ប្រជា​សហគមន៍​ព្រៃឡង់​ថា អាជ្ញាធរ​មិន​អើ​ពើ​ទប់ស្កាត់​បទល្មើស​ព្រៃឡង់​កំពុង​កើន​ឡើង​ច្រើន​ នៅ​ខេត្ត​ស្ទឹងត្រែង

ដោយ ខែ សុណង
2022.01.12
Share on WhatsApp
Share on WhatsApp
ប្រជា​សហគមន៍​ព្រៃឡង់​ថា អាជ្ញាធរ​មិន​អើ​ពើ​ទប់ស្កាត់​បទល្មើស​ព្រៃឡង់​កំពុង​កើន​ឡើង​ច្រើន​ នៅ​ខេត្ត​ស្ទឹងត្រែង ស្ថានភាពការកាប់ព្រៃឈើ ក្នុងតំបន់សហគមន៍ភូមិឈើទាលគ្រឹះ ជាប់ព្រៃឡង់ ក្នុងស្រុកថាឡាបរិវ៉ាត់ ខេត្តស្ទឹងត្រែង កាលពីថ្ងៃទី៣០ ខែកក្កដា ឆ្នាំ២០២១។
រូប៖ សហគមន៍ព្រៃឡង់

ប្រជា​សហគមន៍​ព្រៃឡង់​ខេត្តស្ទឹងត្រែង​អះអាង​ថា បទល្មើស​ព្រៃឈើ ​ឋិត​ក្នុង​ដែន​ជម្រក​សត្វ​ព្រៃឡង់​កំពុង​កើន​ឡើង​ច្រើន​ នៅ​រយៈពេល​ជាង ១ ខែចុង​ក្រោយ​នេះ ដោយ​មាន​គោយន្ត​ និង​រថយន្ត​ដឹក​ឈើ​រាប់​សិប​គ្រឿង នាំ​ឈើ​ចេញ​ពី​ព្រៃអភិរក្ស ដោយ​គ្មាន​អាជ្ញាធរ​ណា​ទប់ស្កាត់​នោះ​ទេ។

សមាជិក​សហគមន៍​ការពារ​ព្រៃឡង់​លោក គង់ រី ប្រាប់​វិទ្យុ​អាស៊ីសេរី នៅថ្ងៃទី​១២ ខែមករា​ថា គ្រាន់​តែ​ផ្លូវ​មួយ​ច្រក ចូល​ព្រៃ​ឡង់​ ក្នុង​ភូមិ​កេះ ក្នុង​ឃុំកាំងចាម ស្រុកថា​ឡាបរិវ៉ាត់​មាន​គោយន្ត​មិន​ក្រោម​ ៣០​គ្រឿង ក្នុង​មួយ​ថ្ងៃៗ ដឹកឈើ​មូល​ធំៗ ចេញ​ពី​ព្រៃឡង់ ដើម្បី​ធ្វើ​អាជីវកម្ម។ លោក​បន្តថា​ មន្ត្រី​ជំនាញ​រដ្ឋបាល​ព្រៃឈើ និង​មន្ត្រីបរិស្ថាន នៅតែមិន​អើពើ​ទប់ស្កាត់​បទល្មើស​ព្រៃឈើ​ទាំង​នេះ បើ​ទោះ​បី​ជា ប្រជាសហគមន៍​ផ្តល់​ព័ត៌មាន​ជាច្រើន​ដងក្តី។ លោកបញ្ជាក់​ថា អាជ្ញាធរ​ភូមិ​ខ្លះ បាន​ក្លាយ​ជា​ឈ្មួញ​ទិញឈើ​ខុសច្បាប់ ដឹកជញ្ជូន​ចេញ​ពីដែន​ជម្រ​ក​សត្វព្រៃឡង់៖ «សកម្មភាព​រាល់​ថ្ងៃនេះវា​ខ្លាំង​ជាង​រាល់​ថ្ងៃ ពី​ព្រោះ​ឥលូវ​យើង​ប្តឹង​ទៅ​នរណា ក៏​គេ​អត់​ធ្វើការ​ឱ្យ​យើង​ដែរ មាន​ទាំង​មេប៉ុស្តិ៍ និង​មន្ត្រី​រដ្ឋបាល​ព្រៃឈើ​ស្រុក​ក៏​ដោយ ឆ្លើយ​ដោះ​សារ​ថា ឈើ​ហ្នឹង​តិច​តូច។ យើង​មិន​ដឹង​ទៅ​ពឹង​នរណា ឥលូវ​ឡាន​ដឹកទាំង​ថ្​ងៃទៀត។

ប្រធាន​មន្ទីរបរិស្ថាន ខេត្តស្ទឹងត្រែង លោក អេង ភីរុង បដិសេធ​មិន​បំភ្លឺរឿង​នេះ​ទេ ដោយ​លោក​ថា លោក​មិន​បាន​ធ្វើការ​ក្នុង​ការិយាល័យ​ទេ។ រីឯនាយ​ផ្នែក​រដ្ឋបាល​ព្រៃឈើ ស្រុកថាឡាបរិវ៉ាត់ លោក វ៉ា សុខា ក៏បដិសេធ​មិន​បំភ្លឺ​រឿង​នេះ​ដែរ ដោយ​លោកថា​ កំពុងជាប់រវល់។

ប្រជាសហគមន៍​ការពារ​ព្រៃឡង់ ចាត់ទុក​បទល្មើស​ព្រៃឈើ​ខ្នាតធំ​នេះ​ កំពុង​ឋិត​ក្នុង​ភាព​ប្រកាស​អាសន្ន​មួយ ព្រោះ​អាជ្ញាធរគ្រប់​ស្ថាប័ន កំពុង​បិទ​ភ្នែក​ធ្វើមិនដឹងឮ ទប់ស្កាត់ឧក្រិដ្ឋកម្មព្រៃឈើទាំងនេះ ទាល់តែសោះ។ រីឯក្រុម​ជន​ល្មើស នៅតែយករណាយន្ត ចូលអារឈើក្នុងព្រៃឡង់តាមចិត្ត ធ្វើឱ្យព្រៃអភិរក្សមួយនេះ ប្រឈមបាត់បង់ធ្ងន់ធ្ងរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល