះ​អះអាង​ថា អាជីវកម្ម​រ៉ែ​មាស​ទ្រង់ទ្រាយ​ធំ​នេះ​កំពុង​បំផ្លាញ​ធនធានធម្មជាតិ​កាន់តែ​រីកធំឡើង។

សកម្មភាព​ធ្វើ​អាជីវកម្ម​រ៉ែ​មាស​ទ្រង់ទ្រាយ​ធំ ពី​សំណាក់​ក្រុមហ៊ុន​ចិន និង​បុគ្គល​មាន​លុយ​មានអំណាច នៅតែ​កើតមាន​ច្រើន បើ​ទោះបី​ជា​ក្រសួង​ប្ដេជ្ញា ទប់ស្កាត់​អាជីវកម្ម​រ៉ែ​មាស​ខុសច្បាប់​ជា​ថ្មី​ទៀត​ក៏ដោយ។

ពលរដ្ឋ​ដែល​បាន​ចុះ​ដល់ទី​តាំង​អាជីវកម្ម​រ៉ែ​មាស​ក្នុង​តំបន់​ស្នងអន តំបន់​អូរផ្អាវ និង​តំបន់​ភ្នំ​ជី ក្នុង​ស្រុក​សណ្ដាន់ ខេត្ត​កំពង់ធំ ជាប់​ព្រំប្រទល់​ខេត្តក្រចេះ​អះអាង​ថា ពួកគាត់​បានឮ​សំឡេង​ម៉ាស៊ីន និង​គ្រឿងចក្រ​ជាច្រើន​គ្រឿង កំពុង​មមាញឹក​ចម្រាស​មាស ដោយមាន​សន្តិសុខ​យាមល្បាត យ៉ាង​ប្រុងប្រយ័ត្ន។

សកម្មជន​ការពារ​ព្រៃ​ឡង់​ខេត្តក្រចេះ​លោក ស្វាយ សុង ប្រាប់​វិទ្យុ​អាស៊ីសេរី នៅ​ថ្ងៃទី១៤ ឧសភា ថា អាជីវកម្ម​រ៉ែ​មាស​ទាំងនេះ បង្កប់​ភាព​មិន​ប្រក្រតី​ច្រើន ដោយ​លាក់បាំង​ព័ត៌មាន មិន​បាន​ផ្សព្វផ្សាយ​ឱ្យ​បាន​ទូលំទូលាយ និង​បំផ្លាញ​ធនធាន​ធម្មជាតិ ក្នុង​តំបន់​ដែន​ជម្រក​សត្វព្រៃ​ឡង់។

លោក​ថា តំបន់​ជើងភ្នំ​ជី មាន​ទេសភាព​ស្រស់​ស្អាត​ទាក់ទាញ​ភ្ញៀវ​ទេសចរ កំពុង​ប្រឈម​ការ​បាត់បង់​រូបរាង ហើយ​ថ្មភ្នំ​មួយ​ចំនួន កំពុង​ទទួល​រង​ការ​បំផ្លាញ ដើម្បី​ទាញ​យក​រ៉ែ​ធ្វើ​អាជីវកម្ម។

លោក ស្វាយ សុង៖ «ខ្ញុំ​ជិះ​ទៅ​ឃើញ នឹក​ឃើញ​ថា សម្បត្តិ​ជាតិ​អើយ បើ​គ្រប់គ្រង​ល្អ​មិន​ខ្វះ​ទេ រ៉ែ​នៅ​ភ្នំ​ជីវា​ពិសេស​ពិសាល​ណាស់ សម្បត្តិ​ជាតិ ធ្វើ​អ្វីមួយ បាន​ដល់ដៃ​ពលរដ្ឋ​ផង និង​រដ្ឋាភិបាល​ផង​។ ក្នុងនាម​យើង​ពលរដ្ឋ​ត្រូវ​ដឹង»

កាលពី​ចុងខែ​មីនា ឆ្នាំ​២០២០ ក្រុមហ៊ុន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) ទទួល​បាន​អាជ្ញាប័ណ្ណ រុករក​រ៉ែ​លោហធាតុ ពី​រដ្ឋាភិបាល ដែល​មាន​ផ្ទៃដី​ជាង​១​ម៉ឺន ៥​ពាន់ (១៥.១០០) ហិកតារ ស្ថិត​នៅ​ឃុំ​សុចិត្រ ស្រុក​សណ្ដាន់ ខេត្ត​កំពង់ធំ ខាងត្បូង​នៃ​ដែន​ជម្រក​សត្វ​ព្រៃឡង់។

មក​ទល់​ពេល​នេះ​ជាង ៤​ឆ្នាំ​មក​ហើយ ដែល​ក្រុមហ៊ុន​ចិន និង​បុគ្គល​មាន​លុយ​មាន​អំណាច​សម្រុក​ចូល​ទៅ​ធ្វើ​អាជីវកម្ម​រ៉ែ​មាស ក្នុង​តំបន់​នោះ ក៏ប៉ុន្តែ​ពលរដ្ឋ​អះអាង​ថា នៅ​មិន​ទាន់​ឃើញ​ថា ក្រុមហ៊ុន​នេះ​បង្ហាញ​អាជ្ញាប័ណ្ណ​ធ្វើ​អាជីវកម្ម​រ៉ែ​មាស​នៅ​ឡើយ​ទេ ប៉ុន្តែ​មាន​អាជ្ញាប័ណ្ណ​រុករក។

ពលរដ្ឋ​រស់នៅ​ក្បែរ​តំបន់​នោះ ក្នុង​ឃុំ​សុចិត្រ ខេត្ត​កំពង់ធំ លោកស្រី ចាន់ សុរិយា សង្កេត​ឃើញ​ថា បច្ចុប្បន្ន​មាន​ជនជាតិ​ចិន​កាន់តែ​ច្រើនឡើង សម្រុក​ទៅ​តំបន់​នោះ ដោយមាន​រថយន្ត និង​គ្រឿងចក្រ​ជាច្រើន​គ្រឿង បើក​ចេញចូល ក្នុង​តំបន់​រ៉ែ​មាស​។ រីឯ​សកម្មភាព​ឈូស​ឆាយ​ពង្រីក​ផ្លូវ​ចូល​ទៅ តំបន់​រ៉ែ​មាស កាន់តែ​ច្រើនឡើង​ដែរ។

លោកស្រី ចាន់ សុរិយា៖ «ជន​ជាតិចិន​កាន់តែ​ច្រើន​ទៅ ហើយ​ផ្លូវ​ក៏​រឹតតែ​ធ្វើ​គ្រប់កន្លែង​ដែរ មិនមែន​ទ្រង់ទ្រាយ​តូចតាច​ទេ ទ្រង់ទ្រាយ​ធំ​តែម្តង»

វិទ្យុ​អាស៊ីសេរី​មិនទាន់​អាច​ទាក់ទង សុំ​ការ​បំភ្លឺ​រឿង​នេះ​ពី​រដ្ឋមន្ត្រីក្រសួង​រ៉ែ​និង​ថាមពល លោក កែវ រតនៈ និង​រដ្ឋមន្ត្រី​ក្រសួង​បរិស្ថាន លោក អ៊ាង សុផល្លែត បាន​នៅឡើយ​ទេ នៅ​ថ្ងៃទី ១៤ ឧសភា​។​

រីឯ​តំណាង ក្រុមហ៊ុន​ចិន ឡេតចេងម៉ាញនីង ក៏​វិទ្យុ​អាស៊ីសេរី​មិនទាន់​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

កាលពី​ថ្ងៃទី៤ ឧសភា ក្រសួង​រ៉ែ​បាន​ចេញ​សេចក្តី​ប្រកាស​ព័ត៌មាន​មួយ​ឱ្យ​ដឹង​ថា ក្រសួង​នឹង​បញ្ចប់​សកម្មភាព​ធ្វើ​អាជីវកម្ម​រ៉ែ​ខុសច្បាប់​បែប​អនាធិបតេយ្យ ជំរុញ​ការ​ធ្វើ​អាជីវកម្ម​រ៉ែ​ស្របច្បាប់​ឡើងវិញ ដើម្បី​ទាញ​ចំណូល​ចូលជាតិ និង​ទប់ស្កាត់​ផល​ប៉ះពាល់​ដល់​បរិស្ថាន​។ ក្រសួង​រក​ឃើញ​ថា អាជីវកម្ម​រ៉ែ​មាស​បាន​កើតមានឡើង​យ៉ាង​អនាធិបតេយ្យ និង​ប្រើប្រាស់​សារធាតុ​គីមី រំសេវ​ជាតិ​ផ្ទុះ និង​ជីក​អណ្តូង​ក្រោម​ដី​យ៉ាង​ជ្រៅ ដោយ​គ្មាន​បច្ចេកទេស​ត្រឹមត្រូវ។

ជុំវិញ​រឿង​នេះ មន្ត្រី​ពង្រឹង​សិទ្ធិអំណាច​សហគមន៍​មូលដ្ឋាន​នៃ​សមាគម​អាដហុក លោក ប៉ែន ប៊ុណ្ណារ៍ សង្កេត​ឃើញ​ថា ក្រុមហ៊ុន​ឯកជន​ខ្លះ​គ្មាន​អាជ្ញាប័ណ្ណ​ធ្វើ​អាជីវកម្ម​រ៉ែ​មាស ក៏ប៉ុន្តែ​សកម្មភាព​បំផ្លាញ​បរិស្ថាន បាន​ឈាន​ដល់​កម្រិត​ធ្ងន់ធ្ងរ ធ្វើ​ឱ្យ​រដ្ឋ​ខាតបង់​ចំណូល​ពន្ធ និង​ប៉ះពាល់​បរិស្ថាន​។ លោក​ថា បញ្ហា​នេះ​កើតមានឡើង​ដដែលៗ​ច្រើន​ឆ្នាំ​មក​ហើយ។

លោក ប៉ែន ប៊ុណ្ណារ៍៖ «កន្លែង​ណា​មាន​រ៉ែ​មាស និង​រ៉ែ​ត្បូង​អំពើ​ខុសច្បាប់ មន្ត្រី​ទុច្ចរិត​និង​ឧកញ៉ា​ទុច្ចរិត ទាំង​ឈើ​ទាំង​អីហ្នឹង វា​បំផ្លាញ​ធនធាន​ធម្មជាតិ​ដែរ»

មន្ត្រី​សង្គម​ស៊ីវិល​រូប​នេះ ស្នើ​ឱ្យ​រដ្ឋាភិបាល​ត្រូវ​បង្ហាញ​ព័ត៌មាន​ឱ្យ​គ្រប់​ជ្រុងជ្រោយ និង​តម្លាភាព ពី​អាជីវកម្ម​រ៉ែ​មាស នៅ​តំបន់​នោះ​ដើម្បី​ធានា​ពី​សុវត្ថិភាព​សម្បត្តិ​ជាតិ ត្រូវ​ការពារ​ឱ្យ​បាន​ត្រឹមត្រូវ បើ​ពុំ​ដូច្នេះ​ទេ ពលរដ្ឋ​នៅតែ​សង្ស័យ​ថា អាជីវកម្ម​រ៉ែ​មាស​ទាំងនេះ​ខុសច្បាប់ កេងប្រវ័ញ្ច​ភោគទ្រព្យ​ជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។